Pakaga o Taavale i Falelotu

Taiala mo Pakaga Taavale mo le Iunaite Setete ma Kanata

O faamatalaga nei e uiga i le faaaogaaga o pakaga taavale, pakaga mauagofie mo i latou e i ai manaoga faapitoa, ma kalone lapisi e mo taitai i le Iunaite Setete ma Kanata. E ono aoga foi mo i latou i isi eria. Peitai, iloilo tulafono ma manaoga i le lotoifale, ma feutagai ma le tou pule o fale ma fanua i le lotoifale mo se talosaga talafeagai.

Faaaogaaga o Pakaga Taavale

E faaopoopo atu i taiala o loo maua i le 35.5.8 o le Tusitaulima Aoao, ia manatua o le faaaogaaga faatasi o pakaga taavale a le Ekalesia ma isi faalapotopotoga po o tagata taitoatasi e mafai ona aliali atu ai le Ekalesia i tulaga lamatia, noataga tautupe, ma le faateleina o tau mo le tausiga. E mafai ona fatuina ai ni aafiaga le lelei i mea tau fale ma ono aveesea ai le tuusaunoaga i lafoga o fanua. E oo foi i le faaaogaaga o pakaga taavale mo gaoioiga su’e tupe a le autalavou (e faalagolago se vaega i luga o le natura o le gaoioiga), e mafai ona oo atu ai i taunuuga o lafoga o fanua ma tupe maua.

Soo se tuusaunoaga i tulafono e ao ona faamaopoopoina faatasi ma le tou pule o fale ma fanua i le lotoifale ma ia faamaoniaina e le faatonu o mataupu faaletino. O tuusaunoaga e tatau ona aoga i le Ekalesia (e pei o le aloese mai feteenaiga i le faaaogaina e le Ekalesia), aloese mai le aafiaga i le tulafono, ma maua faamaoniga uma e tatau ai a’o lei tuuina atu le faatagaga e faaaoga ai.

E faaopoopo atu i pakaga taavale, o faataitaiga o meatotino e faaaoga faatasi e manaomia le faatagaga e aofia ai le mafai ona faaaoga fanua o le Ekalesia, pa, aia faatapulaa e faaaoga ai, faafitauli i tuaoi, ma maliega i le aia e sopo atu i fanua o le Ekalesia.

Pakaga Atofaina mo Tagata e i Ai Manaoga Faapitoa

O se vaega o avanoa mo paka mo tagata e i ai manaoga faapitoa, e pei ona manaomia ai e le tulafono i le lotoifale, ua makaina o se tulaga faatonuina. Ae peitai, e mafai e epikopo po o taitai o le siteki ona talosaga atu i le pule o fale ma fanua e maka nisi avanoa faaopoopo mo tagata e i ai manaoga faapitoa pe a manaomia.

Mo fonotaga o faatasiga toatele, e pei o se konafesi a le siteki, e faamautinoa e taitai i le lotoifale ma (e oo foi i se tulaga le tumau) e atofa ai lava ni avanoa mo pakaga mo tagata e i ai manaoga faapitoa. E faamaopoopo foi e epikopo ma isi uarota pe afai e masani ona latou fesopoai i le faaaogaina o le fale ma ona pakaga taavale. Mo se faataitaiga, atonu e le lava ni paka e maua e se tasi uarota ona ua faaaoga e se uarota o muamua ia avanoa o paka mo tagata e i ai manaoga faapitoa.

E aoao foi e epikopo ma faamanatu atu i tagata o le au paia e uiga i le faaaogaaga sa’o o paka mo tagata e i ai manaoga faapitoa. Mo se faataitaiga, o le paka i se avanoa e le’o makaina ae ua pipii tele atu i se avanoa e paka ai tagata e i ai manaoga faapitoa e le mafai ai ona faaaogaina le avanoa o le paka mo tagata e i ai manaoga faapitoa. E oo lava foi ia i latou o e e i ai kata po o pemita talafeagai e manaomia ona tuu faakilia ia avanoa e mafai ona faaaoga e veni mo isi o e e i ai taavale e i ai lifi po o e e manaomia le avanoa faaopoopo mo le alu i totonu ma le sau i fafo.

Mo nisi faamatalaga mai le Ekalesia, asiasi i le uepisaite Disabilities .

Kalone Lapisi ma Paelo Lapisi

O kalone lapisi ma paelo lapisi e mo na’o le faaaogaina e le Ekalesia. E mafai ona faatapulaaina le faaaogaaga e ala i pa, loka, ma isi faiga, pe a talafeagai ai.