Ni Banen Am Mition

6.0

Moantaeka

Katauraoiko ngkai n reitanako maium n riki bwa ana reirei Iesu Kristo Ibukiia Aika Itiaki ni Boong aika Kaitira ngkai ko a okira mweengam ao ngkai ko a kakoroi bukin am mition ni maium.

6.1

Teimatoa n Reitaki

Reitinako n reitaki ma naake ko a tia n reireiniia ao ni mwakuri ma ngaiia iaon am mition, n raonaki ma am taan kairiiri n te mition. Boutokaia ao kakorakoraia rinanon am taeka ao am banna ni katooto, ao bukamarui taai aika a kakaawaki inanon maiuia.

6.2

Okiran Mweengam man Am Mition

Ibukina bwa ko teimatoa ni mitinare ni karokoa ko a tia ni kainaomataaki iroun am beretitenti n te titeiki, ko kantaningaaki bwa kona irii ni kabane kainibaire ibukiia mitinare ni karokoa te tai anne. Iangoa okiran mweengam ngkekei naba. Aio riki e rang kakaawaki ngkana ko beku n te aba irarikin are oin am tabo are e kainnanoaki iai kamatoaan te kariaia ibukin tikum n te aba . Kawaeremwean okiran mweengam e kona ni karekea te kangaanga ibukiia mitinare n taai aika a na roko ni karekean te kariaia ibukin manangaia nakon te aba anne . Ngkana ko kaitibo ma am utu ni mwananga n oki, karekea maroroom ao kaetieti mairoun am beretitenti n te mition ni moantaai.

Ko kona n aki kabanea am mwakuri ni mitinare n te mition teuana ke bubuti bwa kona kamwaingaki nakon te mition teuana imwain ae ko kamotirawaaki n te bong anne bwa ko aonga n raoniia am koraki.

Ngkana ko okira mweengam, baireia ma am beretitenti n te titeiki tain kamotirawaam n te tai ae waekoa.

N te tai naba are ko kona imwiin okiran mweengam, karekea tuoakim ibukin te kangenge, e ngae ngke ko tuoaki ibukina imwain mwanangam ao ko aki karekei kanikina.

6.3

Te Beku ao te Rikirake imwiin Am Mition

Ngkana ko okira mweengam, reitinako maiuakina ana kainibaire te euangkerio. Kakoaua bwa ko:

Tataro ao kamatebwaia te euangkerio ni katoabong.
Iriira ao makuri inanon am uoote ni mweengam ke aia uoote kairake n ikawai ake a tuai iein.
Kakaai anga ni beku inanon te tembora ngkana iai teuana ae kaan.
Irira te kiraati n intitiute ke reirei n taekan te aro.
Kakaai reirei ao anga ni kareke mwakuri rinanon te Ekaretia ke tabo riki tabeua.

Maiuakinna bwa ko aonga ni kona n rinanon te aekaki ni kimwareirei are e kabwarabwaraaki n Ana Boki Moomon ngke Aramwa te Teei e kaitibo ma raona ni mitinare rimwi inanon maiuna:

“Ao ngkai e koro bukina bwa ngke Aramwa e mwananga man te aba are Kiteon nako maiaki, nakon te aba are Maentaai, nooria, e mimi, ngke e kaitibo ma natin Motiaea aika mwaane aika a mwananga nakon te aba are Taraemera.

“… Ngaia are Aramwa e korakora kimwareireina ngke e nooriia tarina; ao teraa are e a raka riki iai kimwareireina, bon taari naba ngaiia i nanon te Uea; eng, ao a bon matoatoa n te rabakau ibukin te koaua; bwa bon mwaane ngaia aika a raoiroi aia atatai ao a bon tia n ukoukouri koroboki aika tabu ma nanomwakaia, bwa aonga n ataa ana taeka te Atua.

“Ma tiaki ti ngaia aei; a tia n anga nanoia bwa ana bwaina te tataro, ao ana aki mamatam, ngaia ae e a reke irouia tamnein te taetae ni burabeti ao tamnein te kaotioti, ao ngkana anga reirei, anga reirei ma te mwaaka ao te kariaiakaki iroun te Atua” (Aramwa 17:1–3, karinaki taekana aika kairara).