Kapitulo 3

Ang Imbitasyon nga Magpabunyag ug Magpakompirma

Sukaranan nga Doktrina

Kitang tanan anak sa Langitnong Amahan. Kita mianhi sa yuta aron makabaton sa oportunidad nga magkat-on, molambo, ug mahimong mas sama Kaniya aron makabalik kita ngadto sa Iyang presensiya (tan-awa sa Moises 1:39). Dili kita mahimong sama Kaniya o makabalik ngadto Kaniya kon walay balaanon nga tabang. Ang atong Langitnong Amahan mipadala sa Iyang Anak, si Jesukristo, aron sa pag-ula alang kanato ug sa pagbugto sa mga higot sa kamatayon (tan-awa sa 3 Nephi 27:13–22).

Makagamit kita sa matubsanong gahom ni Kristo pinaagi sa pagpakita og hugot nga pagtuo diha Kaniya nga mosangpot sa paghinulsol, pagpabunyag, pagdawat sa gasa sa Espiritu Santo pinaagi sa kompirmasyon, ug paglahutay hangtod sa kataposan. Ang pagtuman sa pakigsaad sa bunyag mao ang unang lakang sa pagbugkos sa atong kaugalingon ngadto sa Dios aron ang Espiritu Santo makalimpyo, makalig-on, ug makausab sa atong kinaiya alang sa mas maayo. Ang pagsinati niining makalimpyo nga impluwensya mao ang gitawag nga espirituwal nga pagkatawo pag-usab. (Tan-awa sa 2 Nephi 31:7, 13–14, 20–21; Mosiah 5:1–7; 18; 27:24; 3 Nephi 27:20; Juan 3:5.)

Ang espirituwal nga pagkatawo pag-usab nagsugod sa dihang kita nabunyagan pinaagi sa tubig ug sa Espiritu. Ang bunyag usa ka malipayon ug malaomon nga ordinansa. Kon kita mabunyagan uban sa usa ka masulub-on nga kasingkasing ug mahinulsolon nga espiritu, makasugod kita og bag-o nga kinabuhi uban ang makapatunhay nga gahom sa Dios. Human kita mabunyagan ug makompirmahan, kita makapadayon nga malig-on pinaagi sa takos nga pag-ambit sa sakramento. (Tan-awa sa 2 Nephi 31:13; Mosiah 18:7–16; Moroni 6:2; Doktrina ug mga Pakigsaad 20:37.)

Pagpadangat sa Imbitasyon

Ingon nga gibati ninyo nga gigiyahan sa Espiritu, imbitara ang mga tawo nga magpabunyag ug magpakompirma. Mahimong mahitabo kini atol sa bisan unsa nga leksiyon.

Itudlo ang doktrina sa bunyag ug tabangi ang mga tawo nga makasabot sa doktrina ni Kristo (tan-awa sa leksiyon 3). Itudlo ang mahitungod sa importansiya ug kalipay sa pakigsaad sa bunyag, sa pagdawat og kapasayloan sa mga sala, ug sa pagdawat sa gasa sa Espiritu Santo pinaagi sa kompirmasyon.

Andama ang mga tawo alang sa imbitasyon sa bunyag pinaagi sa pagseguro nga nakasabot sila sa unsay inyong gitudlo ug sa pakigsaad nga ilang himoon. Ang pakigsaad sa bunyag mao ang mosunod:

• Mahimong andam sa pagdala kanato sa ngalan ni Jesukristo.

• Motuman sa mga sugo sa Dios.

• Moserbisyo sa Dios ug sa uban.

• Molahutay hangtod sa kataposan. (Tan-awa sa leksiyon 4.)

Mahimo ninyong ipakigbahin ang mosunod:

“Kon kita bunyagan, kita ‘[mo]saksi sa … atubangan [sa Dios] nga [kita] nakasulod ngadto sa usa ka pakigsaad uban kaniya, nga [kita] mag-alagad kaniya ug maghupot sa iyang mga sugo.’ Samtang mohimo kita niini nga pakigsaad, Siya nagsaad nga Siya ‘mobubo sa kabuhong sa iyang Espiritu [dinhi kanato] (Mosiah 18:10).”

Ang inyong imbitasyon nga magpabunyag kinahanglan nga piho ug direkta. Mahimong mosulti kamo:

“Imo bang sundon ang ehemplo ni Jesukristo pinaagi sa pagpabunyag sa usa ka tawo nga naorden sa pagpahigayon niini nga ordinansa? Tabangan ka namo nga mag-andam alang sa bunyag. Kami nagtuo nga ikaw maandam sa [petsa]. Buhaton ba nimo nga mangandam nga magpabunyag niana nga petsa?”

Sama sa bisan unsang imbitasyon nga inyong ipadangat, isaad ang talagsaon nga mga panalangin nga madawat sa mga tawo samtang dawaton nila ang imbitasyon nga magpabunyag ug motuman sa nag-uban nga mga pakigsaad. Ipakigbahin ang inyong pagpamatuod bahin niini nga mga panalangin.

Itudlo nga ang bunyag ug kompirmasyon dili mao ang kataposan nga destinasyon. Hinuon, kini usa ka punto subay sa dalan sa pagkakabig nga mas hingpit nga magdala og paglaom, kalipay, ug sa gahom sa Dios ngadto sa kinabuhi sa usa ka tawo (tan-awa sa Mosiah 27:25–26). Human ang mga tawo mabunyagan ug makompirmahan, sila makapaabot nga mahimong malimpyohan sa Espiritu samtang sila mouswag subay sa dalan sa pakigsaad.

Kon mahimo, imbitara kadtong inyong gitudloan sa pagtambong sa usa ka tulumanon sa bunyag ug sa usa ka panagtigom alang sa sakramento sa higayon nga adunay usa ka tawo nga kompirmahan.

Mga Ideya alang sa Imbitasyon nga Magpabunyag

Ikonsiderar ang pagbasa sa asoy sa kasulatan bahin ni Jesus nga gibunyagan (tan-awa sa Mateo 3:13–17). Mahimo usab ninyong ipakita ang bidyo sa Biblia nga nagpakita sa bunyag sa Manluluwas o ang bidyo sa Basahon ni Mormon bahin sa mga disipulo sa Manluluwas nga nagbunyag.

Mahimo usab ninyong basahon ang asoy ni Nephi bahin sa bunyag ni Jesus (tan-awa sa 2 Nephi 31: 4–12). Ang pagbasa sa mga asoy sa bunyag ni Jesukristo makapalig-on niadtong gitudloan.

Pagtuon sa Kasulatan

Tun-i ang mosunod nga mga kasulatan:

• 2 Nephi 31:4–12

• Moroni 6

• Doktrina ug Mga Pakigsaad 20:37; 22

• Mateo 3:13–17

Pagsulat og usa ka katingbanan sa unsay inyong nakat-onan.

Panabot sa Pagtudlo

Ang Langitnong Amahan mahimong mipanalangin sa mga tawo nga inyong nakaplagan og bililhon nga espirituwal nga pagpangandam. Ang mga lakang nga gibuhat na nila mahimong miandam kanila sa paghimo og mga pakigsaad sa Dios pinaagi sa bunyag diha sa Ang Simbahan ni Jesukristo sa mga Santos sa Ulahing mga Adlaw.