“Kapitulo 3: Magtuon ug Motudlo sa Ebanghelyo ni Jesukristo,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Magtuon ug Motudlo sa Ebanghelyo ni Jesukristo,” Isangyaw ang Akong Ebanghelyo
Kapitulo 3
Magtuon ug Motudlo sa Ebanghelyo ni Jesukristo
Ang mga leksiyon dinhi niini nga kapitulo naglangkob sa gikinahanglan nga doktrina, mga baroganan, ug mga sugo sa ebanghelyo ni Jesukristo. Kini nga mga leksiyon mao ang gisugo sa buhi nga mga propeta ug apostoles nga imong kat-onan ug itudlo. Gihatag kini dinhi aron makatabang ka sa uban nga klarong makasabot sa doktrina ni Kristo.
Ang unang seksiyon niini nga kapitulo mao ang imbitasyon sa bunyag. Ang nahibilin sa kapitulo naglangkob sa mosunod nga upat ka leksiyon:
Tun-i ang mga kasulatan ug hatagi og bili ang doktrina sa matag leksiyon. Kon imong buhaton, ang Espiritu magpamatuod sa mga kamatuoran nga imong gitun-an. Siya motabang nimo nga mahibalo kon unsa ang isulti ug buhaton aron sa pagtabang sa uban nga makadawat og saksi sa kamatuoran. (Tan-awa sa Doktrina ug mga Pakigsaad 84:85.)
Ang mga tawo mas hingpit nga makaila sa Manluluwas samtang buhaton nila ang unsay Iyang giimbitar nga buhaton nila. Ipadangat ang mga imbitasyon sa matag leksiyon, ug tabangi ang mga tawo nga motuman sa ilang mga pasalig. Samtang ang mga tawo motuman sa ilang mga pasalig, magsugod sila sa pagsunod sa ebanghelyo ni Jesukristo ug mangandam aron mohimo og mga pakigsaad sa Dios.
Itudlo ang tanang leksiyon sa dili pa ug human sa bunyag. Ang full-time nga mga misyonaryo ang mangulo sa pagtudlo sa mga leksiyon sa parehong mga higayon. Ang mga misyonaryo sa ward o ubang mga miyembro moapil kon mahimo. Tan-awa sa kapitulo 10 ug 13 alang sa impormasyon mahitungod sa paglakip sa mga miyembro sa pagtudlo.
Pangandam sa Pagtudlo
Samtang mangandam kamo sa pagtudlo, rebyoha ang impormasyon alang sa matag tawo diha sa Isangyaw ang Akong Ebanghelyo nga app. Paghimo og plano sa leksiyon base sa mga panginahanglan sa tawo. Ikonsiderar kon unsa ang kinahanglan niyang mahibaloan ug mabati atol sa inyong pagbisita sa pagtudlo. Ang Espiritu mopadako sa inyong mga paningkamot samtang mogahin kamo og panahon sa pag-andam ug pagplano.
Ania ang pipila ka pangutana nga mainampoon nga ikonsiderar nimo ug sa imong kompanyon samtang mangandam kamo sa pagtudlo.
-
Unsa nga imbitasyon ang among ipadangat aron sa pagtabang sa tawo nga mopalambo og hugot nga pagtuo ni Kristo ug mohimo og pag-uswag? Ang mga imbitasyon mao ang paagi nga kamo motabang sa mga tawo nga maghinulsol ug makasinati “sa gahom sa Manunubos” (Helaman 5:11). Ikonsiderar ang pag-uswag, sitwasyon, ug mga panginahanglan sa tawo. Dayon paglakip og usa o dugang pa nga mga imbitasyon diha sa inyong plano sa leksiyon.
-
Unsa nga doktrina ug mga baroganan ang motabang sa tawo nga motuman sa pasalig nga atong giimbitar nga iyang buhaton? Mainampoon nga motino kon unsa nga doktrina ug mga baroganan ang motabang sa mga tawo nga makasabot kon nganong ang pagtuman sa ilang pasalig importante alang kanila ug sa Ginoo.
-
Unsaon nato sa pagtabang sa tawo nga makat-on sa doktrina? Aron sa pag-andam sa pagtudlo sa doktrina, iorganisar ug i-summarize ang unsay inyong itudlo gamit ang mga leksiyon 1–4. Ilha ang mga pangutana, mga kasulatan, mga ehemplo, ug tukma nga media nga motabang sa tawo nga makasabot sa unsay inyong itudlo. Tan-awa sa kapitulo 10 alang sa impormasyon mahitungod kon unsaon sa pagpalambo sa inyong pagtudlo.
-
Unsa nga mga panalangin ang gisaad sa Dios alang sa pagdawat ug pagtuman sa mga pasalig? Samtang kamo magtuon sa doktrina, ilha ang gisaad nga mga panalangin sa Dios. Samtang kamo magtudlo, pagsaad og mga panalangin ug mohatag og pagpamatuod bahin niini.
-
Kinsa nga mga miyembro ang makaapil? Diha sa sinemana nga miting sa pakigsabot, tinoa kon kinsa nga mga miyembro ang makatabang ninyo sa pagtudlo ug pagsuporta sa tawo. Sa dili pa ang leksiyon, hisgoti ang ilang partisipasyon. Tan-awa sa kapitulo 10.
-
Unsa ang atong mahimo sa pagtabang sa mga tawo sa pagtuman sa ilang mga pasalig human nga kita mobiya? Pag-follow up pinaagi sa paghimo og kadiyot nga inadlaw nga pagkontak aron sa pagtabang sa mga tawo sa pagtuman sa ilang mga pasalig. Pangita og mga paagi sa paglakip sa mga miyembro sa pagtabang niadtong inyong gitudloan sa pagtuman sa ilang mga pasalig. Kini nga pagkontak mahimong maglakip sa pagbasa og kapitulo gikan sa Basahon ni Mormon o sa ubang mga kasulatan. Kon ang usa ka tawo wala magtuman sa kanhi nga pasalig, mas maayo nga motabang niana sa dili pa mopadangat og laing pasalig. Tan-awa sa kapitulo 11.
-
Unsaon nato nga mas makatabang nila sa sunod higayon? Human sa matag sitwasyon sa pagtudlo, timbang-timbanga ang kasinatian sa mga tawo nga inyong gitudloan. Nagtubo ba ang ilang hugot nga pagtuo kang Kristo? Gibati ba nila ang Espiritu? Sila ba naghinulsol ug naghimo ug nagtuman sa mga pasalig? Sila ba nag-ampo, nagtuon sa Basahon ni Mormon, ug nagsimba? Paghimo og mga plano sa pagtabang kanila.
Pagtudlo gikan sa Inyong Kasingkasing ingon nga Gigiyahan sa Espiritu
Namulong sa tanang elder ug mga sister, ang Unang Kapangulohan ug ang Korum sa Napulog Duha ka Apostoles miingon:
“Ang atong tuyo mao ang pagtudlo sa mensahe sa gipahiuli nga ebanghelyo sa ingon nga paagi nga matugotan ang Espiritu nga mogiya sa mga misyonaryo ug niadtong gitudloan. Mahinungdanon nga makat-onan ang mga konsepto sa [mga leksiyon], apan kinahanglan nga kini dili itudlo pinaagi sa gimemorya nga pagpresentar. Ang misyonaryo kinahanglan mobati nga mahimo rang mogamit sa iyang kaugalingong mga pulong segun sa giaghat sa Espiritu. Kinahanglan dili siya mohatag og gimemorya nga pagsaysay, kondili mosulti mismo gikan sa iyang kasingkasing sa iyang kaugalingong mga pulong. Mahimong dili niya sundon ang pagkasunod-sunod sa mga leksiyon, maghatag nianang unsay gidasig kaniya nga iyang buhaton, sumala sa mga hilig ug mga panginahanglan sa [tawo]. Magsulti gikan sa iya mismong kombiksiyon ug sa iyang kaugalingon nga mga pulong, siya kinahanglan nga mopaambit og pagpamatuod sa katinuod sa iyang mga gipangtudlo.”
Pagtudlo ug Pag-imbitar segun sa Indibidwal nga mga Panginahanglan
Makapahiangay kamo sa pagtudlo sa mga leksiyon sa bisan unsang paagi nga makatabang sa mga tawo aron hingpit nga makapangandam alang sa bunyag ug kompirmasyon. Unsa nga leksiyon ang inyong itudlo, kanus-a kini ninyo itudlo, ug kon unsa kadugaya kini ninyo itudlo labing maayo nga matino sumala sa mga panginahanglan sa mga tawo nga inyong gitudloan ug sa direksiyon sa Espiritu. Sama pananglit, kon magtudlo sa mga tawo nga walay Kristiyanong kagikan, mahimo kamong magsugod pinaagi sa pagtabang kanila nga makapalambo og mas dako nga koneksiyon sa Langitnong Amahan ug pagsabot sa Iyang plano (tan-awa sa “Pagtudlo sa mga Tawo nga Walay Kristiyanong Kagikan” diha sa kapitulo 10).
Tugoti ang Espiritu nga mogiya kaninyo kon unsa nga mga imbitasyon ang ipadangat ug kon kanus-a kini ipadangat. Ang husto nga imbitasyon sa husto nga panahon makapaaghat sa mga tawo sa pagbuhat sa mga butang nga mopalig-on sa ilang hugot nga pagtuo. Kini nga mga aksiyon mahimong mosangpot sa usa ka dako nga kausaban sa kasingkasing (tan-awa sa Mosiah 5:2; Alma 5:12–14).
Pagtudlo og mga leksiyon nga yano, klaro, ug mubo. Kasagaran, ang usa ka pagbisita sa pagtudlo kinahanglang dili molabaw sa 30 minutos, ug kamo makatudlo sa usa ka tawo sa ingon ka dali sama sa 5 minutos.
Kamo kasagaran magkinahanglan og daghan nga mga miting sa pagtudlo sa mga baroganan sa usa ka leksiyon. Ang mga tawo kasagaran mas makasabot sa inyong mensahe kon kamo motudlo og mubo nga mga leksiyon, makanunayon nga motudlo, ug motudlo og gagmay nga mga bahin sa materyal.
Pagtuon sa Kasulatan
Unsa man ang gisugo nga inyong itudlo?
Nganong importante man nga magtuon sa doktrina diha sa mga leksiyon?