Sauniaina o Falelotu ma Isi Nofoaga o Tapuaiga

Mataupu Faavae e Taialaina Ai

A o iloiloina nofoaga o falelotu fou, e faaaoga e taitai ma le aufaigaluega a le Ekalesia ia mataupu faavae nei e taialaina ai:

1. Ola Tutoatasi—Tatou te tinou e lagolago le faatumauina o le tuputupu ae mo se taimi umi mo le Ekalesia. E tatau i eria taitasi o le Ekalesia ona i ai le sini o le mafai ona ola tutoatasi faaletino.

2. Mauagofie—Tatou te faamautinoa o aoaoga o le talalelei, punaoa, ma auaunaga e mauagofie e tagata uma. O eria ua leva ona i ai le talalelei e tatau ona lagolago i eria e itiiti ai le ola tutoatasi.

3. Tausimea ma le atamai—O i tatou o ni tausimea atamamai o punaoa paia. Tatou te iloiloina auala o le a aafia ai soifuaga o le au paia i aso uma i faaiuga fai ma le gafatiaina o le auai i le Ekalesia.

E taumafai taitai perisitua o le eria ma le lotoifale e faaaoga mataupu faavae ua faamalamalamaina i le pepa o faamatalaga O Mataupu Faavae ma Taiala mo le Fuafuaina o Falelotu a’o le’i fautuaina atu se isi avanoa faaopoopo.

Laugatasia ma Fetuunaiga

E tatau ona i ai i falelotu uma ni vaega autu e lagolago ai ia aafiaga o tapuaiga ma polokalama o le Ekalesia. E aofia ai i nei vaega ia nofoaga avanoa mo faapotopotoga lautele, aoaoga, ma gaoioiga. Tulaga i le lotoifale—e aofia ai le tetelē o iunite ma tulaga faaleautaitai—e ono manaomia ai le fetuunaiga pe a sauniaina falelotu.

O se fale e fono pe lolotu ai e mafai ona fai i se fale o se tagata o le ekalesia, se falea’oga i le lotoifale po o se nofoaga autu o le alalafaga, se nofoaga e lisi, se nofoaga e fauina pe faatauina e le Ekalesia, po o nisi filifiliga. E mafai ona avea nei vaega taitasi ma ni tali mo se taimi umi mo iunite o soo se telē, pe a faamaoniaina e le Au Peresitene o le Eria. O le faaaogaina o tekinolosi, e pei o masini otiovisio, e mafai ona faafaigofie ai se fetuunaiga faapea.

Sauniaina o Nofoaga Avanoa e Fua i Manaoga

E taumafai taitai perisitua o le eria ma le lotoifale ina ia faalauteleina ma le atamai le faaaogaina o falelotu a’o le’i talosagaina se isi avanoa faaopoopo. E tatau ona sauniaina se nofoaga avanoa pe a mae’a ona iloiloina le toatele o le auai po o le numera o iunite i totonu o le fale, faapea ai ma punaoa i fafo atu o tuaoi o le uarota po o le siteki i totonu o taimi o feoaiga na faauigaina mai e le Au Peresitene o le Eria. O le aufaigaluega i le eria, i le galulue faatasi ai ma taitai i le lotoifale, o le a faia ni fautuaga e faaaoga uma ai punaoa a le Ekalesia, ia tutoatasi mai tuaoi o siteki.

Gafatiaina

E sailia e taitai o le eria ma le lotoifale se tali e sili ona talafeagai mo le tamaoaiga, mo se taimi umi, ma faatumauina i manaoga o falelotu. E tatau ona aumai e le nofoaga avanoa fou se ata o le migao ma le mamalu, ia tauagafau, ma ia ogatasi ma le mamanu ma foliga vaaia o lona siosiomaga i le lotoifale. E tatau foi ona faaaoga ia mea faufale, ma masini, ma meaafale e maua i le lotoifale pe a talafeagai. O le faagasologa o le sauniaina ma le faagaoioiga o avanoa mo falelotu e tatau ona fesoasoani e faamalosia ai le ola tutoatasi o le Ekalesia i le eria.

Aloese Mai i Mea e Feteenai Ai

E le tatau i taitai ma le au paia i le lotoifale ona faatosinaina ni feutagaiga faapisinisi mo fale ma fanua o le Ekalesia. Mo se faataitaiga, e lē faatagaina i latou e faia ni feutagaiga mo le faatauina mai po o le lisina o fale ma fanua pe faia soo se tautinoga e faamalosia ai le faaaluina o tupe lautele a le Ekalesia. O tuusaunoaga e ao ona faamaonia i se tusi mai le ofisa o le eria po o le Matagaluega o Fale ma Fanua o Falelotu.

Fuafuaga Autu o Falelotu

Ina ia faamalolosia tagata o le Ekalesia, e saunia e eria ia fuafuaga autu mo falelotu mo se taimi umi. O nei fuafuaga e aofia ai faaiuga e faaopoopo pe toe suia (o lona uiga, o le toe aveese) o se nofoaga avanoa o se falelotu. O le fuafuaga autu mo falelotu mo se taimi umi e lagolagoina le fuafuaga a le eria e faamalolosia aiga, tagata o le ekalesia, ma iunite e ala i le sauniaina o falelotu i se ala faigofie ma taugofie. E faia lenei mea i le faaaogaina ma le atamai o punaoa, ma le iloiloina o le aafiaga o faaiuga mo falelotu i le faamalolosia o tagata o le Ekalesia, ma le sauniaina o nofoaga avanoa e talafeagai i tulaga i le lotoifale.

I lalo o le taitaiga a le Au Peresitene o le Eria, le Fitugafulu Eria, le faatonu mo mataupu faaletino, ma le aufaigaluega a le eria, e tuuina atu ai ni fautuaga mo le falelotu i taitai perisitua, galulue faatasi ma i latou ia foia ni atugaluga, ma fatu se talosaga faaiu mo falelotu ina ia faaaofia ai i le fuafuaga autu. E mafai ona faia lenei mea i se fonotaga a le aufono faamaopoopo faatasi ai ma peresitene o siteki ua tofia. E ono manaomia ona tuuina atu e le au peresitene o le siteki ia faamatalaga i le Au Peresitene o le Eria, lea o le a fesoasoani ai i le faatonu o mataupu faaletino i le sauniaina ma le faafouina o se fuafuaga autu.

Mo nisi faamatalaga, e tatau i taitai perisitua ona toe iloilo le tamaitusi o Taiala o Fuafuaga Autu mo Falelotu.

Faatupeina o Fale ma Fanua mo Falelotu

O nofoaga avanoa mo falelotu e faatupeina e ala atu i le fuafuaga faaletausaga o Fale ma Fanua mo Falelotu. E auina atu e le Au Peresitene o le Eria a latou fuafuaga faaletausaga i le Komiti o Paketi ma Faatauga e ala atu i le Au Epikopo Pulefaamalumalu.

Iloiloina o le Manaomia o se Nofoaga Avanoa Fou mo Tapuaiga

O nisi o itu autu e aafia ai le fuafuaina o se falelotu i le lumanai ma isi nofoaga avanoa mo tapuaiga e aofia ai vaaiga iloga o iunite masani o le Ekalesia i le eria; o le saoasaoa ma mamanu o le tuputupu ae i taimi ua mavae; tuputupu ae faamoemoeina; vaevaega fuafuaina o iunite; ma le toatele, nofoaga, ma le faaaogaina uma o le falelotu o loo i ai.

O Mea e Filifili ai mo le Mauaina o se Avanoa Faaopoopo

O le ofisa o le eria e iloiloina nisi o filifiliga e fuafua pe filima’oti ai le auala sili ona talafeagai e faafetaia’ia ai manaoga mo se isi nofoaga avanoa e tapuai ai. O nei filifiliga e aofia ai le fesuia’iina o polokalama a iunite i le lotoifale, faaaogaina faatasi o avanoa ma isi iunite o le Ekalesia, toe fetuunaiga o nofoaga avanoa o loo i ai nei, fauina o se isi faaopoopoga i se nofoaga avanoa o loo i ai, nofoaga avanoa e lisiina, faatauina mai o se fale o loo i ai, po o le fauina o se falelotu fou.

Foai o Fanua Mautu

E filifili toto’a lava le Ekalesia i le taliaina o foai o fanua mautu. Afai e finagalo se tagata e foai mai se fanua mautu i le Ekalesia, e faafesootai e taitai perisitua i le lotoifale le ofisa o le eria. Mo i latou i le Iunaite Setete po o Kanata, e valaau i le Real Estate Services Division i le Meetinghouse Facilities Department i le 1-801-240-5685 po o le 1-800-453-3860.

E le taliaina pe tuuina atu e taitai i le lotoifale ni lisiti mo fanua mautu e foaiina mai. E tatau ona ofoina mai fanua mautu po o ni fanua uili e aunoa ma ni aiaiga faatulagaina po o ni tuutuuga i lo latou faaaogaina.

Ata Faatulagaina o le Mamanu ma le Fauga o Falelotu

Ua saunia e le aufaigaluega a le Ekalesia i le eria ni ata faatulagaina o le mamanu ma le fauga o falelotu e fetaui ma tulaga ma manaoga i le lotoifale. Afai o le a fausia se falelotu fou, e filifilia se ata faatulagaina e fetaui i ai. O le ata e faataoto mai ai aiaiga faavae mo potu, vaega autu, ma masini o le a aofia ai i totonu o nei nofoaga o tapuaiga.

Faagasologa o le Galuega Faatino i le Fauga o Falelotu

Afai ua ausiaina tuutuuga uma mo le fauina o se falelotu fou ma ua faamaoniaina se poloketi o le fauina o se faleotu na fautuaina, ua tuu i luga o le fuafuaga faaletausaga, faatupeina, ma faatulagaina le taimi, ona se’e atu loa lea i le vaega o le faagasologa o le poloketi.

I le taimi e tatau ai i le faagasologa o le poloketi, e fono ai le pule o le poloketi ma le au peresitene o le siteki, i le feutagai ai ma le pule o fale ma fanua, e iloilo ma filifili le sitaili mai filifiliga o sitaili o loo maua i ata o mamanu faatulagaina. E mafai foi ona talanoaina le filifiliga o le faia o se sauniga o le suatiaina o le eleele. E tuuina atu mai lea taimi i lea taimi e le pule o fale ma fanua i le au peresitene o le siteki ni faamatalaga lata mai i le faagasologa o le galuega.

Poloketi o le Fauina o le Falelotu

A mae’a loa le vaega o le faagasologa o le poloketi, ona tauaao atu lea e le ofisa o le eria le konekarate mo le fauga. Faatasi ai ma le fesoasoani a le pule o fale ma fanua, e taita’ia e le pule o le poloketi se fonotaga a’o le’i amataina le galuega, faatasi ma taitai o le siteki ma le konekarate. O i latou e i ai i le fonotaga e iloiloina a latou matafaioi fitoitonu, faamae’a filifiliga o le sitaili ma anofale e tusa ai ma le ata faatulagaina a le eria i le lotoifale, ma toe iloilo le taimi faatulagaina o le poloketi.

Tauaaoina Atu o le Falelotu

A mae’a loa le poloketi o le fauga o le falelotu, ona “tauaao” aloaia loa lea e le pule o le poloketi le fale po o le faaopoopoga i le pule o fale ma fanua. O le pule o fale ma fanua e fuafuaina ma puleaina le faagasologa o le faamamaina atoa ma galuega faaleleia, ma faatino isi galuega uma e manaomia e saunia ai le fale mo le faaaogaina.

E taitaia e le pule o fale ma fanua se fonotaga faamasani ma faamalamalama mea uma mo taitai i le lotoifale. Na te tuuina atu ni aoaoga amata i vaega eseese o le fale i sui o le siteki ma le uarota e vaaia le fale. Na te tuuina atu ki i taitai i le lotoifale ma toe faamanatu taimi faatulagaina o le faamamaaga faapea ma le auai o tagata o le au paia i le faamamaaga o le falelotu.

Lisiina o Nofoaga Avanoa mo Falelotu

Mo lisi o falelotu fou, e feutagai taitai i le lotoifale ma le pule eria e fuafuaina fale ma fanua mo falelotu e fuafua ai le agavaa [mo se falelotu]. O le totogi o le lisi e totogi mai le paketi a le vaega faafoe o pulega o fale ma fanua.

Mo le faafouga o lisi o falelotu, e feutagai taitai i le lotoifale ma le pule o fale ma fanua, o lē o le a faatautaiina le talosaga. E mafai ona lisiina se fale lē tumau i tulaga ua lē mafai ai e uarota ona faaaogaina falelotu i le taimi o loo faagasolo ai le faafouga o se falelotu.

O le ofisa o le eria e soalaupuleina tuutuuga mo maliega uma o lisi.

Faaaogaina o Avanoa Mautotogi Lē Tumau

O fale le tumau e mafai ona faaaoga faavaitaimi ae totogi e le Ekalesia pe a le lava avanoa o i ai mo falelotu e faofale ai se gaoioiga a le siteki, e pei o konafesi a le siteki ma konafesi faarisone, faeasaite, taaloga e fai i totonu, po o gaoioiga o aganuu e tele. O isi tali, e aofia ai le fai o ni sauniga se tele po o le faaaoga o tekinolosi (e pei o faasalalauga), e tatau ona iloiloina a’o le’i faaaogaina ni falemautotogi lē tumau.

Pe a oo ina manaomia se fale lē tumau, e feutagai taitai i le lotoifale ma le pule o fale ma fanua, e faatulaga le konekarate po o le maliega e tatau ai. Ona auina atu lea e le pule o fale ma fanua le maliega ma se fomu o le “Talosaga mo le Lisiina o Fale Lē Tumau” i le ofisa o le eria. E tatau ona auina atu talosaga a’o le’i taitai oo i le taimi e manaomia ai. Pe a mulimulitaia ia nei faiga faavae, o le totogi mo falemautotogi e totogiina mai i tupe lautele a le Ekalesia.

O fale mo gaoioiga o taaloga e fai i fafo e lisiina ae totogi i tupe faaalu a le iunite i le lotoifale.

Sauniga o le Suatiaina o le Eleele

A maea ona faamaoniaina se poloketi o se fale fou, e mafai e le Au Peresitene o le Eria ona faataga se sauniga o le suatiaina o le eleele e sauniuni ai mo le fauga o le falelotu. O lenei sauniga e le faia i le Aso Sa. O le peresitene o le siteki o loo aofia ai e feutagai ma le Fitugafulu Eria mo le taitaiga.

Faapaiaina o Fale

O le faamaoniga mulimuli mo le faapaiaga e tuuina atu e le Au Peresitene o le Eria i se faamaopoopoga ma le faatonu o mataupu faaletino. E galulue le Au Peresitene o le Eria ma le peresitene o le siteki po o le misiona ma faailoa atu i ai po o ai e nafa ma le faapaiaina o le fale.

O le polokalama mo se sauniga o le faapaiaga e tatau ona ogatasi ma le faamoemoega o le faatasiga. E le tatau ona umi pe aofia ai foi ni faatinoga faamusika uumi. E tatau ona lava le taimi e tuuina atu i le taitai ua tofia e lauga ma faapaia ai le fale.

A maea le tatalo o le faapaiaga, e tatau ona i ai se viiga talafeagai po o se musika filifilia ma se tatalo puupuu e faaiu ai le sauniga.

O tatalo o le faapaiaga o fale e mafai ona pueina i le faatagaga mai le taitai pulefaamalumalu.

O falelotu e lisi e mafai ona faapaiaina pe afai e ausia tulaga uma nei:

1. O avanoa uma e lisiina, e le aofia ai vaega masani talafeagai (e pei o faitotoa ulufale, faapaologa, ma fale le ta’ua), e faaaogaina atoa lava e le Ekalesia.

2. O le lisi e mo le silia ma le tasi le tausaga.

3. E faamaonia e le Au Peresitene o le Eria le faapaiaga o le falelotu e lisi.

Afai e ausia nei tulaga ma ua faapaiaina le falelotu, e tatau ona aofia i le tatalo o le faapaiaga le gagana o loo faapaiaina ai le falelotu “mo le vaitau o le lisi.”