“Kapitulo 7: Pagkat-on sa Pinulongan sa Imong Misyon,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Kapitulo 7,” Isangyaw ang Akong Ebanghelyo

Kapitulo 7

Pagkat-on sa Pinulongan sa Imong Misyon

Hunahunaa Kini

Unsaon nako sa paglig-on sa akong pagtuo sa Ginoo aron sa pagtabang nako nga makakat-on og bag-ong pinulongan?
Nganong kinahanglan nga ako magpadayon sa pagpalambo sa akong mga abilidad sa pinulongan?
Unsaon man nako sa pagpalambo sa akong abilidad sa pagsulti ug sa pagtudlo gamit ang pinulongan sa akong misyon?
Unsaon man nako sa pagbaton sa gasa sa mga pinulongan?

Andama ang Imong Kaugalingon sa Espirituhanong Paagi

Ang Ginoo namahayag, “Ang matag tawo makapaminaw sa kahingpitan sa ebanghelyo sa iyang kaugalingon nga dila, ug sa iyang kaugalingon nga pinulongan, pinaagi niadto kinsa gi-orden ngadto niini nga gahom” (Doktrina ug mga Pakigsaad 90:11).

Gilista sa ubos ang mga paagi nga imong mapalig-on ang imong pagtuo nga ang Ginoo motabang kanimo sa pagtudlo ug sa pagpamatuod gamit ang pinulongan sa imong misyon:

Motuo nga ikaw gitawag sa Dios pinaagi sa usa ka propeta.
Mangayo og tabang sa Dios pinaagi sa sinsero nga pag-ampo.
Makugihong maningkamot pinaagi sa pagtuon, pagbansay, ug sa paggamit sa pinulongan sa imong misyon sa matag adlaw.
Magpakatakos sa pakig-uban sa Espiritu Santo pinaagi sa pagtuman sa mga sugo ug pagsunod sa mga sumbanan sa misyonaryo.
Himoa nga putli ang imong mga motibo pinaagi sa paghigugma sa Dios ug pinaagi sa paghigugma sa Iyang mga anak ug sa pagtinguha sa pagpanalangin kanila.

Magmapahinungoron ug Makugihon

Ang pagkat-on aron epektibong makatudlo gamit ang pinulongan sa imong misyon nagkinahanglan og makugihon nga paningkamot ug mga gasa sa Espiritu. Ayaw kasurprisa kon ang buluhaton morag lisod. Kini nagkinahanglan og panahon. Pagmapailobon sa imong kaugalingon. Samtang ikaw mopahinungod sa imong kaugalingon sa pagkat-on sa pinulongan, ikaw makaangkon og mga kahanas nga gikinahanglan sa pagtuman sa imong katuyoan isip usa ka misyonaryo.

Wala ka mag-inusara sa pagkat-on sa pinulongan sa imong misyon. Ang Langitnong Amahan ug si Jesukristo motabang kanimo sa imong pagtinguha sa Iyang tabang. Pagtinguha ug magmahimong bukas sa tabang sa imong kompanyon, mga miyembro, niadtong imong gitudloan, ubang mga misyonaryo, ug sa ubang tawo.

Paminaw og maayo ug mosulti sa pinulongan sa matag oportunidad. Ayaw kahadlok nga masayop. Ang kada usa nga nagkat-on og bag-ong pinulongan makahimo og mga sayop. Ang mga tawo makasabot, ug modayeg sila sa imong mga paningkamot nga makakat-on sa ilang pinulongan.

Padayon sa pagpalambo sa imong mga kahanas hangtod sa kataposan sa imong misyon. Samtang ang imong abilidad sa pagsulti sa pinulongan molambo, ang mga tawo mas maminaw pa sa unsay imong isulti kaysa giunsa nimo kini pagsulti. Mamenosan ang imong kabalaka mahitungod kon unsaon sa pagpakigsulti ug mas makatubag og maayo sa panginahanglan sa uban.

“Kami … naglaom nga ang kada misyonaryo nga nagkat-on og bag-ong … pinulongan mabansay niini sa tanang posible nga paagi. … Ug sa pagbuhat ninyo sa ingon, ang inyong kahanas sa [pagtudlo] ug pagpamatuod molambo. Mas dawaton kamo ug mas dalaygon sa espirituhanong paagi ngadto [sa mga tawo nga inyong gitudloan]. …

“Ayaw kakontento sa unsay atong gitawag nga usa ka pangbokabolaryo nga misyonaryo lamang. Lugwayi pa ninyo ang inyong kaugalingon diha sa pinulongan, ug kamo makabaton og mas dakong akses ngadto sa mga kasingkasing sa mga tawo” (Jeffrey R. Holland, missionary satellite broadcast, Ago. 1998).

Padayon sa paggamit sa pinulongan sa imong misyon human ka makauli. Ang Ginoo mipundo gyod og maayo diha nimo, ug mahimong Siya adunay mga gamitan sa imong mga abilidad sa pinulongan sa ulahing bahin sa imong kinabuhi.

Pagkat-on og Iningles

Kon dili Iningles ang imong sinultihan, kinahanglan nimo kining tun-an isip usa ka misyonaryo. Mopanalangin kini kanimo atol sa imong misyon ug sa tibuok nimong kinabuhi. Ang pagkat-on og Iningles mopanalanagin usab sa imong pamilya.

Alang sa dugang tabang sa pagkat-on og Iningles, tan-awa sa EnglishConnect for Missionaries.

Mga Baroganan Kabahin sa Pagkat-on sa Pinulongan

Angkona ang Responsibilidad

Pagtakda og mga tumong alang sa pagpalambo sa imong abilidad sa pinulongan, ug regular nga mopahiangay niini. Paghimo og usa ka plano sa pagtuon sa pinulongan. Gamita ang pinulongan sa matag oportunidad.

Himoa ang Imong Pagtuon nga Makahuloganon

Gamita unsa ang imong gitun-an sa tinuod nga mga sitwasyon sa kinabuhi ug diha sa imong inadlaw-adlaw nga mga kalihokan. Tutoki ang pinulongan nga makatabang nimo sa pagsulti unsa ang imong kinahanglan nga isulti.

Tinguhaa ang Pagpakighinabi

Mosulti sa pinulongan sa imong kompanyon kutob sa mahimo. Pahimusli ang matag oportunidad sa pagkat-on ug pagbansay. Pananglitan, mahimo ka nga mohangyo sa usa ka mibalik nga miyembro o usa ka tawo nga imong gitudloan sa pagtabang kanimo sa pinulongan. Walay makapuli sa pagpakig-estorya sa lumad nga mga mamumulong sa pinulongan.

Ayaw Pagkompara

Ayaw ikompara ang imong kahanas sa pinulongan sa imong kompanyon o sa uban nga mga misyonaryo. Ang pagkompara mosangpot sa garbo o pagkawala sa kadasig.

Pagkat-on og Maayo sa Bag-ong mga Konsepto

Rebyoha kanunay kon unsa ang imong natun-an, ug praktisa kini diha sa bag-o nga mga sitwasyon. Kini motabang kanimo nga mahinumdom ug mogamit unsa ang imong nakat-onan.

Paghimo og usa ka Plano sa Pagtuon sa Pinulongan

Ang usa ka plano sa pagtuon sa pinulongan makatabang sa bag-o ug sa sinati nga mga misyonaryo nga makatutok sa unsay ilang mabuhat matag adlaw sa pagpalambo sa ilang abilidad sa pagsulti sa pinulongan sa ilang misyon. Ang imong plano maglakip sa unsay imong buhaton atol sa oras sa imong pagtuon sa pinulongan ug sa tibuok adlaw.

Ang mosunod nga mga lakang magpakita kon unsaon nimo sa paghimo og usa ka plano sa pagtuon sa pinulongan pinaagi sa paggamit sa proseso sa pagtakda og tumong gikan sa kapitulo 8. Ipahiangay kini nga proseso kon gikinahanglan.

Mainampoon nga motakda og mga tumong ug magplano. Pagtakda og sinemana ug inadlaw-adlaw nga mga tumong sa pagpalambo sa imong kinatibuk-an nga abilidad sa pagpakighinabi ug pagtudlo sa ebanghelyo. Ilakip ang mga butang nga imong gusto nga ipasalig nga memoryahon, sama sa mga pulong, hugpong sa mga pulong, mga kasulatan ug mga tudling.
Irekord ug Ieskedyul. Pagdesisyon kon unsa nga himan sa pinulongan ang makatabang kanimo nga makab-ot ang imong mga tumong. Ang mga himan sa mga pinulongan mahimong maglakip sa mga kasulatan, mga diksiyonaryo, mga libro sa gramatika, ang TALL Embark nga app, ug uban pa. Pag-eskedyul og mga panahon kon kanus-a nimo pormal nga matun-an ug magamit ang pinulongan. Pananglitan, mahimo ka nga mag-eskedyul sa pagbasa og kusog gikan sa Basahon ni Mormon sulod sa 15 minutos sa matag adlaw atol sa paniudto.
Buhata ang imong mga plano. Ang Ginoo ganahan og paningkamot, busa pagmakugihon sa pagtuman sa imong mga tumong. Panalipdi ang imong panahon sa pagtuon sa pinulongan ug i-skedyul pag-usab kini unya kon dunay kakulian nga motumaw.
Magrebyo ug mag-follow up. Rebyoha ang imong plano sa pagtuon kanunay aron matimbang-timbang kon nasunod ba kini pag-ayo. Imbitara ang imong kompanyon, mga lider sa misyon, ug ang uban diha sa imong area aron makasugyot og mga paagi nga imong mapalambo. Moapil sa regular nga naka-eskedyul sa pagsukod sa pinulongan aron masubay ang imong pag-uswag ug maila ang mga paagi sa paglambo.

Ibalanse ang imong pagtuon sa pinulongan tali sa taas og termino nga mga tumong sa paghimo og pundasyon sa usa ka pinulongan ug mubo og termino nga mga tumong alang sa piho nga mga kalihokan ug sa mga tawo nga imong gitudloan.

Atol sa imong panahon sa pormal nga pagtuon sa pinulongan, ibalanse ang imong mga tumong ug mga plano sa tanang sukaranan nga mga bahin sa pinulongan nga gipakita sa ubos. Pagdesisyon unsa ang imong kat-onan sa tibuok adlaw.

mga kahanas sa pagpaminaw	mga kahanas sa pagbasa	gamatika
mga kahanas sa pagsulti	mga kahanas sa pagsulat	bokabularyo

Personal nga Pagtuon o Pagtuon uban sa Kompanyon

Paggahin og oras sa matag semana sa pagtimbang-timbang sa imong pagtuon sa pinulongan pinaagi sa pagpangutana sa mosunod nga mga pangutana:

Nagtuon ba ako sa pinulongan sa akong misyon sa matag adlaw karong semanaha? Unsay akong mabuhat aron kanunay akong molambo sa pinulongan sa akong misyon?
Ang ako bang plano mas nakatabang nako sa pagpangita, pagtudlo, ug pakigtambayayong sa mga miyembro? Unsa nga mga pagpahiangay ang akong gikinahanglan sa paghimo sa akong plano?
Unsa ang akong ganahan kaayo kabahin sa akong pagtuon sa pinulongan? Unsa man ang akong mabuhat aron mas ganahan pa niini?
Unsa ka dako nga panahon ang akong kinahanglang igahin sa pagbansay sa pagpaminaw, pagbasa, pagsulat, ug pagsulti? Unsaon nako nga mas makat-on og maayo sa bokabularyon, gamatika, ug paglitok?
Unsa nga mga kalihokan ug mga kapanguhaan ang akong gamiton sa pagtuon sa pinulongan? Hain niini ang makatabang kaayo nako? Unsa pa ang ubang kapanguhaan o mga kalihokan nga mahimong makatabang?
Unsa ang nagkinahanglan pa og dugang pagtagad?

Human sa pagtubag niining mga pangutana, ipahiangay ang imong mga plano sa pagtuon ug tan-awa kon kini makapalambo ba sa imong mga resulta. Ang Espiritu mogiya kanimo samtang ikaw magpadayon sa pagtinguha sa pagpalambo sa imong pagtuon sa pinulongan.

Pagkat-on uban sa Imong mga Kompanyon

Tabangi ang imong mga kompanyon nga makasinati og mga kalamposan ug makaangkon og kamasaligon sa pagkat-on sa pinulongan sa misyon o sa pagkat-on og Iningles. Hatagi og sinsero ug kanunay nga komplemento ang imong mga kompanyon ug ubang misyonaryo sa ilang pag-uswag.

Paghatag og yano ug praktikal nga feedback uban ang pagkamabination. Hatagi sila og daghang oportunidad sa pagtudlo ug pagpamatuod sa malamposong paagi. Hinumdomi kon sa unsang paagi nga ang usa ka mas sinati nga misyonaryo mitabang sa iyang kompanyon sa pagsunod sa tinuod nga asoy.

Bag-o pa lang kong miabot sa akong ikaduhang area sa dihang ang akong kompanyon misulti kanako nga ako nang turno nga mohatag og espirituhanong pamalandong sa usa ka sabot atol sa panihapon. Ang akong unang kompanyon kanunay gayod nga malipayon nga siya ra ang magtudlo, ug naandan nako nga mohatag sa akong gamay nga porsiyon sa leksiyon ug dayon maminaw.

Gisulayan nako sa pagkombinser ang akong kompanyon nga kinahanglan siya maoy mohatag sa espirituhanong pamalandong, pero iya kong giawhag sa pagbuhat sa buluhaton. Nagpraktis ko uban sa iyang tabang.

Sa pag-abot sa higayon, akong giablihan ang akong mga kasulatan ug mibasa sa 3 Nephi 5 ug 7. Naglisod ko pero nakahimo ra sa pagpasabot kon nganong gibati nako nga ang akong gipili nga mga tudling mahinungdanon, ug nahuwasan ko sa dihang nahuman na ko. Sa dihang may nangutana, mitan-aw ko sa akong kompanyon aron maoy motubag, pero wala niya bukha ang iyang ba-ba. Diha na ako nahingangha sa akong kaugalingon pinaagi sa paghimo og usa ka tubag gamit ang masabtan kaayo nga French. Mas nahingangha pa ko nga ang miyembro ingon og wala makabantay nga dili ko segurado mahitungod sa akong kahanas sa pakighinabi. Nakabaton ko og pagsalig ug nakaamgo nga ang akong French mas maayo pa kay sa unsay akong gihunahuna sa akong kaugalingon.

Ang mga semana milabay, ug ang akong kompanyon mipadayon sa pagtugot kanako nga motudlo—bisan pa kon ako wala magdahom nga makabuhat niini ug bisan gani siya tingali naghunahuna kon makahimo ba ko niini. Ako mibati nga ako nahimong usa ka himan sa atong Amahan sa Langit imbis nga mahimong usa lamang ka hilomon nga kompanyon.

Personal nga Pagtuon o Pagtuon uban sa Kompanyon

Pakigtambayayong uban sa mga misyonaryo sa pagtabang kanimo nga makat-on sa pinulongan sa imong misyon.

Kon ikaw nakigtambayayong sa bag-ong misyonaryo, unsaon nimo nga mas makatabang og maayo sa imong kompanyon nga makakat-on sa pinulongan o makakat-on og Iningles?
Kon bag-o ka nga misyonaryo, unsa nga matang sa tabang ang mahimo nimong ihangyo gikan sa imong kompanyon?

Kultura ug Pagkat-on sa Pinulongan

Ang kultura ug ang pinulongan magdug-ol ra. Ang pagsabot sa kultura sa mga tawo makatabang sa pagpasabot sa paagi sa paggamit sa pinulongan. Kini nga pagsabot makatabang usab kanimo sa pagpakighinabi sa talagsaon nga mga aspeto sa mensahe sa Pagpahiuli sa paagi nga maklaro ngadto sa mga tawo.

Usa sa labing mahinungdanon nga mga butang nga imong mahimo aron makabaton sa pagsalig ug gugma sa mga tawo mao ang pagtahod ug paghangop sa ilang kultura sa tukma nga mga paagi. Daghang bantogan nga mga misyonaryo ang nakabuhat niini (tan-awa sa 1 Mga Taga-Corinto 9:20–23).

Personal nga Pagtuon o Pagtuon uban sa Kompanyon

Gamita ang ideya sa ubos nga makatabang nimo sa pag-andam sa pagtudlo sa tawo kinsa adunay lahi og kultura o kagikan.

Hunahunaa ang kultura ug relihiyosong kagikan sa mga tawo nga imong tudloan. Pag-ila og usa ka aspeto sa ilang kagikan nga nakapahimo niining lisod alang kanila sa pagsabot og usa ka baroganan sa ebanghelyo. Pagplano og mga paagi sa pagtudlo niining baroganan sa klaro nga paagi.

Ang Gasa sa mga Pinulongan

Ang mga gasa sa Espiritu tinuod. Ang gasa sa mga pinulongan ug ang paghubad sa mga pinulongan adunay daghang pagpakita. Ang uban niini naglakip sa pagsulti, pagsabot, ug paghubad sa mga pinulongan. Karon ang gasa sa mga pinulongan sagad gayod nga makita diha sa gipalambo sa Espiritu nga pagkat-on ug pagtuon aron matabangan ang mga misyonaryo nga makakat-on sa pinulongan sa ilang misyon.

Ang Espiritu Santo makapakita sa kamatuoran sa imong pagpamatuod bisan tuod og ang usa ka babag sa pinulongan mahimong ana taliwala kanimo ug niadtong imong gitudloan. Sa samang paagi, ang Espiritu Santo makahatag sa mga pulong ug hugpong sa mga pulong ngadto sa imong panumdoman ug motabang kanimo nga makasabot unsa ang gisulti sa mga tawo gikan sa ilang mga kasingkasing.

Sa kadaghanang bahin, ikaw dili makabaton niining mga gasa kon walay paningkamot. Ikaw kinahanglan nga aktibong magtinguha niini aron sa pagpanalangin sa uban (tan-awa sa Doktrina ug mga Pakigsaad 46:8–9, 26). Kabahin sa pagtinguha sa gasa sa mga pinulongan mao ang pagpaningkamot ug pagbuhat sa tanan nimong mahimo aron makakat-on sa pinulongan. Magmapailobon samtang ikaw mainampoon nga magtuon ug magbansay sa pinulongan. Salig nga ang Espiritu motabang kanimo samtang ikaw mohimo og usa ka makugihon nga paningkamot. Pagbaton og hugot nga pagtuo nga ikaw makaangkon og gasa sa mga pinulongan nga makatabang nimo ug niadtong imong gitudloan.

Kon naglisod ka sa pagpahayag sa imong kaugalingon sa klaro nga paagi sumala sa imong gusto, hinumdomi nga ang Espiritu makahimo sa pagsulti ngadto sa mga kasingkasing sa tanang anak sa Dios. Si Presidente Thomas S. Monson mitudlo:

“Adunay usa ka pinulongan … nga komon sa kada misyonaryo—ang pinulongan sa Espiritu. Dili kini makat-onan gikan sa mga libro nga gisulat sa mga bantugang manunulat, ni maangkon kini pinaagi sa pagbasa ug pagmemorya. Ang pinulongan sa Espiritu moabot kaniya kinsa nagtinguha sa tibuok niyang kasingkasing nga makaila sa Dios ug motuman sa Iyang balaanong mga sugo. Ang pagkabatid niining pinulongan magtugot sa usa ka tawo sa paglagpas sa mga babag, pagbuntog sa mga kalisod, ug pagtandog sa kasingkasing sa tawo” (The Spirit Giveth Life,” Ensign, Hunyo 1997, 2).

Personal nga Pagtuon o Pagtuon uban sa Kompanyon

Gamit ang mosunod nga pamahayag sa pagtimbang-timbang sa inyong mga paningkamot sa pagtinguha sa gasa sa mga pinulongan. Irekord ang mga pag-aghat ug mga tumong aron matabangan ka nga molambo ang imong pagkat-on sa pinulongan.

Ako motuo nga ako gitawag sa Dios, pinaagi sa Iyang propeta, sa pagsangyaw sa ebanghelyo gamit ang bag-o nga pinulongan. (Doktrina ug mga Pakigsaad 90:11)
Ang akong gugma alang sa Ginoo ug niadtong akong giserbisyohan nagdasig kanako. (Doktrina ug mga Pakigsaad 46:9; 1 Mga Taga-Corinto 14:12)
Ako maningkamot sa pagpakabuhi nga takos sa Espiritu Santo pinaagi sa pagtuman sa mga sugo, pagsunod sa mga sumbanan sa misyon, ug paghinulsol sa matag adlaw. (Doktrina ug mga Pakigsaad 46:9, 33)
Ako padayon nga mag-ampo aron makabaton sa gasa sa mga pinulongan. (Doktrina ug mga Pakigsaad 46:28, 30–32)
Ako magtuon, magbansay, ug mogamit sa pinulongan sa misyon kutob sa mahimo sa matag adlaw. (1 Mga Taga-Corinto 12:31)

Mga Ideya sa Pagtuon ug Paggamit

Personal nga Pagtuon

Rebyoha ang mga tinubdan sa pinulongan diha sa Missionary Portal. Ilha ang usa ka butang nga wala pa nimo masulayi, ug itakda ang usa ka tumong aron sulayan kini sa sunod nga pipila ka adlaw.
Sa inyong sunod nga miting sa district, pangutana og sinati nga misyonaryo nga adunay maayong abilidad sa pinulongan kon unsa ang iyang gihimo aron makakat-on sa pinulongan.

Pagtuon uban sa Kompanyon ug Panagbaylo sa Kompanyon

Praktisa ang pagtudlo sa usag usa sa mga leksiyon sa misyonaryo gamit ang pinulongan sa inyong misyon. Sa sinugdanan, ang bag-ong mga misyonaryo mahimong magtudlo sa yano kaayong paagi, mopakigbahin og yano nga pagpamatuod, ug mosulti og gimemorya nga mga kasulatan. Samtang ang ilang pagsalig ug abilidad molambo, mas makaapil gayod sila sa pagtudlo.
Rebyoha ang mga ideya niining kapitulo ug sa mga tinubdan sa pinulongan diha sa Missionary Portal. Hisgoti kon hain sa mga sugyot ang imong magamit sa pagtuon uban sa kompanyon inig sunod semana.
Hangyoa ang imong kompanyon sa pagpaminaw sa imong paglitok ug sa pagtabang kanimo nga molambo. Hangyoa sila sa paghimo og mubo nga sulat bahin sa mga sitwasyon kon ikaw wala masabti. Himoa ang lista sa tukma nga mga pulong, mga hugpong sa mga pulong, o gramatika nga makatabang. Ipasabot ug praktisa kon unsaon sa paggamit kon unsa ang anaa sa lista sa mosunod nga mga kalihokan.
Praktisa ang pagpaminaw og maayo. Planoha ang oras atol sa adlaw sa pagpaminaw og maayo aron matino ang bokabolaryo ug mga sumbanan nga imong nakat-onan. Kon makadungog ka og hugpong sa mga pulong nga gipadayag sa lahi nga paagi kaysa paagi sa imong paglitok niini, isulat kini ug praktisa kini.
Himoa ang lista sa mga butang nga mahimong isulti sa mga tawo nianang adlawa. Planoha ug bansaya ang mga paagi sa imong pagtubag.

Konseho sa District, mga Komperensiya sa Zone, ug Konseho sa Pagpangulo sa Misyon

Imbitara ang usa ka lumad nga mga mamumulong sa pagtambong sa usa niini nga mga miting. Ipahigayon nga ang mga misyonaryo motudlo kanila diha sa gagmayng mga pundok. Hangyoa ang lumad nga mga mamumulong sa pagsulat ug sa paghatag og feedback kabahin sa abilidad sa pinulongan sa mga misyonaryo.
Sangoni daan ang usa o duha ka misyonaryo sa pagsulti mahitungod sa mga kalamposan nga ilang naangkon diha sa pagtuon sa pinulongan.
Sangoni ang usa ka sinati na nga misyonaryo sa pagpresentar sa pipila ka bahin sa pinulongan nga sa kasagaran lisod alang sa mga misyonaryo. Hangyoa siya sa pagpresentar og mga ehemplo sa maayong paggamit sa pinulongan, ug hangyoa ang mga misyonaryo sa pagpraktis niini.
Hangyo ang mga misyonaryo kinsa lumad sa kultura nga mopakigbahin sa ilang mga ideya.

Mga Lider sa Misyon ug Mga Magtatambag sa Misyon

Hatagi og gibug-aton ang importansiya sa makanunayong nga pagtuon sa pinulongan sa matag adlaw.
Awhaga ang mga misyonaryo sa paggamit sa pinulongan sa misyon kutob sa mahimo.
Isangkap ang mga elemento bahin sa plano sa pagtuon sa pinulongan sa misyon diha sa sistematiko nga eskedyul sa pagtuon. Rebyoha kini diha sa mga miting sa konseho sa district.
Pangita og mga oportunidad sa pakig-estorya uban sa mga misyonaryo gamit ang pinulongan nga ilang gitun-an. Panagsa nga mointerbiyo kanila niining pinulongan.
Hangyoa ang lokal nga mga lider ug mga miyembro alang sa mga ideya kon sa unsang paagi nga ang mga misyonaryo makapalambo sa ilang abilidad sa pinulongan.
Hatag og instruksiyon diha sa komperensiya sa zone o sa konseho sa pagpangulo sa misyon kabahin sa labing komon nga mga sayop nga gihimo sa mga misyonaryo kinsa nagkat-on sa pinulongan sa imong misyon.
Tudloi ang mga misyonaryo mahitungod sa espirituhanong mga gasa.
Obserbari ang mga misyonaryo kon sila magtudlo gamit ang pinulongan sa misyon.