“Kapitulo 12: Tabangi ang mga Tawo nga Mag-andam alang sa Bunyag ug Kompirmasyon,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Kapitulo 12,” Isangyaw ang Akong Ebanghelyo

Kapitulo 12

Tabangi ang mga Tawo nga Mag-andam alang sa Bunyag ug Kompirmasyon

Hunahunaa Kini

Sa unsang paagi ako makatabang sa mga tawo nga mag-andam alang sa bunyag ug kompirmasyon?
Unsaon man nako sa pagpahigayon og usa ka interbiyo sa bunyag?
Sa unsang paagi nga ang usa ka makapabayaw nga tulumanon sa bunyag giplanohan ug gipahigayon?
Nganong importante man nga kompletohon ug isumiter ang Porma sa Bunyag ug Kompirmasyon?
Unsaon nako sa pagsuporta ang bag-o nga mga miyembro?

Ang bunyag usa ka malipayon nga ordinansa sa paglaom nga magdala sa gahom sa Dios ngadto sa kinabuhi sa usa ka tawo. Kana nga gahom moabot pinaagi pagdawat sa gasa sa Espiritu Santo. Kini magpadayon samtang ang usa ka tawo molahutay hangtod sa kataposan sa pagtuman sa pakigsaad sa bunyag.

Ang katuyoan sa inyong pagtudlo mao ang pagtabang sa uban nga mapalambo ang ilang hugot nga pagtuo diha ni Jesukristo, maghinulsol sa ilang mga sala, ug magpabunyag uban ang usa ka sinsero nga tinguha nga mosunod ni Kristo. Sama sa gitudlo ni Mormon, “ang unang mga bunga sa paghinulsol mao ang bunyag” (Moroni 8:25). Samtang ang mga tawo nga imong gitudloan motuman sa mga pasalig nga inyong giimbitar kanila nga himoon, sila mahimong maandam sa paghimo ug pagtuman og mga pakigsaad sa Dios ug makatagamtan sa gisaad nga mga panalangin.

Ang bunyag ug kompirmasyon dili mao ang kataposan nga destinasyon. Hinuon, kini nga mga ordinansa mao ang ganghaan diin mosulod sa dalan sa pakigsaad ang mga anak sa Dios. Kini nga dalan mosangpot ngadto sa mga ordinansa, mga pakigsaad, ug malipayon nga mga panalangin sa templo—ug sa kataposan ngadto sa kinabuhi nga dayon (tan-awa sa 3 Nephi 11:20–40).

Mga Kwalipikasyon alang sa Bunyag ug Kompirmasyon

Ang Dios nagdapit sa tanan Niyang mga anak sa pagduol ngadto Kaniya pinaagi sa bunyag ug kompirmasyon (tan-awa sa 2 Nephi 26:33; 3 Nephi 27:20). Ang mga kwalipikasyon alang sa bunyag pareha ra alang kanatong tanan.

Tan-awa sa Doktrina ug mga Pakigsaad 20:37:

Magpaubos sa imong kaugalingon atubangan sa Dios.
Magtinguha sa pagpabunyag.
Moduol nga adunay masulub-on nga kasingkasing ug mahinulsulon nga espiritu.
Maghinulsol sa tanan nimong mga sala ug mag-ampo alang sa kapasayloan.
Magmahimong andam sa pagdala nganha kanimo sa ngalan ni Kristo.
Magbaton og determinasyon nga moalagad ni Kristo hangtod sa kataposan.
Mopakita pinaagi sa imong mga buhat nga imong nadawat ang Espiritu ni Kristo ngadto sa kapasayloan sa imong mga sala.

Gikan sa Unang Kapangulohan ug sa Korum sa Napulog Duha ka Apostoles:

Motubag sa tukma nga paagi ngadto sa mga pangutana sa interbiyo sa bunyag.
Modawat sa tanang leksiyon sa misyonaryo.
Makighimamat sa presidente sa korum sa mga elder, sa presidente sa Relief Society, ug sa bishop.
Motambong og pipila ka panagtigom alang sa sakramento.

Kini nga mga kwalipikasyon mao ang mga timailhan sa espirituhanon nga proseso sa pagkakabig. Kon ang mga tawo makatuman niini nga mga kwalipikasyon, andam sila alang sa sagrado nga mga ordinansa sa bunyag ug kompirmasyon.

Kon ang usa ka tawo hugot nga mitakda og petsa sa bunyag:

Mainampingon nga morebyo sa iyang rekord diha sa Isangyaw ang Akong Ebanghelyo nga app aron sa pagseguro nga natudlo ninyo ang gikinahanglan nga doktrina ug mga sugo.
Mohimo og eskedyul sa mga kalihokan nga gikinahanglan sa pag-andam alang sa bunyag og kompirmasyon. Morebyo niini nga eskedyul uban sa tawo.
Kon mahimo, moimbitar sa tawo nga motambong sa usa ka tulumanon sa bunyag sa dili pa ang iyang kaugalingong bunyag.

Pagtuon sa Kasulatan

Tun-i ang mosunod nga mga kasulatan. Unsaon nimo sa pagtabang niadtong inyong gitudloan nga mag-andam alang sa bunyag ug kompirmasyon? Irekord unsa ang imong nakat-onan gikan sa imong pagtuon.

Tabangi ang mga Tawo nga Mag-andam alang sa Ilang Interbiyo sa Bunyag

Ang interbiyo sa bunyag usa ka importante nga lakang aron sa pagseguro nga ang usa tawo nakatuman sa mga kwalipikasyon sa Ginoo alang sa bunyag. Pag-eskedyul lamang og interbiyo sa bunyag kon andam na ang usa ka tawo.

Tabangi ang mga tawo nga mag-andam alang niini nga interbiyo aron mobati sila nga komportable mahitungod niini. Ipasabot kon sama sa unsa kini. Sultihi sila nga makighimamat sila og laing misyonaryo sama kanimo.

Ipasabot ang katuyoan sa interbiyo. Kini usa ka oportunidad kanila sa pagsaksi nga sila “naghinulsol sa tanan nila nga mga sala [ug] magpakita pinaagi sa ilang mga buhat nga sila makadawat sa Espiritu ni Kristo ngadto sa kapasayloan sa ilang mga sala” (Doktrina ug mga Pakigsaad 20:37).

Ipakigbahin ang mga ipangutana sa tig-interbiyo (tan-awa sa ubos). Kini makatabang sa tawo nga maandan sa pagtubag niini.

Seguroha nga ang tawo nakasabot sa unsay inyong gitudlo ug sa pakigsaad nga iyang himoon sa bunyag. Kini nga pakigsaad mao nga:

Mahimong andam sa pagdala nganha kaniya sa ngalan ni Jesukristo.
Motuman sa mga sugo sa Dios.
Moserbisyo sa Dios ug sa uban.
Molahutay hangtod sa kataposan. (Tan-awa sa leksiyon 4.)

Pagpamatuod mahitungod sa nindot nga mga panalangin nga moabot gumikan sa pagpabunyag ug pagpakompirma ug pagtuman sa pakigsaad sa bunyag. Kini nga mga panalangin naglakip sa kapasayloan sa mga sala ug sa gasa sa Espiritu Santo.

Pagpahigayon sa Interbiyo sa Bunyag

Ang matag tawo nga nagtinguha nga magpabunyag interbiyohon sa usa ka awtorisado nga lider sa pagkapari. Diha sa usa ka misyon, kini nga tawo mao ang lider sa district o zone. Siya mopahigayon og mga interbiyo alang sa:

Mga tawo nga nag-edad og 9 ug pataas kinsa wala pa gayod mabunyagi ug makompirmahi.
Mga bata nga nag-edad og 8 ug pataas kansang mga ginikanan dili mga miyembro sa Simbahan.
Mga bata nga nag-edad og 8 ug pataas kinsa adunay usa ka ginikanan nga bunyagan ug kompirmahan usab.

Ang mga sumbanan alang sa tig-interbiyo gihatag sa ubos.

Ipahigayon ang interbiyo diha sa usa ka komportable, pribado nga lugar diin ang Espiritu mahimong mabati.
Kon mag-interbiyo og usa ka bata, batan-on, o babaye, ang kompanyon sa tig-interbiyo kinahanglan nga anaa duol diha sa usa ka tupad nga lawak, pasilyo, o hawanan. Kon gusto sa tawo, laing hamtong ang mahimong imbitaron nga moapil diha sa interbiyo. Ang mga misyonaryo kinahanglang maglikay sa tanang kahimtang nga tingali lainon sa pagsabot.
Sugdi pinaagi sa pag-ampo.
Tabangi ang tawo nga mobati nga komportable.
Himoa ang interbiyo nga usa ka espirituwal nga makabayaw nga kasinatian.
Seguroha nga ang tawo nakasabot sa katuyoan sa interbiyo.
Ipangutana ang mga pangutana sa interbiyo sa bunyag nga gilista sa ubos. Ipahiangay ang mga pangutana ngadto sa pangidaron, kahamtong, ug sirkumstansiya sa tawo.
Tubaga ang mga pangutana sa tawo.
Rebyoha ang impormasyon diha sa Porma sa Bunyag ug Kompirmasyon alang sa katukma. Kon ang tawo usa ka menor de edad, ang usa ka ginikanan o tigbantay gikinahanglan nga mopirma sa porma sa dili pa ang bunyag (tan-awa sa “Bunyag ug Kompirmasyon: Mga Pangutana ug mga Tubag” nga seksiyon niini nga kapitulo).
Dapita ang tawo sa paghatag og pagpamatuod ug sa pagpakigbahin sa iyang mga pagbati.
Pagpahayag og pasalamat nga nakahimamat sa tawo.

Mga Pangutana sa Interbiyo sa Bunyag

Ang mga pangutana sa interbiyo sa bunyag mao ang mosunod:

Motuo ka ba nga ang Dios mao ang atong Amahan sa Kahangtoran? Motuo ka ba nga si Jesukristo mao ang Anak sa Dios ug ang Manluluwas ug Manunubos sa kalibotan?
Motuo ka ba nga ang Simbahan ug ang ebanghelyo ni Jesukristo gipahiuli pinaagi ni Propeta Joseph Smith? Motuo ka ba nga si [kasamtangang Presidente sa Simbahan] usa ka propeta sa Dios? Unsa man ang kahulogan niini nganha kanimo?
Unsa man ang kahulogan sa paghinulsol nganha kanimo? Mibati ka ba nga nahinulsolan na nimo ang imong nangagi nga mga sala?
Ikaw natudloan nga ang pagkamiyembro sa Ang Simbahan ni Jesukristo sa mga Santos sa Ulahing mga Adlaw naglakip sa pagtuman sa mga sumbanan sa ebanghelyo. Unsa ang imong nasabtan mahitungod sa mosunod nga mga sumbanan? Andam ka bang mosunod niini?
- Ang balaod sa kaputli, nga nagdili sa bisan unsa nga sekswal nga mga relasyon nga gawas sa legal nga kaminyoon tali sa usa ka lalaki ug sa usa ka babaye
- Ang balaod sa ikapulo
- Ang Pulong sa Kaalam
- Pagbalaan sa adlaw nga Igpapahulay, lakip na sa sinemanang pag-ambit sa sakramento ug sa pagserbisyo sa uban
Nakahimo ka ba sukad og bug-at nga krimen? Kon mao, anaa ka ba karon sa probation o parole?
Nakasulay ka ba og aborsyon? (Tan-awa sa Kinatibuk-ang Tamdanan nga Basahon, 38.6.1.)
Kon bunyagan ka, ikaw makigsaad sa Dios nga ikaw andam sa pagdala diha sa imong kaugalingon sa ngalan ni Kristo, pagserbisyso sa uban, pagbarog isip usa ka saksi sa Dios sa tanang panahon, ug pagsunod sa Iyang mga sugo sa tibuok nimong kinabuhi. Andam ka ba nga mohimo niini nga pakigsaad ug maningkamot nga magmatinud-anon niini?

Alang sa mga instruksiyon kon ang tawo motubag og oo sa ika-5 o ika-6 nga mga pangutana, tan-awa sa Kinatibuk-ang Tamdanan nga Basahon, 38.2.8.7 ug 38.2.8.8.

Mahimong pamilyar sa mga palisiya ug mga sumbanan nga may kalabotan sa bunyag ug kompirmasyon diha sa Kinatibuk-ang Tamdanan nga Basahon, 38.2.8. Ang pipila niini nga mga palisiya naglambigit og espesyal nga mga sirkumstansiya nga mahimo ninyong masugatan.

Human sa interbiyo, ang misyonaryo ug ang bunyaganan mopundok pag-usab sa ubang mga misyonaryo. Kon ang tawo andam alang sa bunyag, ang mga misyonaryo mopasabot kon unsay mahitabo sa tulumanon sa bunyag. Sila mopasabot usab nga ang kompirmasyon kasagaran mahitabo diha sa panagtigom alang sa sakramento sa ward diin nagpuyo ang tawo.

Kanus-a ang usa ka Bunyag Kinahanglan nga Ilangay

Usahay ang usa ka bunyag kinahanglan nga ilangay tungod sa mga hagit sa pagpamatuod o katakos. Kon mahitabo kini, dumalaa ang sitwasyon sa sensitibo ug pribado nga paagi. Tabangi ang tawo nga makasabot kon unsaon sa pag-andam alang sa bunyag sa umaabot nga petsa.

Dasiga ang tawo ug pagtanyag og paglaom diha kang Kristo ug sa Iyang Pag-ula. Hangyoa ang mga miyembro sa ward sa paghatag og pakigdait. Padayon sa pagtudlo og sukaranan nga mga baroganan sa ebanghelyo hangtod ang tawo andam na nga magpabunyag ug magpakompirma. Paghulat hangtod nianang panahona aron sa pag-eskedyul og bag-o nga petsa sa bunyag.

Bunyag ug Kompirmasyon: Mga Pangutana ug mga Tubag

Magkinahanglan ba ko og pagtugot aron sa pagbunyag og usa ka menor de edad? Ang Simbahan nagpakabana alang sa kaayohan sa mga bata ug sa panag-uyon sa ilang kahimtang sa panimalay. Ang usa ka menor de edad, segun sa gitino sa lokal nga mga balaod, mahimo lamang bunyagan kon ang duha sa mosunod nga mga kondisyon matuman:

Ang (mga) ginikanan nga adunay kustodiya o legal nga (mga) tigbantay mohatag og sinulat nga pagtugot. Sila kinahanglan nga nakasabot sa kinatibuk-an sa doktrina nga itudlo ngadto sa ilang anak isip usa ka miyembro sa Simbahan. Sila kinahanglan usab nga andam nga mosuporta sa bata diha sa paghimo ug pagtuman sa mga pakigsaad sa bunyag.
Ang tawo nga mopahigayon sa interbiyo kinahanglang makahibalo nga ang bata nakasabot sa pakigsaad sa bunyag. Siya kinahanglan mobati og kamasaligon nga ang bata maningkamot sa pagtuman niining pakigsaad pinaagi sa pagsunod sa mga sugo, lakip sa pagtambong sa mga miting sa Simbahan.

Magkinahanglan ba ko og pagtugot sa kapikas aron sa pagbunyag og usa ka bana o asawa? Oo. Ang usa ka minyo nga tawo kinahanglan gayod nga adunay pagtugot sa iyang kapikas sa dili pa bunyagan.

Kon ang usa ka ginikanan diha sa usa ka pamilya dili pa andam alang sa bunyag, kinahanglan ba kong mobunyag sa ubang mga sakop sa pamilya o maghulat hangtod nga ang ginikanan andam na? Mas nindot nga ang mga sakop sa pamilya mabunyagan og dungan. Apan, kon ang uban dili pa andam, ang indibidwal nga mga sakop sa pamilya mahimong bunyagan kon ihatag ang bisan unsa nga kinahanglan nga pagtugot.

Ang mga pagbunyag sa mga sakop sa pamilya kinahanglan ba nga ilangay hangtod ang amahan makadawat sa Aaronic nga Pagkapari ug makapahigayon mismo sa mga bunyag? Dili. Ang bag-o nga nabunyagan nga mga lalaki dili makadawat sa Aaronic nga Pagkapari sa adlaw nga sila gibunyagan. Sila una gikinahanglan nga mainterbiyo sa bishop ug paluyohan sa mga miyembro sa ward.

Mahimo ba kong motudlo ug mobunyag sa usa ka tawo nga miluwat [resigned] sa pagkamiyembro sa Simbahan o kansang pagkamiyembro gibakwi? Ang mga tawo nga miluwat sa pagkamiyembro sa Simbahan o kansang pagkamiyembro gibakwi mahimong dawaton pag-usab pinaagi sa bunyag ug kompirmasyon. Kon ganahan sila nga tudloan, pakigtambag sa lokal nga mga lider sa pagkapari ug sa imong presidente sa misyon mahitungod sa bisan unsa nga papel nga anaa kanimo.

Diha sa usa ka stake, ang pagdawat pag-usab pinaagi sa bunyag anaa ubos sa direksiyon sa bishop o presidente sa stake. Diha sa usa ka misyon, ang pagdawat pag-usab anaa ubos sa direksiyon sa presidente sa misyon. Kini nga mga lider modawat og giya gikan sa Unang Kapangulohan kon gikinahanglan. Ang mga misyonaryo dili mopahigayon niini nga mga interbiyo sa bunyag o mosulat sa Porma sa Bunyag ug Kompirmasyon. Apan, ang usa ka misyonaryo mahimong imbitaron sa pagpahigayon sa bunyag.

Ang kanhi nga mga miyembro sa Simbahan kinsa mopasakop og usab dili mga kinabig. Bisan pa man, usahay ang mga misyonaryo adunay importante nga papel sa pagtabang kanila sa pagtagamtam usab sa mga panalangin sa pagkamiyembro sa Simbahan.

Unsa man ang mahitabo kon ang usa ka tawo duna nay gitakda nga petsa sa bunyag apan wala magtuman sa tanang mga pasalig? Paghulat sa pag-eskedyul og interbiyo sa bunyag hangtod nga ang tawo nagtuman sa mga pasalig ug nakahimo sa mga kwalipikasyon sa bunyag. Tan-awa sa “Kanus-a ang usa ka Bunyag Kinahanglan nga Ilangay” niini nga kapitulo.

Unsa kaha kon ang usa ka magtiayon nga dili minyo gusto nga magpabunyag apan nagpuyo-puyo? Ang usa ka magtiayon nga nagpuyo-puyo gawas sa usa ka legal nga kaminyoon tali sa usa ka lalaki ug sa usa ka babaye dili mahimong bunyagan hangtod nga sila mosunod sa balaod sa kaputli. Kini nagpasabot nga dili na magpuyo-puyo—kon usa man ka magtiayon nga lahi og sekso [heterosexual] o usa ka sama og sekso nga magtiayon—o, alang sa usa ka lalaki ug usa ka babaye, nagpasabot kini nga magminyo. Naglakip kini sa pagpakita og hugot nga pagtuo ngadto sa paghinulsol sama sa gihulagway diha sa Doktrina ug mga Pagkigsaad 20:37. Ang kaminyoon tali sa usa ka lalaki ug sa usa ka babaye usa ka importante nga bahin sa plano sa Dios.

Ang mga pangutana 5 ug 6 diha sa interbiyo sa bunyag nangutana kon ang usa ka tawo nakahimo ba gayod og usa ka seryoso nga krimen o miapil sa usa ka aborsiyon. Unsa ang kinahanglan nakong buhaton kon ang usa ka tawo motubag og “oo” sa bisan hain niini nga mga pangutana? Kon ikaw mahibalo sa usa niini nga mga sitwasyon atol sa usa ka interbiyo sa bunyag, ayaw pangutana mahitungod sa mga detalye. Ayaw og saad nga ang tawo maaprobahan alang sa bunyag. Hinuon, ipahayag ang imong gugma ug mabination nga mopasabot nga ang usa ka tawo nga mas hingkod ug mas may kasinatian ang makig-estorya sa tawo ug motabang.

Pagpadala og usa ka hangyo alang sa interbiyo sa bunyag ngadto sa imong presidente sa misyon. Siya o usa sa iyang mga magtatambag ang makigkita sa tawo. Tan-awa sa Kinatibuk-ang Tamdanan nga Basahon, 38.2.8.7 ug 38.2.8.8.

Unsa ang kinahanglan nakong buhaton kon ang usa ka rekord sa pagkamiyembro nahimo na sa wala pa nako masumiter ang Porma sa Bunyag ug Kompirmasyon? Kontaka ang imong presidente sa misyon alang sa mga instruksiyon.

Personal nga Pagtuon

Hunahunaa kon unsa kaha ang imong bation kon ikaw pa ang giinterbiyo. Ikonsiderar ang mosunod nga mga pangutana ug irekord ang imong mga impresyon.

Sa unsang paagi kaha nga ingon og dili komportable ang interbiyo alang kanimo? Unsa man kaha ang masulti o mabuhat sa tig-interbiyo aron mahimutang ka?
Sa unsang paagi gusto nimo ang tig-interbiyo nga makig-estorya kanimo?
Sa unsang paagi gusto nimo ang tig-interbiyo nga motubag kon mopadayag ka og mga pagduhaduha o sayop nga mga pagsabot o kon mokumpisal ka og grabe nga mga sala?

Ang Tulumanon sa Bunyag [Baptismal Service]

Ang tulumanon sa bunyag ug ang kompirmasyon kinahanglan nga mahimong espirituwal nga mga importante nga panghitabo alang sa usa ka bag-o nga mga kinabig. Ang mga tulumanon sa bunyag kinahanglan nga ieskedyul dayon sa higayon nga ang usa ka tawo nakatuman na sa mga kwalipikasyon sa bunyag. Ipasabot kon unsa ang giplanohan ug ngano. Hisgoti ang angay nga isul-ob, lakip na sa paghatag sa tawo og puting sinina nga sul-obon alang sa bunyag.

Ang mga tulumanon sa bunyag alang sa mga kinabig giplano ubos sa giya sa bishopric. Ang lider sa misyon sa ward (kon adunay usa nga natawag) o ang sakop sa kapangulohan sa korum sa mga elder kinsa nangulo sa misyonaryo nga buhat moplano ug mopahigayon niini nga mga tulumanon. Siya makigsabot sa full-time nga mga misyonaryo. Ang mga tulumanon sa bunyag kinahanglan nga yano, mubo, ug espirituwal nga makabayaw.

Dapita ang usa ka sakop sa bishopric, usa ka sakop sa kapangulohan sa Relief Society, ug usa ka sakop sa kapangulohan sa korum sa mga elder (kon dili siya ang mopahigayon) sa pagtambong sa tulumanon sa bunyag. Kon tukma, dapita ang ubang mga lider sa organisasyon, mga lider sa kabatan-onan, ug tigpangalagad nga mga igsoong lalaki ug mga igsoong babaye (kon gisangonan). Pakigtambayayong sa tawo nga bunyagan sa pag-imbitar og mga higala ug mga paryente nga motambong sa tulumanon sa bunyag ug sa kompirmasyon.

Ikonsiderar ang pag-imbitar sa ubang mga tawo nga inyong gitudloan. Kini nga mga kasinatian motabang kanila nga mobati sa Espiritu ug mas magkat-on mahitungod sa ebanghelyo. Human sa tulumanon, pag-follow up aron sa paghisgot sa ilang kasinatian ug imibitara sila nga matudloan.

Ang usa ka tulumanon sa bunyag mahimong maglakip sa mosunod:

Pasiuna nga musika
Usa ka mubong pag-welcome gikan sa lider sa pagkapari nga nagpahigayon sa tulumanon (usa ka sakop sa bishopric kinahanglang maoy magdumala kon mahimo)
Usa ka pangbukas nga himno ug pag-ampo
Usa o duha ka mubo nga mga mensahe bahin sa mga hilisgotan sa ebanghelyo, sama sa bunyag ug sa gasa sa Espritu Santo
Usa ka pinili nga musika
Ang bunyag
Usa ka panahon sa balaang pagtahod samtang kadtong kinsa miapil sa bunyag mag-ilis og uga nga mga sinina. (Mga Himno o mga awit sa Primary mahimong ipatukar o kantahon atol niining panahona. O ang mga misyonaryo mahimong mohatag og mubo nga presentasyon sa ebanghelyo.)
Mohatag og pagpamatuod ang bag-ong mga kinabig, kon nagtinguha
Usa ka panapos nga himno ug pag-ampo
Panapos nga musika

Kon inyong ieskedyul ang bunyag sa Dominggo, pagpili og oras nga kutob sa mahimo dili ra kaayo makabalda sa regular nga mga miting sa Dominggo.

Kompirmasyon

Ang usa ka tawo makadawat sa ordinansa sa kompirmasyon human siya mabunyagan (tan-awa sa Doktrina ug mga Pakigsaad 20:41). Ang bag-o nga kinabig gikonsiderar nga usa ka miyembro sa Simbahan human nga ang mga ordinansa sa bunyag ug kompirmasyon nakompleto ug tukma nga narekord.

Ang mga kompirmasyon anaa ubos sa direksiyon sa bishop. Apan, dili siya mopahigayon og lahi nga interbiyo alang sa kompirmasyon.

Pakigtambayayong gayod sa bishop ug sa lider sa misyon sa ward (kon adunay gitawag) aron sa pagseguro nga makompirmahan ang bag-o nga mga kinabig. Ang kompirmasyon kinahanglan nga mahitabo sa labing dali nga resonable nga panahon human sa bunyag, labing maayo sa sunod nga Dominggo. Hinuon, ang bishop makatugot sa kompirmasyon nga ipahigayon diha sa tulumanon sa bunyag isip usa ka eksepsiyon (tan-awa sa Kinatibuk-ang Tamdanan nga Basahon, 18.8).

Ang mga kinabig kasagaran ikompirmar diha sa panagtigom alang sa sakramento diha sa ward diin sila nagpuyo. Ang bishop kasagaran modapit sa misyonaryo nga mga elder nga nagserbiyso diha sa ward nga moapil sa kompirmasyon. Kon ang usa ka misyonaryo mopahigayon sa kompirmasyon, magkinahanglan usab siya og pagtugot gikan sa presidente sa misyon (tan-awa sa Kinatibuk-ang Tamdanan nga Basahon, 18.8.1). Dili mominos usa ka sakop sa bishopric ang moapil.

Kompletoha ang Porma sa Bunyag ug Kompirmasyon

Importante kaayo nga ang usa ka rekord sa pagkamiyembro mahimo dayon human nga ang usa ka tawo mabunyagan ug makompirmahan. Kalabot niana nga mga rekord sa iyang panahon, si Moroni misulat nga ang bag-o nga mga miyembro “giihap uban sa mga katawhan sa simbahan ni Kristo; ug ang ilang mga ngalan gikuha, nga sila mahinumdoman ug maamumahan pinaagi sa maayo nga pulong sa Dios, aron pag-agak kanila sa matarong nga agianan” (Moroni 6:4).

Samtang kamo magtudlo og usa ka tawo nga nangandam nga magpabunyag, sugdi ang pagsulat sa Porma sa Bunyag ug Kompirmasyon diha sa Isangyaw ang Akong Ebanghelyo nga app. Ipasabot nga kini nga porma gamiton sa paghimo og rekord sa pagkamiyembro. Kini nga rekord maglangkob og importante nga impormasyon mahitungod sa mga ordinansa nga madawat sa tawo. Kon mamalhin ang mga miyembro sa Simbahan, ang ilang rekord sa pagkamiyembro ipadala ngadto sa ilang bag-o nga ward aron ang lokal nga mga lider ug mga miyembro makasuporta kanila.

Sa higayon nga ang bag-o nga miyembro nabunyagan ug nakompirmahan, i-update ang porma uban sa impormasyon mahitungod sa matag ordinansa, lakip na kon kinsa ang mipahigayon niini. Sa higayon nga nakompleto na ninyo ang porma, irekord ang impormasyon diha sa Isangyaw ang Akong Ebanghelyo nga app ug isumiter kini sa elektronik nga paagi ngadto sa klerk sa ward. Sa higayon nga ang klerk makadawat sa porma, siya morebyo niini ug mohimo og rekord sa pagkamiyembro.

Human mahimo ang rekord sa pagkamiyembro, ang klerk moandam sa Sertipiko sa Bunyag ug Kompirmasyon. Kini nga sertipiko pirmahan sa bishop ug ihatag ngadto sa tawo.

Ang ngalan ug sekso nga anaa sa rekord sa pagkamiyembro ug sa sertipiko kinahanglan nga magkatukma sa sertipiko sa pagkatawo, sa civil birth registry, o sa kasamtangan nga legal nga ngalan sa tawo.

Personal nga Pagtuon o Pagtuon uban sa Kompanyon

Tun-i ang Mosiah 6:1–3 ug Moroni 6:1–4. Sa unsang paagi nga kini nga mga tudling may kalabotan sa paghupot og tukma nga mga rekord sa mga bunyag ug mga kompirmasyon?

Human sa Bunyag ug Kompirmasyon

Padayon sa Pagpangalagad

Padayon sa pagpangalagad ug pagsuporta sa bag-o nga mga miyembro human sila nabunyagan ug nakompirmahan. Tabangi sila nga mosimba ug magpalambo og mga relasyon sa mga miyembro. Magbasa sa Basahon ni Mormon uban nila, ug tabangi sila sa pagpakigbahin sa ebanghelyo ngadto sa mga sakop sa pamilya ug mga higala. Ipaila sila sa My Covenant Path nga booklet. Padayon sa paggamit sa Isangyaw ang Akong Ebanghelyo nga app aron sa pagrekord sa ilang pag-uswag, sama sa ilang pagtambong sa panagtigom alang sa sakramento ug sa mga leksiyon nga ilang nadawat.

Human sa kompirmasyon, itudlo pag-usab ang misyonaryo nga mga leksiyon. Kamo ang mangulo sa pagtudlo. Apan, pakigsabot sa mga lider sa ward aron ang mga misyonaryo sa ward o ubang mga miyembro moapil. Samtang magtudlo kamo, awhaga ang bag-ong mga miyembro sa pagtuman sa tanang pasalig diha sa mga leksiyon.

Diha sa sinemana nga mga miting sa pakigsabot, pakigtambag mahitungod kon sa unsang paagi nga ang mga miyembro makasuporta sa bag-o nga mga kinabig ug motabang kanila nga magpabilin nga aktibong moapil diha sa Simbahan. Pagplano kon kinsa ang mopaila kanila ngadto sa mga lider sa korum o organisasyon. Pakigsabot sa partisipasyon sa ubang mga miyembro samtang kamo motudlo sa mga leksiyon pag-usab. Paghangyo nga sangonan og tigpangalagad nga mga igsoong lalaki (ug tigpangalagad nga mga igsoong babaye alang sa mga babaye).

Human ang usa ka lalaki nakompirmahan, siya angayan nga makadawat sa Aaronic nga Pagkapari kon siya nag-edad og labing menos 12 anyos sa pagtapos sa tuig. Ang mga ordinasyon sa Aaronic nga Pagkapari anaa ubos sa direksiyon sa bishop (tan-awa sa Kinatibuk-ang Tamdanan nga Basahon, 38.2.9.1).

Kon tukma, pakigkontak niadtong inyong gitudloan sa tibuok ninyong kinabuhi. Suportahi sila sa pagdawat sa tanang panalangin sa ebanghelyo ni Jesukristo.

“Kon kita moduol uban sa masulub-on nga mga kasingkasing ug mahinulsulon nga mga espiritu, makakaplag kita og tingog diha ni Jesukristo ug gakson diha sa Iyang masinabtonon nga mga bukton sa kaluwasan. Ang sagrado nga mga ordinansa nagtanyag og pakigsaad nga mahisakop ug ‘ang gahom sa pagkadiosnon’ sa pagbalaan sa gitinguha ug gibuhat [Doktrina ug mga Pakigsaad 84:20]. Pinaagi sa Iyang mahigugmaon nga kaluoy ug pagkamainantoson, ang Iyang Simbahan mahimong atong Balay Abotanan” (Gerrit W. Gong, “Lawak sa Balay Abotanan,” Liahona, Mayo 2021, 27).

Tabangi ang Bag-o nga mga Miyembro nga Moapil diha sa mga Panalangin sa Templo

Ang bag-o nga mga miyembro nga anaa sa tukma nga edad mahimong modawat og rekomend sa templo nga magtugot kanila nga mabunyagan alang sa ilang namatay na nga mga sakop sa pamilya (tan-awa sa Kinatibuk-ang Tamdanan nga Basahon, 26.4.2). Sila modawat niini nga rekomend gikan sa bishop. Awhaga ug tabangi ang bag-o nga mga miyembro aron sa pagkuha og rekomend sa templo sa labing dali nga resonable nga panahon. Kon duol ang usa ka templo, ikonsiderar ang pagpadangat og imbitasyon alang sa usa ka piho nga panahon alang sa bag-o nga mga miyembro sa pagpahigayon og mga bunyag alang sa namatay na nga mga katigulangan.

Diha sa sinemana nga mga miting sa pakigsabot, planoha kinsa ang mopaila sa bag-o nga mga miyembro ngadto sa lider alang sa templo ug family history sa ward. Kini nga lider makatabang kanila sa pag-andam sa pagdawat sa mga panalangin sa templo pinaagi sa paghimo sa ilang kaugalingon nga mga pakigsaad sa templo.

Mga Ideya sa Pagtuon ug Paggamit

Personal nga Pagtuon

Ilista ang mga hagit nga lagmit masugatan sa usa ka bunyaganan. Nganong importante man nga ang usa ka tawo mobati sa gugma ug pagpakighigala sa mga miyembro sa Simbahan?
Tun-i ang Moroni 6 ug ang Doktrina ug mga Pakigsaad 20:68–69. Unsa man ang imong makat-onan gikan niini nga mga bersikulo mahitungod sa pag-andam sa mga tawo alang sa bunyag ug kompirmasyon? Isulat ang unsay imong makat-onan. Ipakigbahin ang imong mga hunahuna sa imong kompanyon atol sa pagtuon uban sa kompanyon.

Pagtuon uban sa Kompanyon ug Panagbaylo sa Kompanyon

Si Presidente Henry B. Eyring mipasabot kon nganong importante ang mga sumbanan sa ebanghelyo. Hisgoti ang mosunod nga tambag. Unsaon nimo sa pag-awhag ang mga tawo nga magtinguha sa pagkab-ot niini nga mga sumbanan?

“Ang Dios nagtakda sa Iyang mga sumbanan aron nga Siya makapanalangin kanato. Hunahunaa kadto nga mga panalangin: Iyang gisaaran sa tabang sa Espiritu Santo kadtong makasunod sa mga sumbanan. Siya misaad og personal nga kalinaw. Siya misaad sa kahigayonan sa pagdawat sa balaan nga mga ordinansa diha sa Iyang balay. Ug Siya misaad niadtong kinsa molahutay sa pagsunod sa Iyang mga sumbanan nga sila makabaton og kinabuhi nga dayon. …

“Tungod kay atong gihigugma ang mga tawo nga atong gialagaran, gusto natong tanan nga makabuhat og mas maayo pa sa pagtuboy sa mga anak sa atong Langitnong Amahan ngadto sa pagkamatinud-anon ug pagkaputli nga ilang gikinahanglan aron makadawat sa tanang mga panalangin sa Ginoo. …

“… Magsugod kamo pinaagi sa paghupot sa mga sumbanan sa Ginoo sa klaro ug walay pag-ukon-ukon nga paagi. Ug kon magkaanam og palayo ang kalibotan gikan niini ug mobugalbugal niini, kinahanglan nga magkadugang ang inyong kaisog sa pagbuhat niini” (“Mga Sumbanan sa Katakos,” Unang Tibuok Kalibotan nga Miting sa Pagbansay sa Pagpangulo, Ene. 2003, 10–11).
Rebyoha ang mga pangutana sa interbiyo sa bunyag. Hunahunaa kon unsaon ninyo sa pagdumala ang mga sitwasyon sama sa mosunod:
- Ang tawo wala mosulti kaninyo nga naa siya sa probation tungod sa usa ka krimen.
- Ang tawo wala makadawat og tubag sa pag-ampo nga si Joseph Smith usa ka propeta.
- Ang tawo nanigarilyo duha ka adlaw ang milabay.
- Ang tawo dili segurado kon nakadawat ba siya og tubag sa iyang mga pag-ampo.
- Ang pamilya mibati og pagpamugos gikan sa mga higala ug dili segurado kon andam ba sila alang sa bunyag.
Rebyoha ang Porma sa Bunyag ug Kompirmasyon. Ngano nga kinahanglan man nga ang impormasyon nga inyong nahatag husto ug kompleto?

Konseho sa District, mga Komperensiya sa Zone, ug Konseho sa Pagpangulo sa Misyon

Rebyoha ang kaimportante sa interbiyo sa bunyag. Hisgoti kon sa unsang paagi nga ang mga misyonaryo makatabang sa mga tawo nga makapangandam alang sa interbiyo.
Hisgoti kon unsaon paggamit ang mga tulumanon sa bunyag ug ang mga kompirmasyon isip mga oportunidad sa pagpangita.

Mga Lider sa Misyon ug Mga Magtatambag sa Misyon

Pakigtambayong sa lokal nga mga lider sa pagkapari ug organisasyon aron sa pagseguro nga sila epektibong naggamit report sa Pag-uswag sa Dalan sa Pakigsaad.
Tudloi ang mga lider sa district, zone, ug ang mga lider sa pagbansay sa mga sister kon unsaon sa pag-andam sa mga tawo alang sa interbiyo sa bunyag. Dapita sila sa pagbansay sa ubang mga misyonaryo aron sa pag-andam sa mga tawo alang niini nga interbiyo.
Tudloi ang mga lider sa district ug zone kon unsaon sa pagpahigayon og mga interbiyo sa bunyag.
Tudloi kon unsaon sa pagtubag diha sa usa ka interbiyo sa bunyag kon ang usa ka tawo mopadayag nga siya nakahimo og seryoso nga sala.
Kon posible, tambong sa mga tulumanon sa bunyag alang sa bag-o nga mga miyembro. Pakig-estorya sa bag-o nga mga miyembro ug pagkat-on mahitungod sa ilang mga kasinatian sa pagkakabig. Ipakigbahin ang unsay imong nakat-onan ngadto sa imong kompanyon ug sa mga misyonaryo.