“Kapitulo 6: Pagtinguha og Kristohanon nga mga Hiyas,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Kapitulo 6,” Isangyaw ang Akong Ebanghelyo
Kapitulo 6
Pagtinguha og Kristohanon nga mga Hiyas
Hunahunaa Kini
-
Sa unsang paagi nga ang pagtinguha og Kristohanon nga mga hiyas makatabang nako sa pagtuman sa akong katuyoan isip usa ka misyonaryo?
-
Sa unsang paagi nga ako makatinguha ug makadawat og Kristohanon nga mga hiyas?
-
Unsa nga hiyas o mga hiyas ang kinahanglan nakong tutokan karon?
Pasiuna
Sa pagsugod sa Iyang mortal nga pangalagad, si Jesukristo naglakaw daplin sa baybayon sa dagat sa Galilea ug mitawag sa duha ka mangingisda, sila si Pedro ug Andres. “Sumunod kamo kanako,” miingon Siya, “ug himoon ko kamong mga mangingisdag mga tawo” (Mateo 4:19; tan-awa usab sa Marcos 1:17).
Ang Ginoo mitawag usab kanimo ngadto sa Iyang buhat, ug nagdapit usab Siya kanimo sa pagsunod Kaniya. “Busa, unsa nga matang sa mga tawo kamo mahisama?” Siya nangutana. “Sa pagkatinuod Ako moingon nganha kaninyo, gani sama nga Ako mao” (3 Nephi 27:27).
Ang pipila ka kapitulo sa Isangyaw ang Akong Ebanghelyo nagtutok sa unsay imong kinahanglang buhaton isip usa ka misyonaryo, sama sa unsaon sa pagtuon, unsaon sa pagtudlo, ug unsaon sa pagtakda og mga tumong. Sama usab sa kamahinungdanon sa unsay imong gibuhat mao ang kinsa ikaw ug kinsa ikaw mamahimo sa umaabot. Mao kana ang gitutokan niini nga kapitulo.
Ang mga kasulatan naghulagway sa Kristohanon nga mga hiyas nga mahinungdanon nimong tinguhaon isip usa ka misyonaryo ug sa tibuok nimong kinabuhi. Ang usa ka Kristohanon nga hiyas mao ang usa ka kinaiya sa karakter sa Manluluwas. Kini nga kapitulo naghulagway sa pipila niadto nga mga hiyas. Tun-i kini ug ang mga kasulatan nga may kalabotan niini. Pangita og ubang Kristohanon nga mga hiyas samtang magtuon ka og ubang mga tudling sa kasulatan.
Personal nga Pagtuon
Tun-i ang Doktrina ug mga Pakigsaad 4. Unsa nga mga hiyas ang giila sa Ginoo nga importante alang sa mga misyonaryo? Sa unsang paagi nga ang pagtinguha niini nga mga hiyas makatabang nimo sa pagtuman sa imong misyonaryo nga katuyoan?
“Pagpangita Niini nga Jesus”
Si propeta Moroni miawhag, “Ako modasig kanimo sa pagpangita niini nga Jesus diin ang mga propeta ug mga apostoles misulat” (Ether 12:41). Usa ka importante nga paagi sa pagpangita ni Jesus mao ang paghimo og makugihon nga paningkamot nga magkat-on kabahin Kaniya ug mahimong mas sama Kaniya. Ang imong misyon mao ang labing maayong panahon sa pagtutok niini.
Samtang maningkamot ka nga mahimong mas sama ni Kristo, mas matuman nimo og maayo ang imong katuyoan isip usa ka misyonaryo. Makasinati ka og hingpit nga kalipay, kalinaw, ug espirituhanong paglambo samtang ang Iyang mga hiyas mahimong kabahin sa imong kinaiya. Ikaw usab moestablisar og pundasyon sa pagpadayon sa pagsunod Kaniya sa tibuok nimong kinabuhi.
Mga Gasa gikan sa Dios
Ang kristohanon nga mga hiyas mga gasa gikan sa Dios. Sama sa tanang maayo nga mga butang, kini nga mga gasa moabot pinaagi sa “grasya sa Dios nga Amahan, ug usab ni Ginoong Jesukristo, ug sa Espiritu Santo” (Ether 12:41).
Tutok kang Kristo samtang maningkamot ka nga magpalambo sa Iyang mga hiyas (tan-awa sa Doktrina ug mga Pakigsaad 6:36). Kini nga mga hiyas dili mga butang diha sa usa ka lista nga tsekanan. Kini dili mga teknik nga inyong maugmad diha sa usa ka programa sa pagpalambo sa kaugalingon. Kini dili maangkon pinaagi lamang sa personal nga determinasyon. Hinuon, ikaw makadawat niini samtang maningkamot ka nga mahimong usa ka mas mapahinungoron nga disipulo ni Jesukristo.
Pag-ampo nga ang Dios mopanalangin nimo niini nga mga hiyas. Mapainubsanon nga moila sa imong kahuyang ug sa imong panginahanglan alang sa Iyang gahom diha sa imong kinabuhi. Kon imong buhaton, Siya “mohimo sa mahuyang nga mga butang nga mahimo nga malig-on [nganha kanimo]” (Ether 12:27).
Usa ka Anam-anam nga Proseso
Ang pagkahimong mas sama sa Manluluwas usa ka anam-anam, tibuok kinabuhi nga proseso. Uban sa usa ka tinguha sa pagpahimuot sa Dios, himoang mas maayo ang usa desisyon sa matag usa ka higayon.
Pagmapailobon sa imong kaugalingon. Ang Dios nasayod nga ang kausaban ug paglambo nagkinahanglan og panahon. Nahimuot Siya sa imong sinsero nga mga tinguha ug mopanalangin kanimo alang sa matag paningkamot nga imong himoon.
Samtang maningkamot ka nga mahimong mas sama ni Kristo, ang imong mga tinguha, mga hunahuna, ug mga aksiyon mausab. Pinaagi sa Pag-ula ni Jesukristo ug sa gahom sa Espiritu Santo, ang imong kinaiya mismo malunsay (tan-awa sa Mosiah 3:19).
Ang Espiritu Santo mopalapad ug mopadako sa atong mga abilidad. Siya “mag-awhag og hiyas, kamabination, kamaayo, kalumo, kaaghop, ug gugmang putli. … Buot ipasabot, kini, mao ang, uyok sa kabukogan, kalipay sa kasingkasing, kahayag sa mga mata, musika sa mga dalunggan, ug kinabuhi sa kinatibuk-ang pagkatawo” (Parley P. Pratt, Key to the Science of Theology [1855], 98–99).
Pagtuon sa Kasulatan
Unsa man ang gitudlo niini nga mga kasulatan kabahin sa pagsunod sa ehemplo ni Jesukristo?
Unsa ang imong makat-onan gikan sa mosunod nga mga kasulatan mahitungod sa pagtinguha og Kristohanon nga mga hiyas?
Hugot nga Pagtuo diha ni Jesukristo
Aron ang hugot nga pagtuo mosangpot sa kaluwasan, kinahanglan nga isentro nimo kini diha ni Jesukristo (tan-awa sa Mga Buhat 4:10–12; Mosiah 3:17; Moroni 7:24–26). Kon ikaw adunay hugot nga pagtuo kang Kristo, ikaw mosalig Kaniya isip ang Bugtong Anak sa Dios. Masaligon ka nga samtang ikaw maghinulsol, ikaw mapasaylo sa imong mga sala pinaagi sa Iyang maulaong sakripisyo ug mabalaan pinaagi sa Espiritu Santo (tan-awa sa 3 Nephi 27:16, 20).
Ang hugot nga pagtuo dili ang pagbaton sa hingpit nga kasayoran. Hinuon, kini usa ka kasegurohan gikan sa Espiritu sa mga butang nga wala nimo makita apan tinuod. (Tan-awa sa Alma 32:21.)
Imong ipakita ang imong hugot nga pagtuo pinaagi sa binuhatan. Kini nga mga binuhatan naglakip sa pagsunod sa mga pagtulon-an ug ehemplo sa Manluluwas. Kini naglakip sa pagserbisyo sa uban ug pagtabang kanila nga mopili sa pagsunod ni Kristo. Ikaw usab mopakita sa imong hugot nga pagtuo pinaagi sa kakugi, paghinulsol, ug gugma.
Ang hugot nga pagtuo maoy usa ka baroganan sa gahom. Samtang magpakita ka og hugot nga pagtuo diha ni Jesukristo, mapanalanginan ka sa Iyang gahom nga gipahaom sa imong kahimtang. Makasinati ka og mga milagro sumala sa kabubut-on sa Ginoo. (Tan-awa sa Jacob 4:4–7; Moroni 7:33; 10:7.)
Ang imong hugot nga pagtuo diha ni Jesukristo magtubo samtang mas makaila ka og maayo Kaniya ug sa Iyang mga pagtulon-an. Madugangan kini samtang mosiksik ka sa mga kasulatan, sinsero nga mag-ampo, ug mosunod sa mga sugo. Ang pagduhaduha ug sala mopahuyang sa hugot nga pagtuo.
“Ang hugot nga pagtuo dili usa ka pagbati; lamang, usa kini ka desisyon. Uban sa pag-ampo, pagtuon, pagkamasulundon, ug mga pakigsaad [kita mipalambo] ug mipalig-on sa atong hugot nga pagtuo. Ang atong hugot nga pagtuo sa Manluluwas ug [sa] Iyang buhat sa ulahing adlaw mahimong … gamhanan nga [mga] lente diin kita mahimong mohukom [sa tanan]. Dayon, kon atong malabang ang lisod nga mga pagsulay sa kinabuhi, … anaa kanato ang kalig-on sa pagpili sa husto nga dalan” (Neil L. Andersen, “Tinuod Kini, Dili Ba? Busa Unsa Pay Angay nga Kabalak-an?” Liahona, Mayo 2007, 75).
Pagtuon sa Kasulatan
Unsa man ang hugot nga pagtuo?
Unsaon man nimo sa pag-angkon og hugot nga pagtuo, ug unsa man ang imong mabuhat pinaagi sa hugot nga pagtuo?
Unsa nga mga panalangin ang moabot pinaagi sa hugot nga pagtuo?
Paglaom
Ang paglaom dili lamang ang pangindahay nga paghunahuna. Hinuon, kini mao ang usa ka malahutayon nga pagsalig, nakabase sa imong hugot nga pagtuo ni Kristo, nga ang Dios motuman sa Iyang mga saad nganha kanimo (tan-awa sa Moroni 7:42). Kini mao ang pagpaabot “sa mga maayong butang nga nanagpangabot” pinaagi ni Kristo (Mga Hebreohanon 9:11).
Ang inyong kinadak-an nga tinubdan sa paglaom mao si Jesukristo. Si propeta Mormon nangutana, “Unsa kana nga kamo molaom?” Siya dayon mitubag, “Kamo magbaton og paglaom pinaagi sa pag-ula ni Kristo ug sa gahom sa iyang pagkabanhaw, aron mabanhaw ngadto sa kinabuhi nga dayon, ug kini tungod sa inyong hugot nga pagtuo diha kaniya sumala sa saad” (Moroni 7:41; tan-awa sa mga bersikulo 40–43).
Samtang imong isentro ang imong paglaom diha kang Kristo, ikaw adunay kasegurohan nga ang tanan nga mga butang maghiusa sa paglihok alang sa imong kaayohan (tan-awa sa Doktrina ug mga Pakigsaad 90:24). Kini nga kasegurohan motabang kanimo sa paglahutay uban sa hugot nga pagtuo kon ikaw mag-atubang og mga pagsulay. Kini makatabang usab kanimo nga motubo gikan sa mga pagsulay ug makaugmad og espirituwal nga kalig-on ug kusog. Ang paglaom diha kang Kristo maghatag og kalig-on alang sa imong kalag (tan-awa sa Ether 12:4).
Ang paglaom maghatag kanimo og pagsalig nga ang Dios mopadako sa imong makugihon, matarong nga mga paningkamot (tan-awa sa Doktrina ug mga Pakigsaad 123:17).
Usa ka paagi sa pagdugang og paglaom mao ang paghinulsol. Ang pagkahimong nalimpyohan ug napasaylo pinaagi sa maulaong sakripisyo ni Jesukristo makamugna ug makapahiuli og paglaom (tan-awa sa Alma 22:16).
Si Nephi miawhag, “Padayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo” (2 Nephi 31:20). Samtang ikaw mosunod sa ebanghelyo, ikaw molambo sa imong abilidad nga “magpadayon pagtubo ang [imong] paglaom” (Mga Taga-Roma 15:13).
“Sa kaluya, kita hugot nga mohupot sa paglaom nga ang tanang butang ‘maghiusa paglihok alang sa [atong] kaayohan’ samtang kita mosunod sa mga tambag sa mga propeta sa Dios. Kini nga matang sa paglaom diha sa Dios, sa Iyang kamaayo, ug sa Iyang gahom makapadasig og balik kanato panahon sa malisod nga mga hagit ug maghatag og kalig-on niadtong kinsa mibati og kahadlok tungod sa pagkabilanggo sa kahadlok, pagduhaduha, ug pagkawalay paglaom” (Dieter F. Uchtdorf, “Ang Walay Kinutoban nga Gahom sa Paglaom,” Liahona, Nob. 2008, 23).
Pagtuon sa Kasulatan
Unsa man ang paglaom, ug unsa man ang atong gilaoman?
-
Ang Giya ngadto sa mga Kasulatan: “Paglaom”
Gugmang Putli ug Gugma
Usa ka tawo kausa nangutana kang Jesus, “Unsa man ang labing dakong sugo sa balaod?” Mitubag si Jesus: “Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna. Kini ang labing dako ug labing importanteng sugo. Ang ikaduha nga labing importanteng sugo sama sa una: Higugmaa ang imong isigkatawo sama sa imong kaugalingon” (Mateo 22:36–39).
Ang gugmang putli mao “ang tiunay nga gugma ni Kristo” (Moroni 7:47). Naglakip kini sa mahangtorong gugma sa Dios alang sa tanan Niyang mga anak.
Si propeta Mormon mitudlo, “Pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma” (Moroni 7:48). Samtang mag-ampo ka nga mapuno sa gugmang putli ang imong kasingkasing, ikaw makatagamtan sa gugma sa Dios. Ang imong gugma alang sa mga tawo madugangan, ug ikaw mobati og sinsero nga pagpakabana alang sa ilang mahangtoron nga kalipay. Makita nimo sila isip mga anak sa Dios nga dunay potensiyal nga mahimong sama Kaniya, ug ikaw maningkamot alang kanila.
Samtang ikaw mag-ampo alang sa gasa sa gugmang putli, ikaw dili kaayo maghambin og negatibo nga mga pagbati sama sa kasuko o kasina. Ikaw dili kaayo mohukom o manaway sa uban. Ikaw makabaton og dugang nga tinguha nga maningkamot nga makasabot kanila ug sa ilang mga panglantaw. Ikaw mahimong mas mapailobon ug mosulay sa pagtabang sa mga tawo kon sila nanglimbasog o nawad-an og paglaom. (Tan-awa sa Moroni 7:45.)
Ang gugmang putli, sama sa hugot nga pagtuo, mosangpot sa aksiyon. Mapalig-on nimo kini samtang moserbisyo ka sa uban ug mohatag kon unsay anaa kanimo.
Ang gugma nga putli makapausab. Ang Langitnong Amahan motugyan niini “diha sa tanan kinsa tinuod nga mga sumusunod sa iyang Anak, nga si Jesukristo; … nga kon siya moabot kita mahisama kaniya … aron mahimo kita nga putli ingon nga siya putli” (Moroni 7:48).
Pagtuon sa Kasulatan
Unsa man ang gugmang putli?
-
Ang Giya ngadto sa mga Kasulatan: “Gugma nga Putli”
Giunsa man pagpakita ni Jesukristo ang gugma nga putli?
Unsa man ang imong makat-onan mahitungod sa gugma nga putli gikan sa mosunod nga mga kasulatan?
Hiyas
“Kami nagtuo sa [pagkahimong] … mahiyason,” gipahayag sa Mga Artikulo sa Hugot nga Pagtuo (1:13). Ang hiyas mao ang sundanan sa hunahuna ug pamatasan ug gibase sa taas nga matarong nga mga sumbanan. Kini mao ang pagkamaunongon ngadto sa Dios ug sa uban. Usa ka importante nga bahin sa hiyas mao ang pagpaningkamot nga mahimong limpyo ug putli sa espirituwal ug pisikal nga paagi.
Ang hiyas nagagikan sa imong mga hunahuna ug mga tinguha. “Himoa ang hiyas nga modayan-dayan sa inyong mga hunahuna nga walay paghunong,” miingon ang Ginoo (Doktrina ug mga Pakigsaad 121:45). Tutok sa matarong, makapabayaw nga mga hunahuna. Isalikway ang dili takos nga mga hunahuna sa imong kaisipan kaysa maghambin niini.
Ang imong hunahuna sama sa usa ka entablado sa usa ka sinehan. Kon tugotan nimo ang dili maayo nga mga hunahuna nga magpabilin diha sa entablado sa imong hunahuna, mas lagmit ka nga makasala. Kon aktibo nimong pun-on ang imong hunahuna og maayo nga mga butang, mas lagmit kang mohangop sa unsay mahiyason ug molikay sa unsay daotan. Pagmalaamon mahitungod sa unsay imong tugotan nga mosulod ug magpabilin diha sa entablado sa imong hunahuna.
Samtang maningkamot ka nga mahiyason nga magpakabuhi, ang imong “pagsalig [mo]samot pagkalig-on diha sa atubangan sa Dios; ug … ang Espiritu Santo mao ang inyong kauban sa kanunay” (Doktrina ug mga Pakigsaad 121: 45–46).
Pagtuon sa Kasulatan
Unsa man ang gipasabot sa mahimo nga mahiyason?
-
Ang Giya ngadto sa mga Kasulatan: “Hiyas”
Kaligdong
Ang kaligdong naggikan sa unang dakong sugo sa paghigugma sa Dios (tan-awa sa Mateo 22:37). Tungod kay nahigugma ka sa Dios, matinud-anon ka Kaniya sa tanang higayon. Sama sa mga anak ni Helaman, ikaw “maglakaw nga matarong sa iyang atubangan” (Alma 53:21).
Kon ikaw adunay kaligdong, ikaw nakasabot nga adunay husto ug sayop ug nga adunay hingpit mga kamatuoran—ang kamatuoran sa Dios. Gamiton nimo ang imong kabubut-on sa pagpili sumala sa kamatuoran sa Dios, ug ikaw maghinulsol dayon kon ikaw wala maghimo niini. Unsay imong pilion nga hunahunaon—ug unsa ang imong buhaton kon ikaw nagtuo nga walay usa nga nagtan-aw—mao ang usa ka lig-ong sukdanan sa imong kaligdong.
Ang kaligdong nagpasabot nga dili nimo paubsan ang imong mga sumbanan o kinaiya aron ikaw makapadani o mahimong dawaton sa uban. Buhaton nimo kon unsay husto bisan kon ang uban motamay sa imong tinguha nga magmatinud-anon ngadto sa Dios (tan-awa sa 1 Nephi 8:24–28). Magpakabuhi ka nga adunay dungog sa tanang kahimtang, lakip kon giunsa nimo pagrepresentar ang imong kaugalingon sa online.
Kon ikaw adunay kaligdong, ikaw motuman sa imong mga pakigsaad sa Dios ingon man sa imong matarong nga mga pasalig ngadto sa uban.
Ang kaligdong naglakip sa pagkahimong matinuoron sa Dios, sa imong kaugalingon, sa imong mga lider, ug sa uban. Ikaw dili mamakak, mangawat, manikas, o mangilad. Kon makabuhat ka og sayop, dawaton nimo ang responsibilidad ug maghinulsol imbes maningkamot nga mangatarongan niini.
Samtang ikaw magpakabuhi nga adunay kaligdong, makabaton ka og kalinaw sa kahiladman ug respeto sa kaugalingon. Ang Ginoo ug ang uban mosalig kanimo.
Pagtuon sa Kasulatan
Giunsa ni Jesus pagpakita og kaligdong bisan diha sa Iyang labing huyang nga mga higayon?
Giunsa sa batan-ong mga sundalo diha sa kasundalohan ni Helaman pagpakita og kaligdong?
Giunsa ni Daniel pagpakita og kaligdong? Giunsa sa Dios pagpanalangin si Daniel tugod sa iyang kaligdong?
Nganong gihigugma sa Ginoo ang igsoong lalaki ni Joseph Smith nga si Hyrum?
Kahibalo
Ang Ginoo mitambag, “Pangitaa ang pagtulon-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Atol sa imong misyon ug sa tibuok nimong kinabuhi, pagtinguha og kahibalo, ilabi na sa espirituwal nga kahibalo.
Pagtuon sa mga kasulatan kada adlaw, ingon man sa mga pulong sa buhi nga mga propeta. Pinaagi sa pagtuon ug pag-ampo, pangayo og panabang alang sa piho nga mga pangutana, mga hagit, ug mga oportunidad. Pangita og mga tudling sa kasulatan nga imong magamit sa pagtudlo ug sa pagtubag sa mga pangutana mahitungod sa ebanghelyo.
Samtang ikaw makugihon ug mainampoon nga magtuon, ang Espiritu Santo molamdag sa imong hunahuna. Siya motudlo kanimo ug mohatag kanimo og panabot. Siya motabang kanimo sa paggamit sa mga pagtulon-an sa mga kasulatan ug sa mga propeta sa ulahing mga adlaw diha sa imong kinabuhi. Sama ni Nephi, ikaw makaingon:
“Ang akong kalag nalipay sa mga kasulatan, ug ang akong kasingkasing namalandong kanila. … “Tan-awa, ang akong kalag nalipay sa mga butang sa Ginoo; ug ang akong kasingkasing nagpalandong sa kanunay diha sa mga butang diin ako nakakita ug nakadungog.” (2 Nephi 4:15–16).
Pagtuon sa Kasulatan
Sa unsang paagi nga ang kahibalo makatabang kanimo sa paghimo sa buluhaton sa Ginoo?
Unsaon man nimo sa pagkabaton og kahibalo?
-
Ang Giya ngadto sa mga Kasulatan: “Kahibalo”
Pailob
Ang pailob mao ang kapasidad sa pagsalig sa Dios samtang ikaw mag-atubang og kalangay, oposisyon, o pag-antos. Pinaagi sa imong hugot nga pagtuo, ikaw mosalig sa tukma nga panahon sa Dios alang sa katumanan sa Iyang gisaad nga mga panalangin.
Kon ikaw mapailobon, ikaw magtan-aw sa kinabuhi gikan sa usa ka mahangtorong panglantaw. Ikaw dili magdahom og dihadiha nga mga panalangin o mga sangpotanan. Ang imong matarong nga mga tinguha kasagaran matuman “pagtulon-an human sa usa ka pagtulon-an, … diyutay dinhi ug diyutay didto” (2 Nephi 28:30). Ang ubang matarong nga mga tinguha tingali dili matuman hangtod human niini nga kinabuhi.
Ang pailob dili lamang ang pagkawalay gibuhat o ang pagkawalay pagtagad. Kini mao ang “magmalipayon sa [pagbuhat] sa tanan nga mga butang nga ubos sa [imong] gahom” samtang ikaw magserbisyo sa Dios (Doktrina ug mga Pakigsaad 123:17). Ikaw motanom, mobisbis, moalima sa binhi, ug ang Dios mohatag sa pagtubo sa “dili madugay” (Alma 32:42; tan-awa usab sa 1 Mga Taga-Corinto 3:6–8). Ikaw makigtambayayong sa Dios, mosalig nga kon imong nabuhat ang imong bahin, Iyang humanon ang Iyang buhat sa Iyang panahon ug sumala sa indibidwal nga kabubut-on.
Ang pailob nagpasabot usab nga kon dili mausab ang usa ka butang, imo kining dawaton uban sa kaisog, grasya, ug hugot nga pagtuo.
Pag-ugmad og pailob ngadto sa uban, lakip sa imong kompanyon ug niadtong inyong serbisyohan. Pagmapailobon usab sa imong kaugalingon. Paningkamot alang sa labing maayo sulod sa imong kaugalingon samtang nakaamgo nga ikaw anam-anam nga molambo.
Sama sa ubang Kristohanon nga mga hiyas, ang paglambo sa pailob usa ka tibuok kinabuhi nga proseso. Ang pagpakita og pailob mahimong adunay makaayo nga impluwensya sa imong kalag ug niadtong naglibot kanimo.
“Ang pailob nagkahulogan nga aktibong maghulat ug maglahutay. Nagkahulogan kini nga magpabilin uban sa usa ka butang ug sa pagbuhat sa tanan kutob sa atong mahimo––motrabaho, molaom, ug mogamit sa hugot nga pagtuo; molahutay sa kalisod uban sa determinasyon, bisan kon ang mga tinguha sa atong mga kasingkasing nalangan. Ang pailob dili lamang ang paglahutay; kondili paglahutay og maayo!” (Dieter F. Uchtdorf, “Ipadayon ang Pagpailob,” Liahona, Mayo 2010, 57).
Personal nga Pagtuon
Tun-i ang Mosiah 28:1–9.
-
Unsa man ang mga tinguha sa mga anak nga lalaki ni Mosiah?
-
Unsa man ang tambag sa Ginoo ngadto niadto nga mga misyonaryo? (Tan-awa sa Alma 17:10–11; 26:27.)
-
Unsa man ang pipila ka resulta sa ilang pailob ug kakugi? (Tan-awa sa Alma 26.)
Isulat ang imong tubag diha sa imong journal sa pagtuon.
Pagtuon sa Kasulatan
Ngano nga ang pailob importante man? Sa unsa nga paagi nga ang pailob ug hugot nga pagtuo adunay kalabotan sa usag usa?
-
Ang Giya ngadto sa mga Kasulatan: “Pailob”
Pagpaubos
Ang pagpaubos mao ang kaandam sa pagtugyan ngadto sa kabubut-on sa Ginoo. Kini mao ang kaandam sa paghatag Kaniya sa dungog alang sa unsay natuman. Kini mao ang pagkahimong matudloan (tan-awa sa Doktrina ug mga Pakigsaad 136:32). Ang pagpaubos naglakip sa pagpasalamat alang sa mga panalangin sa Dios ug pag-ila sa imong makanunayong panginahanglan alang sa Iyang tabang. Siya motabang niadtong kinsa mapainubsanon.
Ang pagpaubos maoy usa ka timailhan sa espirituwal nga kalig-on, dili kahuyang. Ang pagpaubos usa ka importante nga tigpasiugda og espirituwal nga pagtubo (tan-awa sa Ether 12:27).
Kon mapainubsanon kang mosalig sa Ginoo, makabaton ka sa kasegurohan nga ang Iyang mga sugo alang sa imong kaayohan. Makasalig ka nga makabuhat ka sa bisan unsang butang nga gikinahanglan Niya nga imong buhaton kon mosalig ka Kaniya. Andam usab kang mosalig sa Iyang mga sulugoon ug mosunod sa ilang tambag. Ang pagpaubos motabang kanimo nga mahimong masulundon, maningkamot og maayo, ug moserbisyo.
Ang katugbang sa pagpaubos mao ang garbo. Ang pagkamahimong mapasigarbohon nangahulogan nga magbutang og mas dakong pagsalig diha sa usa ka tawo kay sa Dios. Nangahulogan usab kini sa pagbutang sa mga butang sa kalibotan labaw pa sa mga butang sa Dios. Ang garbo makigkompetensiya; kadtong mga mapasigarbohon maninguha sa pagbaton og mas daghan pa ug maghunahuna nga mas maayo pa sila kaysa ubang mga tawo. Ang garbo mao ang usa ka dakong babag.
Pagtuon sa Kasulatan
Unsa ang buot ipasabot sa pagkamapainubsanon?
-
Ang Giya ngadto sa mga Kasulatan, “Mapainubsanon, Pagkamapainubsanon”
Unsa man nga mga panalangin ang imong madawat kon magpaubos ka sa imong kaugalingon?
Unsaon man nimo sa pag-ila sa garbo diha sa imong kaugalingon?
Kakugi
Ang kakugi mao ang kanunay, tinuoray nga paningkamot. Sa misyonaryo nga buhat, ang kakugi mao ang usa ka pagpahayag sa imong gugma alang sa Ginoo. Kon ikaw makugihon, makakita ka og kalipay ug katagbawan diha sa buhat sa Dios (tan-awa sa Alma 26:16).
Ang kakugi naglakip sa pagbuhat og daghang maayo nga mga butang sa imong kaugalingong gawasnon nga kabubut-on imbes nga maghulat sa mga lider nga mosulti kanimo kon unsay buhaton (tan-awa sa Doktrina ug mga Pakigsaad 58:27–29).
Padayon sa pagbuhat og maayo bisan kon kini lisod o ikaw gikapoy. Apan ilha ang panginahanglan alang sa balanse ug pahulay aron ikaw dili “modagan nga labaw pa kay sa [imong] kusog” (Mosiah 4:27).
Isentro ang imong pagtutok ug mga tinguha diha sa Ginoo ug sa Iyang buhat. Likayi ang mga butang nga makabalda nimo gikan sa imong mga prayoridad. Itutok ang imong panahon ug mga paningkamot sa mga kalihokan nga mahimong labing epektibo diha sa imong area ug labing makatabang sa mga tawo nga imong gitudloan.
“Mao kini ang Simbahan sa Ginoo. Siya mitawag kanato ug misalig kanato bisan pa man sa mga kahuyang nga Iyang nasayran nga kita aduna. Nasayod siya sa mga pagsulay nga atong atubangon. Pinaagi sa matinud-anon nga pag-alagad ug pinaagi sa Iyang Pag-ula, kita makakat-on sa unsay Iyang gusto ug mahimo kon unsay angay nga kita mahimo aron sa pagpanalangin niadtong atong gialagaran alang Kaniya. Samtang kita mag-alagad Kaniya sa igo nga gidugayon ug uban sa kakugi, kita mausab. Kita mahimo gayod nga mas sama Kaniya” (Henry B. Eyring, “Pagbuhat diha sa Tanan nga Kakugi,” Liahona, Mayo 2010, 63).
Pagtuon sa Kasulatan
Unsa man ang gipasabot nga mahimong kugihan?
-
Ang Giya ngadto sa mga Kasulatan: “Kakugi”
Nganong gipaabot man sa Ginoo nga magmakugihon ka?
Sa unsa man nga paagi nga ang kakugi may kalabotan sa kabubut-on?
Pagkamasulundon
Ang imong serbisyo isip usa ka misyonaryo usa ka ekstensiyon sa mga pakigsaad nga imong gihimo ngadto sa Dios atol sa bunyag ug didto sa templo. Sa dihang imong nadawat ang mga ordinansa sa bunyag ug sa pagtuga, ikaw nakigsaad nga ikaw motuman sa Iyang mga sugo.
Si Hari Benjamin mitudlo: “Ako nagtinguha nga kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtod sa kataposan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay kataposan ang kalipay” (Mosiah 2:41).
Ang pagsunod sa mga sugo usa ka pagpahayag sa gugma alang sa Langitnong Amahan ug ni Jesukristo (tan-awa sa Juan 14:15). Miingon si Jesus, “Kon tumanon ninyo ang akong mga sugo, magpabilin kamo sa akong gugma; maingon nga gituman ko ang mga sugo sa akong Amahan ug nagapabilin ako diha sa iyang gugma” (Juan 15:10).
Sunda ang mga sumbanan diha sa Mga Sumbanan sa Misyonaryo alang sa mga Disipulo ni Jesukristo. Sunda usab ang tambag sa imong presidente sa misyon ug sa iyang asawa samtang sila motambag kanimo diha sa pagkamatarong.
“Ang pagkamasulundon mao ang atong pagpili. Ang Manluluwas miklaro niini. Segun sa gipahayag diha sa Hubad ni Joseph Smith sa Lucas 14:28, si Jesus mimando, ‘Busa, ipahimutang kini diha sa inyong mga kasingkasing, nga kamo mohimo sa mga butang nga ako motudlo, ug mosugo kaninyo.’ Ingon niana ka yano. … Samtang ato kining buhaton, ang atong espirituwal nga kalig-on mapalambo gayod og maayo. Molikay kita nga mag-usik-usik sa hinatag sa Dios nga mga kapanguhaan ug mohimo og dili mabungahon ug makadaot nga mga pagtipas sa atong kinabuhi” (Dale G. Renlund, “Constructing Spiritual Stability” [debosyonal sa Brigham Young University, Sept. 16, 2014], 2, speeches.byu.edu).
Pagtuon sa Kasulatan
Unsa ang imong makat-onan mahitungod sa pagkamasulundon gikan sa mosunod nga mga kasulatan?
Usa ka Sundanan alang sa Pagkahimong Mas Sama ni Kristo
Ang mosunod nga sundanan makatabang kanimo nga makapalambo ug makadawat sa mga hiyas nga gihulagway niini nga kapitulo ug sa ubang mga hiyas nga gihulagway diha sa mga kasulatan:
-
Moila sa hiyas nga gusto nimong tinguhaon.
-
Mosulat og usa ka deskripsiyon sa hiyas.
-
Molista ug magtuon sa mga tudling sa kasulatan nga nagpakita og mga ehemplo sa hiyas o nga nagtudlo kabahin niini.
-
Morekord sa imong mga pagbati ug mga impresyon.
-
Motakda og mga tumong ug mohimo og mga plano sa pag-uswag diha sa hiyas.
-
Mag-ampo sa Dios nga motabang kanimo nga makapalambo ug makadawat sa hiyas.
-
Moimbang-timbang sa imong pag-uswag matag karon ug unya.
“Ang Ginoo mopanalangin niadtong kinsa gusto nga molambo, kinsa modawat sa mga panginahanglan sa mga sugo ug mosulay aron sa pag[tuman] niini, kinsa [mohatag og bili] sa Kristohanong mga hiyas ug maningkamot sa pag-angkon niini. Kon kamo nasayop niana nga paningkamot, mao usab ang tanan; ang Manluluwas anaa sa pagtabang kaninyo sa pagpadayon. … Sa dili madugay inyong maangkon ang kalamposan nga inyong gitinguha” (Jeffrey R. Holland, “Ugma ang Ginoo Mobuhat og Katingalahan diha Kaninyo,” Liahona, Mayo 2016, 126).
Personal nga Pagtuon
Pag-ila og usa ka hiyas gikan niini nga kapitulo o gikan sa mga kasulatan. Sunda ang sundanan nga bag-ohay lang nga gihulagway aron makasabot ug motinguha sa hiyas.
Tan-awa ang imong name tag sa misyonaryo. Sa unsa nga paagi nga lahi kini kay sa nianang gisul-ob sa mga empleyado sa usa ka kompaniya? Hinumdomi nga ang duha ka labing mahinungdanon nga mga parte mao ang imong ngalan ug ang ngalan sa Manluluwas.
-
Unsaon man nga mas marepresentar nimo og maayo ang Manluluwas isip usa sa Iyang mga disipulo?
-
Nganong importante man alang sa mga tawo nga malambigit ang imong ngalan sa ngalan sa Manluluwas sa usa ka positibo nga paagi?
Isulat ang imong mga hunahuna diha sa imong journal sa pagtuon.
Pagtuon sa Kasulatan
Rebyoha ang mga hiyas nga gilista sa mosunod nga mga kasulatan. Irekord ang bisan unsa nga mga impresyon diha sa imong journal sa pagtuon.
Mga Ideya sa Pagtuon ug Paggamit
Personal nga Pagtuon
-
Matag karon ug unya kompletoha ang “Kalihokan Kabahin sa Hiyas” diha sa kataposan niini nga kapitulo.
-
Pag-ila og usa ka hiyas dinhi niini nga kapitulo. Pangutan-a ang imong kaugalingon:
-
Unsaon nako nga makakat-on pa og dugang mahitungod niini nga hiyas?
-
Sa unsang paagi nga ang pagtinguha niini nga hiyas makatabang nako nga mahimong usa ka mas maayo nga tigpangalagad sa ebanghelyo ni Jesukristo?
-
-
Pangita og mga ehemplo sa Kristohanon nga mga hiyas sa mga kinabuhi sa mga kalalakin-an ug kababayen-an diha sa mga kasulatan. Irekord ang imong mga impresyon diha sa imong journal sa pagtuon.
-
Pangita og mga ehemplo sa Kristohanon nga mga hiyas diha sa sagrado nga musika sa Simbahan. Samtang ikaw magtinguha og usa ka hiyas, sag-uloha ang mga pulong sa mga himno o mga awit aron makakaplag og kusog ug gahom. Balika o kantaha ang mga pulong diha sa imong kaugalingon alang sa inspirasyon ug aron sa pag-imbitar sa impluwensya sa Espiritu.
Pagtuon uban sa Kompanyon ug Panagbaylo sa Kompanyon
-
Tun-i ang mga pakisayran sa Kristohanon nga mga hiyas diha sa Gospel Library o sa ubang gitugotan nga mga kapanguhaan. Hisgoti kon unsaon sa paggamit sa unsay inyong nakat-onan. Mahimong hisgotan usab ninyo kon unsay inyong nakat-onan sa inyong personal nga mga paningkamot sa pagkahimong sama ni Kristo.
Konseho sa District, mga Komperensiya sa Zone, ug Konseho sa Pagpangulo sa Misyon
-
Pipila ka adlaw sa dili pa ang konseho o komperensiya, hangyoa ang matag misyonaryo sa pag-andam og lima ka minuto nga pakigpulong bahin sa usa ka Kristohanon nga hiyas. Hatagi og panahon ang pipila ka misyonaryo aron mopakigbahin sa ilang mga pakigpulong diha sa miting.
-
Bahina ang mga misyonaryo ngadto sa upat ka grupo, ug hatagi sila sa mosunod nga buhatonon:
Grupo 1: Basaha ang 1 Nephi 17:7–16 ug tubaga ang mosunod nga mga pangutana:
-
Giunsa man ni Nephi paggamit ang iyang hugot nga pagtuo?
-
Unsa man ang gibuhat ni Nephi nga Kristohanon?
-
Unsa nga mga saad ang gihimo sa Ginoo ngadto ni Nephi?
-
Sa unsang paagi nga kini nga asoy maggamit sa misyonaryo nga buhat?
Grupo 2: Basaha ang Marcos 5:24–34 ug tubaga ang mosunod nga mga pangutana:
-
Sa unsa nga paagi nga kini nga babaye nagpakita og hugot nga pagtuo diha ni Jesukristo?
-
Nganong naayo man siya?
-
Unsaon nato pagsunod sa iyang ehemplo diha sa atong mga misyonaryo nga mga paningkamot?
Grupo 3: Basaha ang Jacob 7:1–15 ug tubaga ang mosunod nga mga pangutana:
-
Nganong ang hugot nga pagtuo ni Jacob may igo nga kalig-on sa pagpakgang sa pangatake ni Sherem?
-
Giunsa man ni Jacob paggamit ang hugot nga pagtuo sa dihang nakigsulti siya ni Sherem?
-
Sa unsa man nga paagi nga ang mga aksiyon ni Jacob Kristohanon?
Grupo 4: Basaha ang Joseph Smith—Kasaysayan 1:8–18 ug tubaga ang mosunod nga mga pangutana:
-
Sa unsa man nga mga paagi nga gigamit ni Joseph Smith ang hugot nga pagtuo diha ni Jesukristo?
-
Sa unsang paagi nga ang iyang hugot nga pagtuo nasulayan?
-
Unsa man ang iyang gibuhat nga Kristohanon?
-
Unsaon nato pagsunod sa ehemplo ni Joseph Smith?
Human matapos ang mga grupo, pundoka ang mga misyonaryo ug hangyoa sila sa pagpakigbahin sa unsay ilang nahisgotan.
-
Mga Lider sa Misyon ug Mga Magtatambag sa Misyon
-
Hangyoa ang mga misyonaryo sa pagbasa sa usa sa upat ka Ebanghelyo diha sa Bag-ong tugon o sa 3 Nephi 11–28. Pabadlisi nila ang unsay gibuhat sa Manluluwas nga ila usab nga mabuhat.
-
Gamita ang paghimo og tumong ug pagplano aron sa pagtudlo sa mga misyonaryo kabahin sa kakugi. Ipakita kon sa unsang paagi nga ang kakugi sa pagpokus sa mga tawo usa ka pagpadayag sa gugma.
-
Atol sa mga interbiyo o sa mga panagsultihanay, hangyoa ang mga misyonaryo sa paghisgot kabahin sa usa ka Kristohanon nga hiyas nga ilang gitinguha.
Kalihokan Kabahin sa Hiyas
Ang katuyoan niini nga kalihokan mao ang pagtabang kanimo sa pag-ila sa mga oportunidad sa espirituwal nga paglambo. Basaha ang matag aytem sa ubos. Desisyoni kon unsa ka tinuod kana nga pamahayag kabahin nimo, ug pilia ang tukma nga tubag. Isulat ang imong mga tubag diha sa imong journal sa pagtuon.
Walay tawo nga makatubag og “kanunay” ngadto sa matag pamahayag. Ang espirituwal nga paglambo usa ka tibuok kinabuhi nga proseso. Kana mao ang usa ka rason nga kini makapahinam ug magantihon—tungod kay adunay dili maihap nga mga oportunidad sa paglambo ug sa pagsinati sa mga panalangin sa paglambo.
Magmahimong komportable sa pagsugod kon hain ka. Ipasalig ang imong kaugalingon sa paghimo sa espirituwal nga buhat nga gikinahanglan aron molambo. Tinguhaa ang tabang sa Dios. Kon ikaw adunay mga kapakyasan, pagbaton og pagsalig nga Siya motabang kanimo. Samtang ikaw mag-ampo, pagtinguha og giya mahitungod kon unsa nga mga hiyas ang kinahanglang tutokan diha sa lainlaing mga panahon atol sa imong misyon.
Tamdanan sa mga Tubag
-
1 = wala gayod
-
2 = usahay
-
3 = kasagaran
-
4 = hapit kanunay
-
5 = kanunay
Hugot nga Pagtuo
-
Nagtuo ako kang Kristo ug gidawat Siya isip akong Manluluwas. (2 Nephi 25:29)
-
Mibati ko og kamasaligon nga ang Dios nahigugma kanako. (1 Nephi 11:17)
-
Misalig gayod ako sa Manluluwas nga modawat sa Iyang kabubut-on ug mobuhat sa unsay Iyang ipabuhat. (1 Nephi 3:7)
-
Nagtuo ako nga pinaagi sa Pag-ula ni Jesukristo ug sa gahom sa Espiritu Santo, mapasaylo ako sa akong mga sala ug mabalaan kon ako maghinulsol. (Enos 1:2–8)
-
Ako adunay hugot nga pagtuo nga ang Dios maminaw ug motubag sa akong mga pag-ampo. (Mosiah 27:14)
-
Maghunahuna ako kabahin sa Manluluwas atol sa adlaw ug maghinumdom sa unsay Iyang nabuhat alang kanako. (Doktrina ug mga Pakigsaad 20:77, 79)
-
Ako adunay hugot nga pagtuo nga ang Dios mopahinabo sa maayo nga mga butang sa akong kinabuhi ug sa mga kinabuhi sa uban samtang ipahinungod nato ang atong mga kaugalingon ngadto Kaniya ug sa Iyang Anak. (Ether 12:12)
-
Nasayod ko pinaagi sa gahom sa Espiritu Santo nga ang Basahon ni Mormon tinuod. (Moroni 10:3–5)
-
Ako adunay hugot nga pagtuo sa pagtuman sa unsay gusto nga ipabuhat ni Kristo kanako. (Moroni 7:33)
Paglaom
-
Usa sa akong labing dako nga mga tinguha mao ang pagpanunod og kinabuhi nga dayon diha sa celestial nga gingharian. (Moroni 7:41)
-
Masaligon ko nga makabaton ko og usa ka malipayon ug malamposon nga misyon. (Doktrina ug mga Pakigsaad 31:3–5)
-
Mibati ko og kalinaw ug kapositibo mahitungod sa umaabot. (Doktrina ug mga Pakigsaad 59:23)
-
Ako nagtuo nga usa ka adlaw ako mopuyo uban sa Dios ug mahimong sama Kaniya. (Ether 12:4)
Gugmang Putli ug Gugma
-
Akong gibati ang usa ka sinserong tinguha alang sa mahangtorong kaayohan ug kalipay sa uban. (Mosiah 28:3)
-
Kon ako mag-ampo, mangayo ako og gugmang putli—ang tiunay nga gugma ni Kristo. (Moroni 7:47–48)
-
Mosulay ko sa pagsabot sa mga pagbati sa uban ug motan-aw sa ilang panglantaw. (Judas 1:22)
-
Mopasaylo ko sa uban kinsa nakapasilo kanako o nakabuhat kanako og daotan. (Mga Taga-Efeso 4:32)
-
Motabang ako inubanan sa gugma ngadto niadtong kinsa nag-inusara, nanglimbasog, o nawad-an og paglaom. (Mosiah 18:9)
-
Kon tukma, akong ipahayag ang akong gugma ug pagpabakana alang sa uban pinaagi sa pagpangalagad ngadto kanila pinaagi sa pulong ug buhat. (Lucas 7:12–15)
-
Mangita ko og mga oportunidad sa pagserbisyo sa uban. (Mosiah 2:17)
-
Mosulti ko og maayo nga mga butang mahitungod sa uban. (Doktrina ug mga Pakigsaad 42:27)
-
Mabination ko ug mapailobon sa uban, bisan pa man kon lisod sila ikasinabot. (Moroni 7:45)
-
Malipay ko sa mga kalamposan sa uban. (Alma 17:2–4)
Hiyas
-
Limpyo ko ug putli og kasingkasing. (Salmo 24:3–4)
-
Nagtinguha ko sa pagbuhat og maayo. (Mosiah 5:2)
-
Ako nagpunting sa matarong, makabayaw nga mga hunahuna ug isalikway ang akong dili maayo nga mga hunahuna. (Doktrina ug mga Pakigsaad 121:45)
-
Ako naghinulsol sa akong mga sala ug naningkamot sa pagbuntog sa akong mga kahuyang. (Doktrina ug mga Pakigsaad 49:26–28; Ether 12:27)
-
Nabati nako ang impluwensya sa Espiritu Santo sa akong kinabuhi. (Doktrina ug mga Pakigsaad 11:12–13)
Kaligdong
-
Matinuoron ko sa Dios sa tanang higayon. (Mosiah 18:9)
-
Dili nako paubsan ang akong mga sumbanan o kinaiya aron ako daygon o dawaton sa uban. (1 Nephi 8:24–28)
-
Matinuoron ko sa Dios, sa akong kaugalingon, sa akong mga lider, ug sa uban. (Doktrina ug mga Pakigsaad 51:9)
-
Masaligan ko. (Alma 53:20)
Kahibalo
-
Ako masaligon sa akong pagsabot sa mga doktrina ug mga baroganan sa ebanghelyo. (Alma 17:2–3)
-
Nagtuon ko sa mga kasulatan kada adlaw. (2 Timoteo 3:16–17)
-
Nagtinguha ko nga makasabot sa kamatuoran ug makakita og mga tubag sa akong mga pangutana. (Doktrina ug mga Pakigsaad 6:7)
-
Nagtinguha ko og kahibalo ug giya pinaagi sa Espiritu. (1 Nephi 4:6)
-
Gimahal nako ang doktrina ug mga baroganan sa ebanghelyo. (2 Nephi 4:15)
Pailob
-
Mapailobon kong naghulat nga matuman ang mga panalangin ug mga saad sa Ginoo. (2 Nephi 10:17)
-
Makahulat ra ko sa mga butang nga dili masuko o masagmuyo. (Mga Taga-Roma 8:25)
-
Mapailobon ko sa mga hagit sa pagkahimong usa ka misyonaryo. (Alma 17:11)
-
Mapailobon ko sa uban. (Mga Taga-Roma 15:1)
-
Mapailobon ko sa akong kaugalingon ug nagsalig diha sa Ginoo samtang ako naningkamot sa pagbuntog sa akong mga kahuyang. (Ether 12:27)
-
Atubangon nako ang kalisdanan uban sa pailob ug hugot nga pagtuo. (Alma 34:40–41)
Pagpaubos
-
Ako maaghop ug mapaubsanon sa kasingkasing. (Mateo 11:29)
-
Mosalig ko sa Ginoo para sa tabang. (Alma 26:12)
-
Mapasalamaton ko alang sa mga panalangin nga akong nadawat gikan sa Dios. (Alma 7:23)
-
Ang akong mga pag-ampo makahuluganon ug kinasingkasing. (Enos 1:4)
-
Magpasalamat ko sa giya gikan sa akong mga lider o mga magtutudlo. (2 Nephi 9:28–29)
-
Maningkamot ko aron mahimong manunuton ngadto sa kabubut-on sa Dios. (Mosiah 24:15)
Kakugi
-
Ako maayong motrabaho, bisan kon walay nagbantay nako sa duol. (Doktrina ug mga Pakigsaad 58:26–27)
-
Ako nagpunting sa akong mga paningkamot diha sa labing importante nga mga butang. (Mateo 23:23)
-
Ako adunay usa ka personal nga pag-ampo nga dili momenos kaduha sa matag adlaw. (Alma 34:17–27)
-
Akong gipunting ang akong mga hunahuna diha sa akong calling isip usa ka misyonaryo. (Doktrina ug mga Pakigsaaad 4:2, 5)
-
Nagtakda ko og mga tumong ug nagplano kanunay. (Doktrina ug mga Pakigsaad 88:119)
-
Maningkamot ko og maayo hangtod ang trabaho makompleto. (Doktrina ug mga Pakigsaad 10:4)
-
Nakakaplag ako og hingpit nga kalipay ug katagbawan diha sa akong buhat. (Alma 36:24–25)
Pagkamasulundon
-
Kon mag-ampo ko, mangayo ko og kalig-on sa pagpakgang sa tentasyon ug sa pagbuhat sa unsay husto. (3 Nephi 18:15)
-
Takos ako nga naghupot og rekomend sa templo. (Doktrina ug mga Pakigsaad 97:8)
-
Andam kong motuman sa mga lagda sa misyon ug mosunod sa tambag sa akong mga lider. (Mga Hebreo 13:17)
-
Naningkamot ko sa pagpuyo sumala sa mga balaod ug mga baroganan sa ebanghelyo. (Doktrina ug mga Pakigsaad 41:5)