“Kapitulo 5: Gamita ang Gahom sa Basahon ni Mormon,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Kapitulo 5,” Isangyaw ang Akong Ebanghelyo
Kapitulo 5
Gamita ang Gahom sa Basahon ni Mormon
Hunahunaa Kini
-
Sa unsa nga paagi nga ang Basahon ni Mormon mao ang sukaranang bato sa atong relihiyon?
-
Ngano nga ang Basahon ni Mormon gamhanan kaayo diha sa proseso sa pagkabig?
-
Unsa ang gitudlo sa Basahon ni Mormon mahitungod ni Jesukristo?
-
Unsaon nako paggamit ang Basahon ni Mormon nga makapalig-on sa pagtuo ug makatabang sa uban nga mapaduol sa Dios?
-
Sa unsang paagi ang Basahon ni Mormon makatubag sa mahinungdanong mga pangutana sa kinabuhi?
-
Unsaon nako sa pagtabang ang mga tawo nga mobasa ug makabaton og usa ka pagpamatuod sa Basahon ni Mormon?
Ang Basahon ni Mormon, inubanan sa Espiritu, mao ang imong labing gamhanan nga kapanguhaan sa pagkabig. Kini nga basahon mao ang usa ka karaan, sagrado nga rekord nga gisulat aron sa pagkombinser sa tanang tawo nga si Jesus mao ang Kristo (tan-awa sa ulohan nga pahina sa Basahon ni Mormon). Sama sa giingon diha sa ubos nga ulohan, ang Basahon ni Mormon mao ang “lain nga tugon ni Jesukristo.” Kini usab makapadasig nga ebidensya nga ang Dios mitawag ni Joseph Smith isip usa ka propeta ug mipahiuli sa ebanghelyo ni Jesukristo pinaagi kaniya.
Ang Basahon ni Mormon Mao ang Sukaranang Bato sa Atong Relihiyon
Si Propeta Joseph Smith nagtudlo nga ang Basahon ni Mormon mao ang “sukaranan sa atong tinuohan” (pasiuna sa Basahon ni Mormon). Sa laing okasyon siya miingon: “Kuhaa ang Basahon ni Mormon ug ang mga pagpadayag, ug asa na man ang atong relihiyon? Wala kita’y relihiyon” (Mga Pagtulun-an sa mga Presidente sa Simbahan [2007], 233).
Ang usa ka arko usa ka lig-on nga estraktura sa arkitektura nga hinimo gikan sa mga piraso nga may pagkatrayanggulo ang porma nga nagkatakdo sa usag usa. Ang tunga-tungang piraso, o ang sukaranang bato, sa kasagaran mas dako sa ubang mga trayanggulo ug maoy makapalig-on sa ubang mga bato.
Si Presidente Ezra Taft Benson miingon nga ang Basahon ni Mormon mao ang sukaranang bato sa tulo ka paagi:
Saksi ni Kristo. “Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahom ug katataw.”
Kahingpitan sa doktrina. “Ang Ginoo Mismo nagpahayag nga ang Basahon ni Mormon naglangkob sa ‘kahingpitan sa ebanghelyo ni Jesukristo’ [Doktrina ug mga Pakigsaad 20:9; 27:5]. … Diha sa Basahon ni Mormon atong makit-an ang kahingpitan sa [doktrina] nga gikinahanglan sa atong kaluwasan. Ug gitudlo [kini] sa sayon ug sa yano nga paagi aron bisan ang mga bata makakat-on sa mga pamaagi sa kaluwasan ug kahimayaan.”
Pundasyon sa pagpamatuod. “Sama nga ang arko malumpag kon tangtangon ang sukaranang bato, mao usab ang tanan diha sa Simbahan mobarog o mapukan uban sa kamatuoran sa Basahon ni Mormon. … Kon ang Basahon ni Mormon tinuod … ang tawo kinahanglan nga modawat sa mga pag-angkon sa Pagpahiuli.” (Mga Pagtulun-an sa mga Presidente sa Simbahan: Ezra Taft Benson: Ezra Taft Benson [2014], 154, 156, 153.)
Pinaagi sa pag-angkon og usa ka pagpamatuod nga ang Basahon ni Mormon mao ang pulong sa Dios, kita makahibalo nga si Joseph Smith usa ka propeta. Pinaagi kaniya, ang awtoridad sa pagkapari sa Dios gipahiuli pinaagi sa langitnong mga mensahero. Ang Dios usab mihatag og katungod ni Joseph sa pag-organisar sa Simbahan ni Jesukristo. Ang pagpadayag nagpadayon karon pinaagi sa buhi nga mga propeta.
Ang Basahon ni Mormon Mahinungdanon sa Personal nga Pagkakabig
Usa ka mahinungdanong bahin sa pagkakabig mao ang pagdawat og usa ka pagsaksi pinaagi sa gahom sa Espiritu Santo nga ang Basahon ni Mormon tinuod. Samtang ikaw sinsero nga magbasa ug magtuon niini, imong mabati nga ang mga pulong niini mopalambo sa imong kalag. Ang mga pulong niini mopalugway sa imong salabotan sa kinabuhi, sa plano sa Dios, ug ni Jesukristo (tan-awa sa Alma 32:28). Pag-ampo mahitungod sa basahon uban sa tinuod nga katuyoan ug hugot nga pagtuo ni Kristo. Kon imong buhaton, imong madawat ang usa ka pagsaksi pinaagi sa Espiritu Santo nga kini mao ang pulong sa Dios (tan-awa sa Moroni 10:4–5).
Ang imong kaugalingong pagpamatuod sa Basahon ni Mormon magtultol ngadto sa lawom ug makanunayon nga hugot nga pagtuo sa gahom niini sa pagtabang sa uban nga makabig. Tabangi ang mga tawo nga imong tudloan nga moila sa paglamdag nga ilang bation samtang sila sinsero nga mobasa niini. Ipasabot ang kagamhanan sa pagsaksi niini kabahin ni Jesukristo. Awhaga sila sa pag-ampo aron makadawat sa ilang kaugalingong pagsaksi nga ang basahon tinuod.
Ang pag-awhag sa mga tawo sa pagtinguha og pagsaksi gikan sa Espiritu Santo mahitungod sa Basahon ni Mormon kinahanglan mahimong mao ang mahinungdanon nga tutokan sa imong pagtudlo. Ang Basahon ni Mormon makausab sa ilang kinabuhi hangtod sa kahangtoran.
Gamita ang Basahon ni Mormon sa Pagtudlo sa Ebanghelyo ni Jesukristo
Si Propeta Joseph Smith miingon “Ang Basahon ni Mormon [mao] ang labing tukma sa bisan hain nga basahon dinhi sa yuta” (pasiuna sa Basahon ni Mormon). Kini nagpamatuod ni Kristo ug yano nga nagtudlo sa Iyang doktrina (tan-awa sa 2 Nephi 31; 32:1–6; 3 Nephi 11:31–39; 27:13–22). Kini nagtudlo sa kahingpitan sa Iyang ebanghelyo. Ang unang baroganan ug mga ordinansa sa ebanghelyo sumala sa gitudlo diha sa Basahon ni Mormon mao ang dalan ngadto sa usa ka buhong nga kinabuhi.
Gamita ang Basahon ni Mormon isip ang imong nag-unang kapanguhaan alang sa pagtudlo sa gipahiuli nga ebanghelyo. Ang mosunod nga tsart naglista sa pipila sa mga kamatuoran diha sa Basahon ni Mormon nga imong itudlo.
|
Misyonaryo nga Leksiyon sa Kapitulo 3 |
Doktrina |
Mga Pakisayran |
|---|---|---|
Misyonaryo nga Leksiyon sa Kapitulo 3 Ang Mensahe sa Pagpahiuli sa Ebanghelyo ni Jesukristo | Doktrina Ang kinaiyahan sa Dios, ang pangalagad sa Manluluwas ug Pag-ula, ang pagbiya sa kamatuoran, Pagpahiuli, Joseph Smith, awtoridad | Mga Pakisayran |
Misyonaryo nga Leksiyon sa Kapitulo 3 Ang Plano sa Langitnong Amahan sa Kaluwasan | Doktrina Ang “mahinungdanon nga plano sa Dios sa Kahangtoran,” lakip na ang Pagkapukan ni Adan ug ni Eva, ang Pag-ula ni Jesukristo, ang Pagkabanhaw, ug ang Paghukom | Mga Pakisayran |
Misyonaryo nga Leksiyon sa Kapitulo 3 Ang Ebanghelyo ni Jesukristo | Doktrina Hugot nga pagtuo diha ni Kristo, paghinulsol, bunyag, ang gasa sa Espiritu Santo, ug paglahutay hangtod sa kataposan | Mga Pakisayran |
Misyonaryo nga Leksiyon sa Kapitulo 3 Pagkahimong mga Disipulo ni Jesukristo sa Tibuok Kinabuhi | Doktrina Mga ordinansa sama sa bunyag, ordinasyon sa pagkapari, ug ang sakramento | Mga Pakisayran |
Pagtuon sa Kasulatan
Unsay gisulti sa Manluluwas mahitungod sa Basahon ni Mormon?
Ang Basahon ni Mormon Nagpamatuod ni Kristo
Ang sentro nga katuyoan sa Basahon ni Mormon mao ang pagpamatuod ni Jesukristo. Kini nagmatuod sa kamatuoran sa Iyang kinabuhi, misyon, pagkabanhaw, ug gahom. Nagtudlo kini sa tinuod nga doktrina mahitungod ni Kristo ug sa Iyang Pag-ula.
Daghan sa mga propeta kansang mga sinulat gipreserbar diha sa Basahon ni Mormon nakakita mismo ni Kristo. Ang igsoong lalaki ni Jared, si Nephi, ug si Jacob nakakita sa wala pa matawo dinhi sa yuta nga Kristo. Dakong pundok sa katawhan mitambong atol sa pangalagad sa Manluluwas taliwala sa mga Nephite (tan-awa sa 3 Nephi 11–28). Sa kaulahian, si Mormon ug Moroni nakakita sa nabanhaw nga Kristo (tan-awa sa Mormon 1:15; Ether 12:39).
Samtang ang mga tawo mobasa ug mag-ampo mahitungod sa Basahon ni Mormon, mas makaila sila og maayo sa Manluluwas ug makasinati sa Iyang gugma. Sila molambo sa ilang pagpamatuod diha Kaniya. Ilang mahibaloan kon unsaon pagduol ngadto Kaniya ug mahimong maluwas. (Tan-awa sa 1 Nephi 15:14–15.)
“Ang Basahon ni Mormon naghatag sa kahingpitan sa labing masaligon nga pagsabot sa Pag-ula ni Jesukristo nga makaplagan bisan asa. Nagtudlo kini unsa gayod ang gipasabot sa pagpakatawo og usab. … Makahibalo kita nganong anaa kita dinhi sa yuta. Kini ug ang ubang kamatuoran mas impluwensyal ug maagnihong gitudlo diha sa Basahon ni Mormon kay sa bisan unsang libro. Ang hingpit nga gahom sa ebanghelyo ni Jesukristo anaa sa Basahon ni Mormon” (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 62).
Personal nga Pagtuon
Sa tibuok nimo nga misyon, isulat ang mga tubag sa mosunod nga mga pangutana sa imong journal sa pagtuon:
-
Unsa ang imong nakat-onan mahitungod ni Jesukristo gikan sa imong pagtuon sa Basahon ni Mormon?
-
Sa unsang paagi nga ang imong pagtuon sa Basahon ni Mormon makaimpluwensya sa imong pagpamatuod ni Jesukristo?
-
Unsaon nimo sa paggamit ang Basahon ni Mormon aron makatabang nga mapalig-on ang mga tawo sa ilang mga pagpamatuod?
Pagtuon sa Kasulatan
Unsa ang mga rason nga gihatag sa mga propeta sa Basahon ni Mormon sa pagsulat sa ilang mga rekord?
Personal nga Pagtuon o Pagtuon uban sa Kompanyon
Ang Basahon ni Mormon gisulat “sa pagpamatuod ngadto sa [tanang tawo] nga si Jesus mao ang Kristo” (ulohan nga pahina sa Basahon ni Mormon). Ang mosunod nga table naglista sa pipila sa kapitulo sa Basahon ni Mormon nga nagpamatuod sa kinabuhi, mga pagtulon-an, ug pangalagad ni Jesukristo. Pilia ang mga pahina nga pagatun-an sa tibuok nimong misyon.
Agig dugang, hunahunaa ang mahitungod sa mga panginahanglan sa mga tawo nga imong gitudloan. Paghimo og mga plano sa pagbasa og pipila niining mga tudling uban kanila aron mapalig-on ang ilang kahibalo ug pagpamatuod sa Manluluwas.
|
Ulohan nga pahina ug pasiuna |
Naghatag og katin-awan sa katuyoan sa basahon. |
|
Si Lehi ug si Nephi nagpamatuod sa Manluluwas. | |
|
Si Lehi ug si Jacob nagpamatuod ni Jesukristo ug sa Iyang Pag-ula. | |
|
Si Nephi nagtudlo sa doktrina ni Kristo. | |
|
Si Hari Benjamin nagpamatuod ni Kristo. | |
|
Si Alma nagpamatuod sa Manluluwas. | |
|
Si Alma nakasinati sa maulaon nga gahom ni Kristo. | |
|
Ang Manluluwas nag-imbitar sa mga tawo sa pagduol Kaniya. | |
|
Ang Manluluwas nagtudlo sa mga Nephite mahitungod sa Amahan ug sa Iyang doktrina. | |
|
Ang Manluluwas nagtudlo sa Iyang ebanghelyo. | |
|
Si Ether ug si Moroni nagtudlo nga ang hugot nga pagtuo diha ni Jesukristo mao ang usa ka baroganan sa paglihok ug sa gahom. | |
|
Si Mormon nagtudlo mahitungod sa gugmang putli ni Kristo ug sa Iyang Pag-ula. | |
|
Si Moroni nag-imbitar sa tanan sa pagduol ngadto ni Kristo ug mamahimong hingpit diha Kaniya. |
Ang Basahon ni Mormon Nagtabang Kanato nga mas Maduol ngadto sa Dios
Mahitungod sa Basahon ni Mormon, si Propeta Joseph Smith miingon nga “ang tawo labing mahiduol sa Dios pinaagi sa pagsunod sa iyang mga lagda, kay sa bisan hain nga basahon” (pasiuna sa Basahon ni Mormon). Pinaagi sa makanunayong pagtudlo ug pagdapit sa mga tawo sa pagsunod sa mga baroganan nga anaa sa Basahon ni Mormon, nagtabang kamo nila nga makapalambo og hugot nga pagtuo ni Jesukristo ug makapaduol ngadto sa Dios.
Ang Basahon ni Mormon mopalig-on sa pagpamatuod ug mag-imbitar og personal nga pagpadayag. Gamita ang Basahon ni Mormon sa pagtabang sa mga tawo nga makaangkon og espirituhanong mga kasinatian, ilabi na sa pagsaksi gikan sa Espiritu Santo nga ang basahon mismo tinuod pulong sa Dios.
Hatagi og prayoridad ang mga tudling sa Basahon ni Mormon kon kamo magtudlo. Kini adunay gahom nga makapakabig pinaagi sa Espiritu Santo. Kon kamo magtudlo sa ebanghelyo gamit ang Basahon ni Mormon, ang inyong pagtudlo molanog uban sa gahom ug katin-aw diha sa kasingkasing ug hunahuna.
Si Presidente Gordon B. Hinckley nagtudlo nga “kadtong kinsa mainampoon nga nakabasa [sa Basahon ni Mormon], maadunahan man o kabos, makinaadmanon o dili makinaadmanon, milambo ubos sa gahom niini.” Siya midugang pagsulti:
Sa walay pagpanagana ako mosaad kaninyo nga kon mainampoon kamong mobasa sa Basahon ni Mormon, nga dili igsapayan kon kapila na ninyo kini nabasa, moabot diha sa inyong kasingkasing ang dugang nga pagbati sa Espiritu sa Ginoo. Adunay moabot nga usa ka gipalig-on nga resolusyon sa pagsunod sa iyang mga sugo, ug moabot ang mas lig-on nga pagpamatuod sa buhing kamatuoran sa Anak sa Dios” (The Power of the Book of Mormon [Ang Gahom sa Basahon ni Mormon],” Ensign, Hunyo 1988, 6).
Ang Basahon ni Mormon Makatubag sa Mahinungdanong mga Pangutana sa Kinabuhi
Ang pagbasa sa Basahon ni Mormon uban sa giya sa Espiritu makatabang sa mga tawo sa pagkaplag sa mga tubag o mga salabotan ngadto sa ilang personal nga mga pangutana—o mahinungdanong mga pangutana sa kinabuhi. Tabangi ang mga tawo nga makita kon sa unsang paagi ang mga pagtulon-an diha sa Basahon ni Mormon motubag sa mga pangutana sa kinabuhi.
Ang pipila niining mga pangutana gilista sa ubos, inubanan sa mga pakisayran sa Basahon ni Mormon nga makatubag niini.
-
Aduna bay Dios? Kinsa ang Dios? (Mosiah 4:9; Alma 18:24–40; 22:4–23; 30:44)
-
Nakaila ba ang Dios kanako ug nagpakabana ba mahitungod kanako? Unsaon nako nga mabati ang Iyang gugma? Unsaon nako nga mas maduol ngadto Kaniya? (2 Nephi 26:24; Mosiah 4:9–12; Enos 1:1–12; Alma 18:32; Moroni 10:32–33)
-
Unsa ang katuyoan sa kinabuhi? (2 Nephi 2:25; Alma 34:32)
-
Nganong ang kinabuhi lisod man kaayo usahay? Unsaon nako pagkaplag og kalig-on atol niining lisod nga mga panahon? (1 Nephi 17:3; 2 Nephi 4:20–21; Alma 36:3; Ether 12:27)
-
Unsaon nako pagkaplag og kalinaw sa mga panahon sa kasamok? (Mosiah 24:13–15; Helaman 5:47)
-
Sa unsang paagi nga ako mahimong mas malipayon? (Mosiah 2:41; Alma 22:15–16)
-
Unsaon man nako nga mahimong mas maayo nga tawo? (Mosiah 26:30–31; Alma 5:12–13; 7:23–24; Ether 12:27)
-
Unsaon nako nga mobati sa kapasayloan sa Dios? (Enos 1:2–8; Alma 36:17–21)
-
Unsay mahitabo human ako mamatay? (2 Nephi 9:3–6, 11–13; Alma 11:42–44; 40:11)
Ang Basahon ni Mormon nagsangkap usab og giya mahitungod sa uban nga importanteng mga pangutana, sama sa:
-
Sa unsang paagi nga ako makatampo sa espirituhaong kaayohan sa akong pamilya? (1 Nephi 1:1; 8:36–38; Mosiah 2:5–6; 4:14–15; 3 Nephi 18:21)
-
Sa unsang paagi nga ako makatabang sa akong mga anak sa pag-ugmad og kalig-on sa pagbatok sa tentasyon? (1 Nephi 15:23–25; Helaman 5:12; 3 Nephi 18:15, 18–21, 24–25)
-
Sa unsang paagi nga ang pagtuman sa mga sugo sa Dios makatabang kanako nga makaangkon og mas malipayon, mas buhong nga kinabuhi? (2 Nephi 2:25–28; 4:35; Mosiah 2:41; 4 Nephi 1:15–18)
“Ang mga misyonaryo kinahanglan gayod makamao unsaon sa paggamit ang Basahon ni Mormon sa pagtubag sa ilang kaugalingon nga mga pangutana aron sila epektibong makagamit niini sa pagtabang sa uban nga makakat-on sa pagbuhat sa samang butang. … Sila kinahanglan gayod nga makasabot og maayo sa gahom sa Basahon ni Mormon sa pagtudlo sa gipahiuli nga ebanghelyo, una pinaagi sa paggamit niini diha sa ilang kaugalingong mga kinabuhi ug dayon pinaagi sa pagpakigbahin niini uban niadtong ilang gitudloan” (Dallin H. Oaks, “Tambag alang sa mga Lider sa Misyon,” seminar alang sa bag-o nga mga lider sa misyon Hunyo 25, 2022).
Personal nga Pagtuon o Pagtuon uban sa Kompanyon
Ilista ang inyong mga pangutana o nianang inyong nadunggan gikan sa uban. Pangitaa ang mga bersikulo sa basahon ni Mormon nga makatabang nga matubag kini ng amga pangutana. Isulat ang mga panabot ug ang mga pakisayran sa Basahon ni Mormon diha sa inyong journal sa pagtuon. Gamita kini samtang kamo magtudlo.
Ang Basahon ni Mormon ug ang Biblia Nagsuporta sa Usag Usa
Ang Ginoo nagsulti nga “magtudlo sa mga baroganan sa akong ebanghelyo, nga anaa sa Biblia ug sa Basahon ni Mormon, diin anaa ang kahingpitan sa ebanghelyo” (Doktrina ug mga Pakigsaad 42:12). Ang mga Santos sa Ulahing mga Adlaw “nagtuo sa Biblia nga pulong sa Dios kon kini tukma nga pagkahubad” (Mga Artikulo sa Hugot nga Pagtuo 1:8; tan-awa usab sa 1 Nephi 13:29). Ang Biblia usa ka sagrado nga kasulatan. Ang Basahon ni Mormon kauban nga sagradong kasulatan nga naglangkob sa kahingpitan sa ebanghelyo ni Jesukristo.
Ang Biblia ug ang Basahon ni Mormon nagkomplemento ug nagpalambo sa usag usa (tan-awa sa Ezequiel 37:16–17; 1 Nephi 13:40; Mormon 7:8–9). Ang duha ka bolyum sa kasulatan mga hinugpong sa mga pagtulon-an nga girekord sa karaan nga mga propeta. Ang Biblia nagsulti sa pakig-interaksiyon sa Dios ngadto sa mga tawo sa Silangang Bahin sa Kalibotan sulod sa mga liboan ka tuig. Ang Basahon ni Mormon nagsulti kabahin sa pakig-interaksiyon sa Dios ngadto sa mga tawo sa karaan nga Amerika kapin sa liboan ka tuig.
Labing importante, ang Biblia ug ang Basahon ni Mormon mikomplemento sa usag usa diha sa pagsaksi ni Jesukristo. Ang Biblia nagsangkap sa asoy sa pagkatawo sa Manluluwas, sa mortal nga pagpangalagad, ug sa Pag-ula—lakip na sa Iyang kamatayon ug Pagkabanhaw. Ang Basahon ni Mormon naglakip og mga panagna sa pagkatawo ug sa misyon sa Manluluwas, nagtudlo mahitungod sa Iyang Pag-ula, ug sa asoy sa Iyang pangalagad didto sa Amerika. Ang pagpamatuod sa Basahon ni Mormon nagkompirmar ug mipalapad sa pagpamatuod sa Biblia nga si Jesus mao ang Bugtong Anak sa Dios ug ang Manluluwas sa kalibotan.
Ang Biblia ug ang Basahon ni Mormon nagtudlo sa balaod bahin sa mga saksi: “kinahanglan paluyohan sa pamatuod sa duha o tulo ka mga saksi” (2 Mga Taga-Corinto 13:1; tan-awa usab sa 2 Nephi 11:2–3). Pinasubay niini nga balaod, ang duha ka basahon sa kasulatan nagpamatuod kabahin ni Jesukristo (tan-awa sa 2 Nephi 29:8).
Personal nga Pagtuon o Pagtuon uban sa Kompanyon
Pangitaa ang mga cross reference sa mosunod nga mga hilisgotan diha sa Basahon ni Mormon ug sa Biblia. Mga ehemplo gihatag sa sulod sa parentesis sunod sa kada hilisgotan. Idugang ang inyong kaugalingon nga hilisgotan ug mga tudling.
-
Mga Propeta (Jacob 4:4–6; Amos 3:7)
-
Apostasiya (2 Nephi 28; 2 Timoteo 4:3–4)
-
Pagpahiuli (1 Nephi 13:34–42; Mga Buhat 3:19–21)
-
Kitang tanan mga anak sa Dios (1 Nephi 17:36; Mga Buhat 17:29)
Tabangi ang mga Tawo nga Mobasa ug Makasabot sa Basahon ni Mormon
Kadtong kinsa wala mobasa o makasabot sa Basahon ni Mormon maglisod sa pagdawat og pagsaksi nga kini tinuod. Kamo makatabang kanila nga makasabot sa basahon pinaagi sa pagbasa niini uban kanila. Magbasa atol sa panahon sa pagtudlo, atol sa sunod nga pagbisita, o pinaagi sa teknolohiya. Mahimo usab kamong makigsabot og mga miyembro aron magbasa uban kanila. Ang pagtan-aw sa bidyo sa Basahon ni Mormon ug dayon mobasa sa may kalabotan nga mga kapitulo mahimong makatabang kaayo.
Pag-ampo alang sa panabang samtang magpili kamo og mga tudling nga makatubag sa mga kabalaka ug mga panginahanglan sa mga tawo. Basaha ug hisgoti ang mubo nga mga tudling, sama sa 1 Nephi 3:7 o Mosiah 2:17. Basaha usab ug hisgoti ang mas tag-as nga mga tudling o kompletoha ang mga kapitulo, sama sa 2 Nephi 31, Alma 7, o 3 Nephi 18. Awhaga ang mga tawo sa pagbasa sa Basahon ni Mormon gikan sa sinugdanan, lakip na ang mga pagpamatuod sa Tulo ug Walo ka mga Saksi ug ang pagpamatuod ni Propeta Joseph Smith.
Ikonsiderar ang pagsunod sa mga sugyot samtang kamo magbasa sa Basahon ni Mormon uban sa mga tawo:
-
Pag-ampo sa dili pa magbasa. Pangayo og tabang sa pagsabot. Pag-ampo nga ang Espiritu Santo mosaksi ngadto kanila nga kini tinuod.
-
Pagpuli-puli sa pagbasa. Igo-igoa ang kapaspason nga sila komportable. Ipasabot ang dili pamilyar nga mga pulong o hugpong sa mga pulong.
-
Hunong og panagsa aron hisgotan kon unsa ang inyong nabasa.
-
Ipasabot ang background ug konteksto sa tudling, sama sa kinsa ang namulong, unsang matang sa tawo, ug unsa ang kahimtang. Kon adunay kalabotan nga bidyo sa Basahon ni Mormon, ikonsiderar ang pagpasalida niini.
-
Itudlo ang mahinungdanon nga mga mensahe o doktrina nga pangitaon.
-
Ipakigbahin ang inyong pagpamatuod ug tukma nga mga panabot, mga pagbati, ug personal nga mga kasinatian.
-
Itudlo ang doktrina direkta gikan sa mga pulong sa mga propeta sa Basahon ni Mormon. Kini makatabang sa mga tawo nga mabati ang espirituhanong gahom sa basahon.
-
Tabangi ang mga tawo nga “[mo]pahisama” unsa man ang ilang nabasa ngadto sa ilang kaugalingong kinabuhi (1 Nephi 19:23). Tabangi sila nga makita kon sa unsang paagi ang mga kasulatan may kalabotan ngadto kanila sa personal nga paagi.
Samtang gamiton ninyo kini nga mga baroganan, inyong matabangan ang mga tawo nga makaugmad og abilidad ug tinguha sa pagbasa sa Basahon ni Mormon nga sila ra. Ipasabot nga ang pagbasa sa basahon sa matag adlaw mao ang yawe sa pag-uswag ngadto sa bunyag ug pagkakabig sa tibuok kinabuhi.
Salig sa saad sa Moroni 10:3–5. Awhaga ang mga tawo sa pagbasa sa Basahon ni Mormon sa sinsero nga paagi ug sa pag-ampo uban sa tinuod nga katuyoan aron masayod nga kini tinuod. Ipasabot nga ang tinuod nga katuyoan nagpasabot sa pagkaandam nga mobuhat sa tubag nga ilang nadawat pinaagi sa Espiritu Santo. Ang tanang tawo kinsa kinasingkasing nga mobasa ug mag-ampo uban sa tinuod nga katuyoan mahitungod sa Basahon ni Mormon makahibalo sa kamatuoran niini pinaagi sa gahom sa Espiritu Santo.
Kamo kinahanglan usab nga kanunayng mogamit niining saad aron sa pagpalig-on sa inyong kaugalingong pagpamatuod sa Basahon ni Mormon. Ang inyong pagpamatuod mohatag kaninyo og kamasaligon nga kadtong kinsa mogamit niining saad makadawat og usa ka pagsaksi nga ang basahon mao ang pulong sa Dios.
Mga Ideya sa Pagtuon ug Paggamit
Personal nga Pagtuon
-
Basaha ang 2 Nephi 2; 9; 30; 31; 32. Markahi ang matag pakisayran nga nagpasabot kang Jesukristo. Paghimo og lista sa lain-laing mga ngalan ug mga titulo ni Kristo niini nga mga kapitulo. Markahi ang Iyang mga gipamulong. Butangi og timaan ang Iyang mga hiyas ug mga aksiyon.
-
Samtang magbasa ka kada adlaw gikan sa Basahon ni Mormon, irekord sa imong journal sa pagtuon ang mga tudling nga adunay espesyal nga kahulogan alang kanimo. Isulat unsaon nimo sa paggamit niini sa imong kinabuhi.
-
Isulat sa imong journal sa pagtuon unsay imong gibati sa dihang nakaangkon ka og espirituhanon nga pagsaksi sa unang higayon nga ang Basahon ni Mormon tinuod.
-
Isulat ang mosunod nga tulo ka pangutana diha sa imong journal sa pagtuon. Sa imong tibuok misyon, pagdugang og mga tubag ngadto niining mga pangutana.
-
Unsa kaha ang akong kinabuhi kon wala ang Basahon ni Mormon?
-
Unsa kaha ang dili nako mahibaloan kon wala ang Basahon ni Mormon?
-
Unsa kaha ang dili nako maangkon kon wala ang Basahon ni Mormon?
-
-
Basaha ang Wali sa Bukid nga anaa sa Mateo 5–7 ug ang wali ni Kristo didto sa templo nga anaa sa 3 Nephi 12–14. Sa unsang paagi nga ang pagbasa niini og dungan makatabang kanimo nga mas masabtan ang mga pagtulon-an sa Manluluwas?
-
Tun-i ang matag higayon diha sa Basahon ni Mormon nga may pakisayran sa usa ka tawo nga nag-ampo. Sa imong journal sa pagtuon, isulat kon unsay imong nakat-onan gikan sa Basahon ni Mormon mahitungod sa pag-ampo.
-
Gikan sa mga ulohan sa kapitulo sa Mosiah 11–16, isulat ang katingbanan sa unsay gitudlo ni Abinadi. Dayon basaha kining mga kapitulo ug lugwayi ang imong katingbanan.
-
Gikan sa mga ulohan sa kapitulo sa Mosiah 2–5, isulat ang katingbanan sa unsay gitudlo ni Hari Benjamin. Dayon basaha kining mga kapitulo ug lugwayi ang imong katingbanan.
Pagtuon uban sa Kompanyon ug Panagbaylo sa Kompanyon
-
Magdungan sa pagbasa sa mga tudling sa Basahon ni Mormon. Ipakigbahin unsay inyong nakat-onan ug gibati. Hisgoti kon unsaon ninyo paggamit niini sa inyong kinabuhi.
-
Basaha og dungan ang Alma 26 ug 29. Ipakigbahin unsay inyong gibati mahitungod sa inyong misyon. Isulat ang inyong mga pagbati diha sa inyong journal sa pagtuon.
-
Basaha ang Alma 37:9 ug tukia kon unsa ka importante ang mga kasulatan ngadto ni Ammon ug sa iyang isig ka misyonaryo. Pangita og mga pakisayran nga naghulagway kon giunsa nila paggamit ang mga kasulatan.
-
Basaha ang Alma 11–14, nga ang usa ninyo modala sa papel ni Alma o ni Amulek ug ang lain modala sa papel sa mga tigpanaway. Hisgoti kon giunsa niini nga mga misyonaryo sa pagtubag sa lisod nga mga pangutana.
Konseho sa District, mga Komperensiya sa Zone, ug Konseho sa Pagpangulo sa Misyon
-
Praktisa ang paggamit sa Basahon ni Mormon sa kada paagi nga gihisgotan sa nag-unang mga ulohan niini nga kapitulo.
-
Ilista ang mga pangutana niadtong inyong gitudloan. Ipasabot sa usag usa kon unsaon ninyo sa pagtubag kining mga pangutana gamit ang Basahon ni Mormon.
-
Magdungan sa pagbasa sa mga tudling sa Basahon ni Mormon. Ipakigbahin ang kahibalo, mga pagbati, ug pagpamatuod.
-
Praktisa ang paggamit sa Basahon ni Mormon sa pagkompirmar sa mensahe sa Pagpahiuli.
-
Imbitara ang mga misyonaryo sa pagpakigbahin og mga kasinatian diin ang Basahon ni Mormon nakatabang kanila ug niadtong ilang natudloan diha sa proseso sa pagkakabig.
-
Hangyoa ang mga misyonaryo nga mopakigbahin og usa ka paborito nga kasulatan sa Basahon ni Mormon nga nakatabang sa pagtubag sa usa ka mahinungdanong pangutana sa kinabuhi.
-
Imbitara ang usa ka miyembro nga usa ka kinabig sa pagpakigbahin sa tahas sa Basahon ni Mormon sa iyang pagkakabig.
Mga Lider sa Misyon ug Mga Magtatambag sa Misyon
-
Tudloi ang mga misyonaryo unsaon sa paggamit sa Basahon ni Mormon sa pagkompirmar sa katinuod sa mensahe sa Pagpahiuli.
-
Basaha ang 1 Nephi 1 uban sa mga misyonaryo ug itandi kini sa kasinatian ni Joseph Smith.
-
Hatagi ang mga misyonaryo og limpyo nga kopya sa Basahon ni Mormon nga papel ang hapin [paperback]. Imbitara sila sa pagbasa ug pagmarka sa basahon og kaduha atol sa sunod nga duha o tulo ka higayon sa pagbinayloay sa misyonaryo.
-
Sa unang pagbasa, hangyoa sila sa pagmarka sa tanang butang nga nagpunting o nagpamatuod ni Jesukristo.
-
Sa ikaduha nga pagbasa, hangyoa sila sa pagmarka sa doktrina sa ebanghelyo ug mga baroganan.
Hangyoa ang mga misyonaryo sa pagpakigbahin unsa ang ilang nakat-onan ug gibati. Si Elder Ronald A. Rasband mihulagway kon sa unsang paagi nga ang pagbasa sa Basahon ni Mormon niining paagiha nakaapekto kaniya isip usa ka misyonaryo:
-
“Adunay mas mahinungdanon pa sa akong pagbasa kaysa pagmarka lang sa mga kasulatan. Sa matag pagbasa sa Basahon Mormon, sa sinugdanan hangtod sa kataposan, ako napuno sa tiunay nga gugma alang sa Ginoo. Mibati ko og lig-ong pagsaksi sa kamatuoran sa Iyang mga pagtulon-an ug kon sa unsang paagi nga kini magamit ‘karong adlawa.’ Kini nga basahon nahaom sa ulohan niini, ‘Lain nga Tugon ni Jesukristo.’ Pinaagi niana nga pagtuon ug sa espirituhanong pagsaksi nga nadawat, ako nahimong misyonaryo nga ganahan sa Basahon ni Mormon ug usa ka disipulo ni Jesukristo (“Karong Adlawa,” Liahona, Nob. 2022, 25).
-
Imbitara ang mga misyonaryo sa pagpakigbahin uban kaninyo sa mga kasulatan sa Basahon ni Mormon nga nakapausab sa ilang mga kinabuhi.
-
Ilha ang mahinungdanon nga mga pangutana sa kinabuhi alang sa mga tawo sa inyong misyon. Imbitara ang mga misyonaryo sa pagpangita og mga bersikulo diha sa Basahon ni Mormon nga makatabang nga matubag kini nga mga pangutana.