“Kapitulo 11: Tabangi ang mga Tawo sa Paghimo ug Pagtuman sa mga Pasalig,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Kapitulo 11,” Isangyaw ang Akong Ebanghelyo

Kapitulo 11

Tabangi ang mga Tawo sa Paghimo ug Pagtuman sa mga Pasalig

Hunahunaa Kini

Sa unsang paagi nga ang pagtuman sa mga pasalig adunay kalabotan sa pagkakabig?
Sa unsang paagi nga ang pagtuman sa mga pasalig adunay kalabotan sa pagtuman sa mga pakigsaad?
Unsaon nako sa paghatag sa mga imbitasyon aron matabangan ang mga tawo nga molambo sa espirituhanong paagi ug mapalig-on ang ilang pagtuo ni Jesukristo?
Nganong importante ang pagpakigbahin og usa ka sinsero nga pagpamatuod?
Unsa man nga mga panalangin ang akong masaad?
Unsaon nako nga makatabang sa mga tawo sa pagtuman sa mga pasalig?

Paghinulsol, Pasalig, ug Pagkakabig

Isip usa ka misyonaryo ug disipulo ni Jesukristo, ikaw nagtinguha sa kaluwasan sa mga kalag (tan-awa sa Mosiah 28:3). Ang Manluluwas “gamhanan sa pagluwas” niadtong kinsa motuman sa mga pakigsaad nga ilang gihimo pinaagi sa pagdawat sa mahinungdanon nga mga ordinansa sa pagkapari, sugod sa bunyag (tan-awa sa 2 Nephi 31:19). Ang paghatag sa mga imbitasyon ug pagtabang sa mga tawo sa pagtuman sa mga pasalig moandam kanila alang sa bunyag.

Ang mga tawo giluwas sa usa ka kondisyon sa paghinulsol (tan-awa sa Helaman 5:11). Ang paghinulsol mao ang hingpit ug sinsero nga pagbalik ngadto ni Jesukristo. Ang pasalig usa ka mahinungdanong bahin sa paghinulsol. Kon ikaw moimbitar sa mga tawo sa paghimo og mga pasalig isip kabahin sa imong pagtudlo, ikaw nag-imbitar kanila sa paghinulsol.

Ang pasalig nangahulogan sa pagpili og usa ka dalan sa pagbuhat ug pagsunod pinaagi niana nga pagpili. Ang makanunayong pagbuhat sa mga kamatuoran sa ebanghelyo mosangpot ngadto sa pagkakabig.

Ang pagkakabig mao ang kausaban sa mga gituohan, kasingkasing, ug kinabuhi sa tawo aron modawat ug mosunod sa kabubut-on sa Dios. Kini usa ka mahunahunaon nga desisyon nga mahimong usa ka disipulo ni Kristo. Ang pagkakabig motumaw samtang ang mga tawo mopakita og hugot nga pagtuo diha ni Kristo, maghinulsol sa ilang mga sala, magpabunyag, modawat sa gasa sa Espiritu Santo, ug molahutay hangtod sa kataposan. Ang Ginoo ug ang Iyang mga propeta nagtawag niini nga kausaban isip usa ka espirituhanong pagkatawo pag-usab (tan-awa sa Juan 3:3–5; Mosiah 27:25–26).

Ang Pag-ula sa Manluluwas nakapahimo sa pagkakabig nga posible, ug ang Espiritu Santo nagpahinabo niining dako nga kausaban sa kasingkasing (tan-awa sa Mosiah 5:2; Alma 5:12–14).

Ang pagkakabig usa ka proseso, dili usa ka higayon nga panghitabo. Ang pagtabang sa mga tawo nga mahimong makabig ngadto ni Jesukristo mao ang sentro sa imong misyonaryo nga katuyoan. Sumala sa giya sa Espiritu, ikaw moimbitar sa mga tawo sa paghimo og mga pasalig nga makatabang kanila nga molambo sa espirituhanong paagi ug mobati sa impluwensya sa Espiritu Santo sa ilang mga kinabuhi. Dayon imong suportahan ang mga tawo sa pagtuman sa mga pasalig nga ilang gihimo. Ikaw motabang kanila sa pagbuhat pinaagi sa hugot nga pagtuo ngadto sa malungtaron nga kausaban (tan-awa sa Mosiah 6:3).

Ang mga tawo kinsa motuman sa mga pasalig sa wala pa ang bunyag mas adunay kalagmitan sa paghimo ug pagtuman sa sagrado nga mga pakigsaad pagkahuman. Kon ikaw magtudlo sa mga tawo sa pagtuman sa mga pasalig, ikaw nagtudlo kanila sa pagtuman sa mga pakigsaad. Ang paghimo ug pagtuman sa mga pakigsaad mao ang usa ka mahinungdanon nga bahin sa ebanghelyo ni Jesukristo ug sa plano sa Dios alang sa Iyang mga anak.

Kini nga kapitulo naglakip og mga lagda alang sa paghatag og mga imbitasyon, pagsaad og mga panalangin, pagpakigbahin sa imong pagpamatuod, ug pagtabang sa mga tawo nga motuman sa ilang mga pasalig aron sila makaduol ngadto sa Manluluwas ug maluwas.

Paghatag sa mga Imbitasyon

Isip usa ka reperesentante ni Jesukristo, ikaw moimbitar sa mga tawo sa pagsunod Kaniya ug sa pagdawat sa kalipay sa Iyang ebanghelyo. Ikaw mohatag og piho nga mga imbitasyon alang kanila sa pagbuhat sa mga butang nga mopalig-on sa ilang patuo diha ni Kristo. Dayon ikaw mosuporta kanila sa pagtuman sa ilang mga pasalig.

Ang mga imbitasyon ug mga pasalig mahinungdanon alang sa mosunod nga mga rason:

Kini motabang sa mga tawo nga mosunod sa mga baroganan nga ilang nakat-onan aron sila mobati sa pamatuod nga pagsaksi sa Espiritu.
Ang pagtuman sa mga pasalig mao ang usa ka paagi nga ang mga tawo nagpakita og paghinulsol (tan-awa sa Doktrina ug mga Pakigsaad 20:37).
Ang paghinulsol makatabang sa mga tawo nga masinati ang kalinaw ug kalipay sa kapasayloan sa Dios. Kini usab mopasaka sa tabang gikan sa Dios alang sa ilang mga hagit.
Ang pagtuman sa mga pasalig moandam sa mga tawo sa paghimo ug pagtuman sa sagrado nga mga pakigsaad.
Makapakita ka sa imong gugma alang sa mga tawo ug sa imong hugot nga pagtuo diha sa mga saad sa Dios pinaagi sa pagtabang sa mga tawo nga motuman sa ilang mga pasalig.

Moimbitar sumala sa Paggiya sa Espiritu

Tinguhaa ang giya sa Espiritu mahitungod sa unsa nga mga imbitasyon ang ihatag ug kon kanus-a kini ihatag. Hunahunaa kon unsa ang pagtulon-an o doktrina, nga hustong nasabtan, ang makatabang sa usa ka tawo sa pagdawat sa imong imbitasyon. Ang husto nga imbitasyon sa husto nga panahon makapaaghat sa mga tawo sa pagbuhat sa mga butang nga mopalig-on sa ilang hugot nga pagtuo. Kini nga mga aksiyon mahimong mosangpot sa usa ka dako nga kausaban sa kasingkasing (tan-awa sa Mosiah 5:2; Alma 5:12–14).

Ang mga imbitasyon nga imong ihatag mahimong gamay, sama sa pagbasa og usa ka kapitulo sa kasulatan o pag-adto sa panagtigom alang sa sakramento. O kini tingali ingon kaimportante sama sa pagpabunyag. Ang mga imbitasyon kinahanglan nga tukma kon asa dapit ang tawo diha sa iyang espirituhanong panaw.

Ang giniyahan sa Espiritu nga mga imbitasyon makapalig-on sa usag usa sa pagtabang sa tawo nga mouswag sa espirituhanong paagi (tan-awa sa 2 Nephi 28:30; Doktrina ug mga Pakigsaad 93:12–13). Pangutan-a ang imong kaugalingon, “Unsa nga mga pasalig ang gituman sa tawo? Unsa ang gikinahanglan niyang buhaton sa sunod aron mouswag?”

Paminaw niadtong imong gikaestorya o gitudloan. Gikan sa imong nadungog ug gibati, tinguhaa ang giya sa Espiritu mahitungod kon unsa ang mga imbitasyon nga makatabang sa matag tawo nga mouswag ngadto sa paghimo og sagrado nga mga pakigsaad.

Mga Baroganan alang sa Paghatag og mga Imbitasyon

Ang paghatag og mga imbitasyon nagkinahanglan og hugot nga pagtuo diha ni Kristo. Pagbaton og hugot nga pagtuo nga Siya mopanalangin sa mga tawo kon sila modawat ug mosunod pinaagi sa inyong mga imbitasyon.

Ang mga tawo mas adunay kalagmitan sa pag-usab kon ikaw moimbitar kanila sa pagbuhat sa kamatuoran sa ebanghelyo ug motabang kanila nga maseguro kon sa unsang paagi nga ang kausaban mopanalangin kanila. Sila mausab ngadto sa punto nga ilang mabati ang Espiritu ug masinati ang kalipay sa pagsunod sa ebanghelyo ni Jesukristo.

Sa higayon nga ikaw makig-uban sa mga tawo, sa personal man o sa online, hunahunaa kon unsa nga imbitasyon ang makatabang kanila nga mapalig-on ang ilang pagtuo ni Kristo ug mobati sa Espiritu. Usahay kini tingali ingon ka yano sama sa pakigkita kanimo pag-usab o pag-adto sa kalihokan sa Simbahan.

Samtang ikaw mangandam sa pagtudlo og usa ka leksiyon, hunahunaa ang mga panginahanglan ug pag-uswag sa matag tawo. Seguroa nga ang imong plano sa leksiyon maglakip og usa o dugang pa nga mga imbitasyon nga motabang sa tawo nga mouswag.

Pag-amping nga dili mohatag og daghan kaayo nga mga imbitasyon sa usa ka higayon. Ang usa ka tawo nagkinahanglan og panahon sa paglihok, pagtubo, ug pagkat-on gikan sa matag imbitasyon.

Magmaisugon apan dili magmapahitas-on kon ikaw moimbitar sa mga tawo sa paghimo og mga pasalig (tan-awa sa Alma 38:12). Tahora ang kabubut-on sa tawo.

Pagtuon sa Kasulatan

Nganong importante ang mga pasalig?

Pangimbitar gamit ang Mabination ug Klaro nga Pinulongan

Ang usa ka imbitasyon kasagaran anaa sa porma nga “buhaton ba nimo,” nga mga pangutana, nga nagkinahanglan og usa ka oo o dili nga tubag. Himoa ang imong imbitasyon nga mabination, piho, ug klaro. Kini kinahanglan nga moimbitar o mogiya sa mga tawo sa paghimo og usa ka pasalig sa pagbuhat uban sa hugot nga pagtuo diha ni Jesukristo.

Bisan og ang imong mga imbitasyon mahimong lahi alang sa tawo, hunahunaa ang mosunod nga mga ehemplo:

Ang pagtambong sa simbahan nagsangkap og usa ka panahon ug dapit alang kanimo sa pagsimba sa Dios ug sa pagbati sa Iyang Espiritu. Kini usab makatabang kanimo nga mamahimong kabahin sa usa ka maabagon nga komunidad samtang ikaw mohimo og mga kausaban nga mas mapaduol ngadto sa Manluluwas. Moadto ka ba uban kanamo sa miting sa sakramento karong Dominggo?
Karon nga atong nahisgotan ang kaimportante sa pagtuon sa mga kasulatan, basahon ba nimo ang [usa ka piho nga tudling sa kasulatan]? Imo bang isulat ang bisan unsa nga mga pag-aghat o mga pangutana nga anaa kanimo? Mahimo natong hisgotan ang imong mga hunahuna sa sunod higayon nga magkita kita.
Atong nahisgotan ang kinabuhi sa Manluluwas ug ang Iyang mga sugo. Sundon ba nimo ang Iyang ehemplo pinaagi sa pagpabunyag ngadto sa Iyang Simbahan ug mohimo og mga saad uban Kaniya? (Tan-awa sa “Ang Imbitasyon nga Magpabunyag ug Magpakompir” sa kapitulo 3.)
Nagpahayag ka og interes nga mas mokonektar sa imong kinabuhi ngadto sa Dios. Buhaton ba nimo nga mag-ampo uban sa hugot nga pagtuo sa mosunod nga pipila ka adlaw aron ka makasinati sa mga panalangin sa pag-ampo?
Kami adunay bidyo nga sa among hunahuna makatabang nimo. Mahimo ba kami mopakita niini diha nimo o padalhan ka namo sa link? Tan-awon ba nimo kini? Mahimo ba kami nga magsusi ugma aron masayod kon unsa ang imong hunahuna?

Tinguhaa ang mga pag-aghat sa Espiritu Santo samtang ikaw maghunahuna og natural nga mga paagi sa paghatag og mabination, piho, ug klaro nga mga imbitasyon.

Personal nga Pagtuon o Pagtuon uban sa Kompanyon

Diha sa imong journal sa pagtuon, pagsulat og usa ka imbitasyon nga yano, direkta, ug klaro alang sa matag pasalig diha sa usa ka leksiyon. Kon nakabuhat ka na niini nga kalihokan sa una, balika kini ug ikomparar ang imong bag-ong mga imbitasyon sa mga nangagi.

Rebyoha ang mga imbitasyon nga imong gisulat uban sa imong kompanyon. Dayon hisgoti ang mosunod nga mga pangutana:

Unsaon nato nga makatabang sa mga tawo nga makasabot sa gisaad nga panalangin sa Ginoo kauban niini nga imbitasyon?
Nganong importante kini nga imbitasyon kanako mismo?
Unsaon nako sa pagtabang ang mga tawo nga mobati sa gugma sa Dios alang kanila samtang ako mohatag niini nga imbitasyon?
Unsaon nako pagpalambo sa pagtabang sa uban nga mobuhat sa mga imbitasyon nga akong gihatag?

Paghunahuna og usa ka tawo nga inyong gitudloan. Praktisa ang paghatag niining mga imbitasyon nga morag ikaw ang nagpasabot niana nga tawo. Usba ang imong mga imbitasyon kon gikinahanglan.

Mosaad sa mga Tawo og mga Panalangin

Ang Dios nagsaad sa pagpanalangin kanato kon kita motuman sa Iyang mga sugo (tan-awa sa Doktrina ug mga Pakigsaad 130:20–21). Ang mga tawo nga motuman sa mga sugo ug magpabilin nga matinud-anon “bulahan sa tanan nga mga butang” ug “mopuyo uban sa Dios diha sa usa ka kahimtang nga walay kataposan ang kalipay” (Mosiah 2:41).

Sa imong pag-imbitar sa mga tawo sa paghimo og mga pasalig, saari sila og mga panalangin alang sa pagtuman sa ilang mga pasalig. Mahimo nimong ilhon ang daghan niining mga panalangin pinaagi sa pagtuon sa mga kasulatan, sa mga pagtulon-an sa mga propeta sa ulahing mga adlaw, ug sa mga leksiyon sa kapitulo 3. Hunahunaa usab ang mga panalangin sa imong kaugalingong kinabuhi. Sa mainampoon nga paagi pagdesisyon unsa nga mga panalangin ang isaad sa matag tawo kon ikaw mohatag sa mga imbitasyon.

Kon magdapit sa usa ka tawo sa pagsunod og usa ka sugo, itudlo ang mosunod:

Ang pagsunod sa mga sugo nagpakita sa atong gugma alang sa Langitnong Amahan ug sa Iyang Anak, si Jesukristo (tan-awa sa Juan 14:15).
Ang pagsunod sa mga sugo nagpakita sa Dios nga kita mosalig Kaniya (tan-awa sa Mga Panultihon 3:5–6).
Ang mga panalangin sa Dios espirituhanon ug temporal (tan-awa sa Mosiah 2:41).
Ang labing mahinungdanon nga panalangin sa Dios mao ang kinabuhi nga dayon (tan-awa sa Doktrina ug mga Pakigsaad 14:7).
Kon kita sinsero nga mag-ampo ug mobuhat diha sa hugot nga pagtuo, ang Dios motabang kanato nga matuman ang mga butang nga Iyang gisugo nga atong buhaton (tan-awa sa 1 Nephi 3:7).
Ang Dios motuman sa iyang mga saad sa pagpanalangin kanato sumala sa Iyang paagi ug panahon (tan-awa sa Doktrina ug mga Pakigsaad 88:68).

Ang mga tawo kasagaran mag-atubang og oposisyon sa pagtuman sa mga sugo. Suportahi kadtong imong gitudloan, ug iseguro kanila nga ang Dios mopanalangin kanila kon sila maningkamot sa pagbuhat sa Iyang kabubut-on. Tabangi sila nga makasabot nga ang oposisyon usa ka oportunidad sa paglambo pinaagi sa pagpili sa pagsunod ni Kristo bisan kon kini lisod (tan-awa sa 2 Nephi 2:11, 13–16).

Si Elder Jeffrey R. Holland nagtudlo, “Ang uban nga mga panalangin moabot dayon, ang uban ulahing moabot, ug ang uban dili moabot hangtod sa langit; apan niadtong kinsa modawat sa ebanghelyo ni Jesukristo, moabot kini” (“An High Priest of Good Things to Come,” Ensign, Nob. 1999, 38).

Pagtuon sa Kasulatan

Unsa ang gitudlo sa mosunod nga mga kasulatan mahitungod sa tinguha sa Ginoo sa pagpanalangin kanato?

Personal nga Pagtuon

Basaha ang Doktrina ug mga Pakigsaad 82:10 ug 130:20–21. Dayon tun-i ang mosunod nga mga kasulatan. Paghimo og duha ka mga kolum sa imong journal sa pagtuon. Sa usa ka habig, isulat ang sugo nga imong nakit-an sa matag tudling. Sa laing habig, isulat ang saad alang sa pagtuman sa sugo.

Ipakigbahin ang Imong Pagpamatuod

Ipakigbahin ang imong pagpamatuod sa higayon nga ikaw mohatag og usa ka imbitasyon ug mosaad og mga panalangin. Isulti kon sa unsang paagi ikaw napanalanginan samtang ikaw misunod sa baroganan nga imong gitudlo. Ipakigbahin ang imong pagpamatuod nga ang baroganan mopanalangin sa kinabuhi sa tawo kon siya mosunod niini.

Ang imong sinsero nga pagpamatuod makatabang sa pagmugna og palibot alang sa mga tawo nga mobati sa Espiritu Santo nga mokompirmar sa kamatuoran. Kini moawhag kanila sa pagdawat sa mga imbitasyon nga imong gihatag.

Alang sa dugang impormasyon, tan-awa sa “Ipakigbahin ang Imong Pagpamatuod” sa kapitulo 10.

Tabangi ang mga Tawo nga Motuman sa Ilang mga Pasalig

Kon ang mga tawo modawat sa imong imbitasyon sa pagbuhat og usa ka butang, mag-follow up aron matabangan sila sa pagtuman sa ilang mga pasalig. Ikaw nagtabang sa mga tawo nga makaugmad og hugot nga pagtuo diha ni Kristo. Ang imong papel mao ang pagtabang kanila sa pagpalig-on sa ilang pagtuo ug sa ilang resolusyon aron mouswag ngadto sa hingpit nga pagkakabig. Dili lang moimbitar sa mga tawo nga mag-usab; mosuporta nila sa pagbuhat niini.

Ang mga tawo makadawat og usa ka pagsaksi sa Espiritu kon sila mopakita og hugot nga pagtuo ngadto sa paghinulsol pinaagi sa pagtuman sa mga pasalig. Kana nga pagsaksi sa kasagaran dili moabot “hangtod human sa pagsulay sa [ilang] hugot nga pagtuo” (Ether 12:6). Ayaw ikahibulong kon ang oposisyon motumaw. Planoha kon unsaon nimo sila sa pagtabang latas sa mga pagsulay aron sila makadawat og pagsaksi sa Espiritu. Ang uban nga mga miyembro sa Simbahan makahatag usab og suporta.

Ang mga tawo kasagaran mobati sa impluwensya sa Espiritu kon ikaw anaa uban kanila. Ipasabot ang kaimportante sa pag-ampo, pagbasa sa mga kasulatan, ug pagsunod sa imong mga imbitasyon aron sila makaangkon niini nga mga pagbati kon sila nalang sa ilang kaugalingon.

Ang pagtuman sa mga pasalig moandam sa mga tawo alang sa mga ordinansa ug mga pakigsaad subay sa dalan sa tibuok kinabuhi nga pagkakabig. Ang imong mga paningkamot makatabang kanila nga “[ma]pakita pinaagi sa ilang mga buhat” ang ilang mga tinguha sa pagsunod ni Jesukristo (Doktrina ug mga Pakigsaad 20:37).

Pagplano og Mubo nga Inadlaw nga Pagkontak

Ang pagtabang sa mga tawo nga motuman sa mga pasalig magsugod sa inyong unang pagbisita ug pagtudlo kanila. Hangyoa sila sa pagsulat sa ilang mga pasalig diha sa telepono, kalendaryo, o sa butang nga inyong ibilin kanila.

Pangutana kon kamo, o ang usa ka miyembro kinsa nag-apil, makahimo ba og mubo nga pagkontak kada adlaw tali sa mga pagbisita sa pagtudlo. Ipasabot nga ang katuyoan niining pagkontak mao ang pagsuporta kanila, ug ihulagway ang pipila ka paagi nga kamo makahimo niana. Kin nga mga pagkontak mao ang usa ka paagi sa paggamit sa baroganan diha sa Doktrina ug mga Pakigsaad 84:106.

Tinoa ang pamaagi sa pagkontak nga mahimong labing epektibo, sama sa mubo nga pagbisita, motawag sa telepono, motext, o mensahe diha sa social media. Ang teknolohiya nagtanyag og daghang opsiyon alang sa dugang nga mga pahinumdom ug suporta.

Moawhag ug Motabang sa mga Tawo diha sa Inyong Inadlaw nga Pagkontak

Alang sa matag imbitasyon nga imong ihatag, irekord ang mga pahinumdom diha sa Isangyaw ang Akong Ebanghelyo nga app mahitungod kon unsaon sa pag-follow up sa sunod nga adlaw. Sa inyong pagplano sa sunod adlaw, tinguhaa ang giya sa Espiritu samtang kamo maghisgot kon unsaon sa pagtabang ang mga tawo nga motuman sa ilang mga pasalig.

Himoa ang inyong inadlaw nga mga pagkontak sa mga tawo nga positibo ug makapadasig. Pag-ampo alang kanila. Ipakita ang gugma ug pagsabot samtang kamo motabang kanila nga motuman sa ilang mga pasalig. Tubaga ang mga pangutana ug tabangi sila nga mabuntog ang mga hagit. Kon aduna pay panahon, magbasa og dungan gikan sa Basahon ni Mormon. Ipakigbahin ang may kalabotan nga media sa Simbahan, lakip na ang musika nga gisangkap sa Simbahan nga tingali makapabayaw kanila. Magmatinahoron sa ilang oras ug mga gipangandoy.

Ipaila-ila sila ngadto sa uban nga mga miyembro sa Simbahan. Kon tukma, hangyoa ang mga miyembro aron motabang sa mga tawo sa pagtuman sa ilang mga pasalig (tan-awa sa kapitulo 10).

Dayga ang mga tawo nga naningkamot sa pagtuman sa ilang mga pasalig. Tabangi sila nga makita nga nahimuot ang Ginoo sa ilang mga paningkamot. Kini nga mga tawo nag-usab sa ilang mga kinabuhi, nga magkinahanglan og dakong trabaho ug pailob. Tabangi sila sa pag-ila sa mga panalangin ilang nadawat. Ipahayag ang kamasaligon nga sila magmalamposon.

Usab ipakita ang gugma kon ang mga tawo wala motuman sa ilang mga pasalig. Itanyag ang suporta kanila atol sa inyong inadlaw nga pagkontak. Pananglitan, kon ang tawo midawat sa imbitasyon sa pagbasa sa kapitulo sa Basahon ni Mormon apan wala pa nakahimo niini, itanyag nga magbasa niini og dungan. Tabangi ang tawo sa pagdiskobre pinaagi sa kasinatian kon sa unsang paagi ang pasalig makapanalangin sa iyang kinabuhi.

Tingali kinahanglan nga mosulay og kadaghan aron ang mga tawo makatuman og usa ka pasalig, ug kamo tingali magkinahanglan nga mohimo og kadaghan nga pagbisita aron matabangan sila. Hisgoti kon unsaon nila sa pagbuntog ang mga hagit sa pagtuman sa mga pasalig. Magmapailubon ug maabagon, dili magmasinawayon o mahukmanon.

Pagbaton sa Impluwensya sa Espiritu Santo sa Inyong Inadlaw nga Pagkontak

Kon kamo mo-follow up sa mga tawo, hangyoa sila sa pagpakigbahin sa ilang mga kasinatian sa pagtuman sa mga pasalig. Pangutana kon unsa ang ilang nakat-onan ug gibati. Kini makatabang kanila sa pag-ila sa impluwensya sa Espiritu sa ilang mga kinabuhi ug motabang kanila nga mahbalo sa sunod nga lakang.

Sa inyong pagkontak sa mga tawo sa matag adlaw, usa ka importanteng bahin sa inyong katuyoan mao ang pag-imbitar sa impluwensya sa Espiritu Santo ngadto sa ilang mga kinabuhi. Tabangi sila nga makaila unsaon sa pagbati sa Espiritu kon kamo wala diha. Ang inyong inadlaw nga pagkontak kinahanglang mopalig-on sa espirituhanong mga pagbati nga ilang nabati sa dihang kamo nagtudlo kanila. Sila mahimong makabig kon ilang mabati ang gahom ug impluwensya sa Espiritu Santo.

Ipakita ang Gugma

Ang proseso pagkakabig gisentro diha sa Kristohanon nga gugma (tan-awa sa 4 Nephi 1:15). Tinguhaa ang gasa sa gugmang putli. Ang pagpakita og sinsero nga gugma makatabang sa mga tawo nga mobati sa Espiritu sa ilang kinabuhi. Ang inyong mga pagpahayag sa gugma makatabang usab kanila nga modawat sa mga imbitasyon ug motuman sa mga pasalig nga mosangpot ngadto sa pagkakabig.

Sa inyong paghigugma ug pagtudlo sa uban, ang inyong kaugalignong pagkakabig ngadto sa Manluluwas magkalawom.

Ang pagtabang sa pagkakabig sa lain nga tawo usa ka sagrado nga buhat. Kamo makakaplag og malungtaron nga kalipay samtang inyong ipahinungod ang inyong kaugalingon niini nga buhat ug sa pagserbisyo sa uban (tan-awa sa Mateo 10:39; Mosiah 2:17; Alma 27:17–18; Doktrina ug mga Pakigsaad 18:10–16).

Personal nga Pagtuon o Pagtuon uban sa Kompanyon

Irekord diha sa Isangyaw ang Akong Ebanghelyo nga app ang inyong mga plano alang sa inadlaw nga pagkontak sa matag tawo nga inyong gitudloan. Pagplano daan og pila ka adlaw kon unsa ang inyong buhaton aron ma-follow up ang matag tawo.

Pagpili og usa ka imbitasyon nga inyong ihatag kon kamo magtudlo sa matag tawo. Dayon ilha ang lainlaing nga mga kabalaka nga lagmit makapugong sa tawo sa pagdawat o pagtuman niana nga pasalig. Hisgoti ug pagpraktis kon unsaon ninyo aron labing makatabang sa mga tawo samtang naningkamot sila sa pagsulbad sa ilang mga kabalaka.

Ang Ginoo Nagtinguha nga ang mga Tawo Moadto ug Magpabilin

Ang misyonaryo nga buhat adunay dako kaayo nga epekto samtang ang mga tawo mohimo ug motuman sa pasalig sa pagsunod sa ebanghelyo ug magpabilin nga aktibo sa Simbahan sa tibuok nilang kinabuhi. Dili igo nga moadto lang sila sa Simbahan. Ang Ginoo nagtinguha nga sila moadto ug magpabilin (tan-awa sa Juan 15:16). Itumong ang tanan ninyo nga pagtudlo ug mga imbitasyon niana nga katuyoan. Aron madawat ang tanan nga mga panalangin nga anaa sa Langitnong Amahan alang kanila, ang mga miyembro kinahanglang magpadayon sa pagsunod sa ebanghelyo pinaagi sa pagtuman sa mga sugo ug sa mga pakigsaad nga ilang gihimo samtang sila magpabilin nga aktibo sa Simbahan.

Si Nephi nagtudlo: “Human kamo makasulod niini nga higpit ug pig-ot nga dalan, ako mangutana kon ang tanan natuman ba? Tan-awa, ako moingon nganha kaninyo, Wala; … kamo kinahanglan gayod mopadayon sa unahan uban ang pagkamakanunayon kang Kristo … ug [kon kamo] molahutay hangtod sa kataposan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:19–20).

Ihatag ang inyong labing maayo nga mga paningkamot sa pagtabang sa mga tawo nga mahimong sarang sa “kinabuhi nga dayon, diin nga gasa mao ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7).

Mga Ideya sa Pagtuon ug Paggamit

Personal nga Pagtuon

Ilha ang mga sugo gikan sa leksiyon 4. Pangita ug irekord ang mga pakisayran sa kasulatan ug mga kinutlo gikan sa mga propeta sa ulahing mga adlaw nga naghulagway sa gisaad nga panalangin nga uban niining sugo. Paghunahuna og mga panalangin nga imong nadawat pinaagi sa pagsunod niini nga sugo, ug isulat kini sa imong journal.
Kon kamo makig-estorya sa inyong pamilya o sa uban, pangutana kon giunsa sila sa pagpanalangin pinaagi sa pagsunod sa piho nga sugo (pananglitan, pagbalaan sa Adlaw nga Igpapahulay, pagsunod sa balaod sa ikapulo, o pagtuman sa usa ka sugo nga lisod alang sa usa ka tawo nga inyong gitudlo).
Tubaga ang mosunod nga mga pangutana aron pagtabang kanimo sa pag-ila sa mga dapit nga imong mapalambo kon maghatag og mga imbitasyon. Paghimo og mga plano sa paglambo.
- Nakahibalo ba ang mga tawo nga ako nahigugma kanila?
- Masaligon ba ko nga sila mapanalanginan pinaagi sa pagbuhat sa among mga imbitasyon?
- Naghatag ba ko og tukma nga panahon ug pagtagad sa paghimo og inadlaw nga pagkontak sa mga tawo aron matabangan sila nga matuman ang ilang mga pasalig?
- Ang among mga plano sa leksiyon naglakip ba sa piho nga mga imbitasyon sa pagbuhat?

Pagtuon uban sa Kompanyon ug Panagbaylo sa Kompanyon

Rebyoha ang mga imbitasyon sa usa sa mga leksiyon sa misyonaryo. Alang sa matag imbitasyon, tubaga ang mosunod nga mga pangutana:
- Unsa nga mga panalangin ang gisaad sa Ginoo niadtong kinsa nagtuman niini nga pasalig?
- Sa unsang paagi nga ang pagsunod niini nga baroganan makatabang sa mga tawo nga madugangan ang ilang hugot nga pagtuo ug pagpamatuod?
- Sa unsang paagi nga kini nga pasalig makatabang sa mga tawo sa paghinulsol ug mahimong mas sensitibo sa Espiritu?
Gikan sa inyong mga himan sa pagplano, paghimo og lista sa mga tawo nga inyong gikontak sa milabay nga duha ka adlaw. Ilakip kadtong inyong gitudloan ug ang mga miyembro.
- Alang sa matag tawo, isulat ang mga imbitasyon nga inyong gihatag ug mga pasalig nga ilang gihimo.
- Hunahunaa unsa pa ang uban nga mga imbitasyon nga mahimo ninyong mahatag.
- Hisgoti kon nganong nakakuha man kamo og mga pasalig gikan sa uban niining mga tawhana ug dili gikan sa uban.
- Unsa man ang inyong buhaton sa pag-follow up niini nga mga pasalig?

Konseho sa District, mga Komperensiya sa Zone, ug Konseho sa Pagpangulo sa Misyon

Hisgoti ang epektibo ug mamugnaon nga mga ideya alang sa inadlaw nga pagkontak sa mga tawo nga inyong gitudloan. Giunsa man sa mga misyonaryo sa pagpakigtambayayong sa mga miyembro sa epektibong paagi? Unsa nga giimprinta o digital media ang mapuslanon? Unsa man ang inyong buhaton kon ang mga tawo wala sa balay o bisi kaayo sa pakigkita ninyo?
Hisgoti ang mga pamaagi nga ang mga misyonaryo sa epektibo nga paagi nagtudlo sa mga sugo diha sa mga leksiyon 4.

Mga Lider sa Misyon ug Mga Magtatambag sa Misyon

Kon mahimo, mokuyog panagsa sa mga misyonaryo sa ilang pagtudlo. Tabangi sila nga makatutok sa pagtabang sa mga tawo sa paghimo ug pagtuman sa mga pasalig.
Awhaga ang mga lider sa pagkapari, mga lider sa organisasyon, ug mga miyembro sa paghimo og inadlaw nga pagkontak sa mga tawo nga gitudloan sa mga misyonaryo—kon ang mga tawo mouyon niini nga pagkontak.