“Kapitulo 9: Pangita og mga Tawo nga Katudloan,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Kapitulo 9,” Isangyaw ang Akong Ebanghelyo
Imahe
The Good Shepherd [Ang Maayong Magbalantay], ni Del Parson
Kapitulo 9
Pangita og mga Tawo nga Katudloan
Hunahunaa Kini
Unsaon nako sa pagpakita og hugot nga pagtuo diha kang Kristo sa pagpangita og mga tawo nga katudloan?
Unsaon nato sa pagpalapad sa atong panglantaw ug pagpalambo sa atong mga plano sa pagpangita og mga tawo nga katudloan?
Unsaon nako nga molambo sa akong abilidad ug kamasaligon sa pagpakig-estorya sa mga tawo nga akong mahimamat kada adlaw?
Unsaon nato sa pakighiusa sa mga miyembro sa pagpakigbahin sa ebanghelyo?
Unsay angay natong buhaton kon kita makadawat og mga referral?
Unsa man ang pipila ka ideya alang sa pagpangita og mga tawo nga katudloan nga wala pa nato masulayi?
Ang nabanhaw nga Manluluwas misulti sa Iyang mga disipulo, “Tungod niini, sa inyong pagpanglakaw himoa nga akong mga tinun-an ang tanang katawhan sa tibuok kalibotan. Bunyagi sila sa ngalan sa Amahan, sa Anak ug sa Espiritu Santo” (Mateo 28:19; tan-awa usab sa Marcos 16:15). Ang Ginoo misubli niini nga sugo sa atong panahon, nag-ingon, “Panglakaw kamo ngadto sa tibuok kalibotan, [ug] isangyaw ang ebanghelyo” (Doktrina ug mga Pakigsaad 68:8; tan-awa usab sa 50:14).
Ang misyonaryo nga buhat mao ang pagpangita og mga tawo, pagtudlo kanila, ug pagtabang kanila nga mangandam alang sa bunyag. Inyong matuman ang sugo sa Ginoo sa pagtudlo sa Iyang ebanghelyo ug pagbunyag sa mga kinabig samtang kamo “[mangita kanila] nga modawat kaninyo” (Doktrina ug mga Pakigsaad 42:8). Walay mahitabo sa misyonaryo nga buhat hangtod nga kamo adunay makit-an nga tawo nga katudloan. Pagbantay sa tanang higayon alang sa mga oportunidad sa pagpaila sa ebanghelyo. Pagkat-on sa paggamit sa mga paagi nga epektibo sa inyong dapit.
Importante gayod nga makigtambayayong sa mga miyembro sa pagpangita. Paningkamot gayod og maayo aron makuha ang ilang pagsalig. Kon ang mga miyembro mosalig sa mga misyonaryo, sila mas lagmit nga moimbitar sa ilang mga higala ug mga sakop sa pamilya nga makighimamat kaninyo. Kini nga mga tawo mas lagmit nga makabig ngadto sa Ginoo, magpabunyag, ug mouswag diha sa dalan sa ebanghelyo.
Ang pagpangita mahitabo sumala sa kaandam sa usa ka tawo nga maminaw sa ebanghelyo. Ang katukma sa panahon managlahi alang sa matag tawo. Ang pagpangita mahimong resulta gikan sa unang higayon nga pakighinabi o gikan sa daghang mga pakighinabi sulod sa dugay nga panahon. Daghang tawo nakahinabi na og pipila ka higayon sa mga misyonaryo o sa mga miyembro sa Simbahan sa wala pa magsugod og usa ka seryoso nga pagtuon sa ebanghelyo. Ayaw pagduhaduha sa pagkontak og usab kanila.
Ang inyong mga paningkamot sa pagpangita mahimong magbunga human nga kamo nabalhin o gani human nga kamo natapos sa inyong misyon. Dili igsapayan sa katukma sa panahon o sa sangpotanan, ang Ginoo mapasalamaton alang sa inyong mga paningkamot.
Kini nga kapitulo naglatid sa mga baroganan ug mga ideya sa pagtabang kaninyo sa pagpangita. Kini nga mga baroganan malukpanon. Apan, ang mga misyonaryo ug mga lider sa misyon mahimong magkinahanglan sa pagpahiangay niini ngadto sa ilang mga kahimtang.
Pagpakita og Hugot nga Pagtuo sa Pagpangita og mga Tawo nga Katudloan
Bisan asa man kamo moserbisyo, ang Ginoo mitawag kaninyo sa paghago “alang sa kaluwasan sa mga kalag” (Doktrina ug mga Pakigsaad 100:4). Aron mabuhat kini, gikinahanglan ninyong magpakita og hugot nga pagtuo kang Kristo sa pagpangita og mga tawo nga katudloan aron sila makapili sa pagsunod Kaniya ug magpabunyag.
Ang hugot nga pagtuo usa ka baroganan sa paglihok ug gahom. Pagbaton og hugot nga pagtuo nga ang Ginoo nag-andam og mga tawo nga modawat sa gipahiuli nga ebanghelyo. Pagbaton og mapailobon nga pagsalig nga Siya mogiya kaninyo ngadto kanila, o sila nganha kaninyo. Lihoka ang inyong hugot nga pagtuo pinaagi sa pagtakda og mga tumong, paghimo og mga plano, ug pagpatuman sa inyong mga plano sa pagpangita og mga tawo nga katudloan (tan-awa sa kapitulo 8).
Imahe
mga misyonaryo nga nag-ampo
Pag-ampo inubanan sa hugot nga pagtuo samtang kamo magtinguha sa tabang sa Dios sa pagpangita og mga tawo nga katudloan. Sa dihang si Alma nangulo og usa ka misyon ngadto sa mga Zoramite, siya nag-ampo: “O Ginoo, ikaw mohatag ba ngari kanamo nga kami mahimo nga makaangkon og kalamposan sa pagdala kanila pagbalik nganha kanimo diha kang Kristo. Tan-awa, O Ginoo, ang ilang mga kalag mga bililhon … ; busa, ihatag ngari kanamo, O Ginoo, gahom ug kaalam nga kami mahimo nga modala [kanila], among mga kaigsoonan, pagbalik nganha kanimo” (Alma 31:34–35).
Ang mga tawo nga inyong mahimamat kasagaran wala makaamgo nga nangita diay sila sa gipahiuli nga ebanghelyo hangtod nga ila kining makaplagan. Pananglitan, may usa ka kinabig miingon, “Sa dihang nakadungog ko sa ebanghelyo, gipuno niini ang kahaw-ang sa akong kasingkasing nga wala nako masayri nga anaa diay.” Ang lain miingon, “Nahuman nako ang pagpangita nga wala nako masayri nga gibuhat diay nako.” Ang uban aktibong nangita alang sa kamatuoran apan wala makahibalo kon asa kini pangitaon (tan-awa sa Doktrina ug mga Pakigsaad 123:12).
Tinguhaa ang giya sa Espiritu samtang mangita kamo og mga tawo nga katudloan. Ang pagpangita pinaagi sa Espiritu sama ra ka importante sa pagtudlo pinaagi sa Espiritu. Pagbaton og hugot nga pagtuo nga mahibalo kamo unsaon sa pagpangita niadtong kinsa modawat kaninyo.
Pagtuon uban sa Kompanyon
Tingali adunay mga miyembro diha sa inyong area kinsa mga kinabig ngadto sa Simbahan. Pangutan-a sila kon sa unsang paagi sila nakahibalo sa Simbahan. Ang ilang mga tubag mahimong mohatag kaninyo og mga panabot kon unsaon sa pagpangita. Pangutana usab kon sa unsang paagi nila nahibaloan nga ang mga misyonaryo nagtudlo kanila sa kamatuoran. I-summarize ang ilang mga kasinatian diha sa inyong journal sa pagtuon.
Pagtuon sa Kasulatan
Sa unsang paagi nga ang mga anak sa Dios giandam ug gigiyahan ngadto sa gipahiuli nga ebanghelyo?
Palapdi ang Inyong Pagsabot sa Pagplano sa Pagpangita
Samtang kamo magtinguha sa pagpangita og mga tawo nga katudloan, hibaloi ang kalahian tali sa pag-eskedyul ug pagplano. Ang pag-eskedyul mao ang pagtakda og panahon diha sa inyong planner ug sa inyong adlaw. Ang pagplano mao ang paghimo og mainampoon, puno sa katuyoan nga paningkamot sa pagtutok sa mga tawo ug sa labing maayo nga mga paagi sa pagpangita kanila.
Ang husto nga kalihokan, diha sa husto nga panahon ug diha sa husto nga lokasyon, makatabang kaninyo sa pagpangita og mga tawo nga katudloan. Pangutan-a ang inyong kaugalingon sa mosunod nga mga pangutana:
Asa kaha nato mahimamat ang mga tawo nga tingali giandam sa Ginoo?
Unsa ang labing maayo nga mga dapit ug mga matang sa mga kalihokan sa pagpangita og mga tawo sa piho nga mga panahon sa adlaw o semana?
Unsaon nato sa pagpakita og gugma, pagserbisyo kanila, o paghatag og bili ngadto sa ilang mga kinabuhi karon?
Unsaon nato sa paggamit sa personal nga mga kalig-on, mga kahanas, ug mga talento aron sa pagbayaw kanila?
Unsa ang atong backup nga mga plano kon dili mahimo ang usa ka butang?
Sulayi sa pag-ila ang mga paagi nga ang Ginoo nag-andam sa mga tawo. Andam ba sila nga makig-estorya kaninyo? Nangayo ba sila og tabang o kahupayan?
Paghunahuna mahitungod sa mga paningkamot sa pagpangita nga nahimong malamposon. Diin ang unang pakighinabi? Naglakip ba sa lokal nga mga miyembro ang mga paningkamot? Gigamit ba ang teknolohiya?
Sugdi ang inyong pagplano pinaagi sa pagtutok kon sa unsang paagi nga kamo makapanalangin sa mga tawo, ug dayon ang inyong eskedyul mamugna.
Pagtuon uban sa Kompanyon
Uban sa imong kompanyon, gamita ang table sa ubos aron sa pagtimbang-timbang sa inyong mga paningkamot sa pagpangita og mga tawo nga katudloan. Pagplano sa pagsulay sa pipila ka ideya nga bag-o kaninyo.
Mga Paningkamot sa Pagpangita
Usahay
Kasagaran
Hapit Pirme
Nailaila namo ang mga miyembro ug gisuportahan sila sa ilang mga paningkamot sa pagpakigbahin sa ebanghelyo, lakip na sa bag-o nga mga miyembro, kabatan-onan, niadtong nangandam nga moserbisyo og mga misyon, mopauliay nga mga misyonaryo, mga pamilya nga dili tanan miyembro, ug umaabot nga mga elder.
Naningkamot kami nga masaligan sa mga miyembro aron mahimo silang komportable sa pag-imbitar sa ilang mga sakop sa pamilya ug mga higala nga makighimamat kanamo.
Nakigtambayayong kami sa mga lider sa ward diha sa sinemana nga mga miting sa pakigsabot aron sa pagsuporta sa among mga paningkamot sa pagpangita ug sa pagsuta kon aduna bay mga tawo nga among makontak.
Nakigtambayayong kami sa kasamtangan nga mga tawo nga gitudloan, sa mga tawo nga kanhi gitudloan, ug sa mga tawo nga gi-refer sa media aron pangitaon.
Nakig-estorya kami sa daghang mga tawo kutob sa among mahimo kada adlaw.
Nangandam kami sa espirituhanong paagi ug nag-ampo alang sa tabang sa Dios samtang nagplano kami sa pagpangita og mga tawo nga katudloan.
Nagtuo kami nga ang Ginoo nag-andam alang kanamo og mga tawo nga katudloan.
Gikonsiderar namo unsaon sa pagtabang niadtong among nahimamat nga mobati sa impluwensya sa Espiritu Santo.
Nagtakda kami og sinemana ug inadlaw nga mga tumong sa pagpangita (tan-awa sa kapitulo 8).
Kanunay kaming nangita og mga tawo nga katudloan.
Mamugnaon kami ug mogamit og nagkadaiyang paagi sa pagpangita og mga tawo. Gisulayan namo ang bag-o nga mga paagi ug naglikay nga magpabilin lang sa usa ka naandan.
Piho kaming nagplano sa pagpangita. Nagplano kami kon kanus-a, asa, ug sa unsang paagi kami mopokus.
Gikonsiderar namo kon unsa ang labing maayo nga mga dapit ug mga oras sa adlaw nga makapangita og mga tawo nga katudloan.
Gikonsiderar namo kon unsa nga mga kalihokan sa pagpangita ang epektibo kaniadto.
Gipahiangay namo ang among mga plano sa pagpangita kon gikinahanglan ug adunay backup nga mga plano kon ang gieskedyul nga mga kalihokan dili matuman.
Gigamit namo ang Preach My Gospel [Isangyaw ang Akong Ebanghelyo] nga app sa pagpangita, sa pagtakda og mga tumong ug sa paghimo og mga plano, ug sa pagrebyo ug pag-update sa among mga rekord kada adlaw.
Gigamit namo ang among personal nga mga talento ug mga kalig-on aron sa pagtabang sa pagpangita.
Nagplano kami kon kanus-a ug unsaon namo paggamit ang social media ug ubang teknolohiya aron sa pagpangita og mga tawo nga katudloan.
Gigamit namo ang mga kampanya sa media ug ang lokal nga mga gitanyag nga motubag sa mga interes ug sa mga panginahanglan sa mga tawo sa among dapit.
Dali kaming motubag sa online nga mga hangyo ug mga mensahe nga gikan sa mga tawo kinsa lagmit interesado.
Giplano namo daan ang among mga post sa social media ug nakigtambayayong sa mga miyembro aron mangita sa online.
Pagmakugihon sa Pagpangita
Himoa ang Pagpangita nga usa ka Makanunayon nga Paningkamot
Sa sayong mga bahin sa gipahiuli nga Simbahan, ang Ginoo balik-balik nga mitugon sa usa ka grupo sa kalalakin-an sa pagtudlo sa Iyang ebanghelyo “diha sa agianan” samtang sila mibiyahe. Gusto siya nga gamiton nila ang matag kahigayonan sa pagpakigbahin sa ebanghelyo. (Tan-awa sa Doktrina ug mga Pakigsaad 52:9–10, 22–23, 25–27.)
Gamita kini nga instruksiyon sa inyong pagpangita. Paghimo og makugihon nga paningkamot sa pagpangita sa tibuok adlaw. Planoha ang inyong mga paningkamot sa pagpangita—ug pangita usab og mga oportunidad nga wala giplano. Ang pagpangita og bag-o nga mga tawo nga katudloan usa ka kanunay nga panginahanglan.
Pagtinguha og inspirasyon ug mahimong andam sa paggamit og nagkadaiya nga mga paagi. Tutoki ang mga paagi nga labing epektibo sa inyong area.
Imahe
Christ Calling Peter and Andrew [Si Kristo nga Nagtawag ni Pedro ug ni Andres], ni James T. Harwood
Gamit og Daghan nga mga Paagi
Kalabot sa buhat sa mga misyonaryo, si Presidente Dallin H. Oaks miingon:
“Walay usa kanato ang kinahanglang mahisama sa mangingisda kinsa naghunahuna nga tibuok adlaw siyang nangisda nga sa tinuoray lang naggahin siya sa hapit tanan niyang oras nga nagsige og saka-kanaog gikan sa tubig, nagkaon og paniudto, ug nagduki-duki sa iyang gamit. Ang kalamposan sa pagpangisda adunay kalabotan kon unsa ka dugay imong pasol anaa diha sa tubig, dili kon unsa ka kadugay nga mihawa sa imong apartment. Ang ubang mga mangingisda nalayo sa panimalay sulod sa dose ka oras ug ang ilang pasol anaa diha sa tubig sulod sa napulo ka oras. Ang ubang mga mangingisda nalayo sa panimalay sulod sa dose ka oras ug ang ilang pasol anaa diha sa tubig sulod lamang sa duha ka oras. Kining ulahing matang sa mangingisda mahimong matingala nganong wala silay sama nga kalamposan sa uban.
“Ang samang baroganan maggamit ngadto sa mga misyonaryo, kinsa maoy gitawag sa Magtutudlo og ‘mga mangingisdag tawo’ [Mateo 4:19]. Ang pasol sa usa ka misyonaryo kinahanglan nga maanaa sa tubig nga pangisdaan sa higayon nga siya mobiya sa apartment” (seminar for new mission presidents, Hunyo 20, 2000).
Imahe
daghang mga pasol
Si Elder Quentin L. Cook mipalapad niini nga pagtandi. Agig dugang sa pagpabilin sa inyong “pasol diha sa tubig” alang sa mas taas nga panahon, siya mitudlo nga ang mga misyonaryo kinsa makakita og mga tawo nga katudloan “makanunayong magpabilin og daghang pasol diha sa tubig. …
“Sila moila ug mokontak og mga pamilya nga dili tanan miyembro.
“Sila mosiksik sa ilang [Isangyaw ang Akong Ebanghelyo nga app] alang sa mga tawo kinsa natudloan kaniadto aron kontakon pinaagi sa tawag ug text.
“Sila motanyag og serbisyo ngadto sa mga miyembro, mga tawo nga natudloan kaniadto, mga tawo nga kasamtangan nilang gitudloan, ug sa komunidad sa kinatibuk-an. …
“Sila motabang sa mga miyembro nga maghimo og mga mensahe sa ebanghelyo nga ipakigbahin sa ilang kaugalingon … nga mga plataporma sa social media.
“Sila mokuha og mga referral gikan sa mga tawo nga ilang gibisita ug gitudloan” (“Be Spiritual Pathfinders and Influencers,” debosyonal sa misyonaryo, Sept. 10, 2020).
Pagtuon uban sa Kompanyon
Hisgoti ang mosunod nga mga pangutana:
Unsa ang pipila ka paagi nga inyong mapabilin ang inyong “pasol diha tubig” sa mas taas nga panahon atol sa adlaw?
Unsa ang pipila ka paagi nga inyong mapabilin ang daghang pasol diha sa tubig samtang mangita kamo og mga tawo nga katudloan?
Unsa nga mga feature diha sa Isangyaw ang Akong Ebanghelyo nga app ang makatabang kaninyo?
Unsaon kaha ninyo paggamit ang teknolohiya aron sa pagtabang kaninyo nga ipabilin ang daghang pasol diha sa tubig?
Pakig-estorya sa Tanan
Pagpalambo og lawom nga tinguha sa pagdala og mga kalag ngadto kang Kristo (tan-awa sa Mosiah 28:3). Kon mabati ninyo kini nga tinguha, ang inyong gugma ug pakabana mapakita diha sa inyong mga paningkamot sa pagpangita. Ang inyong gugma mapakita usab diha sa inyong mga pagpakig-estorya.
Pakig-estorya sa daghang mga tawo kutob sa inyong mahimo kada adlaw. Pakig-estorya kanila bisan asa kamo moadto. Diin tukma, adto gikan sa usa ka panimalay ngadto sa laing panimalay. Ang Ginoo misugo sa pipila sa nag-una nga mga elder sa Simbahan, “[Ibuka ang inyong] baba sa pagpadayag sa akong ebanghelyo.” Siya dayon misaad nga ang ilang mga baba “makasulti” kon unsay angayng itudlo (Doktrina ug mga Pakigsaad 30:5; tan-awa usab sa 33:7–10).
Sa samang paagi, ang Ginoo misulti kang Joseph Smith ug Sidney Rigdon, “Ipataas ang inyong mga tingog ngadto niini nga mga katawhan; ipamulong ang mga hunahuna diin Ako mobutang sa inyong mga kasingkasing.” Siya dayon misaad, “Ihatag kini kaninyo … sa diha gayod nga higayon, unsa ang inyong isulti” (Doktrina ug mga Pakigsaad 100:5–6).
Samtang makighimamat kamo og mga tawo, kasagaran mabati ninyo ang Espiritu nga motabang kaninyo nga mahibalo unsa ang isulti. Apan, kon dili kamo makabati og usa ka pag-aghat, pagsugod lang sa usa ka dapit—tingali pinaagi sa pagpangutana ug pagpaminaw sa ilang tubag (tan-awa sa “Pangita og mga Tawo kon Hain Sila” niini nga kapitulo). O tingali paghisgot bahin ni Ginoong Jesukristo o sa tawag ni Joseph Smith nga mahimong usa ka propeta sa Dios.
Ang mosunod nga mga ideya makatabang samtang kamo makig-estorya niadtong inyong mahimamat:
Mahimong mainiton, tinuod, ug mahigalaon. Pangita og mga paagi sa pagpakigdait sa tawo ug pagsugod og usa ka pagpakig-estorya.
Sinsero nga maminaw sa unsay isulti sa mga tawo. Tinguhaa nga makasabot sa mga panginahanglan ug mga interes sa matag tawo. Pagtanyag og personal nga tabang kon angay.
Ikonsiderar kon sa unsang paagi nga ang ebanghelyo makatabang sa pagtubag sa ilang mga panginahanglan. Dayon itudlo ang usa ka sukaranan nga kamatuoran sa ebanghelyo ug imbitara sila sa pagkat-on og dugang. Ipakigbahin kon sa unsang paagi nga ang gipahiuli nga ebanghelyo makahatag og mas dako nga paglaom ug kahulogan sa ilang mga kinabuhi.
Pangutana mahitungod sa ilang mga pamilya. Tabangi sila nga makakita kon sa unsa nga paagi nga ang ebanghelyo makapanalangin sa ilang mga pamilya. Pagtanyag nga tabangan sila sa pagpangita sa mga ngalan sa ilang namatay na nga mga katigulangan.
Imbitara sila nga motambong sa panagtigom alang sa sakramento.
Itanyag ang mga pampleta o ubang mga materyal sa Simbahan, giimprinta ug digital.
Ipakigbahin nila ang inyong tumong isip usa ka misyonaryo ug nganong nakadesisyon mo nga moserbisyo og usa ka misyon.
Kini nga mga baroganan magamit usab ngadto sa inyong mga pakighinabi sa mga miyembro.
Natural lang nga mahimong morag mahadlok sa pagpakig-estorya sa mga tawo. Pag-ampo alang sa hugot nga pagtuo ug kaisog sa pagtudlo sa gipahiuli nga ebanghelyo. Ang tanan nga inyong mahimamat inyong igsoon nga lalaki o igsoon nga babaye diha sa pamilya sa Dios. Hinumdomi nga Siya “wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye; … ang tanan managsama ngadto sa Dios” (2 Nephi 26:33).
Personal nga Pagtuon o Pagtuon uban sa Kompanyon
Basaha ang estorya gikan ni Victor Manuel Cabrera sa “Thirsting for the Living Water [Giuhaw alang sa Buhi nga Tubig],” Ensign, Ago. 2001, 60–61. Samtang basahon ninyo, pangitaa kon sa unsang paagi nga siya giandam sa pagdawat sa mga misyonaryo ug giunsa sa mga misyonaryo paggamit ang wala planoha nga oportunidad sa pagtudlo kaniya sa ebanghelyo.
Sa unsa man nga paagi nga ang tawo giandam alang sa gipahiuli nga ebanghelyo?
Unsa man unta ang nahitabo kon ang mga elder wala pa mopakigbahin og usa ka mensahe sa ebanghelyo?
Rebyoha kon unsay inyong gibuhat kagahapon. Nakig-estorya ba kamo sa daghang mga tawo kutob sa inyong mahimo? Kon wala, pagtakda og mga tumong ug pagbuhat og mga plano nga makig-estorya og mas daghang tawo karon.
Pagtuon sa Kasulatan
Unsa ang inyong makat-onan gikan sa mosunod nga mga kasulatan mahitungod sa pagpangita og mga tawo nga katudloan? Unsa ang inyong makat-onan gikan niini nga mga kasulatan mahitungod sa unsay inyong kinahanglan nga itudlo? Unsa ang gisaad sa Ginoo?
“Ang pagdapit sa tanan nga modawat sa ebanghelyo kabahin sa buhat sa kaluwasan ug kahimayaan” (Kinatibuk-ang Tamdanan nga Basahon,, 23.0). Pakigtambayayong sa mga miyembro sa Simbahan aron sa pagpangita og mga tawo nga katudloan. Kon ang mga miyembro mo-refer og usa ka tawo nganha kaninyo ug dayon moapil sa mga leksiyon, ang tawo mas lagmit nga mabunyagan ug magpabilin nga aktibo diha sa Simbahan.
Pag-ugmad og Lig-on nga mga Relasyon sa Lokal nga mga Lider
Pag-ugmad og lig-on nga mga relasyon sa bishopric ug sa ubang mga lider sa ward. Ang lider sa misyon sa ward (kon adunay gitawag) ug ang mga kapangulohan sa korum sa mga elder ug sa Relief Society mao ang inyong nag-una nga mga tawo nga kontakon. Tinguhaa ang ilang giya, ug suportahi sila diha sa sinemana nga mga miting sa pakigsabot (tan-awa sa kapitulo 13).
Atol sa sinemana nga mga miting sa pakigsabot, pakigtambayayong sa kaabag sa korum sa mga priest ug sa presidente sa klase sa Young Women alang sa kinamagulangan nga klase. Kini nga kabatan-onan adunay importante nga papel sa pagpakigbahin sa ebanghelyo. Tabangi sila sa pag-awhag sa mga sakop sa korum ug klase sa pagpakigbahin sa ebanghelyo. Usa ka paagi mao nga ang kabatan-onan moimbitar og mga higala ngadto sa kalihokan.
Kanunayng mangutana sa imong kaugalingon, “Usa ba ako ka panalangin ngadto sa lokal nga mga lider?” Palamboa ang kinaiya nga “Unsaon nako pagtabang?” Sama ni Ammon diha sa Basahon ni Mormon, duola ang lokal nga mga lider nga adunay usa ka kinaiya sa pagserbisyo (tan-awa sa Alma 17:23–25).
Ngadto sa mga lider sa misyon, si Presidente Russell M. Nelson mitudlo: “Nanghinaot ko nga inyong makat-onan nga higugmaon ang lokal nga mga lider ug mga miyembro. Mobayaw kanila ug modasig kanila. “Ang inyong abilidad sa paghiusa sa kadasig sa mga misyonaryo ngadto sa kalig-on ug mahigugmaong paningkamot sa mga miyembro importante kaayo. Ang inyong kalamposan modaghan pag-ayo” (“Hopes of My Heart,” seminar alang sa bag-o nga mga lider sa misyon, Hunyo 23, 2019).
Imahe
mga misyonaryo nga nagtudlo sa kababayen-an
Suportahi ang mga Miyembro sa Ilang mga Paningkamot sa Pagpakigbahin sa Ebanghelyo
Adunay daghang paagi sa pagsuporta ug pag-awhag sa mga miyembro sa pagpaambit sa ebanghelyo. Tabangi sila nga makapamalandong kon sa unsang paagi nga ang ebanghelyo nakapanalangin sa ilang mga kinabuhi. Awhaga sila nga “ipakita ang [ilang] kahayag aron kini moiwag sa kalibotan” (3 Nephi 18:24).
Tabangi ang mga miyembro nga mogamit sa mga baroganan sa paghigugma, pagpakigbahin, ug pag-imbitar. Paghatag og mga ehemplo sa normal ug natural nga mga paagi nga sila mahimong mogamit niini nga mga baroganan.
Paghigugma. Usa ka paagi nga atong mapakita ang atong gugma alang sa Dios mao ang paghigugma ug pagserbisyo sa Iyang mga anak. Awhaga ang mga miyembro nga motabang inubanan sa gugma ngadto sa mga sakop sa pamilya, mga higala, mga silingan, ug uban pa. Ang bisan unsa nga paningkamot sa pagpahayag og gugma usa ka importante nga paagi sa pagtuman sa mga pakigsaad nga ilang gihimo ngadto sa Dios (tan-awa sa Mosiah 18: 9–10).
Pagpakigbahin. Tungod sa ilang gugma alang sa Dios ug sa Iyang mga anak, ang mga miyembro natural nga gustong mopakigbahin sa mga panalangin nga Iyang gihatag kanila (tan-awa sa Juan 13:34–35). Awhaga ang mga miyembro sa pagsulti sa uban kon sa unsang paagi nga ang ebanghelyo nakapanalangin sa ilang mga kinabuhi. Awhaga sila nga maghisgot bahin sa Manluluwas ug sa Iyang impluwensya. Tabangi sila nga mobati sa kalipay sa pagpakigbahin sa ilang gugma, panahon, ug mga panghitabo sa kinabuhi. Tabangi sila nga makat-on kon unsaon sa pagpakigbahin sa normal ug natural nga mga paagi—isip kabahin lang sa unsay ilang gibuhat na sa ilang mga kinabuhi.
Imahe
Elder Gary E. Stevenson
“Kitang tanan adunay mga butang nga gipakigbahin sa uban. Kita nagbuhat niini sa kasagaran. Kita manabi kon unsa ang mga salida ug pagkaon nga atong ganahan, makapakatawa nga mga butang nga atong nakita, mga dapit nga atong gibisita, art nga atong gidayeg, mga kinutlo nga nakapadasig kanato.
“Unsaon kaha nato aron yano nga makadugang ngadto sa lista sa mga butang nga ato nang napakigbahin kon unsa ang atong ganahan mahitungod sa ebanghelyo ni Jesukristo? … Pinaagi sa pagpaambit sa atong positibo nga mga kasinatian sa ebanghelyo ngadto sa uban, kita makasalmot sa pagpatuman sa dakong mando sa Manluluwas” (Gary E. Stevenson, “Paghigugma, Pagpaambit, Pagdapit,” Liahona, Mayo 2022, 86).
Pag-imbitar. Ang Manluluwas nag-imbitar sa tanan nga modawat sa Iyang ebanghelyo ug moandam alang sa kinabuhi nga dayon (tan-awa sa Alma 5:33–34). Sama sa pagpakigbahin, ang pag-imbitar kasagaran yano lang nga paglakip sa atong pamilya, mga higala, ug mga silingan sa unsay gibuhat na sa mga miyembro. Awhaga ang mga miyembro nga mag-ampo mahitungod sa pag-imbitar sa mga tawo sa mosunod nga mga paagi:
Pagduol ug pagtan-aw. Imbitara ang mga tawo sa “pagduol ug pagtan-aw” sa mga panalangin nga ilang madawat pinaagi ni Jesukristo, sa Iyang ebanghelyo, ug sa Iyang Simbahan.
Pagduol ug pagtabang. Imbitara ang mga tawo sa “pagduol ug pagtabang” sa uban nga nanginahanglan.
Pagduol ug pagpasakop. Imbitara ang mga tawo sa “pagduol ug pagpasakop” isip mga miyembro sa gipahiuli nga Simbahan ni Jesukristo.
Si Elder Gary E. Stevenson miingon: “Adunay daghan kaayong mga pagdapit nga mahimo natong ipaabot sa uban. Kita [makaimbitar] sa uban sa ‘pagduol ug pagtan-aw’ sa usa ka tulumanon sa sakramento, usa ka kalihokan sa ward, usa ka online nga video nga nagpasabot sa ebanghelyo ni Jesukristo. Ang ‘pagduol ug pagtan-aw’ mahimong mao ang usa ka imbitasyon sa pagbasa sa Basahon ni Mormon o pagbisita sa usa ka bag-o nga templo atol sa open house niini sa dili pa kini ipahinungod. Usahay, ang [imbitasyon] mao ang usa ka butang nga atong ipaabot ngadto sa kahiladman—usa ka [imbitasyon] sa atong kaugalingon, maghatag kanato og kaigmat ug panglantaw sa mga oportunidad nga naglibot kanato aron lihokon” (“Paghigugma, Pagpaambit, Pagdapit,” 86).
Seguroha nga tabangan ang kabatan-onan nga mohigugma, mopakigbahin, ug moimbitar. Ang kabatan-onan hilabihan ka hanas sa paghigugma sa ilang mga higala, pagpakigbahin sa unsay anaa sa ilang kasingkasing, ug pag-imbitar kanila ngadto sa mga kalihokan.
Tabangi ang mga miyembro nga makasabot nga positibo ang bisan unsa nga paningkamot nga mosunod sa mga baroganan sa paghigugma, pagpakigbahin, ug pag-imbitar, bisan kon ang usa ka tawo makighimamat man o dili sa mga misyonaryo o moapil sa Simbahan.
Tabangi ang mga miyembro nga mogamit sa ilang mga kalig-on sa pagpakigbahin sa ebanghelyo. Ang uban maayo kaayo sa pagpangita og mga tawo nga katudloan, ug ang uban maayo kaayo nga mga magtutudlo. Ang uban adunay natural nga abilidad nga mokonektar sa mga higala, samtang ang uban ganahan nga mag-ampo alang sa ilang mga higala. Tabangi sila nga makita nga adunay mga paagi nga makaapil ang tanan.
Kon mobisita kamo sa mga miyembro, buhata ang ingon nga adunay katuyoan. Ipakita nga kamo matinguhaon nga moapil sa buhat sa pagpangita ug pagtudlo. Tahora ang ilang panahon ug eskedyul.
Ang ubang mga miyembro tingali ganahan nga motudlo kamo og usa ka mensahe gikan sa usa sa mga leksiyon. Ang mga kamatuoran sa ebanghelyo makapausab sa kinabuhi. Ang paglig-on sa pagsabot sa mga miyembro sa ebanghelyo modugang sa ilang pagsalig diha kaninyo ug mopalambo sa ilang kahinam sa pagpakigbahin niini. Tabangi sila nga makaila sa Espiritu ug molihok sa mga pag-aghat.
Tinguhaa nga mangita og mga tawo nga katudloan pinaagi sa mga pamilya nga dili tanan miyembro, umaabot nga mga elder, mibalik nga mga miyembro, ug bag-o nga mga miyembro. Sila lagmit adunay daghang sakop sa pamilya ug mga higala sa uban nga mga tinuohan.
Sa tanan nga inyong buhaton uban sa mga miyembro, sunda ang Espiritu ug tinguhaa ang pagpalambo sa ilang hugot nga pagtuo diha sa Manluluwas, si Jesukristo.
Alang sa dugang nga mga ideya ug mga kapanguhaan kon unsaon ninyo nga makasuporta sa mga miyembro sa pagpakigbahin sa ebanghelyo, tan-awa sa:
Rebyoha ang inyong kataposan nga sinemana nga miting sa pakigsabot. Unsaon kaha ninyo nga mahimo kini nga mas epektibo? Rebyoha ang mga hangyo gikan sa mga lider sa ward ug planoha kon unsaon ug kanus-a moresponde.
Planoha kon unsaon ninyo sa pagpakigsabot ang inyong misyonaryo nga mga paningkamot sa sunod nga miting sa pakigsabot.
Ilha ang mga ngalan sa mga lider sa ward (mga lalaki ug mga babaye). Planoha kon unsa ang inyong buhaton atol sa sunod nga bulan aron sa pagpalambo og mas lig-on nga mga relasyon uban kanila ug sa pagsuporta kanila sa ilang misyonaryo nga mga paningkamot.
Pangita pinaagi sa Isangyaw ang Akong Ebanghelyo nga App
Ang Isangyaw ang Akong Ebanghelyo nga app usa ka nindot nga kapanguhaan alang sa pagpangita og mga tawo nga katudloan. Ang mga misyonaryo kinsa makanunayon nga mogamit sa mga feature niini nga app mas malamposon sa pagpangita. Aron mahimong makasinati niini nga mga feature, tan-awa ang pagbansay nga gihatag diha sulod sa app. Magmahimong sensitibo sa espirituwal nga mga pag-aghat nga mahimo ninyong madawat samtang rebyohon ninyo ang mga ngalan sa mga tawo.
Ang app naglakip og impormasyon mahitungod sa mga tawo kinsa kaniadto gi-refer, gikontak, o gitudloan. Pipila niini nga mga tawo tingali ganahan nga mahimamat ang mga misyonaryo pag-usab. Tingali sila usab adunay lain nga mga tawo nga tingali interesado sa pagkat-on mahitungod sa ebanghelyo.
Sa inyong pagplano, gamita ang mapa ug ang mga filter diha sa app aron sa paghatag og prayoridad kon kinsa nga mga tawo ang bisitahon. Tan-awa ang ilang impormasyon ug hibaloi kon sa unsang paagi sila nakaplagan. Tan-awa kon adunay usa ka rekord mahitungod sa mga miyembro kinsa mitabang kanila. Gamita kini nga impormasyon sa pagtino kon unsa ang labing maayo nga paagi sa pagkontak nila og usab.
Imahe
mga misyonaryo nga nagtuon diha sa mga telepono
Gamita ang mga filter nga feature diha sa app aron sa pag-ila sa tanan niadtong kinsa:
Adunay kanhi nga nakaeskedyul nga petsa sa bunyag apan wala mabunyagi.
Mitambong og panagtigom alang sa sakramento labing menos kausa apan wala mabunyagi.
Nakadawat og sobra sa tulo ka leksiyon.
Wala makontak bag-ohay lang.
Kon ang mga tawo nga inyong makontak dili interesado nga matudloan o mopili nga mohunong sa pagdawat og mga bisita, irekord kana nga impormasyon diha sa app. Irekord kon unsaon ninyo nga magpabilin nga adunay kontak kanila ug maamumahan sila hangtod nga sila andam na sa pagkat-on og dugang. Pananglitan, ikonsiderar ang pag-imbitar kanila sa pag-sign up alang sa serye sa mga email aron makadawat og mga mensahe mahitungod ni Jesukristo o sa ubang mga hilisgotan sa ebanghelyo. Mahimong makigkonektar gihapon mo nila pinaagi sa usa ka miyembro kinsa makatubag og mga pangutana ug makaamuma sa ilang interes ug panaghigalaay. Pagtakda og pahinumdom diha sa app aron sa pag-follow up kanila. Pangutana kon nakaila ba sila og laing tawo kinsa tingali mahimong interesado.
Makapangita usab kamo og mga tawo nga katudloan pinaagi sa Isangyaw ang Akong Ebanghelyo nga app pinaagi sa paggamit sa mga filter o mga grupo aron sa pagpadala og mga mensahe sa grupo. Mahimo kining usa ka nindot nga paagi sa pagpahibalo sa mga tawo mahitungod sa mga panghitabo sama sa mga kalihokan sa ward ug mga tulumanon sa bunyag. Pag-follow up gamit ang personal nga mga imbitasyon ngadto niini nga mga panghitabo.
Pagtuon uban sa Kompanyon
Aron makita kon unsa ka nindot nga kapanguhaan ang Isangyaw ang Akong Ebanghelyo nga app sa pagpangita, sulayi ang mosunod nga mga kalihokan. Samtang inyong buhaton, hatagi og pagtagad ang mga impresyon nga inyong madawat.
Gamit ang usa ka filter, ilha ang tanang tawo kinsa natudloan og tulo o daghan pa mga leksiyon. Imbitara sila sa tinagsa-tagsa nga mosimba karong Dominggo.
Paghimo og filter ug pangitaa ang tanan kinsa adunay nakaeskedyul nga petsa sa bunyag ug misimba og labing menos kaduha.
Planoha nga tinagsa-tagsa nga padad-an og mensahe ang mga tawo nga moapil og usa ka kalihokan sa ward o proyekto sa pagserbisyo. Usahay mahimo kang magpadala og mensahe sa grupo ug mo-follow up sa mga tawo sa tinagsa-tagsa.
Hisgoti uban sa imong kompanyon kadtong kinsa inyong nabati nga giaghat. Paghimo og mga plano sa pagbisita o kondili sa pagkontak kanila sa labing daling panahon.
Pagpangita pinaagi sa Pagserbisyo
Mohatag og mga Oportunidad alang sa mga Tawo sa Pagduol ug Pagtabang
Ang mga tawo makabaton og positibo nga mga kasinatian ug makakonektar sa mga misyonaryo ug sa lokal nga mga miyembro diha sa mga kalihokan sa pagserbisyo. Daghang mga tawo ang malipayon sa pagpakigbahin sa ilang mga talento, mga kahanas, o mga serbisyo ug gikinahanglan lang nga imbitaron.
Imbitara ang mga tawo sa pag-apil diha sa mga kalihokan sa pagserbisyo nga giorganisar sa ward. Makakonektar gihapon kamo sa mga tawo ngadto sa mga oportunidad sa pagserbisyo sama niadtong anaa sa JustServe.org kon kini anaa. Samtang kamo moserbisyo kuyog ang uban, magkahiusa kamo sa usa ka gamhanan nga paagi.
Pagtanyag og Serbisyo
Sama sa Manluluwas, “[p]aghimog mga kaayohan” (Mga Buhat 10:38; tan-awa usab sa “Paghimo og mga Kaayohan” sa kapitulo 1). Pag-ampo nga mahibalo sa mga oportunidad sa paghimo og kaayohan sa matag adlaw. Usahay ang inyong pagserbisyo giplano, apan kasagaran wala kini planoha. Pangita og yano ug dihadiha nga mga paagi sa pagserbisyo, pagtabang, ug pagbayaw sa mga tawo. Hinumdomi nga ang Ginoo migahin og wala damha nga mga oportunidad sa pagtabang ug pagpanalangin sa uban.
Moserbisyo uban sa usa ka sinsero nga tinguha sa pagtabang sa mga tawo. Kon ang pagserbisyo mosangpot ngadto sa usa ka oportunidad sa pagtudlo, pagmapasalamaton. Kon dili, nan pagmapasalamaton nga nakahimo og kaayohan alang sa usa ka tawo. Tubaga ang mga pangutana kon ang mga tawo mangutana niini. Kon mopahayag og interes ang usa ka tawo, tubaga og kadiyot ug sabota nga magkita sa laing panahon aron sa pagpakigbahin og mensahe.
Seguroha nga mosunod sa mga sumbanan alang sa pagserbisyo diha sa Mga Sumbanan sa Misyonaryo alang sa mga Disipulo ni Jesukristo, 2.7 ug 7.2.
Pangita og mga Tawo kon Hain Sila
Ang pagpangita og mga tawo kon hain sila magsugod sa pagpaningkamot sa pagtan-aw kanila sama sa pagtan-aw sa Dios kanila. Hunahunaa nga tingali nagiyahan kamo sa pakig-estorya niini nga tawo, o tingali siya ang nagiyahan diha kaninyo. Tinguhaa nga makasabot sa espirituwal nga mga panginahanglan ug mga tinguha sa mga tawo. Hibaloi kon unsay labing importante ngadto kanila, ilabi na sa ilang mga relasyon sa pamilya ug sa Dios. Mahimong mangutana ka og sama sa ubos—ug dayon sinserong maminaw:
Unsa gayod ang gihatagan nimo og bili?
Unsay makahatag kanimo og kalipay?
Unsay imong gusto alang sa imong kaugalingon nga kaugmaon ug alang niadtong imong gihigugma?
Unsa nga mga hagit ang imong giatubang sa pagkab-ot sa imong mga gilaoman ug mga gipangandoy?
Unsa nga mga aspeto sa imong kinabuhi ang ganahan nimo nga palamboon?
Pagtinguha og inspirasyon samtang mamalandong kamo sa unsay inyong nakat-onan mahitungod sa mga gilaoman ug mga tinguha sa mga tawo. Unsa nga mga kamatuoran sa ebanghelyo nga natural nga mokonektar sa unsay iyang gusto?
Ikonsiderar ang inyong pamaagi gikan sa panglantaw niana nga tawo. Unsay iyang nahibaloan mahitungod kaninyo? Unsay inyong ikatanyag nga mahimong makatabang? Gibati ba sa tawo nga ang usa ka pakighinabi uban kaninyo mahimong bililhon?
Ikonsiderar ang lainlain nga mga rason nga ang mga tawo gusto nga makaila kaninyo, sa ubang mga miyembro, o sa Simbahan. Ang pipila ka ehemplo sa unsay inyong mahatag gilatid sa ubos.
Imahe
mga misyonaryo nga nakig-istorya sa babaye
Paghatag og mga Kasinatian o Impormasyon nga Ilang Hatagan og Bili
Gamita ang mga kapanguhaan sa Simbahan ug ang inyong kaugalingon nga mga talento ug mga kalig-on sa pagkonektar ngadto sa mga interes sa usa ka tawo. Tinguhaa ang tabang sa Langitnong Amahan sa pagtanyag og impormasyon o mga kasinatian nga hatagan og bili sa tawo.
Magmahimong bukas sa inspirasyon ug magmamugnaon samtang maghunahuna kamo mahitungod sa lainlain nga mga matang sa mga kasinatian o impormasyon nga inyong mahatag. Ang pipila ka ideya gilista sa ubos.
Ipakigbahin ang link sa usa ka kapanguhaan sa Simbahan nga maghatag og impormasyon mahitungod sa usa ka butang nga makapainteres kanila.
Pagpasiugda og usa ka kalihokan sama sa usa ka debosyonal (sa personal o live nga gi-stream).
Pagtanyag og usa ka butang diha sa usa ka lokal nga pagpundok o kalihokan (pananglitan, paghimo og libre nga mga family history tree diha sa usa ka lokal nga merkado).
Pagtanyag sa pagtudlo og usa ka klase.
Pag-organisar og usa ka klase sa pagtuon sa kasulatan, o pagtanyag sa pagbasa sa Biblia ug sa ubang mga kasulatan kauban sila.
Pagtudlo og Iningles isip ikaduhang pinulongan.
Ipahibalo sa publiko ang lokal nga mga kalihokan sa Simbahan sama sa usa ka holiday nga party o mga klase sa pagbarog pinaagi sa kinaugalingong pagpaningkamot. Gamit og mga flyer o social media.
Imbitara sila ngadto sa usa ka tulumanon sa bunyag.
Motanyag nga ilibot sila sa lokal nga meetinghouse.
Usa sa labing bililhon nga mga kasinatian nga makatabang kamo nga masinati sa mga tawo mao ang pagtambong og usa ka tulumanon sa Simbahan. Imbitara sila ug ipasabot kon unsa kini sama. Sultihi sila kon sa unsang paagi nga ang pagtambong og panagtigom alang sa sakramento mopanalangin sa ilang mga kinabuhi.
Tinguhaa ang Pagpalambo og Tinud-anay nga mga Relasyon
Daghang mga tawo ang ganahan nga makighimamat sa uban diha sa ilang komunidad o mas makig-ila-ila kanila. Ang uban nga mga tawo nag-inusara. Pipila sa mga ideya alang sa pagtabang sa pagpalambo og tinud-anay nga mga relasyon gilista sa ubos.
Bisitaha ang mga tawo kinsa bag-ohay lang nga mibalhin diha sa dapit aron sa pag-abi-abi kanila.
Ipaila ang mga tawo diha sa komunidad ngadto sa mga miyembro kinsa adunay susama nga mga interes.
Imbitara ang mga tawo sa mga miting sa ward, mga kalihokan, ug sa mga open house.
Motanyag sa pagtabang kanila nga makonektar ngadto sa lider alang sa templo ug family history sa ward, kinsa makatabang nila nga makat-on og dugang mahitungod sa ilang namatay na nga mga sakop sa pamilya.
Motanyag sa pagtudlo sa mga tawo unsaon sa pagpahigayon og home evening o pagbasa sa mga kasulatan isip usa ka pamilya. (Tan-awa sa Kinatibuk-ang Tamdanan nga Basahon, 2.2.4, alang sa makatabang nga mga baroganan nga mapahiangay ngadto sa mga kahimtang sa mga tawo.)
Imbitara ang mga tawo nga anaa na sa husto nga edad sa pagtambong og seminary, pagtambong og institute, o moapil sa BYU–Pathway Worldwide.
Adunay daghang dungganon nga mga pamaagi sa pagpangita niadtong kinsa giandam alang sa gipahiuli nga ebanghelyo. Buhata kon unsay inyong mahimo aron mabutang diha sa agianan niadtong kinsa giandam.
Pagtuon uban sa Kompanyon
Ilha ang pipila ka ideya niini nga seksiyon nga wala ninyo masulayi. Paghimo og mga plano nga sulayan ang pipila ka ideya atol sa sunod semana.
Kontaka ang mga Tawo nga Gi-refer nganha Kaninyo
Ang mga tawo nga gi-refer kaninyo mahimong andam na nga modawat sa ebanghelyo ni Jesukristo. Ang mga referral mahimong maggikan sa mga miyembro sa Simbahan, sa ubang mga misyonaryo, sa punoang buhatan sa Simbahan, ug sa mga paningkamot sa lokal nga social media.
Kontaka Dayon
Kon ang usa ka tawo gi-refer nganha kaninyo pinaagi sa punoang buhatan o sa lokal nga social media, rebyoha ang impormasyon diha sa Isangyaw ang Akong Ebanghelyo nga app mahitungod sa ilang mga interes. Sulayi nga kontakon sila sa labing daling panahon.
Imahe
misyonaryo nga natuktok sa pultahan
Gamita ang mosunod nga mga sumbanan kon kontakon ang mga tawo nga gi-refer kaninyo:
Kon ang tawo gi-refer sa usa ka miyembro o sa ubang mga misyonaryo, kontaka ang tawo kinsa mipadala sa referral aron makahibalo og dugang pa. Kon mga misyonaryo ang mi-refer sa tawo, mahimo silang motudlo uban kaninyo sa birtuwal nga paagi kon ang ilang lider sa misyon motugot. Ang mga miyembro mahimong personal o birtuwal nga moapil kaninyo aron mosalmot sa pagtudlo.
Sulayi dayon sa pagkontak ang tawo pinaagi sa usa ka pagbisita, tawag, text, email, o laing matang sa komunikasyon. Kon ang tawo dili motubag, sulayi siya sa pagkontak sa lahi nga oras sa adlaw.
Kon ang inyong pasiuna nga pagkontak pinaagi sa tawag, text, o email, pakigsabot og oras nga personal nga makigkita o pinaagi sa teknolohiya.
Isip usa ka managkompanyon, rebyoha ang hangyo sa tawo ug ilha ang iyang mga panginahanglan ug mga interes. Tinoa kon sa unsang paagi nga ang ebanghelyo makatabang sa pagtubag niadto nga mga panginahanglan.
Kon magkita kamo, dad-a ang bisan unsa nga gihangyo nga mga butang, sama sa Basahon ni Mormon. Ipakigbahin ang mga kamatuoran sa ebanghelyo gikan sa mga leksiyon sa misyonaryo nga motubag sa mga interes o mga panginahanglan sa tawo.
Usahay ang mga tawo nga gi-refer mahimong mogiya kaninyo ngadto sa uban nga giandam sa Dios. Kon ang mga tawo nga inyong gikontak dili interesado, pangutana kon sila aduna bay kaila nga tingali interesado o nagkinahanglan og paglaom sa ilang mga kinabuhi. Siguro gigiyahan kamo ngadto niining tawhana tungod kay may laing tawo diha sa panimalay o sa kasilinganan ang andam alang sa ebanghelyo.
Kon dili madayon ang panagsabot sa usa ka tawo, ikonsiderar kon unsaon ninyo paghimo og laing misyonaryo nga buhat diha sa dapit. Ang Isangyaw ang Akong Ebanghelyo nga app makatabang kaninyo sa pagpangita og mga tawo diha sa duol kinsa nakontak o natudloan na kaniadto.
I-refer ang mga Tawo ngadto sa mga Misyonaryo didto sa Laing Dapit
Kon makahimamat mo og mga tawo nga interesado nga magkat-on pa og dugang mahitungod sa ebanghelyo apan nagpuyo gawas sa dapit nga gisangon kaninyo, ipaila sila ngadto sa ebanghelyo. Dayon tabangi sila nga maandam sa pakighimamat sa mga misyonaryo ug sa mga miyembro diin sila nagpuyo.
Uban sa pagtugot sa inyong presidente sa misyon, mahimong magpadayon kamo sa pagsuporta niini nga mga tawo aron tabangan sila nga makadawat sa ebanghelyo (tan-awa sa Mga Sumbanan sa Misyonaryo, 7.5.4).
Pagtuon uban sa Kompanyon
Rebyoha ang tanang tawo kinsa na-refer diha sa inyong dapit sulod sa miaging bulan. Ilha ang bisan kinsa nga tawo nga wala ninyo makontak, ug sulayi sa pagkontak nila og usab. Desisyoni kon kinsa niadtong mga nakontak na kaniadto ang kinahanglang bisitahan pag-usab. I-update kini nga mga rekord diha sa Isangyaw ang Akong Ebanghelyo nga app.
Imahe
mga misyonaryo nga nag-estorya pinaagi sa telepono
Gamita ang Teknolohiya
Adunay daghang paagi nga kamo makagamit sa teknolohiya aron sa pagpangita og mga tawo nga katudloan. Pipila sa mga ehemplo gilista sa ubos:
Gamita ang social media sa pakigtambayayong uban sa mga miyembro aron sa pagpangita og mga tawo.
Pag-ugmad og mga relasyon pinaagi sa pagkontak gamit ang email ug social media.
Pagpakigbahin og makapabayaw nga mga kasulatan, mga kinutlo, ug mga mensahe sa ebanghelyo.
Tabangi ang mga tawo nga mogamit sa FamilySearch.org aron magkat-on og dugang mahitungod sa ilang namatay na nga mga sakop sa pamilya.
Pagtanyag og online nga mga klase aron sa pagtudlo og mga kahanas.
Paghimo og tukma nga mga koneksiyon pinaagi sa susama og interes nga mga grupo sa online.
Paghimo og usa ka post nga nagsulti mahitungod sa umaabot nga mga kalihokan sa ward.
Ang paggamit sa teknolohiya usa ka importante nga paagi aron sa pagpabilin og “daghang pasol diha sa tubig” sa tibuok adlaw. Agig dugang ngadto sa inyong ubang mga paningkamot sa pagpangita, gamit og lain-laing mga paagi sa paggamit sa internet sa pagpangita og mga tawo nga katudloan.
Imahe
Elder David A. Bednar
Si Elder David A. Bednar mitudlo: “Ang tekonolohiya naghatag og daghang gamhanan nga mga paagi diin kita makasangyaw ‘kang Jesukristo lamang ug kaniya ingon nga linansang sa krus’ ug ‘mosangyaw og paghinulsol ngadto sa mga katawhan’ [1 Mga Taga-Corinto 2:2; Doktrina ug mga Pakigsaad 44:3]. Ang nagtubo nga henerasyon labihan gayod nga naandam sa pagpaminaw ug pagkat-on mahitungod sa gipahiuli nga ebanghelyo pinaagi niini nga mga pamaagi sa komunikasyon” (“They Should Proclaim These Things unto the World,” seminar for new mission presidents, Hunyo 24, 2016).
Pagtuon uban sa Kompanyon
Hibaloi kon unsay gibuhat sa inyong misyon gamit ang social media. Hisgoti ngadto sa imong kompanyon kon unsaon ninyo paghimo og mga post sa social media nga nahiuyon niini. Ang inyong mga post kinahanglang motuman sa palisiya sa Simbahan bahin sa Internet (tan-awa ang “Internet” diha sa seksiyon 38.8 sa Kinatibuk-ang Tamdanan nga Basahon).
Kon ang inyong misyon adunay usa ka espesyalista sa social media, gamita ang iyang kahanas samtang kamo maghimo og mga post sa social media.
Imahe
duha ka babaye nga nag-estoryahanay
Gamita ang Family History
Ang family history usa ka laing paagi nga makakita kamo og mga tawo nga katudloan. Sa tibuok kalibotan, ang Espiritu nag-impluwensya og minilyon ka tawo sa pag-ila sa ilang namatay na nga mga katigulangan. Daghan ang nagtinguha og usa ka mas lig-on nga koneksiyon sa ilang nagkadakong pamilya. Mahimong mosangpot kini sa usa ka tinguha sa pagpangita og usa ka koneksiyon ug kailhanan isip kabahin sa pamilya sa Dios.
Unsa ang atong gitawag usahay nga ang espiritu ni Elijah mao ang impluwensya sa Espiritu Santo nga nagdasig sa mga tawo sa pag-ila, pagrekord, ug paghinumdom sa ilang mga sakop sa pamilya—kaniadto ug karon (tan-awa sa Malaquias 4:5–6).
Sa inyong pagpangita, mahimo ninyong ipaila ang mga tawo sa FamilySearch.org o dapiton sila sa pag-download sa FamilySearch Tree app o sa FamilySearch Memories app. Mahimo usab ninyong hatagan sila og usa ka kopya sa booklet nga Akong Pamilya: Mga Istorya Nga Naghiusa Namo. Kini nga mga kapanguhaan motabang sa mga tawo nga makadiskobre sa mga paryente ug mga katigulangan ug mopundok sa ilang mga estorya.
Tinoa kon unsa nga mga kapanguhaan sa family history ang anaa sa inyong dapit ug kon sa unsang paagi kini makatabang sa mga tawo nga inyong makontak. Ang lider alang sa templo ug family history sa ward makatabang sa mga tawo nga moila sa ilang namatay nga mga katigulangan.
Dapita ang mga tawo sa pagpakigbahin kaninyo og mga handomanan sa ilang mga minahal. Kon ilang buhaton, mahimong mabati nila ang Espiritu Santo nga magpamatuod kanila mahitungod sa importansiya sa mga pamilya sa plano sa Dios. Kini nga mga higayon mahimong mosangpot ngadto sa natural nga mga panag-estoryahanay mahitungod sa katuyoan sa kinabuhi, sa plano sa Dios sa kalipay, ug sa papel sa Manluluwas niana nga plano.
Kon tukma, tudloi ang mga tawo sa doktrina mahitungod kon ngano nga ang mga miyembro sa Simbahan naghimo sa buhat sa family history ug kon sa unsang paagi nga kini may kalabotan sa mga templo.
Pag-ampo aron masayod sa mga oportunidad sa paggamit sa family history diha sa inyong mga paningkamot sa pagpangita og katudloan. Magmamugnaon, ug mahimong pamilyar sa anaa nga mga kapanguhaan.
Pagtuon sa Kasulatan
Tun-i ang mosunod nga mga kasulatan mahitungod sa family history. Irekord ang unsay inyong nakat-onan.
Sulayi ang usa o dugang pa sa mosunod nga mga kalihokan aron sa pagtabang kaninyo sa pagpangita pinaagi sa family history.
Pakigsabot nga mobisita sa usa ka miyembro nga adunay kasinatian sa family history. Hibaloi kon unsa nga mga serbisyo ang anaa pinaagi sa inyong lider alang sa templo ug family history sa ward.
Pagpraktis kon unsaon ninyo pagtanyag og tabang sa family history niadtong inyong mahimamat. Paghimo og mga plano sa pagtanyag sa family history diha sa inyong mga paningkamot sa pagpangita og katudloan.
Basaha ug hisgoti ang Families and Temples nga booklet aron makaangkon og usa ka mas lig-on nga pagsabot sa buhat sa family history. Isulat ang unsay imong nakat-onan diha sa imong journal sa pagtuon.
Gamita ang Akong Pamilya nga booklet o FamilySearch.org nga mga kapanguhaan samtang mangita kamo og mga tawo nga katudloan.
Kon posible, pagpahigayon og open house, pagtudlo og usa ka klase sa family history diha sa usa ka publiko nga dapit, o pagtanyag og mga konsultasyon.
Pangita Kon Magtudlo Kamo
Ang pagpangita ug pagtudlo adunay kalabotan nga mga kalihokan. Ang mga tawo nga inyong gitudloan sa kasagaran adunay mga higala o mga paryente kinsa andam na nga modawat sa gipahiuli nga ebanghelyo. Samtang kadtong inyong gitudloan makasinati sa mga panalangin sa ebanghelyo, ang ilang tinguha sa pagpakigbahin niini molambo (tan-awa sa 1 Nephi 8:12). Sa tanang sitwasyon—sama sa pagpangita, pagtudlo, pakigtambayayong uban sa mga miyembro—pangutana, “Kinsa man ang inyong nailhan nga makabenepisyo niini nga mensahe?”
Kon kadtong inyong gitudloan nangandam alang sa ilang tulumanon sa bunyag, pangutan-a sila mahitungod sa pamilya ug mga higala nga ganahan nilang dapiton sa ilang bunyag. Paghimo og mga plano sa pagdapit ug pag-awhag sa tanan nga motambong. Ang Espiritu kusog kaayong mabati atol sa usa ka tulumanon sa bunyag.
Pagtuon uban sa Kompanyon
Rebyoha ang lista sa mga tawo nga inyong gitudloan. Paghimo og lista niadtong inyong gipangayoan og mga referral ug niadtong wala pa ninyo pangayoi. Pagpraktis kon unsaon ninyo sa pagpadangat og imbitasyon sa pagpangayo og referral ngadto niadtong anaa sa kada grupo. Sa inyong planner, paghimo og usa ka pahinumdom sa pagpahigayon niini nga imbitasyon sa inyong sunod nga mga pagbisita.
Imahe
mga babaye nga nagtan-aw sa telepono
Motudlo Kon Makakita Kamo
Samtang inyong mahimamat ang mga tawo ug maila ang ilang mga interes ug mga panginahanglan, pagpalambo og kinaiya sa pagsugod og tudlo ug pagpakigbahin sa inyong pagpamatuod. Makakita kamo og mas daghang tawo nga katudloan samtang magpamatuod kamo sa Manluluwas ug sa Iyang ebanghelyo ug motugot nila sa pagbati sa gahom sa Espiritu Santo.
Ikonsiderar ang pagtudlo sa mga hilisgotan, sama sa kalipay, kalisdanan, ang katuyoan sa kinabuhi, o kamatayon. Bisan unsa ang inyong pasiuna nga pamaagi, hisgoti dayon ug sa yano nga paagi ang Manluluwas, ang Iyang ebanghelyo, ug ang Iyang pagtawag ni Propeta Joseph Smith. Kini mao ang atong talagsaon nga mensahe sa kalibotan.
Ang mosunod nga mga seksiyon maghatag og mga ehemplo kon sa unsang paagi ninyo matudlo og kadiyot ang mahitungod sa Pagpahiuli sa ebanghelyo ni Jesukristo ug ang importansiya sa pamilya.
Pagtudlo ug Pagpamatuod mahitungod sa Pagpahiuli sa Ebanghelyo ni Jesukristo
Mopamatuod bahin ni Jesukristo ug motudlo og mubo nga mga katingbanan sa gipahiuli nga kamatuoran. Pananglitan, mahimo kamong mopamatuod kabahin sa gipahiuli nga ebanghelyo ni Jesukristo sa duha o tulo lamang ka kapahayag:
Human nawala sulod sa mga siglo, ang mga kamatuoran gipahiuli pinaagi sa usa ka mahigugmaon nga Dios pinaagi sa usa ka buhing propeta. Kami adunay ebidensya niini nga inyong makuptan sa inyong mga kamot, mabasa, ug mapamalandong diha sa inyong kasingkasing. Kami moimbitar kaninyo nga mobasa ug mag-ampo aron makat-on sa kamatuoran niini mismo sa inyong kaugalingon. Motugot ba kamo kanamo sa …
Kon kamo aduna pay dugang nga oras, mahimo kamong mosulti og dugang:
Simple lang ang among mensahe. Ang Dios mao ang atong Amahan. Kita Iyang mga anak. Kabahin kita sa Iyang pamilya. Siya personal nga nakaila ug nahigugma kanato. Gusto Siya nga kita makasinati og hingpit nga kalipay. Gikan sa sinugdanan sa kalibotan, Siya misunod og usa ka sundanan sa pagtabang uban ang gugma aron ipadayag ang ebanghelyo ni Jesukristo aron ang Iyang mga anak masayod kon unsaon nga makabalik ngadto Kaniya. Iyang gipadayag ang ebanghelyo ngadto sa mga propeta sama kang Adan, Noe, Abraham, ug Moises. Apan daghang tawo ang balik-balik nga mipili sa pagsalikway sa ebanghelyo ug sa mga propeta nga mitudlo niini. Duha ka libo ka tuig na ang milabay, si Jesukristo Mismo mitudlo sa Iyang ebanghelyo. Ang mga tawo misalikway pa gani ni Jesus. Human sa kamatayon sa Apostoles ni Jesus, ang mga tawo mituis sa tinuod nga doktrina, sama sa Dios nga Kapangulohan. Giusab pod nila ang mga ordinansa, sama sa bunyag.
Ang among imbitasyon nganha ninyo mao ang pagdugang sa mga kamatuoran nga gihatagan na ninyo og bili. Hunahunaa ang ebidensya nga ang atong Langitnong Amahan sa makausa pa mitabang sa Iyang mga anak uban sa gugma ug mipadayag sa tinuod nga doktrina ug mga ordinansa ngadto sa usa ka propeta. Ang ngalan niining mao nga propeta mao si Joseph Smith. Ang ebidensya niini nga kamatuoran makita diha sa usa ka basahon—ang Basahon ni Mormon. Makuptan ninyo kini sa inyong mga kamot, basaha kini, ug pamalandongi ang kamatuoran niini diha sa inyong hunahuna ug kasingkasing. Imbitaron namo kamo nga mosimba aron makakat-on og dugang pa.
Pagtudlo ug Pagpamatuod mahitungod sa Importansiya sa Pamilya
Ang paghisgot sa importansiya sa pamilya motabang kaninyo sa pagpangita og mga tawo nga katudloan, bisan kon sila adunay usa ka Kristiyano nga kaagi o dili man Kristiyano. Dali ninyong makonektar ang unsay nahibaloan sa kasagaran nga mga tawo mahitungod sa pamilya ngadto plano sa Langitnong Amahan bahin sa kaluwasan. Mahimong mosulti kamo og ingon niini:
Ang atong pamilya mahimong usa sa ilabing importante nga mga impluwensya sa atong kinabuhi. Ang atong pamilya naghigot kanato ngadto sa usag usa ug makatabang kanato nga mobati nga gikinahanglan kita ug gihigugma.
Ang pagbaton og usa ka lig-on, malipayon nga pamilya mao ang labing taas nga prayoridad alang sa daghang mga tawo. Ang pagbaton og usa ka lig-on nga kaminyoon ug ang pagpadako og mga anak sa kalibotan karon mahimong mahagiton kaayo.
Makahimo dayon kamo og transisyon ngadto sa mensahe sa Pagpahiuli:
Nahimo na kamong parte sa pamilya sa Dios sukad sa wala pa kamo matawo. Siya ang atong Amahan. Ang Langitnong Amahan gusto nga kita mobalik sa pagpuyo uban Kaniya. Kamo Iyang anak, ug Siya nahigugma kaninyo. Siya adunay plano aron sa pagtabang kaninyo nga makabalik ngadto Kaniya.
Kini nga mga kamaturoan ug uban pa napahiuli nganhi sa kalibotan pinaagi sa atong mahigugmaon nga Langitnong Amahan pinaagi sa usa ka buhi nga propeta. Kini nga mga kamatuoran makatabang kanato nga makasabot sa atong luna sa pamilya sa Dios. Mahimo bang motudlo kami ninyo og dugang kabahin niini nga mga kamatuoran? Mosimba ba kamo aron mas makakat-on pa kamo?
Pagtuon uban sa Kompanyon
Pag-andam og usa ka minuto nga mensahe base sa usa sa mga lekisyon diha sa kapitulo 3. Pagpraktis sa pagpakigbahin niini sa usag usa. Paghunahuna og mga paagi nga inyong mapakigbahin kini nga mensahe diha sa usa ka sitwasyon sa pagpangita. Pagplano sa pagpakigbahin niini diha sa usa ka tukma nga sitwasyon aron sa pag-imbitar sa uban nga magkat-on og dugang mahitungod ni Jesukristo.
Walay Paningkamot nga Mausik
Kon ang mga tawo mopili nga dili magkat-on og dugang pa mahitungod sa gipahiuli nga ebanghelyo, ang inyong mga paningkamot wala mausik. Tingali nagtanom kamo og usa ka binhi nga motubo sa laing higayon. Kon mahitabo man kana o dili, ang inyong serbisyo ug mga pagpahayag sa tinud-anay nga gugma mopanalangin kaninyo ug kanila.
Kon ang mga tawo dili andam nga modawat sa ebanghelyo, tan-awa kon unsa pa ang inyong mahimo aron sa pagpalambo sa ilang kinabuhi. Ang mga relasyon nga inyong naugmad mahinungdanon gihapon ug bililhon. Padayon nga mahimong usa ka higala.
Ang mga tawo usahay nagkinahanglan og panahon sa pagkonsiderar sa mga kausaban nga gihangyo gikan kanila. Tabangi sila nga makadawat og mga mensahe pinaagi sa mga email o mga website sa Simbahan. Kini nga mga mensahe mahimong makatabang sa pag-andam sa mga tawo nga modawat og mga imbitasyon nga magkat-on og dugang sa umaabot.
Kon ang usa ka tawo dili modawat sa ebanghelyo, natural lang nga masagmuyo. Apan, samtang modangop kamo sa Ginoo sa ingon niana nga mga panahon, Siya misaad, “lig-onon ug tabangan Ko ikaw” (Isaias 41:10).
Pinaagi sa hugot nga pagtuo kang Kristo, makakaplag kamo og kalinaw ug kasegurohan mahitungod sa inyong mga paningkamot. Pagmentinar og usa ka panglantaw kon kinsa kamo ug kon nganong nagserbisyo kamo sa Ginoo isip usa ka misyonaryo. Ang hugot nga pagtuo motabang kanimo nga mopadayon sa unahan ug magpadayon sa matarong nga mga tinguha.
Mga Ideya sa Pagtuon ug Paggamit
Personal nga Pagtuon
Basaha ang Juan 15:12–13, 21:15–17, 1 Mga Taga-Tesalonica 2, ug Mosiah 18:8–10. Unsa ka maayo ang inyong pagtuman sa inyong responsibilidad sa paghigugma ug pagserbisyo sa uban? Unsaon man ninyo sa pagpalambo? Isulat ang inyong tubag diha sa inyong journal sa pagtuon.
Basaha ang 3 Nephi 18:31–32, Alma 24:7–8, ug Alma 32:41. Unsa ang gitudlo niini nga mga bersikulo mahitungod sa pagpaningkamot sa mga tawo kinsa natudloan kaniadto? Irekord ang unsay imong nakat-onan diha sa imong journal sa pagtuon. Itudlo kini ngadto sa imong kompanyon.
Pagtuon uban sa Kompanyon ug Panagbaylo sa Kompanyon
Paghimo og mga plano sa pakighimamat sa bag-o nga mga miyembro diha sa inyong dapit. Kon gikinahanglan, gamita ang Isangyaw ang Akong Ebanghelyo [Preach My Gospel] nga app aron sa pag-ila kanila. Ipangutana ang sama niini:
Sa unsang paagi nga kamo naandam alang sa ebanghelyo?
Kanus-a ug sa unsang paagi man kamo unang nakahibalo sa Simbahan?
Unsa man ang nakaaghat kaninyo nga makighimamat sa mga misyonaryo?
Unsaon man namo nga makasuporta sa inyong padayon nga pag-uswag?
Gikan niini nga mga pakighimamat, unsa ang inyong nakat-onan mahitungod sa pagpangita og mga tawo kinsa mouswag ngadto sa bunyag? Paghimo og mga plano sa paggamit sa unsay inyong nakat-onan niini nga semana.
Rebyoha ang matag usa sa mosunod nga mga hilisgotan. Gamit ang mga leksiyon diha sa kapitulo 3, pag-andam og usa ka yano nga pamaagi sa pagpangita. Pagpraktis og tudlo diha sa usa ka sitwasyon sa pagpangita.
Mibati og panginahanglan alang sa dugang nga direksiyon ug katuyoan sa kinabuhi
Gusto nga mas maduol ngadto sa Dios
Nanginahanglan og tabang sa importante nga mga desisyon
Konseho sa District, mga Komperensiya sa Zone, ug Konseho sa Pagpangulo sa Misyon
Hisgoti kon sa unsang paagi nga kini nga mga ideya nakatabang sa mga misyonaryo nga makakita og mga tawo nga katudloan.
Ilista ang ubang mga ideya alang sa pagpangita og mga tawo nga katudloan. Imbitara ang mga misyonaryo sa pagpakita sa ilang mga ideya.
Imbitara ang mga misyonaryo sa pagtakda og personal nga mga tumong alang sa pagpalambo sa ilang mga paningkamot sa pagpangita.
Paghimo og usa ka lista sa pipila ka oportunidad sa pagpangita.
Sangoni ang matag misyonaryo og usa sa mga oportunidad. Hatagi ang matag misyonaryo og lima ka minuto nga mag-andam kon unsaon niya pagtudlo ang usa ka bahin sa leksiyon diha sa gisangon nga sitwasyon.
Hatagi og gibug-aton ang panginahanglan nga ipabiling tukma ang gitas-on sa mensahe alang sa sitwasyon.
Imbitara ang pipila ka misyonaryo sa pagtudlo sa leksiyon nga ilang giplano diha sa gisangon kanila nga sitwasyon.
Imbitara ang mga misyonaryo sa pagpraktis sa pagpakigbahin og usa ka minuto nga mensahe sa ebanghelyo ngadto sa usag usa. Mahimo kamong mopahigayon og nagkalainlaing mga sitwasyon sa pagpangita, sama sa pagtudlo diha sa balay sa miyembro, pagtudlo diha sa may pultahan, pagtudlo diha sa daplin sa dalan, o sa pagkontak og usa ka referral. Papraktisa ang mga misyonaryo sa pagtudlo sa kada usa niini nga mga sitwasyon.
Mga Lider sa Misyon ug Mga Magtatambag sa Misyon
Pakita og ehemplo kabahin sa miyembro-misyonaryo nga buhat diha sa inyong pamilya. Ipakigbahin ang inyong mga kasinatian ngadto sa mga misyonaryo ug mga miyembro.
Pakigtambag uban sa lokal nga mga lider sa pagkapari ug mga lider sa organisasyon kabahin sa labing maayo nga mga paagi alang sa mga misyonaryo sa pagpangita og mga tawo nga katudloan diha sa inyong misyon.
Pag-organisar og misyonaryo nga mga debosyonal diin makapamulong kamo ngadto sa mga tawo nga gitudloan diha sa inyong misyon. Pakigsabot uban sa lokal nga mga lider sa pagkapari aron ang mga miyembro makadala sa ilang mga higala. Imbitara ang bag-ong mga miyembro sa pagpakigbahin sa ilang mga pagpamatuod ug sa pagsugilon sa ilang mga estorya sa pagkakabig sa dili pa kamo mosulti.
Matag karon ug unya kuyog sa mga misyonaryo aron sa pagtabang kanila nga makakita og mga tawo nga katudloan.
