O le Fuafuaga Autu e Lagolagoina le Taitaiga a le Au Peresitene o le Eria

O le taitaiga a le Au Peresitene o le Eria e fesoasoani i taitai perisitua e taulai atu i taumafaiga mo le faamalolosia o aiga, tagata o le ekalesia, ma iunite. O loo talanoaina ai ni mea patino e galulue faatasi ai taitai i se auala autasi e fausia ai le malo o le Atua i le lalolagi.

O le fuafuaga autu mo falelotu mo se taimi umi e lagolagoina le taitaiga a le Au Peresitene o le Eria e faamalolosia aiga, tagata o le ekalesia, ma iunite e ala i le sauniaina o falelotu i se ala faigofie ma gafatia e faaaoga ai ma le atamai punaoa, ma manatulia ai le aafiaga o faaiuga mo falelotu i le faamalolosia o tagata o le Ekalesia, ma le sauniaina o nofoaga e talafeagai mo tulaga i le lotoifale. O loo faamamafaina lenei mea i le Tusitaulima Aoao faatonuga:

E saunia e le Ekalesia ia falelotu ina ia mafai ai e i latou uma e ulufale mai ona:

• Osia ma faafou feagaiga e ala i sauniga paia (tagai i le Mataupu Faavae ma Feagaiga 20:75; 59:9–12).

• Potopoto faatasi (tagai i le 3 Nifae 18:22–23).

• Tapuai ma tatalo faatasi (tagai i le Mosaea 18:25; Moronae 6:9).

• Aoao atu ma auauna atu le tasi i le isi (tagai i le Moronae 6:4–5).

• Auai i isi faaaogaaga ua faamaonia e pei ona faamatalaina i lenei mataupu.

Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 35.1, ChurchofJesusChrist.org

“Ina ia mafai ona faamalosia le Ekalesia, e saunia e eria ia fuafuaga autu mo se taimi umi a o le’i faia ni faaiuga e faaopoopo pe toe faatulaga se falelotu. … O itu moni taua i nei fuafuaga e aofia ai le faaaogaina o avanoa o loo i ai, o le tuputupu ae valoiaina, fuafuaga mamao o tulaga o fale, suiga i tuaoi o iunite, ma le gafataulimaina. O manaoga ma fuafuaga o falelotu e iloiloina i le tulaga faale-eria ma aufono faamaopoopo” (“O Mataupu Faavae ma Taiala mo le Sauniaina o Falelotu” [na tuuina atu faatasi ma le tusi a le Au Epikopo Pulefaamalumalu, 5 Iuni, 2015], 2–3).