2

Organisasyon ug mga Kalihokan sa Misyonaryo

2.0

Pasiuna

Ang Ginoo nag-ingon, “Kamo motukod sa inyong mga kaugalingon ug motudlo sa matag tawo [ug sa babaye] sa [iyang] pagkatinugyanan” (Doktrina ug mga Pakigsaad 104:11). Kini nga seksiyon niining tamdanan nga basahon maghulagway sa organisasyon sa misyon ug magpasabot kon unsaon nimo nga sa labing maayo makatambayayong ug makauban ang usa ka kompanyon, makaapil sa mga kalihokan sa misyon, makaplano sa inadlaw-adlaw nga mga iskedyul, ug makaserbisyo sa uban nga dunay putli nga gugma ni Kristo (tan-awa sa Moroni 7:44–47).

Alang sa katin-awan, kini nga mga sumbanan naggamit sa termino nga mga batan-ong lider nga misyonaryo ang gipasabot kadtong mga misyonaryo nga adunay mga buluhaton sa pagkalider, sama sa senior nga mga kompanyon, mga lider sa pagbansay sa sister, ug mga lider sa zone. Ang mga lider sa misyon nagpasabot sa imong presidente sa misyon, kinsa naghupot sa mga yawe sa pagkapari, ug ang iyang asawa.

Kini nga mga sumbanan naggamit usab og mga termino nga bishop, presidente sa stake, ward, ug stake. Gamita ang may kalabotan nga mga lagda kon tukma ngadto sa mga presidente sa branch, mga presidente sa district, mga branch, ug mga sakop nga mga district.

2.1

Pagpangulo sa Misyon

Ang imong labing importanting responsibilidad, dili igsapayan sa bisan unsang buluhaton sa pagkapangulo, mao ang pagkamatinud-anon ug pagkamapahinunguron nga misyonaryo. Kini nga tambag gikan sa Ginoo nga narekord diha sa Doktrina ug mga Pakigsaad magamit usab diha nimo: “Ang butang nga labing bililhon nganha kanimo mao ang pagpahayag og paghinulsol ngadto niini nga mga [henerasyon], nga ikaw unta makadala og mga kalag ngari kanako” (Doktrina ug mga Pakigsaad 15:6).

2.1.1

Mga Lider sa Misyon: Imong Presidente sa Misyon ug ang Iyang Asawa

Ang imong presidente sa misyon ug ang iyang asawa, kinsa nagserbisyo isip imong mga lider sa misyon, gitawag sa Ginoo ug gi-set apart aron mangulo sa misyon. Silang duha nahigugma ug nagserbisyo kanimo, motabang kanimo sa pagtuman sa imong katuyoan isip usa ka misyonaryo, ug motabang kanimo nga magpabilin nga luwas ug malipayon.

Ang imong mga lider sa misyon nagtinabangay sa daghang mga responsibilidad alang sa misyon. Magtambayayong sila aron sa pagsuporta ug pagdasig nimo, maminaw sa imong mga kabalaka, motubag sa mga pangutana, motimbang-timbang sa kauswagan, ug mohatag og tambag. Tungod kay ang imong presidente sa misyon naghupot og piho nga mga yawe sa pagkapari, naglihok siya isip usa ka komon nga maghuhukom diha sa misyon. Ang sekswal nga kalapasan ug ubang seryoso nga mga sala kinahanglan ikompisal ngadto sa imong presidente sa misyon (tan-awa sa Mosiah 26:29–30). Magmatinuoron sa hingpit ngadto kaniya. Siya motabang kanimo sa paghinulsol (tan-awa sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili [2022], “Si Jesukristo motabang kaninyo,” 6–9).

Mahimo nimong dapiton ang asawa sa presidente sa misyon, usa ka senior nga misyonaryo, o ang imong misyonaryo nga kompanyon sa pag-apil sa bisan unsang interbiyo uban sa presidente sa misyon. Ang imong desisyon sa pagdapit og tawo sa pag-apil kanimo dili makapakunhod sa gugma, pagpakabana, o pagdayeg sa mga lider sa imong misyon alang kanimo.

2.1.2

Kapangulohan sa Misyon

Ang imong presidente sa misyon nagdumala sa misyon nga dunay mga yawe sa pagkapari. Sakop siya sa kapangulohan sa misyon uban sa duha ka magtatambag.

Ang mga magtatambag sa kapangulohan sa misyon, sama sa mga magtatambag sa kapangulohan sa stake o bishopric, motabang sa pag-organisar ug moabag diha sa buhat. Ang mga magtatambag sa kapangulohan sa misyon wala gitahasan kabahin sa katakos sa misyonaryo.

2.1.3

Organisasyon sa Pagpangulo sa Misyon

Ang imong presidente sa misyon mogamit sa pagpadayag ug mga yawe sa pagkapari sa pag-organisar sa buhat. Iyang tahasan ang batan-ong mga misyonaryo nga mamahimong mga tigbansay, senior nga mga kompanyon, mga lider sa district, mga lider sa pagbansay sa sister, mga lider sa zone, ug mga kaabag. Ang mga kaabag, mga misyonaryo sa opisina, ug ubang mga misyonaryo dili maoy mobuhat sa paghatag og mga buluhaton sa pagkalider sa misyonaryo o modestino sa mga dapit diin ka magserbisyo. Hinoon, ang presidente sa misyon mahimong makigtambag sa iyang asawa o sa iyang mga kaabag mahitungod sa mga buluhaton sa misyonaryo.

Ang imong mga lider sa misyon ug mga kaabag, mga lider sa zone, ug mga lider sa pagbansay sa sister mao ang mga sakop sa konseho sa pagpangulo sa misyon. Kini nga mga lider magtinambagay mahitungod sa pagkab-ot sa mga panginahanglan sa mga misyonaryo ug mohimo og mga plano sa pagtabang sa kalamboan sa misyon ug sa pagpadayon sa buhat sa unahan.

2.1.4

Mga Responsibilidad sa Pagpangulo sa Batan-ong Misyonaryo

Ang mga batan-ong lider nga misyonaryo, sama sa tanang mga misyonaryo, mosunod sa tambag ni Jesukristo sa “pag-alagad sa [Dios] sa tibuok [nilang] kasingkasing, gahom, hunahuna ug kusog” ug nga “hinumdomi ang hugot nga pagtuo, hiyas, kahibalo, pagkamapugnganon, pailob, inigsoon nga pagkamabination, pagkadiosnon, gugma nga putli, pagkamapainubsanon, kakugi” (Doktrina ug mga Pakigsaad 4:2, 6). Ang mga buluhaton sa pagpangulo wala magpakita og espesyal nga pag-ila o pag-abante o pagpakita og bili sa usa ka misyonaryo.

Ang mga batan-ong lider nga misyonaryo adunay responsibilidad sa:

• Pagpangita, pagtudlo, pagbunyag, ug pagpakigdait sa mga tawo.

• Pagpakita og ehemplo sa mga sumbanan sa misyonaryo alang sa pamatasan (tan-awa sa 3.0).

• Pagbansay sa uban nga mga misyonaryo ug mangulo sa mga panagbaylo og kompanyon (tan-awa sa 2.3.1).

• Pagpakigbahin og mga impormasyon ug direksyon gikan sa konseho sa pagpangulo sa misyon uban sa mga misyonaryo nga ilang gipangulohan.

• Paghigugma ug pakighigala sa ubang mga misyonaryo. Pagtabang kanila sa pag-ila sa bili sa ilang mga paningkamot.

• Pagpaminaw sa mga kabalaka sa ubang mga misyonaryo. Paghatag og pagsuporta ug tambag.

• Pagkoriher sa ubang mga misyonaryo sa paagi nga mabination ug pribado, kon gikinahanglan, pagasundan og “dugang nga paghigugma” (tan-awa sa Doktrina ug mga Pakigsaad 121:41–43).

• Pagpakigtambayayong og maayo uban sa lokal nga mga lider ug mga miyembro.

Sama sa tanang mga misyonaryo, ang mga elder ug mga sister nga dunay mga buluhaton sa pagpangulo kinahanglang mobuhat sa Kristohanong pagpangulo. Kon ang gawi sa bisan kinsang misyonaryo, lakip sa mga batan-ong lider nga misyonaryo, ingon og wala mahiuyon sa mga sugo ug mga sumbanan sa misyonaryo, hisgoti ang isyu uban niana nga misyonaryo. Kon ang isyu wala maresolba, ipakigbahin ang imong mga kabalaka ngadto sa imong mga batan-ong lider nga misyonaryo o sa presidente sa misyon ug dili sa ubang mga misyonaryo, mga miyembro, o mga higala.

Alang sa dugang nga impormasyon mahitungod sa piho nga mga buluhaton ug mga reponsibilidad sa mga batan-ong lider nga misyonaryo (mga tigbansay, senior nga mga kompanyon, mga lider sa district, mga lider sa pagbansay sa sister, mga lider sa zone, ug mga kaabag ngadto sa presidente), tan-awa sa seksiyon 7.1, “Mga Responsibilidad sa Pagpangulo sa Batan-ong Misyonaryo.”

2.1.5

Personal nga mga Responsibilidad

“[Mag]palambo sa [imong] buluhaton ngadto sa Ginoo” (Jacob 1:19), mahimong makabarog pinaagi sa kinaugalingong paningkamot sa espirituhanong paagi, ug “molihok sa [imong kaugalingon]” (2 Nephi 2:16) pinaagi sa pagsalig sa Ginoo ug sa pagsunod sa Espiritu. Kon ikaw adunay mga pangutana o mga kabalaka:

• Gamita ang pagtulon-an sa “[p]agtuon niini diha sa imong hunahuna; unya … mangutana kanako kon kini husto” (Doktrina ug mga Pakigsaad 9:8).

• Tinguhaa ang giya pinaagi sa personal nga pagpadayag; pag-ampo; ug pagtuon sa mga kasulatan (ilabi na sa Basahon ni Mormon), Isangyaw ang Akong Ebanghelyo, ang mga pagtulon-an sa buhi nga mga propeta, ug kini nga mga sumbanan.

Kon nagkinahanglan ka og dugang nga tabang human sa paggamit niining mga baroganan, pangutana sa imong kompanyon o sa mga batan-ong lider nga misyonaryo. Kasagaran, makatabang sila nimo sa pagpangita og mga tubag sa imong mga pangutana ug sa pagsulbad sa imong mga kabalaka. Kon dili, magpatabang sa imong mga lider sa misyon, sa imong mga ginikanan, o sa mga lider sa pagkapari kon asa ka gikan. Palihog ayaw pagkontak sa punoang buhatan sa Simbahan. Kon buhaton na nimo, ibalik ka ngadto sa imong presidente sa misyon.

Pakig-istorya sa imong presidente sa misyon mahitungod sa mga isyu sa katakos. Pakig-istorya bisan hain sa imong mga lider sa misyon mahitungod sa dinalian nga mga kabalaka sa seguridad, apil ang pagpang-atake o pagpang-abuso, o ubang mga isyu nga dili masulbad sa uban nga mga misyonaryo.

Mahimong dunay mga panahon atol sa imong misyon nga magkalisod ka nga matutokan ang imong trabaho tungod sa kasamtangan nga mga hagit, personal man o mga butang kalabot sa pamilya, o gani sa nanglabay na nga mga kasinatian. Masabtan ra kana. Ayaw pagduhaduha sa pagpakigbahin sa imong mga kabalaka ngadto sa imong kompanyon, sa mga batan-ong lider nga misyonaryo, o bisan hain sa imong mga lider sa misyon ug magpakitabang aron masuportahan.

Hinumdomi ang imbitasyon sa Manluluwas: “Paghunahuna ngari kanako sa matag hunahuna; ayaw pagduha-duha, ayaw kahadlok. Hunahunaa ang mga samad nga milapos sa akong kilid, ug usab ang mga marka sa mga lansang sa akong mga kamot ug tiil; pagmatinud-anon, paghupot sa akong mga sugo, ug kamo makapanunod sa gingharian sa langit. Amen” (Doktrina ug mga Pakigsaad 6:36–37).

2.2

Mga Kompanyon

Ang Ginoo nagtawag og mga misyonaryo aron sa pagsangyaw sa Iyang ebanghelyo nga managkompanyon. “Himoa nga sila manglakaw nga magtinagurha, ug sa ingon himoa nga sila magsangyaw diha sa agianan sa matag katigoman, magbunyag pinaagi sa tubig, ug magpandong sa mga kamot” (Doktrina ug mga Pakigsaad 52:10). Makigtrabaho ka sa lain-laing mga kompanyon sa tibuok nimo nga misyon. Mga Kompanyon:

• Makighiusa diha sa buhat ug mag-uban sa pagpamatuod bahin ni Jesukristo.

• Mosuporta sa espiritwal, emosyonal, ug pisikal nga kahimtang sa usag-usa.

• Maningkamot nga pirming luwas ang usag usa.

• May tulubagon sa usag usa sa pagtuman sa mga sumbanan sa misyonaryo.

2.2.1

Pagsuporta sa Usag Usa

Ang mga kompanyon kinahanglang motabang sa usag usa nga makat-on, molambo, ug makaugmad og Kristohanon nga mga hiyas (tan-awa sa Doktrina ug mga Pakigsaad 4 ug “Unsaon Nako Pagpalambo og mga Hiyas nga Sama kang Kristo?” diha sa Isangyaw ang Akong Ebanghelyo, kapitulo 6). Ang pagkat-on og pailob ug gugma, pagpraktis og pagpasaylo, ug ang pagdawat sa mga kalainan sa personalidad mopanalangin kanimo sa tibuok nimong kinabuhi.

Isip managkompanyon:

• Higugmaa, respetohi, ug lig-ona ang usag usa.

• Magdungan sa pagtuon sa kada adlaw ug magdungan sa pag-ampo kanunay sa tibuok adlaw.

• Pagmapainubsanon ug ilha ang mga kalig-on sa usag usa.

• Tagda ang usag usa sama sa pagtagad nga imong gusto.

• Likayi ang pagpanaway ug panagbingkil.

• Likayi ang pagsulti og negatibo mahitungod sa usag usa ngadto sa laing mga misyonaryo, mga miyembro sa Simbahan, o sa pamilya ug mga higala didto sa panimalay.

Kon makamatikod ka og bisan unsang dili maayo nga sitwasyon o linihokan, hisgoti kini uban sa imong kompanyon. Kon dili masulbad ang maong butang o kon ang imong kompanyon abusado, pagbaton og kaisog ug gugma alang sa imong kompanyon aron mohangyo og tabang sa imong presidente sa misyon (tan-awa sa 3.9.2).

2.2.2

Mag-uban Kanunay

Ang pag-uban kanunay sa imong kompanyon makatabang sa paghatag og panalipod gikan sa pisikal ug espiritwal nga mga peligro, bakak nga mga pasangil, ug sa kamingaw. Tumana kining sumbanan sa misyonaryo sa tanang panahon ug sa tanang dapit. Ayaw gayod pag-inusara.

• Kinahanglan imong makita ug madungog ang imong kompanyon sa tanang higayon gawas kon ikaw anaa sa banyo, sa usa ka interbiyo uban sa usa ka lider sa misyon, o nagpahigayon og interbiyo sa bunyag (tan-awa sa 2.3.6).

• Kinahanglan matulog kamo sa samang kwarto apan dili sa sama nga higdaanan.

• Kon maghimo og indibidwal nga mga tahas samtang anaa sa inyong pinuy-anan, gamita ang sentido komon sa pagpanalipod sa inyong mga kaugalingon ug sunda ang mga sumbanan sa misyonaryo kabahin sa pamatasan (tan-awa sa 3.0).

• Ayaw paggahin og panahon nga mag-inusara. Pananglitan, ayaw pagpuwaw o pagbangon og mas sayo kay sa imong kompanyon.

• Kon ikaw ug ang imong kompanyon magkabulag, kontaka gayod dayon ang imong presidente sa misyon.

2.2.3

Pagtrabaho diha sa Inyong Area

“[Mo]adto ug [mo]buhat uban sa [imong] mga kusog” (Jacob 5:72), ug tutoki ang imong mga paningkamot diha sa dapit nga ikaw gisangonan sa pagtudlo. Tutoki ang mga dapit diin kamo motrabaho nga mas dako ang posibilidad nga makatabang kamo sa mga tawo nga maghimo ug motuman sa mga pakigsaad. Pananglitan, tutokan ang palibot sa mga kasilinganan nga duol sa usa ka gambalay sa simbahan o sa usa ka kasilinganan diin nagpuyo ang mga mapasaligon nga mga miyembro. Hinumdomi ang saad sa Ginoo: “Kinsa kadto nga modawat kaninyo, didto atua usab Ako” (Doktrina ug mga Pakigsaad 84:88).

Mahimo kang mobiya sa dapit nga ikaw nadestino alang sa mga panagbaylo og kompanyon (tan-awa sa 2.3.1) o mga pagbalhin (tan-awa sa 2.3.2). Kon kinahanglan ka nga mobiya sa imong area tungod sa laing rason, pangayo og pagtugot gikan sa imong lider sa district aron makabiya sa imong area sulod sa imong district o gikan sa imong mga lider sa zone kon kinahanglan ka nga mobiyahe gawas sa imong district. Nagkinahanglan ka og pagtugot gikan sa imong presidente sa misyon, o sa tawo nga iyang gitahasan, aron makabiya ka sa imong zone.

Kon kinahanglan ka nga mobiya sa dapit nga ikaw nadestino tungod sa usa ka emerhensiya, sama sa natural nga kalamidad o usa ka pagpang-atake o aron mangita og dinalian nga medikal nga pagtagad, pangita usa og seguridad o medikal nga pag-atiman ug dayon kontaka ang imong presidente sa misyon o ang imong mga batan-ong lider nga misyonaryo sa labing dali kutob sa imong mahimo.

2.2.4

Pakigtambayayong sa mga Tawo nga gawas sa Imong Area

Atol sa imong misyon lagmit ikasugat nimo ang mga tawo kinsa nagpuyo gawas na sa dapit nga ikaw nadestino. Kon sila interesado sa pagkat-on mahitungod sa ebanghelyo ni Jesukristo, makahimo ka nga:

• Mopakigbahin og mensahe ngadto kanila.

• Mokonektar nila gamit ang aprobado nga social media (tan-awa sa 7.5.6).

• Mo-refer nila ngadto sa mga misyonaryo kon asa sila nagpuyo ug ipakigbahin ang impormasyon mahitungod kanila uban sa gisangonan nga mga misyonaryo (tan-awa sa 2.3.4).

• Uban sa pagtugot sa imong presidente sa misyon, gamita ang teknolohiya (tan-awa sa 7.5.4) sa pagtrabaho uban sa mga misyonaryo diin ang mga indibidwal nagpuyo aron makatabang ug makasuporta kanila. Makadapit ka usab sa imong kaugalingong pamilya ug mga higala sa pagtudlo kanila, uban sa pagtugot (tan-awa sa 3.9.5).

Kon makigtrabaho uban sa laing mga misyonaryo o mga miyembro sa sulod ug gawas sa imong area o misyon:

• Pagpakigtambag aron masayod kon unsay labing maayo sa pagtabang sa interesado nga tawo nga moduol ngadto sa Langitnong Amahan ug ni Jesukristo.

• Pagmatinahuron sa oras sa mga miyembro o sa uban nga mga misyonaryo.

• Tugoti nga ang mga misyonaryo nga nadestino ngadto sa dapit diin ang tawo nagpuyo nga maoy mangulo sa pagtudlo sa labing dali nga panahon.

2.3

Mga Kalihokan sa Misyonaryo nga Buhat

Ang mga misyonaryo moapil sa lain-laing mga kalihokan aron matuman ang sugo sa Ginoo nga “andama ang matag butang nga kinahanglanon” (Doktrina ug mga Pakigsaad 88:119) aron matuman ang Iyang buhat. Kini nga mga kalihokan naglakip sa pag-apil diha sa mga panagbaylo og kompanyon ug mga pagbalhin, pagpakigtrabaho uban sa mga miyembro, pagtubag sa mga referral, pagtudlo, pag-apil diha sa mga konseho ug mga miting, ug pagserbisyo. Ang mga elder mahimo usab nga mopahigayon og mga interbiyo alang sa bunyag isip kabahin sa ilang misyonaryo nga mga kalihokan.

2.3.1

Mga Panagbaylo og Kompanyon

Diha sa panagbaylo og kompanyon, usa ka batan-on nga lider nga misyonaryo, sama sa usa ka lider sa pagbansay sa sister o kaabag sa presidente, makigtrabaho sa laing misyonaryo. Atol sa panagbaylo ang lider motudlo, mobansay, ug magkat-on gikan sa misyonaryo. Ang lider mosunod sa tambag sa Ginoo nga makita diha sa Doktrina ug mga Pakigsaad sa pagpalig-on sa ubang mga misyonaryo “sa [ilang] tanan nga mga panagsultihanay, diha sa [ilang] tanan nga mga pag-ampo, diha sa [ilang] tanan nga mga pagdasig, ug sa [ilang] tanan nga mga buhat” (Doktrina ug mga Pakigsaad 108:7).

Ang mga batan-ong lider nga misyonaryo mao ang responsable alang sa pagplano sa mga panagbaylo uban sa mga misyonaryo nga ilang gipangulohan. Ang mga sister mopahigayon og mga panagbaylo uban sa laing mga sister, ug ang mga elder mopahigayon og mga panagbaylo sa ubang mga elder.

Sa kadaghanan sa mga misyon, ang mga batan-ong lider nga misyonaryo sa kasagaran mopahigayon og mga panagbaylo og kompanyon kausa sa matag pamalhin.

• Ang mga lider sa district mopahigayon og mga panagbaylo sa matag elder diha sa ilang district.

• Ang mga lider sa zone mopahigayon og mga panagbaylo sa matag lider sa district ug kon gikinahanglan sa ubang mga elder sa ilang zone.

• Ang mga lider sa pagbansay sa sister mopahigayon og mga panagbaylo sa matag sister diha sa zone o mga zone nga sila gidestino.

• Ang mga kaabag sa presidente mopahigayon og mga panagbaylo sa mga lider sa zone o laing mga elder sumala sa gisugo sa presidente sa misyon.

• Ang usa ka panagbaylo sa kompanyon sa kasagaran mokabat og 24 oras. Alang sa matag panagbaylo sa kompanyon, ang batan-ong lider nga misyonaryo kinahanglang:

  • Mopahigayon og mga panagbaylo og kompanyon diha sa area sa batan-ong lider nga misyonaryo. Dunay mga higayon, nga ang mga panagbaylo mahimong ipahigayon diha sa area sa misyonaryo kon gikinahanglan.

  • Planoha og una ang mga panagbaylo sa kompanyon.

  • Magtinabangay sa paghimo og mga tumong uban sa misyonaryo mahitungod sa unsay matuman atol sa panagbaylo. Apil sa tanang bahin sa misyonaryo nga buhat, lakip na sa pagpangita, pagtudlo, pagtuon sa managkompanyon, pagtuon sa pinulongan (kon gikinahanglan), kada adlaw nga pagplano, ug pagpakigdait.

  • Mobansay gamit ang mga kasulatan ug mga baroganan gikan sa Isangyaw ang Akong Ebanghelyo.

  • Ribyohon ug hisgotan ang mga tawo nga gipaningkamotan o gitudloan sa mga misyonaryo.

  • Mohatag sa misyonaryo og piho, mapuslanon nga mga opinyon alang sa paglambo [feedback], lakip na sa unsay maayong nabuhat sa misyonaryo ug sa unsang paagi nga molambo pa ang misyonaryo.

  • Andam nga modawat sa feedback gikan sa misyonaryo sa mga dapit alang sa paglambo.

  • Ribyohon ug hisgotan unsay nakat-onan sa matag misyonaryo atol sa panagbaylo sa kompanyon.

  • Mo-report kabahin sa panagbaylo sa kompanyon diha sa sinemana nga sulat ngadto sa presidente sa misyon.

2.3.2

Mga Pagbalhin

Ang opisina sa misyon maoy mohan-ay sa imong pagbiyahe atol sa usa ka pagbalhin aron nga dili ka mag-inusara. Sa pipila ka mga higayon, tungod sa distansya ug sa ubang mga konsiderasyon, ang imong presidente sa misyon mahimong mohatag og direksyon. Niining mga sitwasyon, pagmainampingon gayod, gamita ang sentido komon, ug sunda ang Espiritu.

Kon ikaw mabalhin:

• Modiretso sa pag-adto sa imong bag-o nga area aron makauban ang imong bag-o nga kompanyon.

• Ayaw kan-a o imna ang bisan unsang pagkaon nga imong napasagdan atol sa biyahe.

• Kon magbiyahe ka, siguroa nga dunay igong karga ang bateriya sa imong telepono alang sa biyahe. Kon magbiyahe ka nga mag-inusara nga mosobra sa tulo ka oras, tawag og panagsa sa opisina sa misyon.

Kon ang imong kompanyon nabalhin ug ikaw wala, pakigtrabaho sa ubang mga misyonaryo, sumala sa gitahas diha nimo sa imong mga batan-ong lider nga misyonaryo, hangtod ang imong bag-o nga kompanyon moabot.

2.3.3

Mga Oportunidad sa Pagtudlo uban sa mga Miyembro

Dapita ang mga miyembro sa pag-apil diha ninyo sa normal ug natural nga mga paagi samtang kamo mangita, magtudlo, magbunyag, ug makigdait. Awhaga ug tabangi ang mga miyembro nga higalaon ang mga tawo nga inyong gitudloan ug aron dapiton kadtong mga tawo sa pag-apil diha sa ward ug mga kalihokan sa pamilya. Hangyoa ang mga miyembro sa pagpakigbahin og may kalabotan nga personal nga mga kasinatian ug sa ilang mga pagpamatuod.

Ang mga misyonaryo kinahanglang mag-uban kanunay isip mga kompanyon. Busa, walay mga panagbaylo sa mga misyonaryo uban sa mga miyembro. Hinoon, ang mga babaye nga mga miyembro (sa labing ubos nga edad 16, apan hingkod kon gikinahanglan aron masunod ang lokal nga mga balaod) mahimong mokuyog ug motudlo sa duha o mas daghang sister nga mga misyonaryo. Ang mga lalaki nga mga miyembro (labing minos 16, apan hingkod kon gikinahanglan aron masunod ang lokal nga mga balaod) mahimong mokuyog ug motudlo sa duha o mas daghang elder nga mga misyonaryo. Ang minyo nga managtiayon mahimong mouban og tudlo sa mga sister o mga elder.

2.3.4

Mga Referral

Ang referral mao nga kon ang usa ka tawo mihangyo sa mga misyonaryo sa pagkontak kaniya.

Kon makigtrabaho sa mga tawo kinsa gi-refer diha kanimo:

• Kontaka ang mga misyonaryo, mga miyembro, o mga indibidwal kinsa mihatag sa referral, kon mahimo. Makigtambag kanila mahitungod kon unsaon sa pagtabang sa tawo.

• Sulayi sa pagkontak ang tawo kinsa gi-refer sa labing dali nga panahon, kasagaran sulod sa 24 oras.

• Paminawa ug pagkat-on kon unsaon sa pagtabang ang tawo kinsa gi-refer.

• Ihatod ang bisan unsa nga mga butang nga gihangyo.

• Itudlo ang mga panginahanglan ug mga interes sa tawo.

• Padayon sa pakigtrabaho sa mga misyonaryo, mga miyembro, o sa mga indibidwal nga mihatag og referral (tan-awa sa 2.2.4).

Alang sa dugang nga impormasyon mahitungod sa mga referral, tan-awa sa “Miyembro, Misyonaryo, ug Punoang Buhatan sa Simbahan nga mga Referral ” sa “Unsaon Nako Pagpangita og mga Tawo nga Katudloan?” diha sa Isangyaw ang Akong Ebanghelyo, kapitulo 9.

2.3.5

Mga Miting ug mga Konseho

Ang mga misyonaryo magtinambagay samtang mohatag sila ug modawat og pagbansay ug samtang sila magplano ug magsabot sa misyonaryo nga buhat. Ang mga miting ug mga konseho kinahanglang modapit sa Espiritu sa Ginoo ug kinahanglang usa kini ka panahon alang sa pagpadayag (tan-awa sa Doktrina ug mga Pakigsaad 6:32). Dugang pa, ang pagpundok isip mga misyonaryo makasangkap nimo og oportunidad sa pagpalig-on sa usag usa ug magmaya diha sa inyong mga paghago (tan-awa sa Doktrina ug mga Pakigsaad 43:8; 50:22).

Ang mga miting nga giorganisar sa misyonaryo nga mga managkompanyon, mga batan-ong lider nga misyonaryo, ug sa mga lider sa misyon maglakip sa mosunod:

• Inadlaw-adlaw ug sinemana nga mga sesyon sa pagplano

• Mga miting sa konseho sa district

• Mga komperensiya sa zone

• Mga miting sa konseho sa pagpangulo sa misyon

Ang mga miting nga giorganisar sa lokal nga mga lider naglakip sa mosunod:

• Mga miting sa misyonaryo nga panagsabot

• Mga miting sa konseho sa ward

2.3.6

Mga Interbiyo alang sa Bunyag

Kon mopahigayon og usa ka interbiyo sa bunyag, ang mga elder kinahanglan nga:

• Morebyo unsa ang giingon sa Ginoo diha sa Doktrina ug mga Pakigsaad 20:37.

• Mosunod sa giya sa Espiritu Santo.

• Mangutana sa mga pangutana sa interbiyo sa bunyag nga makita sa “Bunyag ug Pagkumpirma: Mga Pangutana ug mga Tubagnga seksiyon sa kapitulo 12 diha sa Isangyaw ang Akong Ebanghelyo.

• Mopahiangay sa mga pangutana ngadto sa edad ug kahingkod sa indibidwal.

• Mosiguro nga ang presidente sa korum sa mga elder ug ang lider sa misyon sa ward nakahibalo nang daan sa interbiyo sa bunyag.

Kon gusto sa kandidato sa bunyag, mahimo siya nga modapit sa iyang ginikanan, kapikas, o laing hingkod sa pag-apil sa interbiyo sa bunyag. Pagmabatyagon sa bation sa tawo mahitungod sa iyang kapikas o sa menor de edad nga anak nga gi-interbiyo. Sunda ang mga lagda diha sa Isangyaw ang Akong Ebanghelyo alang sa pag-interbiyo ug pagbaton og pagtugot sa pagbunyag sa mga kapikas ug menor de edad nga mga bata (tan-awa sa “Unsaon sa Pagpahigayon sa Interbiyo” sa “Unsaon Nako Pag-andam ang mga Tawo alang sa Bunyag ug Pagkompirma?” diha sa Isangyaw ang Akong Ebanghelyo, kapitulo 12).

Ang mga lider sa district mointerbiyo sa mga kandidato sa bunyag nga gitudloan sa mga misyonaryo diha sa ilang district, lakip niadtong gitudloan sa mga kaabag sa presidente, mga lider sa zone, ug mga lider sa pagbansay sa sister diha sa ilang district.

Ang mga lider sa zone mointerbiyo sa mga kandidato sa bunyag nga gitudloan sa mga lider sa district sa ilang zone.

Kon ang gitahasan nga mga lider sa district ug zone wala, ang presidente sa misyon mahimong motudlo og laing elder sa pagpahigayon sa interbiyo.

2.3.7

Mga Bunyag

Makigtambayayong sa presidente sa korum sa mga elder o sa lider sa misyon sa ward aron sa paghan-ay sa mga tulumanon sa bunyag (tan-awa sa “Ang Tulumanon sa Bunyag [Baptismal Service]” sa “Unsaon Nako Pag-andam ang mga Tawo alang sa Bunyag ug Pagkompirma?” diha sa Isangyaw ang Akong Ebanghelyo, kapitulo 12). Sugdi ang mga pagpangandam alang sa tulumanon sa bunyag sa labing dali nga panahon.

2.4

Inadlaw-adlaw nga mga Kalihokan ug Iskedyul

Planoha ang imong iskedyul aron matuman ang imong misyonaryo nga katuyoan ug matutokan ang mga panginahanglan sa uban. Hinumdomi unsa ang gisaad sa Ginoo ngadto niadtong kinsa gitawag sa pagsangyaw sa ebanghelyo: “Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” (Doktrina ug mga Pakigsaad 18:15).

2.4.1

Kasagaran nga Inadlaw-adlaw nga mga Kalihokan

Ilakip ang mosunod nga mga kalihokan sa imong inadlaw-adlaw nga iskedyul:

• Maghimo ug magrebyo sa personal, kompanyon ug sa misyon nga mga tumong.

• Magplano sa imong iskedyul alang sa adlaw.

• Mag-andam sa mga leksyon.

• Magtuon sa mga kasulatan, Isangyaw ang Akong Ebanghelyo, mga pagtulon-an sa mga propeta ug mga apostol, ug sa uban nga aprobado nga mga kapanguhaan (tan-awa sa 2.4.4).

• Magrebyo og usa ka hilisgotan sa kahimsog ug seguridad o usa sa mga pag-amping sa paggamit sa teknolohiya (tan-awa sa 4.0–4.7).

• Pagpangita og mga tawo nga tudloanan.

• Makigtambayayong sa lokal nga mga lider ug mga miyembro.

• Magserbisyo sa uban sumala sa giplano o wala giplano nga mga kalihokan.

• Mag-atiman sa personal nga mga panginahanglan, sama sa pagkaon ug pagpangandam alang sa adlaw.

2.4.2

Sampol sa Inadlaw-adlaw nga Iskedyul

Ang inadlaw-adlaw nga iskedyul alang sa imong misyon mahimong mahisama sa iskedyul sa ubos. Ang inadlaw-adlaw nga iskedyul mahimong usbon sa presidente sa misyon alang sa mga holiday, espesyal nga mga kalihokan sa inyong misyon, ug uban pa.

6:30 a.m.	Magsugod ang adlaw.
6:30–10:00 a.m.	Mag-ampo. Mag-ehersisyo (30 minutos). Maligo, mokaon og pamahaw, ug mangandam alang sa adlaw. Mohimo sa personal nga pagtuon (60 minutos). Magplano (30 minutos).
10:00 a.m.–9:00 p.m.	Mangita, magtudlo, ug moserbisyo sa uban.* Mag-update sa digital o magrekord sa papel sa tibuok adlaw. Magrebyo sa makadiyot og usa ka hilisgotan sa kahimsog o seguridad o usa sa mga pag-amping sa paggamit sa teknolohiya. Mopahigayon og pagtuon kauban ang kompanyon ug mag-andam sa mga leksyon (30 minutos). Magtuon og dugang nga mga materyal alang sa bag-ong mga misyonaryo ug mga tigbansay atol sa unang 12 ka semana diha sa natad sa misyon (30–60 minutos, kon mahimo). Kon nagkat-on og bag-o nga pinulongan, pagtuon sa pinulongan (30–60 minuots). Ikaw gidasig nga magtuon og Iningles kon ikaw dili lumad sa pinulongan. Mokaon og paniudto ug panihapon (dili mosobra sa duha ka oras kon tingbon).
9:00 p.m.	Mouli sa inyong pinuy-anan, gawas kon kamo adunay sabot sa pagtudlo; kon mao, mouli pagka 9:30 p.m.
9:00–9:30 p.m.	Magsulat sa imong journal, mag-andam sa higdaanan, ug mag-ampo.
9:30–10:30 p.m.	Matulog na.

*Ang imong inadlaw-adlaw nga mga kalihokan kinahanglan nga nakatutok diha sa pagpakig-istorya sa mga tawo. Ibahin-bahin ang imong mga kalihokan sa pagplano ug pagtuon sa tibuok adlaw aron malikayan ang paggahin og tag-as nga panahon diha sa inyong apartment. Kon itugot sa gilay-on ug sa panahon, mahimo kang mobiya ug mobalik sa inyong apartment sa tibuok adlaw aron makab-ot kining mga panginahanglan.

Ang iskedyul nga giaprobahan sa imong misyon nakahatag og panahon sa pagtrabaho, pagpahulay, ug pag-focus pag-usab. Importante kaayo nga makabaton og igong pahulay ug nutrisyon alang sa imong espiritwal, emosyonal, ug pisikal nga kaayohan.

2.4.3

Pagtakda og Tumong ug mga Sesyon sa Pagplano

Pagpahigayon og inadlaw-adlaw ug sinemana nga mga sesyon sa pagplano uban sa imong kompanyon. Hunahunaa ang mga panginahanglan niadtong inyong gitudloan ug unsaon ninyo sa pagpakigtambayayong sa mga miyembro samtang magrebyo kamo sa kauswagan, magtakda og mga tumong, ug maghimo og mga plano alang sa adlaw ug alang sa semana (tan-awa sa “Unsaon Paghimo og mga Tumong,” “Ang Sinemanang Sesyon sa Pagplano,” ug “Inadlaw nga Sesyon sa Pagplano” sa “Unsaon man Nako Paggamit ang Panahon sa Maalamong Paagi?” diha sa Isangyaw ang Akong Ebanghelyo, kapitulo 8).

2.4.4

Mga Sesyon sa Pagtuon

Gamita ang oras sa imong personal ug uban sa kompanyon nga pagtuon aron matutokan ang mga kasulatan (ilabi na ang Basahon ni Mormon), Isangyaw ang Akong Ebanghelyo, sa mga pagtulon-an sa buhi nga mga propeta (makita sa Gospel Library), ug niini nga mga sumbanan. Kining mga aprobado nga mga kapanguhaan makapalig-on sa imong kahibalo ug pagpamatuod sa gipahiuli nga ebanghelyo ni Jesukristo ug makatabang nimo nga maandam sa pagkab-ot sa mga panginahanglan niadtong inyong gitudloan.

Kon gitahasan ka sa pagkat-on og bag-ong pinulongan, tun-i ug praktisa kini kada adlaw.

Kon ikaw bag-o pa nga misyonaryo, pagtuon uban sa imong tigbansay [trainer] sa dugang 30 ngadto sa 60 minutos matag adlaw sulod sa unang 12 ka semana diha sa natad sa misyon (tan-awa sa “Alang sa Bag-ong mga Misyonaryo: Dugang nga Pagtuon Kauban ang Kompanyon” sa “Pasiuna: Unsay Akong Buhaton Aron Magamit Nako Pag-ayo ang Isangyaw ang Akong Ebanghelyo?” diha sa Isangyaw ang Akong Ebanghelyo).

2.4.5

Pakigpangaon Uban sa Laing Tawo

Kon mahimo, ang imong presidente sa misyon ug ang lokal nga presidente sa stake mohatag og mga lagda alang sa pag-iskedyul sa mga tawo nga mopakaon diha sa inyong misyon. Kon ang mga miyembro o ubang tawo mopakaon:

• Pagmatinahuron sa ilang personal nga mga sitwasyon ug panahon.

• Pagmapasalamaton sa pagkaon nga ilang gidalit.

• Pangayo og higayon sa pagtudlo og 15- o 20-minutos nga leksyon sa dili pa o human mangaon aron mapalig-on kadtong inyong gibisita ug mohatag kaninyo og oportunidad sa pagpalambo sa inyong abilidad sa pagtudlo uban sa Espiritu.

Laing hingkod nga parehas ninyo og sekso kinahanglan anaa uban nimo ug sa imong kompanyon kon kamo mokaon kauban ang tawo nga dili pareho og sekso.

2.5

Adlaw sa Pagpangandam

Ang imong presidente sa misyon mogahin og usa ka adlaw sa matag semana isip adlaw sa pagpangandam. Ang adlaw sa pagpangandam makahatag nimo og panahon nga mabag-o sa pisikal, espiritwal, ug emosyonal nga paagi samtang ikaw “mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Makahatag usab kini kanimo ug sa imong kompanyon og mga oportunidad nga makauban ang uban nga mga misyonaryo sa inyong district ug malingaw sa maayo nga kalihokan sa paglingaw-lingaw (tan-awa sa 3.6).

Palihog hinumdomi ang tukma sa panahon nga pasidaan sa Ginoo: “Ayaw pagdagan og labaw ka tulin ug pagbuhat og labaw ka daghan kay sa imong kusog” (Doktrina ug mga Pakigsaad 10:4), ug “mopahulay sa higdaanan og sayo, nga kamo dili kapuyon; bangon og sayo, nga ang inyong mga kalawasan ug ang inyong hunahuna mahimo nga malagsik” (Doktrina ug mga Pakigsaad 88:124).

2.5.1

Mga Kalihokan sa Adlaw sa Pagpangandam

Ang mga kalihokan sa adlaw sa pagpangandam mahimong maglakip (apan dili limitado) sa mosunod:

• Pakig-istorya sa imong pamilya, presidente sa misyon, ug mga higala (tan-awa sa 3.9)

• Panglaba

• Pagpatupi ug uban pang personal nga pagpamustura

• Pagpanglimpyo

• Pagpangumpra

• Pagpahulay

• Pag-apil sa mga aprobado nga mga kalihokan sa kalingawan (tan-awa sa 3.6)

2.5.2

Sampol sa Iskedyul sa Adlaw sa Pagpangandam

Ang iskedyul sa adlaw sa pagpangandam lagmit pareha sa mosunod:

6:30 a.m.	Magsugod ang adlaw.
6:30–8:00 a.m.	Mag-ampo. Maligo, mokaon og pamahaw, ug mangandam alang sa adlaw. Magplano (30 minutos). Mohimo og personal nga pagtuon (30 minutos).
8:00 a.m.–6:00 p.m.	Mobuhat sa mga kalihokan sa adlaw sa pagpangandam (tan-awa sa 2.5.1). Pahinumdom: Tanang mga kalihokan sa adlaw sa pagpangandam kinahanglan makompleto pagka 6:00 p.m.
6:00–9:00 p.m.	Mangita, magtudlo, ug moserbisyo sa uban.
9:00 p.m.	Balik sa inyong pinuy-anan. Kon kamo dunay sabot sa pagtudlo, mouli pagka 9:30 p.m.
9:00–9:30 p.m.	Magsulat sa imong journal, mag-andam sa higdaanan, ug mag-ampo.
9:30–10:30 p.m.	Matulog na.

2.6

Mga Kalihokan sa Adlaw nga Igpapahulay

Pagplano og mga kalihokan sa Igpapahulay nga makatabang nimo nga makatuman sa imong misyonaryo nga katuyoan sa pagpangita, pagtudlo, pagbunyag, ug pagtabang sa uban nga makakat-on ug mahimong mas sama sa Langitnong Amahan ug ni Jesukristo. Hinumdomi ang mga pagtulon-an sa Ginoo mahitungod sa adlaw nga Igpapahulay diha sa Doktrina ug mga Pakigsaad 59:13–19, ug isulat ang mga pulong ug hugpong sa mga pulong nga nagsugyot nga ang tinuod nga Igpapahulay naglakip og kalipay, pagmaya, usa ka malipayon nga kasingkasing, ug usa ka maabibahon nga panagway.

Ang mga kalihokan sa adlaw nga Igpapahulay naglakip sa pagtambong sa simbahan, kinatibuk-ang komperensiya, kinatibuk-ang mga sesyon sa Dominggo sa komperensiya sa stake, ug dugang nga mga miting sama sa konseho sa ward kon gidapit. Naglakip usab kini sa pag-apil sa binulan nga pagpuasa.

Diha sa imong misyonaryo nga mga paningkamot, ang Ginoo wala nagsugo nimo sa dili pagkaon, gawas sa panahon sa regular nga binulan nga pagpuasa, o sa pagsakripisyo sa tulog aron mahimong mas mapahinunguron nga misyonaryo. Panagsa mahimo kang magpuasa alang sa espesyal nga rason, apan ayaw pagpuasa og molabaw sa 24 oras.

2.7

Pagserbisyo sa Komunidad

Makakat-on ka nga mahimong disipulo ni Jesukristo pinaagi sa pagserbisyo sama sa Iyang gibuhat. Pangita og mga oportunidad sa pagserbisyo sa imong kompanyon, sa mga tawo nga inyong gitudloan, mga miyembro, ug sa uban diha sa komunidad, “nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Kinahanglan moserbisyo ka inubanan sa bug-os nga tinguha sa pagtabang sa uban nga walay bisan unsang gilaoman nga mga balos. Sunda ang tanang mga lagda sa proyekto sa pagserbisyo (tan-awa sa 7.2), ilabi na sa bisan unsa kabahin sa dili pagtudlo samtang nagserbisyo ug sa dili pagserbisyo diin mag-inusara ka uban sa mga bata. Kon adunay tawo nga mopadayag og kainteresado sa inyong mensahe, motubag lang og mubo kaayo ug magsabot sa pagpakigkita kanila sa usa ka lahi nga oras ug dapit aron mopakigbahin og mensahe.

Alang sa dugang nga impormasyon tan-awa sa seksiyon 7.2, “Mga Lagda alang sa Pagserbisyo.”