“Kapitulo 2: Siksika ang mga Kasulatan ug Isul-ob ang Tibuok Hinagiban sa Dios,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Siksika ang mga Kasulatan ug Isul-ob ang Tibuok Hinagiban sa Dios,” Isangyaw ang Akong Ebanghelyo

Kapitulo 2

Siksika ang mga Kasulatan ug Isul-ob ang Tibuok Hinagiban sa Dios

Hunahunaa Kini

Nganong importante man ang makanunayon nga pagtuon sa pulong sa Dios diha sa mga kasulatan?
Unsaon nako sa paghimo sa akong pagtuon sa kasulatan nga mas epektibo?
Unsaon nako sa paggamit sa teknolohiya aron matabangan ako sa pagtuman sa akong katuyoan?
Unsay gipasabot sa pagsul-ob sa tibuok hinagiban sa Dios?

Siksika ang mga Kasulatan

Si Jesukristo “mao ang kinabuhi ug ang kahayag sa kalibotan. Tan-awa, siya mao ang pulong sa kamatuoran ug pagkamatarong” (Alma 38:9; tan-awa usab sa Juan 1). Ang pagtuon sa pulong sa Dios diha sa balaan nga mga kasulatan makahatag og kabuhong sa imong kinabuhi (tan-awa sa Juan 10:10). Ang Iyang mga pulong mopuno kanimo—ug niadtong imong gitudloan—uban sa kahayag ug kamatuoran. Kini motabang kanimo—ug niadtong imong gitudloan—sa pagpuyo sa katarong ug pagdawat og balaan nga panalipod ug kalig-on. Kini motabang kanimo aron makaila ug makatagamtam sa Iyang gugma, nga mao ang matam-is sa tanang katam-is. Ang iyang mga pulong mopuno sa imong kalag sa kalipay (1 Nephi 8:11–12; tan-awa sa bersikulo 1–34).

Ang mga kasulatan mao ang mga langitnong gasa. Usa sa dagkong mga panalangin sa imong misyon mao ang pagbaton og gieskedyul nga oras sa pagtuon niini sa matag adlaw.

Ang pagtuon sa ebanghelyo mao ang usa sa labing magantihon nga matang sa espirituhanong buhat nga imong mahimo. Makapalagsik kini sa panghunahuna ug sa espirituhanon. Sama sa gitudlo ni Alma, kon ikaw, “motanom” sa pulong sa Dios diha sa imong kasingkasing, kini “modan-ag sa [imong] salabotan” ug mahimong maanindot nganha kaninyo (Alma 32:28; tan-awa usab sa Enos 1:3–4). Samtang magpadayon ka sa pagtuon ug paggamit sa pulong sa Dios, kini “mogamot; ug … mahimo nga usa ka kahoy magtubo ngadto sa kinabuhi nga walay kataposan” (Alma 32:41; tan-awa usab sa mga bersikulo 42–43). Ang imong kahibalo ug pagpamatuod sa ebanghelyo molambo. Ang imong tinguha ug abilidad sa pagpakigbahin sa ebanghelyo molambo usab.

Ang pagkat-on gikan sa usa ka maayo nga magtutudlo importante, apan importante usab nga ikaw makabaton og makahuloganon nga mga kasinatian sa pagkat-on gikan sa imong kaugalingong pagtuon sa mga kasulatan. Tinuod usab kini alang sa mga tawo nga imong gitudloan.

Ang pagsabot sa mga kasulatan mahimong lisod sa sinugdanan. Apan, kon ikaw mapailobon nga mopadayon sa pagtuon sa pulong sa Dios, ang imong salabotan molambo. Imong magustohan ang imong panahon sa mga kasulatan. Matinguhaon ka nga maglantaw sa unsay imong makat-onan ug masinati.

Ang pagkasayod ug paghigugma sa mga kasulatan mahimong usa ka dakong panalangin sa tibuok kinabuhi sa imong misyonaryo nga pagserbisyo. Kon imong masinati ang mga panalangin sa pagtuon sa kasulatan atol sa imong misyon, gusto nimong magpadayon sa tibuok nimong kinabuhi.

“Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo sa plano sa Amahan alang sa atong pagka-imortal ug kinabuhi nga dayon; hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila ‘sa bugtong tinuod nga Dios, ug kang Jesukristo, nga [Iyang] pinadala’ (Juan 17:3)” (D. Todd Christofferson, “Ang Panalangin sa Kasulatan,” Liahona, Mayo 2010, 34).

Personal nga Pagtuon

Tan-awa ang hulagway ni Joseph Smith sa sinugdanan niining kapitulo. Basaha ang Joseph Smith—Kasaysayan 1:11–13. Tubaga ang mosunod nga mga pangutana diha sa imong journal sa pagtuon.

Sa unsang paagi nga ang pagbasa ug pagpamalandong ni Joseph Smith sa Santiago 1:5 nakagiya kaniya sa pagdawat og pagpadayag?
Unsa nga impluwensya ang nahimo sa iyang pagtuon ngadto sa umaabot nga mga henerasyon?
Unsa ang epekto nga nahimo sa iyang desisyon nga magtuon ug magtinguha sa imong kinabuhi?
Sa unsang paagi nga ang imong pagtuon sa ebanghelyo nakaimpluwensya sa imong kinabuhi ug sa mga kinabuhi sa uban?

Pagtuon sa Kasulatan

Unsa ang imong makat-onan gikan sa mosunod nga mga kasulatan mahitungod sa pamaagi sa pagtuon sa ebanghelyo?

Tinguhaa ang Espiritu

Ang pagkat-on sa ebanghelyo mas labaw pa kaysa pagbaton og impormasyon. Usa usab kini ka espirituhanong proseso sa paggamit sa mahangtoron nga kamatuoran ubos sa giya sa Espiritu Santo (tan-awa sa Jacob 4:8; Doktrina ug mga Pakigsaad 50:19–25). Tinguhaa ug saligi ang Espiritu sa pagtudlo kanimo samtang ikaw magtuon sa mga kasulatan. Kini mahitabo ngadto sa kahimtang nga imong ipahisama ang mga kasulatan ngadto sa imong kaugalingon uban sa tinuod nga katuyoan sa pagbuhat sa unsay imong nakat-onan (tan-awa sa 1 Nephi 19:23; Moroni 10:4; Joseph Smith—Kasaysayan 1:18).

Ang mainampoon nga pagtuon sa mga kasulatan mobukas sa usa ka bintana sa pagpadayag aron ang Espiritu mamulong diha sa imong hunahuna ug kasingkasing. Siya mopanalangin kanimo og giya, pagdasig, ug mga tubag sa imong mga pangutana. Pinaagi sa imong pagtuon sa mga kasulatan, ang Espiritu Santo mopalig-on ug mohupay kanimo. Siya mohatag kanimo og kahibalo ug kombiksiyon nga mopanalangin sa imong kinabuhi ug makapahimo kanimo sa pagpanalangin sa uban.

Pagtuon sa Kasulatan

Unsa ang papel sa Espiritu Santo sa pagtabang sa usa ka tawo sa pagkat-on sa ebanghelyo?

Pangitaa ang mga Tubag sa mga Pangutana

Isip usa ka misyonaryo, ikaw makadungog og daghang mga pangutana. Ikaw usab adunay kaugalingong mga pangutana. Ang pagsiksik sa mga kasulatan ug ubang giaprobahan nga mga kapanguhaan alang sa mga tubag niining mga pangutana mao ang usa ka gamhanang paagi sa pagtuon. Irekord ang mga pangutana ug kon unsa ang imong nakat-onan ug gibati diha sa imong journal sa pagtuon.

Paggamit og tukma, kasaligan nga mga tinubdan diha sa imong pagtuon—ilabi na sa mga kasulatan, sa mga pulong sa buhi nga mga propeta, ug sa Isangyaw ang Akong Ebanghelyo. Gamita ang mga kapanguhaan diha sa Gospel Library, sama sa Ang Giya ngadto sa mga Kasulatan. Pagkat-on kon hain sa mga kapanguhaan ang anaa diha sa mga pinulongan sa mga tawo nga imong gitudloan.

“Usa ka butang nga akong nakat-onan sa kinabuhi mao kon unsa ka sagad ang Ginoo motubag sa atong mga pangutana ug mohatag kanato og tambag pinaagi sa mga kasulatan. … Modangop dayon kita ngadto sa Ginoo pinaagi sa pag-ampo, mangamuyo alang sa tabang o mga tubag; ug kadtong mga tubag moabot kon kita moabli sa mga kasulatan ug magsugod sa pagtuon niini. Usahay ingon kini og usa ka tudling sa gatosan o liboan ka tuig na ang kadugayon nga piho nga gidektar sa pagtubag sa atong mga pangutana” (M. Russell Ballard, “Be Strong in the Lord, and in the Power of His Might” [Brigham Young University fireside, Mar. 3, 2002], 5, speeches.byu.edu).

Buhata ang Unsay Imong Nakat-onan

Samtang imong mabati ang kalipay nga nagagikan sa nagtubo nga pagsabot sa ebanghelyo, gusto ka nga mogamit sa unsay imong nakat-onan. Paningkamot sa pagpuyo nga nahisubay sa unsay imong nasabtan. Ang pagbuhat sa ingon molig-on sa imong hugot nga pagtuo, kahibalo, ug pagpamatuod. Ang pagbuhat sa unsay imong nakat-onan maghatag og dugang ug malungtaron nga pagsabot. (Tan-awa sa Juan 7:17)

“Ang tinuod nga doktrina, unya nasabtan, mopausab sa mga kinaiya ug pamatasan. “Ang pagtuon sa mga [doktrina] sa ebanghelyo mas dali nga mopalambo sa pamatasan kay sa pagtuon sa pamatasan aron molambo ang pamatasan” (Boyd K. Packer, Little Children,” Ensign, Nob. 1986, 17).

Personal nga Pagtuon

Unsa man ang gitudlo sa mga kasulatan mahitungod sa pagkat-on sa ebanghelyo?

Gamita ang Gospel Library

Ang Gospel Library mao ang usa ka online nga kapanguhaan nga makapalambo kaayo sa imong pagtuon ug pagtudlo. Sinatia ang daghan nga mga bahin [feature] niini. Ang pipila ka benepisyo sa paggamit sa Gospel Library isip kabahin sa imong pagtuon ug pagtudlo gilista sa ubos.

Kini makahatag kanimo og akses ngadto sa mga kasulatan, mga pulong sa buhi nga mga propeta, ug sa uban nga content sa Simbahan diha sa daghang pinulongan sa teksto, audio, ug bidyo nga mga format.
Kon imong irekord diha sa Gospel Library ang unsay imong nakat-onan ug ang mga impresyon nga imong nadawat, ikaw makapadayon sa pag-akses ug mapalig-on pinaagi niana nga impormasyon human sa imong misyon.
Kini magtugot kanimo nga dali ra nga makapaambit og mga kasulatan, mga kinutlo gikan sa buhi nga mga propeta, ug mga bidyo ngadto niadtong imong gitudloan.
Kadaghanan sa mga tawo nga imong gitudloan ug gibunyagan mogamit sa Gospel Library sa pag-akses sa mga kapanguhaan sa Simbahan. Sinatia ang mga bahin sa Gospel Library aron ikaw makatabang kanila nga makat-on sa paggamit niini.

Personal nga Pagtuon

Rebyoha ang “Gospel Library User Guide.” Pagpili og usa ka bahin sa Gospel Library aron sulayan sa imong sunod nga personal nga pagtuon ug pagtuon uban sa kompanyon. Sa unsang paagi nga kining bahin makatabang sa imong pagtuon? Unsa ang imong sulayan sa sunod higayon? Tudloi ang uban nga mga misyonaryo sa unsay imong nakat-onan.

Gamita ang Teknolohiya sa Matarong nga Paagi

Ang Ginoo ug ang Iyang mga propeta mipiyal kanimo sa teknolohiya aron makatabang sa pagtuman sa Iyang buhat. Ang teknolohiya makapalambo sa imong pagtuon sa mga kasulatan ug sa Isangyaw ang Akong Ebanghelyo. Ang digital nga mga kapanguhaan makatabang usab kanimo sa pagplano. Kini makatabang diha sa imong pagtudlo ug sa imong mga paningkamot sa pagpangita og mga tawo nga tudloan.

Ang maalamon nga paggamit sa teknolohiya makatabang kanimo sa pagtuman sa imong misyonaryo nga katuyoan ug sa epektibong paggamit sa oras. Makatabang usab kini kanimo nga malikayan ang dili tukma nga mga materyal.

Sunda ang Espiritu mahitungod kon kanus-a ug unsaon sa paggamit ang teknolohiya sa mga paagi nga makatabang sa pagpalig-on imong pagtuo diha ni Jesukristo ug sa pagtuo niadtong imong giserbisyohan ug gitudloan.

Sunda ang mga Pag-amping sa Paggamit sa Teknolohiya

Ang upat ka pag-amping nga gilatid diha sa ubos makatabang nimo sa paggamit og teknolohiya sa tukma nga paagi. Ang pagsunod niini nga mga pag-amping usa ka importante nga paagi alang kanimo “ Isul-ob ninyo ang tibuok kahimanan sa gubat nga gikan sa Dios, aron makabarog kamo batok sa mga pagpanglimbong sa yawa” (Mga Taga-Efeso 6:11).

Magpahiuyon sa Espirituhanong mga Pag-aghat

Si Nephi misaad, “Kon kamo mosulod pinaagi sa agianan, ug modawat sa Espiritu Santo, kini mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5). Ang imong Langitnong Amahan naghatag kanimo og duha ka gamhanang mga gasa nga makatabang kanimo: moral nga kabubot-on ug ang gasa sa Espiritu Santo. Ikaw adunay gahom sa pagpili sa pagsunod sa giya sa Espiritu Santo. Ang Iyang giya mahinungdanon sa pagtabang kanimo sa pagbuhat og maayo samtang naggamit sa teknolohiya. Kini usab makatabang sa pagpanalipod kanimo gikan sa daotan.

Itumong ang Imong Hunahuna diha sa Imong Misyonaryo nga Katuyoan

Miingon ang Ginoo, “Ug kon ang inyong katuyoan usa ngadto sa akong himaya, ang inyong tibuok kalawasan mapuno sa kahayag, ug walay kangitngit diha kaninyo; ug kana nga lawas nga napuno sa kahayag makasabot sa tanan nga mga butang” (Doktrina ug mga Pakigsaad 88:67). Ang pagbaton og usa ka katuyoan ngadto sa himaya sa Dios nagpasabot sa imong hingpit nga pagtutok sa katuyoan sa Dios, nga mao usab ang imong katuyoan isip misyonaryo.

Ang imong paggamit sa teknolohiya kinahanglan nakasentro sa imong katuyoan. I-on lang ang imong device human nga imong naila ang misyonaryo nga katuyoan diin kini ang imong gamiton. Dayon palunga kini kon kana nga katuyoan nahuman na.

Mas lagmit makatagbo ka og dili tukma nga mga content diha sa internet kon ikaw kaswal lang nga nagsuhid sa web nga walay piho nga katuyoan diha sa hunahuna.

Magbaton og Disiplina

Si Mormon nagsulat: “Ako usa ka tinun-an ni Jesukristo, ang Anak sa Dios. Ako tinawag kaniya aron sa pagpahayag sa iyang pulong diha sa iyang mga katawhan, aron sila unta makabaton og kinabuhi nga walay kataposan” (3 Nephi 5:13). Sama ni Mormon, ikaw usa ka disipulo ni Kristo. Ang pagserbisyo isip usa ka full-time nga misyonaryo usa ka espesyal nga oportunidad aron mapaladman ang imong pagkadisipulo.

Ang mga pulong nga disipulo ug disiplina gikan sa samang ugat nga pulong nga nagpasabot og “tigkat-on” o “estudyante.” Aron mahimong usa ka disipulo ni Kristo nagpasabot nga ikaw magtinguha sa pagsunod Kaniya ug sa pagtuman sa Iyang mga sugo. Kini nagpasabot nga ikaw makanunayon nga magkat-on ug motudlo bahin ni Kristo.

Magbaton og disiplina ug mohimo og matarong nga mga pagpili kon unsaon nimo sa paggamit ang teknolohiya. Mopili sa pagsunod sa mga pag-amping. Kon nakig-atubang ka sa pakig-istorya og mga tawo, ayaw pagsusi sa mga mensahe o pagtubag sa mga tawag. Kontrolaha kon unsaon nimo sa paggamit kini nga mga device. Ayaw tugoti nga kini mokontrolar kanimo.

Ang Ginoo namahayag, “Siya nga nakadawat sa akong balaod ug nagbuhat niini, ang mao akong tinun-an; ug siya nga nag-ingon nga siya nakadawat niini ug wala magbuhat niini, ang mao dili akong tinun-an”(Doktrina ug mga Pakigsaad 41:5). Samtang walay usa nga hingpit, ang Ginoo naglaom og makanunayon, pursigido nga paningkamot sa pagsunod Kaniya.

Ang katahom sa ebanghelyo mao nga kita mahimong mapasaylo kon kita maghinulsol—ug ang Ginoo gusto nga dili nato langayon ang paghinulsol (tan-awa sa Doktrina ug mga Pakigsaad 109:21). Kon ikaw makahimo og usa ka sa sayop, lakip na sa dili tukma nga paggamit sa teknolohiya, paghinulsol nianang taknaa ug padayon sa pagpaningkamot sa pagsunod sa Iyang balaod. Kabahin kini sa pagkadisipulo ni Kristo.

Maghiusa

Ang Ginoo miingon, “Paghiusa; ug kon kamo dili magkahiusa kamo dili akò” (Doktrina ug mga Pakigsaad 38:27). Tabangi ang imong misyon nga makapalambo og kultura sa panaghiusa, pagsalig, pagkamaytulubagon, ug pagkamapuangoron aron nga kamo makapalig-on ug makasuporta sa usag usa.

Ang tanang misyonaryo kinahanglang mobati nga komportable sa pagpangayo og tabang kon gikinahanglan. Ang usa ka misyonaryo nga lig-on diha sa Espiritu makatabang sa usa kinsa mibati og kahuyang (tan-awa sa Doktrina ug mga Pakigsaad 84:106). Kon ikaw mibati nga natintal, pangayo og tabang sa imong kompanyon o sa lider sa misyon.

Hapit tanang hagit nga may kalabotan sa internet o sa pornograpiya mahitabo diha sa pag-inusara. Gamita lang ang mga device kon makita ninyo ang screen sa usag usa. Pagbaton og kaisog ug pagkamaytulubagon sa usag usa.

Ang Ginoo adunay pagsalig kanimo ug sa matag misyonaryo nga Iyang gitawag lakip kanimo. Siya mihatag og mga kompanyon ug mga lider aron mopanalipod ug mosuporta kanimo. Ingon nga si Alma misuporta sa iyang kompanyon nga si Amulek, tinguhaa ang paglig-on sa usag usa (tan-awa sa Alma 15:18).

Unsa ang Kinahanglan Nimong Buhaton Kon Ikaw Mibati nga Huyang o Delikado?

Ang pagkat-on sa pagsunod niining upat ka pag-amping nagkinahanglan og paningkamot, disiplina, ug praktis. Bisan og ang mga pag-amping nahimo na nga natural nga bahin sa imong panghunahuna ug buhat, adunay mga panahon nga mobati ka nga huyang o delikado. Tingali ikaw adunay dili maayo nga mga pamatasan kabahin sa teknolohiya sa wala pa ang imong misyon nga nahimong lisod buntogon. Ang ubang misyonaryo nanglimbasog sa pornograpiya sa wala pa ang ilang tawag ug mahimong matintal nga mobalik ngadto sa kanhi nga naandang batasan.

Ang mga baroganan diha sa ubos makatabang kanimo sa pagsunod sa mga pag-amping ug pagpalig-on sa imong kaugalingon batok sa tentasyon:

Pagmatngon sa imong mga hunahuna, mga pagbati, ug mga pamatasan. Sabta kon sa unsang paagi nga kini mas makatintal nimo sa sayop nga paggamit sa teknolohiya.
Mopili sa paglihok. Moresponde diha sa katarong, sa mabungahon nga mga paagi ngadto sa unsay imong gibati.
Magkat-on, maghinulsol, ug mouswag. Gamita ang imong mga kasinatian aron sa pagpadayon sa pagkat-on ug paglambo.

Dili kinahanglan nga imong buntogon ang mga hagit nga ikaw ra. Mosalig sa kalig-on nga moabot pinaagi sa Pag-ula sa Manluluwas ug sa mga pakigsaad nga imong gihimo uban Kaniya. Ang Ginoo nasayod sa mga hagit nga imong giatubang, ug Siya motabang kanimo niining talagsaon nga buhat.

Ang paghinumdom kanunay sa Manluluwas makatabang kanimo sa paggamit sa teknolohiya sa matarong nga paagi. Magmatinuoron ngadto sa pagsalig nga Iyang gihatag kanimo. Tinoa ang “paglakaw nga matarong sa iyang atubangan” (Alma 53:21; tan-awa usab sa bersikulo 20). Ang pagbati og pagkapasalamaton sa tanan nga nabuhat Niya ug sa Amahan alang kanimo makatabang kanimo sa paghimo og maayong mga pagpili kon unsaon nimo paggamit ang digital nga mga kapanguhaan.

Ang imong misyon usa ka talagsaong oportunidad sa pagkat-on sa paggamit sa teknolohiya sa maalamon nga paagi. Ang pasalig ug maayong mga pamatasan nga imong napalambo atol sa imong misyon makabenepisyo kanimo sa tibuok nimong kinabuhi.

Isul-ob ang Tibuok nga Hinagiban sa Dios

Ang imong abilidad sa pagbatok sa tentasyon molambo samtang ikaw magtuon ug mogamit sa mga kasulatan, sa mga pulong sa buhi nga mga propeta, sa Isangyaw ang Akong Ebanghelyo, Mga Sumbanan sa Misyonaryo alang sa mga Disipulo ni Jesukristo, ug sa mga pag-amping nga gilatid niining kapitulo.

Pinaagi sa pagsul-ob sa “tibuok hinagiban sa Dios,” ikaw makahimo sa pag-ila sa kamatuoran gikan sa sayop. Imong masapinan ang imong mga tiil sa “ebanghelyo sa kalinaw.” Ang pagsul-ob “sa hinagiban sa pagkamatarong” makapanalipod kanimo. Gamit ang “panagang sa hugot nga pagtuo” diin kamo makasagubang sa tanan nga nagdilaab nga mga pana sa daotan. Ikaw modala “sa espada sa [Iyang] Espiritu” sa pagtudlo sa kamatuoran uban sa gahom ug awtoridad. Ikaw mapalig-on batok sa kalibotanon nga mga impluwensya nga mahimong modala kanimo nga mahisalaag, mahilayo, ug gani malain. (Tan-awa sa Mga Taga-Efeso 6:10–18; tan-awa usab sa 1 Nephi 8:20, 30; 15:24–25; Helaman 3:29–30; Doktrina ug mga Pakigsaad 27:15–18; Joseph Smith—Mateo 1:37; 2 Timoteo 3:15–17.)

Personal nga Pagtuon

Mainampoon nga moila og usa sa mga pag-amping nga tutokan niining semanaha. Tinguhaa ang Tabang sa Ginoo. Irekord ang imong mga pagbati ug unsa ang imong mga nakat-onan.

Mga Ideya sa Pagtuon ug Paggamit

Personal nga Pagtuon

Gamita ang mosunod nga mga sugyot aron mapalambo ang imong pagtuon:
- Basaha ang mga kasulatan uban ang mga pangutana ug mga kabalaka nga anaa sa hunahuna.
- Ipakigbahin unsa ang imong nakat-onan ngadto sa laing mga misyonaryo ug ngadto niadtong inyong gitudloan. Ang pagpasabot og usa ka doktrina o baroganan makatabang kanimo nga mahinumdom niini ug makabaton og katin-awan.
- Pagtuon pinaagi sa hilisgotan. Tutoki ang mga hilisgotan nga makatabang kanimo ug sa mga tawo nga imong gitudloan.
- Pangutan-a ang imong kaugalingon, “Unsay gisulti sa tagsulat? Unsa ang mahinungdanong mensahe? Sa unsang paagi nga kini magamit ngari kanako? Sa unsang paagi kaha kini makatabang sa tawo nga atong gitudloan?”
- Handurawa o drowinga unsa ang imong gitun-an. Pananglitan, handurawa kon sama sa unsa kaha para ni Ammon nga mobarog atubangan sa hari sa Lamanite.
- Isulat ang nag-unang ideya sa usa ka tudling diha sa usa ka kapahayag [sentence] o mubo nga hugpong sa mga pulong.
- Memoryaha ang mga kasulatan nga nagpasabot ug nagsuporta sa mga baroganan nga imong gitudlo.
Timbang-timbanga ang imong kaugalingon pinaagi sa mosunod (1=wala gayod, 3=sa pipila ka higayon, ug 5=hapit kanunay).
- Ako nag-anam sa paglambo diha sa akong hugot nga pagtuo ug sa kahibalo sa Langitnong amahan ug ni Jesukristo.
- Maghunahuna ko kabahin sa mga tawo nga akong tudloanan kon ako magtuon.
- Sa tibuok adlaw, maghunahuna ko unsa ang akong gitun-an sa buntag.
- Samtang ako magtuon, ang mga ideya mosulod sa akong hunahuna nga wala pa nako mahunahunai sa una.
- Akong irekord ang mga espirituhanong mga pag-aghat ug mga ideya diha sa tukma nga dapit.
- Magpabilin ko nga magmata samtang ako magtuon.
- Mahinamon ko nga maghimo sa personal nga pagtuon.
- Mahinamon ko nga maghimo sa pagtuon uban sa kompanyon.
Rebyoha ang imong mga tubag. Unsa ang imong gibuhat nga maayo? Unsaon nimo sa paglambo? Pagtakda og usa o duha ka tumong aron molambo ang kalidad sa imong pagtuon.

Pagtuon uban sa Kompanyon ug Panagbaylo sa Kompanyon

Magdungan sa pagbasa og pipila sa mosunod nga mga tudling. Hisgoti ang mga panalangin nga moabot gikan sa pagtuon sa pulong sa Dios. Unsa nga mga tudling ang makatabang kaayo niadtong inyong tudloanan?

Konseho sa District, mga Komperensiya sa Zone, ug Konseho sa Pagpangulo sa Misyon

Hangyoa ang mga misyonaryo sa pagsulat og usa o duha ka pangutana mahitungod sa ebanghelyo gikan sa usa ka leksiyon diha sa kapitulo 3. Kini nga mga pangutana mahimong personal o gikan sa mga tawo nga ilang gitudloan. Imbitara ang mga misyonaryo sa pagpakigbahin sa ilang mga pangutana ngadto sa grupo. Alang sa matag pangutana, hisgoti ang mosunod:
- Sa unsang paagi nga ang pagtubag niini nga pangutana makapanalangin sa kinabuhi sa misyonaryo?
- Sa unsang paagi nga kini makapanalangin sa mga kinabuhi sa mga tawo nga iyang gitudloan?
- Sa unsang paagi nga ang misyonaryo makakita og tubag?
Bahina ang mga misyonaryo ngadto sa mga grupo, ug sangoni ang matag grupo sa pagtuon sa usa sa upat ka pag-amping ug ang nag-uban nga mga kasulatan. Imbitara ang mga misyonaryo sa pagpakigbahin kon unsa ang ilang nakat-onan ug kon sa unsang paagi nga ang mga pag-amping nakatabang kanila.

Mga Lider sa Misyon ug Mga Magtatambag sa Misyon

Sa panagsa nga higayon moapil sa mga misyonaryo sa ilang pagtuon uban sa kompanyon.
Atol sa mga interbiyo o mga panag-estoryahanay, ipangutana ang mosunod:
- Unsa nga mga impresyon ang inyong naangkon bag-ohay lang diha sa inyong pagtuon sa kasulatan?
- Unsa nga kapitulo o seksiyon sa Isangyaw ang Akong Ebanghelyo nga nakatabang kaayo kaninyo sa milabay nga duha ka semana? Sa unsang paagi kini nakatabang kaninyo?
- Unsa ang inyong gibuhat sa inyong personal nga pagtuon nga nakatabang ninyo nga makat-on?
Sa mga interbiyo, ikonsiderar ang pagrebyo sa mga pag-amping sa paggamit sa teknolohiya ug paghangyo sa mga misyonaryo unsa ang ilang nakat-onan samtang sila mogamit niini.
Ipakigbahin ang mga panabot gikan sa inyong personal nga pagtuon. Ipakigbahin ang mga nahisulat gikan sa inyong journal sa pagtuon ug sa inyong pagpamatuod sa kaimportante sa pagtuon sa ebanghelyo.