“Kapitulo 4: Magtinguha ug Mosalig sa Espiritu,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Kapitulo 4: Magtinguha ug Mosalig sa Espiritu,” Isangyaw ang Akong Ebanghelyo
Kapitulo 4
Magtinguha ug Mosalig sa Espiritu
Hunahunaa Kini
-
Unsa ang akong mabuhat aron makabaton sa gahom sa Espiritu Santo sa akong kinabuhi ug sa misyonaryo nga pagserbisyo?
-
Unsa ang tahas sa Espiritu Santo sa pagkakabig?
-
Unsaon nako sa pagtabang sa mga tawo nga among gitudloan nga mobati sa impluwensya sa Espiritu Santo?
-
Unsaon nako sa paghimo sa akong mga pag-ampo nga mas makahuloganon?
-
Unsaon nako sa pagkat-on sa pag-ila sa mga pag-aghat sa Espiritu Santo?
Tinguhaa ang Giya sa Espiritu Santo
Ang gasa sa Espiritu Santo mao ang usa sa labing mahinungdanon nga mga gasa nga gihatag sa Dios sa Iyang mga anak. Importante kaayo kini sa imong buhat isip usa ka misyonaryo. Gikinahanglan nimo ang makagiya, mapadayagon nga gahom sa Espiritu Santo samtang motabang ka sa mga tawo nga mabunyagan, makompirmahan, ug makabig.
Ang pagbaton sa giya sa Espiritu Santo sa imong kinabuhi nagkinahanglan og espirituwal nga paningkamot. Kini nga paningkamot naglakip og kinasingkasing nga pag-ampo ug makanunayon nga pagtuon sa kasulatan. Kini usab naglakip sa pagtuman sa imong mga pakigsaad ug sa mga sugo sa Dios (tan-awa sa Mosiah 18:8–10, 13). Kini naglakip sa takos nga pag-ambit sa sakramento matag semana (tan-awa sa Doktrina ug mga Pakigsaad 20:77, 79).
Nag-atubang ka og nagkalainlain nga mga panginahanglan ug mga kahimtag matag adlaw. Ang mga pag-aghat gikan sa Espiritu motabang kanimo nga mahibalo kon unsa ang buhaton ug isulti. Samtang ikaw magtinguha ug molihok niini nga mga pag-aghat, ang Espiritu Santo mopadako sa imong mga abilidad ug pagserbisyo nga molabaw pa gayod sa unsay imong mabuhat sa imong kaugalingon. Siya motabang kanimo sa matag aspeto sa imong misyonaryo nga pagserbisyo ug sa imong personal nga kinabuhi. (Tan-awa sa 2 Nephi 32:2–5; Alma 17:3; Helaman 5:17–19; Doktrina ug mga Pakigsaad 43:15–16; 84:85.)
“Sa umaabot nga mga adlaw, dili na posible ang espirituhanong pagsugakod kon wala ang giya, direksiyon, makahupay, ug makanunayon nga impluwensya sa Espiritu Santo” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96).
Ang Kahayag ni Kristo
Ang Kahayag ni Kristo “gihatag ngadto sa matag tawo, [aron] siya masayod sa maayo gikan sa daotan” (Moroni 7:16; tan-awa sa mga bersikulo 14–19; tan-awa usab sa Juan 1:9). Ang Kahayag ni Kristo mao ang paglamdag, kahibalo, ug impluwensya nga gihatag pinaagi kang Jesukristo. Kini nga impluwensya mag-una sa dili pa ang pagdawat sa gasa sa Espiritu Santo. Kini mogiya niadtong kinsa andam nga magkat-on ug mosunod sa gipahiuli nga ebanghelyo ni Jesukristo.
Ang Espiritu Santo
Ang Personahe sa Espiritu Santo
Ang Espiritu Santo mao ang ikatulong sakop sa Dios nga Kapangulohan. Siya usa ka personahe nga espiritu ug walay lawas nga unod ug mga bukog (tan-awa sa Doktrina ug mga Pakigsaad 130:22). Siya mao ang Maghuhupay, nga gisaad sa Manluluwas nga motudlo sa Iyang mga sumusunod sa tanan nga mga butang ug mopahinumdom kanila sa tanan nga mga butang nga gitudlo ni Jesus (tan-awa sa Juan 14:26).
Ang Gahom sa Espiritu Santo
Ang saksi nga moabot ngadto sa sinsero nga mga nangita sa kamatuoran sa dili pa ang bunyag moabot pinaagi sa gahom sa Espiritu Santo. Ang tanang tawo makadawat og pagpamatuod kabahin ni Jesukristo ug sa Iyang gipahiuli nga ebanghelyo pinaagi sa gahom sa Espiritu Santo. “Pinaagi sa gahom sa Espiritu Santo [kita] mahimo nga masayod sa kamatuoran sa tanan nga mga butang” (Moroni 10:5).
Ang Gasa sa Espiritu Santo
Ang gasa sa Espiritu Santo mao ang katungod nga makabaton sa kanunay nga panag-uban sa Espiritu Santo kon kita takos. Kita makadawat sa gasa sa Espiritu Santo human nga kita mabunyagan pinaagi sa tubig. Gitugyan kini pinaagi sa ordinansa sa kompirmasyon.
Si Propeta Joseph Smith miingon: “Adunay kalainan tali sa Espiritu Santo ug sa gasa sa Espiritu Santo. Nadawat ni Cornelio ang Espiritu Santo sa wala pa siya bunyagi, nga mao ang makapadani nga gahom sa Dios ngadto kaniya sa kamatuoran sa Ebanghelyo, apan dili siya makadawat sa gasa sa Espiritu Santo hangtod human mabunyagi” (Mga Pagtulon-an sa mga Presidente sa Simbahan: Joseph Smith [2007], 114).
Pinaagi kini sa gasa ug gahom sa Espiritu Santo nga kita malimpyohan—mahimong mas balaan, mas kompleto, mas hingpit, mas sama sa Dios. Pinaagi kini sa pagtubos ni Kristo ug sa makapalimpyo nga gahom sa Espiritu Santo nga kita mahimong matawo pag-usab sa espirituwal nga paagi samtang kita motuman sa pakigsaad nga atong gihimo sa Dios (tan-awa sa Mosiah 27:25–26).
Ang Balaan nga Espiritu sa Saad
Ang Espiritu Santo gitawag usab isip ang Balaan nga Espiritu sa Saad (tan-awa sa Doktrina ug mga Pakigsaad 88:3). Niini nga kapasidad, ang Espiritu Santo mokompirmar nga ang mga ordinansa sa pagkapari nga atong madawat ug ang mga pakigsaad nga atong himoon madawat ngadto sa Dios. Kadto kinsa naselyohan pinaagi sa Balaan nga Espiritu sa Saad makadawat sa tanan nga anaa sa Amahan (tan-awa sa Doktrina ug mga Pakigsaad 76:51–60; Mga Taga-Efeso 1:13–14; Ang Giya ngadto sa mga Kasulatan, “Balaan nga Espiritu sa Saad”).
Ang tanang ordinansa ug pakigsaad kinahanglan maselyo pinaagi sa Balaan nga Espiritu sa Saad aron mahimong balido human niini nga kinabuhi (tan-awa sa Doktrina ug mga Pakigsaad 132:7, 18–19, 26). Kana nga pagselyo nagdepende sa atong padayon nga kamatinud-anon.
Mga Gasa sa Espiritu Santo
Ang Ginoo mohatag kanato og mga gasa sa Espiritu aron sa pagpanalangin kanato ug aron gamiton sa pagpanalangin sa uban (tan-awa sa Doktrina ug mga Pakigsaad 46:8–9, 26). Pananglitan, ang mga misyonaryo nga magkat-on og bag-o nga pinulongan mahimong makadawat sa gasa sa pagpanulti og mga pinulongan aron mahatagan sila og balaanon nga tabang sa pagtudlo sa uban diha sa ilang lumad nga pinulongan.
Pipila ka gasa sa Espiritu gihulagway diha sa Moroni 10:8–18, Doktrina ug mga Pakigsaad 46:11–33, ug sa 1 Mga Taga-Corinto 12:1–12. Kini mao lamang ang pipila sa daghang mga gasa sa Espiritu. Ang Ginoo mahimong mopanalangin kanato og uban pa nga mga gasa depende sa atong kamatinud-anon, sa atong mga panginahanglan, ug sa mga panginahanglan sa uban.
Ang Manluluwas nag-imbitar kanato nga kinasingkasing nga magtinguha og espirituwal nga mga gasa (tan-awa sa Doktrina ug mga Pakigsaad 46:8; 1 Mga Taga-Corinto 14:1, 12). Kini nga mga gasa moabot pinaagi sa pag-ampo, hugot nga pagtuo, ug paningkamot—ug sumala sa kabubut-on sa Dios.
Personal nga Pagtuon o Pagtuon uban sa Kompanyon
Diha sa Ang Giya ngadto sa mga Kasulatan, basaha ang “Espiritu Santo,” “Kahayag, Kahayag ni Kristo,” ug “Espiritu, Balaan nga.” Pagsulat og paghulagway sa kinaiya ug papel sa Espiritu Santo.
Basaha ang Mga Buhat 4:1–33.
-
Giunsa ni Pedro ug ni Juan pagtinguha og espirituwal nga mga gasa?
-
Giunsa sa Dios pagtubag ang ilang mga pag-ampo?
-
Unsa man ang makat-onan nimo gikan niini nga kasinatian kabahin sa imong kaugalingong trabaho?
Ang Gahom sa Espiritu diha sa Pagkabig
Ang pagkakabig mahitabo pinaagi sa gahom sa Espiritu Santo. Ang imong papel mao ang pagtabang sa pagdala sa gahom sa Espiritu ngadto sa kinabuhi sa usa ka tawo. Ang pipila ka paagi nga mahimo nimo kini gisugyot sa ubos.
-
Pagtinguha nga mabatonan nimo ang Espiritu pinaagi sa pag-ampo, pagsiksik sa mga kasulatan, ug pagtuman sa imong mga pakigsaad.
-
Pagtudlo pinaagi sa Espiritu mahitungod sa Manluluwas ug sa mensahe sa Pagpahiuli. Pagsunod sa giya sa Espiritu sa pagpahiangay sa imong mensahe ngadto sa mga panginahanglan sa kada tawo.
-
Pagpamatuod nga ikaw nasayod pinaagi sa gahom Espiritu Santo nga unsay imong gitudlo tinuod. Samtang ikaw magpamatuod, ang Espiritu Santo makahatag og pagsaksi ngadto sa uban.
-
Pag-imbitar og mga tawo nga molihok, ug suportahi sila sa pagtuman sa ilang mga pasalig. Samtang ang mga tawo motuman sa mga pasalig, mas kusog nila nga mabati ang gahom sa Espiritu Santo. Tan-awa sa kapitulo 11.
-
Pag-follow up pinaagi sa pagpangutana sa mga tawo mahitungod sa ilang mga kasinatian samtang ilang gibuhat ang usa ka imbitasyon. Ang ilang hugot nga pagtuo motubo samtang sila maghinulsol, mosunod sa mga sugo, ug motuman sa ilang mga pasalig. Tabangi sila nga makaila sa Espiritu nga naglihok uban kanila.
Si Presidente M. Russell Ballard mitudlo: “Ang tinuod nga pagkakabig moabot pinaagi sa gahom sa Espiritu. Kon ang Espiritu motandog sa kasingkasing, ang mga kasingkasing mausab. Kon ang mga indibidwal … mobati sa Espiritu nga naglihok kanila, o kon ilang makita ang ebidensiya sa gugma ug kapuangod sa Ginoo diha sa ilang mga kinabuhi, sila nahatagan og kaayohan ug nalig-on sa espirituhanong paagi ug ang ilang hugot nga pagtuo diha Kaniya motubo. Kini nga mga kasinatian uban sa Espiritu natural nga mosunod kon ang usa ka tawo andam nga mosulay sa pulong [tan-awa sa Alma 32:27]. Kini mao ang paagi nga kita mobati nga ang ebanghelyo tinuod” (“Now Is the Time,” Ensign, Nob. 2000, 75).
Personal nga Pagtuon o Pagtuon uban sa Kompanyon
-
Tun-i ang usa o dugang pa sa mosunod nga mga tudling. Samtang ikaw magbasa, tinguhaa nga makasabot kon unsay bation sa usa ka tawo diha sa proseso sa pagkakabig. Irekord ang imong mga impresyon diha sa imong journal sa pagtuon. Hisgoti ang imong mga panabot ngadto sa ubang mga misyonaryo ug mga miyembro.
2 Nephi 4:16–35; Enos 1; Mosiah 4–5; 18:7–14; 27–28; Alma 5; 17–22; 32; 36; 38
-
Tun-i ang usa o dugang pa sa mosunod nga mga tudling. Samtang ikaw magbasa, ikonsiderar kon unsaon nimo nga mas makatudlo og maayo pinaagi sa makapakabig nga gahom sa Espiritu. Irekord ang imong mga pagbati ug mga impresyon diha sa imong journal sa pagtuon. Hisgoti ang imong mga ideya ngadto sa ubang mga misyonaryo ug mga miyembro.
1 Nephi 8:11–12; Mosiah 28:1–4; Alma 26; 29; 31:26–38; 32; Moroni 7:43–48; Doktrina ug mga Pakigsaad 4; 18:10–16; 50:21–22.
Pagtuon sa Kasulatan
Unsay gitudlo sa mosunod nga mga kasulatan mahitungod sa gahom sa Espiritu diha sa imong buhat?
Unsay mabuhat nimo aron makabaton sa gahom sa Espiritu diha sa imong buhat?
Pag-ampo inubanan sa Hugot nga Pagtuo diha ni Jesukristo
Aron matabangan ang uban nga mahimong makabig, gikinahanglan nimo nga motudlo pinaagi sa gahom sa Espiritu (tan-awa sa Doktrina ug mga Pakigsaad 50:13–14, 17–22). Ang Ginoo nag-ingon, “Ug ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo” (Doktrina ug mga Pakigsaad 42:14).
Samtang ikaw mag-ampo alang sa tabang sa imong pagtudlo, ang gahom sa Espiritu Santo modala sa imong mga gitudlo “ngadto sa mga kasingkasing sa mga katawhan” (2 Nephi 33:1). Samtang ikaw magtudlo pinaagi sa Espiritu ug ang uban modawat pinaagi sa Espiritu, kamo “[m]akasabot sa usag usa” ug “makadawat og kaayohan ug maglipay nga maghiusa” (Doktrina ug mga Pakigsaad 50:22).
Unsaon sa Pag-ampo
Si Jesus mitudlo kanato kon unsaon sa pag-ampo (tan-awa sa Mateo 6:9–13; 3 Nephi 18:19). Sinsero nga pag-ampo ug uban sa tinuod nga katuyoan nga molihok sa mga pag-aghat nga imong madawat gikan sa Espiritu Santo. Ang epektibo nga pag-ampo nagkinahanglan og mapainubsanon, nagpadayon nga paningkamot (tan-awa sa Moroni 10:3–4; Doktrina ug mga Pakigsaad 8:10).
Gamit og pinulongan nga magpadayag og mahigugmaon, masimbahon nga relasyon sa Dios. Sa Cebuano, gamit og pinulongan sa kasulatan sama sa Kanimo kaysa mas komon nga mga pulingan nga ikaw, imo, ug imoha.
Kanunay nga mopahayag og pasalamat. Usa ka tininuod nga paningkamot nga magmapasalamaton makatabang nimo nga makasabot kon unsa ka maluluy-on ang Ginoo sa imong kinabuhi. Kini mobukas sa imong kasingkasing ug hunahuna ngadto sa inspirasyon.
Pag-ampo “sa tibuok kusog sa kasingkasing” alang sa gugma nga putli nga itugyan diha nimo (Moroni 7:48). Pag-ampo alang sa uban gamit ang ilang ngalan. Pag-ampo alang niadtong inyong gitudloan. Pagtinguha og inspirasyon kon unsaon ninyo pag-imbitar ug pagtabang kanila nga moduol ngadto kang Kristo.
Personal nga Pagtuon
Tun-i ang pag-ampo sa Ginoo diha sa Mateo 6:9–13. Pangutan-a ang imong kaugalingon sa mosunod nga mga pangutana, ug irekord ang mga impresyon diha sa imong journal sa pagtuon.
-
Sa unsa nga paagi nga ang imong kasamtangan nga responsibilidad isip usa ka misyonaryo nakaimpluwensya sa imong mga pag-ampo?
-
Sa unsa nga mga paagi nga ang imong mga pag-ampo nagtinguha sa pagpanalangin sa mga kinabuhi sa uban?
-
Sa unsa nga paagi ka nag-ampo aron makabuntog sa tentasyon?
-
Giunsa nimo pag-ampo alang sa tabang sa pagsangkap sa imong espirituwal ug temporal nga mga panginahanglan?
-
Giunsa nimo paghatag og himaya sa Dios kon ikaw mag-ampo?
Kanus-a Mag-ampo
Kanus-a ka kinahanglan mag-ampo? Ang Ginoo miingon “Pangita nga makugihon, pag-ampo sa kanunay, ug pagmatuohon, ug ang tanan nga mga butang maghiusa sa paglihok alang sa inyong kaayohan” (Doktrina ug mga Pakigsaad 90:24).
Si Alma miingon, “Pakitambag uban sa Ginoo sa tanan nimo nga buhaton, ug siya moagak kanimo alang sa kaayohan; oo, kon ikaw mohigda sa gabii higda ngadto sa Ginoo, nga siya mobantay diha kanimo sa imong pagkatulog; ug kon ikaw mobangon sa buntag himoa nga ang imong kasingkasing puno sa mga pasalamat ngadto sa Dios” (Alma 37:37; tan-awa usab sa 34:17–27).
Ang Ginoo nag-imbitar kanimo sa paggahin og hilom, pribado nga mga higayon sa pag-ampo: “sulod sa inyong lawak, ug … pag-ampo ngadto sa inyong Amahan” (3 Nephi 13:6; tan-awa usab sa mga bersikulo 7–13).
Si Presidente Gordon B. Hinckley mitudlo:“Matag buntag … , ang mga misyonaryo kinahanglan nga mangluhod ug mangamuyo sa Ginoo sa pagluag sa ilang mga dila ug makapamulong ngadto kanila sa mga panalangin niadtong ilang gitudloan. Kon buhaton nila kini, usa ka bag-ong kahayag ang moabot sa ilang kinabuhi. Adunay tumang kadasig alang sa buhat. Sila masayod uban sa tumang kaseguroan, nga sila mga sulugoon sa Ginoo nga nagsulti alang Kaniya” (“Missionary Service,” First Worldwide Leadership Training Meeting, Ene. 11, 2003, 20).
Pagsalig sa Dios kon Kita Mag-ampo
Ang pagbaton og hugot nga pagtuo diha sa Dios nagpasabot sa pagsalig Kaniya. Kini naglakip sa pagsalig sa Iyang kabubut-on ug sa Iyang tukmang panahon sa pagtubag sa imong mga pag-ampo (tan-awa sa Isaias 55: 8–9). Si Presidente Dallin H. Oaks mitudlo:
“Bisan unsa pa ka lig-on ang atong hugot nga pagtuo, kini dili makamugna og resulta sukwahi sa kabubut-on Niya kinsa atong gituohan. Hinumdomi kini sa higayon ang inyong mga pag-ampo morag wala tubaga sa paagi o sa panahon nga gusto ninyo. Ang pagbaton og hugot nga pagtuo kang Ginoong Jesukristo kanunay gayod nga pinasubay sa lagda sa langit, sa kamaayo ug kabubut-on ug kaalam ug tayming sa Ginoo. Kon kita anaa nianang klase sa hugot nga pagtuo ug pagsalig sa Ginoo, kita adunay tinuod nga kasiguroan ug kalinaw sa atong mga kinabuhi” (“Ang Pag-ula ug Hugot nga Pagtuo,” Liahona, Abr. 2008, 8).
Kalabot sa mga pag-ampo nga tingali ingon og wala matubag, si Presidente Russell M. Nelson miingon:
“Nasayod ako niana nga pagbati! Nasayod ako sa mga kahadlok ug mga luha sa maong mga higayon. Pero nasayod usab ako nga ang atong mga pag-ampo dili ibaliwala. Dili mahitabo nga ang atong [hugot nga] pagtuo dili mamatikdan. Nasayod ako nga ang panglantaw sa maalamon nga Langitnong Amahan mas klaro kay sa atoa. Samtang nahibalo kita sa atong mortal nga mga problema ug kasakit, nasayod siya sa atong imortal nga kauswagan ug potensiyal. Kon mag-ampo kita aron mahibalo sa Iyang kabubut-on ug motugyan sa atong mga kaugalingon niini uban sa pailob ug kaisog, ang langitnong pagkaayo mahitabo sa Iyang kaugalingong paagi ug panahon” (“Jesukristo—ang Gamhanang Tig-ayo,” Liahona, Nob. 2005, 86).
Pagkat-on sa Pag-ila sa mga Pag-aghat sa Espiritu
Importante alang kaninyo ug sa mga tawo nga inyong gitudloan nga makat-on sa pag-ila sa mga komunikasyon gikan sa Espiritu. Ang Espiritu kasagaran hilom nga moistorya, pinaagi sa atong mga pagbati, hunahuna, ug kasingkasing. Nahibaloan ni propeta Elias nga ang tingog sa Ginoo wala sa hangin, sa linog, o sa sunog—apan usa ka “hinay ug malumong tingog” (1 Mga Hari 19:12). Kini “dili usa ka tingog sa dugdog,” apan hinuon “usa kini ka hagawhaw nga tingog nga hingpit sa kalumo,” ug bisan pa man kini mahimong “[mo]dulot bisan ngadto sa kinahiladman sa kalag” (Helaman 5:30).
Ang mga komunikasyon gikan sa Espiritu mahimong mabati sa managlahing paagi ngadto sa lainlaing katawhan. Dili igsapayan kon sa unsa nga paagi nga mabati kini nga mga komunikasyon, ang mga kasulatan nagtudlo kon unsaon sa pag-ila niini. Pananglitan, ang Espiritu mohatag kanimo og kaayohan ug mogiya kanimo sa pagbuhat og maayo. Siya molamdag sa imong hunahuna. Siya mogiya kanimo nga mapainubsanong molakaw ug matarong nga mohukom. (Tan-awa sa Doktrina ug mga Pakigsaad 11:12–14 ug sa “Personal nga Pagtuon” nga kahon sa ulahing bahin niini nga seksiyon.)
Agig tubag sa pangutana, “Unsaon nato pag-ila ang mga pag-aghat sa Espiritu?” Si Presidente Gordon B. Hinckley mibasa sa Moroni 7:13, 16–17. Dayon miingon siya:
“Mao kana ang pagsulay, kon masulti ug mahimo na ang tanan. Nagdani ba kini sa tawo sa paghimo og maayo, sa pagbangon, sa pagbarog nga matarong, sa pagbuhat sa husto nga butang, sa pagbinuotan, sa pagmanggihatagon? Nan kini iya sa Espiritu sa Dios. …
“… Kon kini nagdapit sa pagbuhat og maayo, kini iya sa Dios. Kon kini nagdapit sa pagbuhat og daotan, kini iya sa yawa. … Ug kon ikaw nagbuhat sa husto nga butang ug kon ikaw nagpuyo sa saktong paagi, imong mahibaloan sa imong kasingkasing kon unsay gisulti sa Espiritu kanimo.
“Mailhan ninyo ang mga pag-aghat sa Espiritu pinaagi sa mga bunga sa Espiritu—kanang molamdag, kanang molig-on, kanang positibo ug apirmatibo ug makapadasig ug modala kanato sa mas maayong panghunahuna ug mas maayong mga pulong ug mas maayong mga binuhatan iya sa Espiritu sa Dios” (Teachings of Gordon B. Hinckley [1997], 260–61).
Samtang ikaw magtinguha ug mosunod sa giya sa Espiritu Santo, ang imong abilidad sa pag-ila ug pagsabot sa Iyang mga pag-aghat molambo sa paglabay sa panahon (tan-awa sa 2 Nephi 28:30). Sa pipila ka paagi, ang pagkahimong mas mahaom ngadto sa pinulongan sa Espiritu sama sa pagkat-on og laing pinulongan. Usa kini ka anam-anam nga proseso nga nagkinahanglan og makugihon, mapailobon nga paningkamot.
Tinguhaa ang giya sa Espiritu Santo uban ang hingpit nga katuyoan sa kasingkasing. Kon ikaw nabisi sa ubang mga butang, mahimong dili nimo mabati ang malumo nga mga paghunghong sa Espiritu. O mahimong maghulat Siya nga makig-estorya hangtod nga ikaw motinguha sa Iyang impluwensya uban ang usa ka mapainubsanon nga kaandam sa paglihok sa Iyang mga pag-aghat.
Ang mga tingog sa kalibotan nakig-ilog alang sa imong atensiyon. Kini sayon nga makapuli sa espirituwal nga mga impresyon gawas kon ikaw mohatag og luna alang sa Espiritu sa imong kasingkasing. Hinumdomi kini nga tambag gikan sa Ginoo: “Humilom kamo ug ilhon ninyo nga ako mao ang Dios” (Salmo 46:10; tan-awa usab sa Doktrina ug mga Pakigsaad 101:16).
“Ang Dios naggamit og nagkadaiyang sundanan sa pagpaabot og pagpadayag ngadto sa Iyang mga anak nga lalaki ug mga anak nga babaye, sama sa mga panghunahuna ug mga pagbati sa kasingkasing, mga damgo, … ug inspirasyon. Ang pipila ka pagpadayag madawat dihadiha dayon ug kusog kaayo; ang pipila mailhan sa inanay ug sa kalumo. Ang pagdawat, pag-ila, ug pagtubag sa mga pagpadayag gikan sa Dios espirituwal nga mga gasa nga kitang tanan kinahanglan nga mangandoy ug tukmang tinguhaon” (David A. Bednar, “The Spirit of Revelation in the Work,” 2018 nga seminar sa pagpangulo sa misyon).
Personal nga Pagtuon
Tun-i ang mga kasulatan sa mosunod nga table. Paghunahuna sa mga panahon nga ikaw nakasinati sa bisan hain niini nga mga pagbati, mga hunahuna, o mga impresyon nga gihulagway niini nga mga bersikulo. Samtang ikaw magtuon ug makaangkon og kasinatian, pagdugang og lain pa nga mga kasulatan niini nga lista. Paghunahuna kon unsaon nimo paggamit kini nga mga baroganan sa pagtabang sa uban nga makabati ug makaila sa Espiritu.
|
Doktrina ug mga Pakigsaad 6:23; 11:12–14; 88:3; Juan 14:26–27; Mga Taga-Roma 15:13; Mga Taga-Galacia 5:22–23 |
Mohatag sa mga pagbati sa gugma, hingpit nga kalipay, kalinaw, kahupay, pailob, kaaghop, kalumo, hugot nga pagtuo, ug paglaom. |
|
Alma 32:28; Doktrina ug mga Pakigsaad 6:14–15; 8:2–3; 1 Mga Taga-Corinto 2:9–11 |
Molamdag ug mohatag og mga ideya sa hunahuna ug mga pagbati sa kasingkasing. |
|
Motabang sa mga kasulatan nga adunay dako nga epekto. | |
|
Mopuli sa kangitngit og kahayag. | |
|
Molig-on sa tinguha sa paglikay sa daotan ug sa pagsunod sa kasugoan. | |
|
Moroni 10:5; Doktrina ug mga Pakigsaad 21:9; 100:8; Juan 14:26; 15:26; 16:13 |
Motudlo sa kamatuoran ug mopahinumdom niini. |
|
Mogiya ug mopanalipod gikan sa paglingla. | |
|
2 Nephi 31:18; Doktrina ug mga Pakigsaad 20:27; Juan 16:13–14 |
Mohimaya ug mopamatuod mahitungod sa Dios Amahan ug kang Jesukristo. |
|
Doktrina ug mga Pakigsaad 42:16; 84:85; 100:5–8; Lucas 12:11–12 |
Mogiya sa mga pulong sa mapainubsanon nga mga magtutudlo. |
|
Moroni 10:8–17; Doktrina ug mga Pakigsaad 46:8–26; 1 Mga Taga-Corinto 12 |
Mohatag sa mga gasa sa Espiritu. |
|
Mosulti kon unsay angayng iampo. | |
|
Mosulti kon unsay buhaton. | |
|
Motabang sa matarong nga mosulti uban sa gahom ug katungod. | |
|
Mopabalaan ug modala og kapasayloan sa mga sala. | |
|
Modala sa kamatuoran ngadto sa kasingkasing sa tigpaminaw. | |
|
Mopausbaw sa mga kahanas ug mga abilidad. | |
|
1 Nephi 7:15; 2 Nephi 28:1; 32:7; Alma 14:11; Mormon 3:16; Ether 12:2 |
Moawhag sa pagpadayon o mopugong. |
|
Mohatag og kaayohan sa magtutudlo ug sa mga estudyante. |
Mosalig sa Espiritu
Isip sulugoon sa Ginoo, ikaw mohimo sa Iyang trabaho sa Iyang paagi ug pinaagi sa Iyang gahom. Si Propeta Joseph Smith mitudlo nga “walay tawo nga makasangyaw sa Ebanghelyo kon wala ang Espiritu Santo” (Mga Pagtulon-an: Joseph Smith, 402).
Saligi ang Espiritu sa paggiya kanimo sa tanang aspeto sa imong trabaho. Siya molamdag ug modasig kanimo. Siya motabang kanimo sa pagpangita og mga tawo nga katudloan ug magdala og gahom sa imong pagtudlo. Siya moabag kanimo samtang ikaw motabang sa mga miyembro, sa mibalik nga mga miyembro, ug sa bag-o nga mga kinabig sa pagpalig-on sa ilang hugot nga pagtuo.
Ang uban nga mga misyonaryo mibati nga masaligon sa ilang kaugalingon. Ang uban nagkulang sa sama nga pagsalig. Mapainubsanon nga ibutang ang imong pagsalig ug hugot nga pagtuo diha ni Jesukristo, dili sa imong kaugalingon. Salig sa Espiritu imbes kay sa imong kaugalingon nga mga talento ug mga abilidad. Ang Espiritu Santo mopadako sa imong mga paningkamot labaw pa gayod sa unsay imong mabuhat sa imong kaugalingon.
Pagtuon sa Kasulatan
Tun-i ang mosunod nga mga kasulatan ug hunahunaa kon sa unsang paagi kini motubag niini nga importante nga mga pangutana nga angay nimong ipangutana kada adlaw. Sa unsang paagi nimo magamit ang mga pagtulon-an niini nga mga tudling ngadto sa imong mga paningkamot sa pagpangita, mga sesyon sa pagplano, ug sa personal nga pagtuon ug pagtuon uban sa kompanyon? Sa unsang paagi nimo magamit kini nga mga tudling ngadto sa imong mga paningkamot sa pagtudlo, pag-imbitar sa mga tawo nga mohimo og mga pasalig, ug sa pag-follow up sa mga pasalig?
Asa man ko kinahanglan moadto?
Unsay kinahanglan nakong buhaton?
Unsay angay nakong isulti?
Unsaon nako paggamit sa mga kasulatan sa akong pagtudlo?
Pipila ka Pulong sa Pasidaan
Ikompirmar ang Imong mga Impresyon sa Kasaligan nga mga Tinubdan
Samtang ikaw mag-ampo alang sa inspirasyon, itandi ang imong espirituwal nga mga impresyon sa mga kasulatan ug sa mga pagtulon-an sa buhi nga mga propeta. Ang mga impresyon gikan sa Espiritu motakdo niini nga mga tinubdan.
Pagtinguha og Pagpadayag sulod sa Imong Buluhaton
Seguroha nga ang mga pagbati nga imong nadawat nahiuyon sa imong buluhaton. Gawas kon ikaw gitawag pinaagi sa tukma nga awtoridad, ang mga impresyon gikan sa Espiritu wala gihatag kanimo aron sa pagtambag o pagkorihir sa uban. Pananglitan, dili ka makadawat og pagpadayag sa pagsulti sa usa ka bishop kon unsay iyang kinahanglan buhaton sa iyang calling.
Ilha ang Tinuod nga Impluwensya sa Espiritu
Si Presidente Howard W. Hunter mitambag: “Tugoti ako nga motanyag og usa ka pulong-pahimangno. … Para nako kon kita dili magbantay … , mahimong magsugod kita sa pagmao-mao sa tinuod nga impluwensya sa Espiritu sa Ginoo pinaagi sa dili takos ug minao-mao nga mga paagi. Mabalaka ko kon morag ang kusganon nga pagbati o ang paghilak pag-ayo sabton nga anaa ang Espiritu. Tinuod ang Espiritu sa Ginoo makadala og kusganon nga emosyonal nga mga pagbati, lakip sa mga luha, pero kana nga pagpakita dili angayng kalibgan nga mao na kini mismo ang presensya sa Espiritu.” (The Teachings of Howard W. Hunter [1997], 184).
Ayaw Sulayi sa Pagpugos ang Espirituhanon nga mga Butang
Ang espirituhanon nga mga butang dili mapugos. Mahimo kang mag-ugmad og kinaiya ug usa ka kahimtang nga moimbitar sa Espiritu, ug ikaw makaandam sa imong kaugalingon, apan dili ka makadiktar kon sa unsang paagi o kanus-a moabot ang inspirasyon. Mahimong mapailobon ug mosalig nga ikaw makadawat sa unsay imong gikinahanglan kon ang panahon husto.
Ipabiling Sagrado ang Espirituwal nga mga Kasinatian
Isip usa ka misyonaryo, mahimong mas makasugat ikaw og espirituhanong mga kasinatian kaysa sa kaniadto sa sayo pa sa imong kinabuhi. Kini nga mga kasinatian sagrado ug kasagaran alang sa imong kaugalingon nga kaayohan, instruksiyon, o koreksiyon.
Daghan niini nga mga kasinatian ang labing maayo nga ipabiling pribado. Pagpakigbahin lamang kon ang Espiritu mopahibalo nga ikaw makapanalangin sa ubang tawo pinaagi sa pagbuhat sa ingon (tan-awa sa Alma 12:9; Doktrina ug mga Pakigsaad 63:64; 84:73).
Gamita ang Imong Kaugalingon nga Labing Maayo nga Paghukom sa Ubang mga Sitwasyon
Usahay ganahan kita nga magiyahan sa Espiritu sa tanang butang. Apan, sa kasagaran ang Ginoo gusto nga kita molihok gamit ang atong kaugalinon nga labing maayo nga paghukom (tan-awa sa Doktrina ug mga Pakigsaad 60:5; 61:22; 62:5). Si Presidente Dallin H. Oaks mitudlo:
“Ang tinguha nga magiyahan sa Ginoo usa ka kalig-on, apan kinahanglan kining pagaubanan og pagsabot nga itugyan ra sa atong Langitnong Amahan ang daghang mga desisyon diha sa atong personal nga mga pagpili. Ang personal nga paghimo og desisyon maoy usa sa mga tinubdan sa paglambo nga gituyo nga atong masinati sa mortalidad. Ang mga tawo nga mosulay sa pagtugyan sa tanang paghimo og desisyon ngadto sa Ginoo ug mangamuyo alang sa pagpadayag sa matag pagpili sa dili madugay makakaplag og mga kahimtang diin mag-ampo sila alang sa giya apan dili makadawat niini. Pananglitan, malagmit nga mahitabo kini niadtong daghan nga mga sirkumstansiya diin ang mga pagpili dili kaayo importante o ang bisan hain nga kapilian madawat ra.
“Kinahanglang tun-an nato diha sa atong mga hunahuna ang mga butang, gamiton ang mga gahom sa pangatarongan nga gibutang sulod kanato sa atong Tiglalang. Dayon kinahanglan kitang mag-ampo alang sa giya ug lihokon kini kon madawat nato kini. Kon dili kita makadawat og giya, kinahanglan molihok kita sumala sa atong labing maayo nga paghukom. Ang mga tawo nga magpadayon sa pagpangita og giya pinaagi sa pagpadayag mahitungod sa mga hilisgotan nga ang Ginoo wala mopili sa pagmando kanato mahimong mohimo-himo og tubag gikan sa ilang kaugalingong pantasya o hilig, o mahimo ganing makadawat sila og tubag pinaagi sa sayop nga pagpadayag” (“Our Strengths Can Become Our Downfall,” Ensign, Okt. 1994, 13–14).
Pagtuon sa Kasulatan
Ang pagsalig sa Espiritu mahinungdanon kaayo nga ang Ginoo nagpasidaan kanato nga dili ilimod o ibaliwala ang Espiritu. Unsay makat-onan nimo gikan sa mosunod nga mga tudling sa kasulatan?
Mga Ideya sa Pagtuon ug Paggamit
Personal nga Pagtuon
-
Bahina ang usa ka pahina ngadto sa duha ka kolum. Hinganli ang usa ka kolum og “Unsay Gibuhat sa Ginoo” ug ang usa ka kolum “Unsay Gibuhat ni Lehi o ni Nephi.” Basaha ang estorya mahitungod sa Liahona ug sa nabali nga gapasan sa pana (1 Nephi 16:9–31) o ang istorya mahitungod ni Nephi nga naghimo og barko (1 Nephi 17:7–16; 18:1–6). Ilista ang mga panghitabo sa estorya diha sa tukma nga mga kolum. Hunahunaa unsay matudlo sa mao nga estorya kanimo kabahin sa kinaiya sa inspirasyon.
-
Siksika ang imong journal ug pangita og mga higayon sa dihang ikaw nagiyahan sa Espiritu o nakasinati og gasa sa Espiritu. Hunahunaa kon kanus-a, asa, ug ngano nga nahitabo kini nga mga kasinatian. Sa unsang paagi napakita ang impluwensya sa Ginoo? Unsay imong gibati? Ang paghinumdom niini nga mga kasinatian makatabang kanimo nga makaila sa Espiritu.
-
Tun-i ang Alma 33:1–12 ug Alma 34:17–31. Unsa nga mga pangutana ang gitubag ni Alma ug ni Amulek? (Rebyoha ang Alma 33:1–2.) Giunsa nila pagtubag kini nga mga pangutana? Unsa nga mga kasegurohan ang ilang gihatag?
-
Ang Ginoo misaad nga ang Espiritu mogiya kanato sa daghang mahinungdanon nga mga paagi. Sa imong pagbasa sa mosunod nga mga tudling, ilha ang mga aspeto sa imong trabaho nga nagkinahanglan sa giya sa Espiritu. Unsay gipasabot sa mga baroganan nga anaa sa mosunod nga mga kasulatan alang sa imong personal nga pagtuon ug pagtuon uban sa kompanyon? alang sa mga miting sa konseho sa district, mga komperensiya sa zone, mga tulumanon sa bunyag, ug uban pa nga mga miting?
Pag-ampo
Pagpahigayon og mga miting
Pagtuon uban sa Kompanyon ug Panagbaylo sa Kompanyon
-
Paghisgot kabahin sa mga pag-ampo nga inyong gihatag isip mga managkompanyon. Giniyahan ba kini sa Espiritu Santo? Sa unsang paagi kamo nakadawat og mga tubag sa inyong mga pag-ampo isip managkompanyon? Kon kamo mag-ampo isip managkompanyon, kamo ba:
-
Motuo nga ang Dios mohatag kaninyo sa unsay inyong gipangayo diha sa pagkamatarong ug sumala sa Iyang kabubut-on?
-
Moila ug mopasalamat alang sa mga tubag sa inyong mga pag-ampo?
-
Mag-ampo alang sa mga tawo pinaagi sa ngalan ug mokonsiderar sa ilang mga panginahanglan?
-
Mag-ampo alang sa usag usa ug alang sa Espiritu sa paggiya kaninyo?
-
Moila sa mga tubag sa inyong mga pag-ampo?
-
Mag-ampo uban sa usa ka pasalig sa pagbuhat sa mga pag-aghat nga inyong madawat?
-
-
Hisgoti kon unsaon ninyo sa pagtinguha sa Espiritu sa mas makugihon nga paagi.
-
Hisgoti ang lainlaing mga paagi nga ang mga tawo mohulagway sa impluwensya sa Espiritu Santo. Pagtipig og rekord diha sa inyong journal sa pagtuon bahin sa mga komentaryo nga gisulti niadtong inyong gitudloan mahitungod sa ilang mga kasinatian uban sa Espiritu. Unsaon ninyo pagtabang sa uban nga makaila niining sagrado nga impluwensya?
Konseho sa District, mga Komperensiya sa Zone, ug Konseho sa Pagpangulo sa Misyon
-
Kon tukma, hangyoa ang mga misyonaryo nga mopakigbahin og usa ka estorya o kasinatian nga ilang nadunggan diha sa usa ka bag-ohay nga miting sa pagpamatuod [testimony meeting], kasinatian sa pagtudlo, o sa uban pa nga mga sitwasyon. Ang espirituwal nga mga estorya ug mga kasinatian nga gisulti sa ubang mga tawo makatabang kanimo sa pagpalambo og hugot nga pagtuo ug makaila nga ang impluwensya sa Espiritu halapad ug kanunay gayod nga makita.
-
Hangyoa ang mga misyonaryo sa paghatag og mga pakigpulong mahitungod sa misyon ug gahom sa Espiritu Santo.
-
Hisgoti kon sa unsang paagi nga ang pagpahayag og pasalamat makatabang kaninyo nga makakita sa gagmay apan mahinungdanon kaayo nga mga paagi diin ang Ginoo nagpanalangin kaninyo (tan-awa sa Ether 3:5; Doktrina ug mga Pakigsaad 59:21). Hisgoti ang mga paagi sa pagpahayag og pasalamat.
-
Ikonsiderar ang paghangyo sa usa ka bag-o nga miyembro sa pag-estorya mahitungod kon sa unsang paagi siya naimpluwensya sa Espiritu sa dihang nagkat-on mahitungod sa Simbahan. Hangyoa ang tawo sa pagpakigbahin lamang og mga kasinatian nga gibati niya nga tukma.
Mga Lider sa Misyon ug Mga Magtatambag sa Misyon
-
Mahimong hangyoon ninyo ang mga misyonaryo sa paglakip og tukma nga espirituhanon nga mga kasinatian diha sa ilang sinemana nga sulat kaninyo.
-
Sa mga interbiyo o sa mga panag-estoryahanay, pangutan-a ang mga misyonaryo usahay kabahin sa ilang mga pag-ampo sa buntag ug sa gabii. Kon gikinahanglan, pakigtambag uban kanila mahitungod kon unsaon sa paghimo sa ilang mga pag-ampo nga mas makahuloganon.
-
Pangutan-a ang mga misyonaryo kon giunsa nila pagtabang niadtong ilang gitudloan nga makabati ug makaila sa Espiritu.