Na Te Taitai Ia te A’u, saunia e Yongsung Kim, havenlight.com

Faamae’aina o Lau Misiona

6.0

Faatomuaga

Saunia nei loa oe lava e faaauau lou olaga o se soo o Iesu Keriso ma o se tagata faatuatua o Le Ekalesia a Iesu Keriso o le Au Paia o Aso e Gata Ai pe a e toe foi i le aiga ina ua faataunuuina lau misiona o lou olaga.

6.1

Fesootai Pea Lava Pea

Faaauau ona fesootai ma i latou sa e aoaoina ma galulue faatasi i lau misiona, e aofia ai ma ou taitai o le misiona. Lagolago ma faamalolosia i latou e ala i au upu ma faataitaiga, ma faamanatu mea taua i o latou olaga.

6.2

Toe Foi i le Aiga mai Lau Misiona

Ona sa e tumau pea o se faifeautalai seia oo i le taimi na faamalolo ai oe e lou peresitene o le siteki, e manaomia lou mulimuli i tulaga faatonuina uma faafaifeautalai seia oo i lena taimi. Mafaufau e toe foi sao atu i le fale. E faapitoa le taua o lenei mea pe a faapea o loo e talai i se atunuu e ese mai lou lava atunuu e faamalosia ai le manaomia o visa e femalagaai ai. O le faatuai o lou toe foi atu i lou aiga e mafai ona avea ma mea e faigata ai ona maua visa e femalagaai ai faifeautalai i le lumanai. Afai e te malaga faatasi ma lou aiga e toe foi i lou aiga, saili vave lava le fautuaga ma le faatonuga mai lou peresitene o le misiona.

E le mafai ona faamaea lau auaunaga faafaifeautalai i se isi misiona pe talosaga ina ia siitia i se isi misiona pe a tuanai le aso e faamalolo ai ina ia mafai ona soa ma se tasi o lou aiga.

Pe a e toe foi i lou aiga, faatulaga ma lou peresitene o le siteki ina ia faamaloloina oe i se taimi vave e mafai ai.

I se taimi vave lava pe a e taunuu i lou aiga, ia faia sou tui mo le ma’i o le mamapala, e tusa lava pe na suesueina muamua oe ae lei alu lau misiona ma sa leai se faailoga faaletonu.

6.3

Auaunaga ma le Soifua Tuputupu Ae ina ua Maea Lau Misiona

Pe a e toe foi i lou aiga, faaauau ona ola ai pea i tulaga faatonuina o le talalelei. Ia mautinoa e te:

Tatalo ma suesue i le talalelei i aso uma.
Lotu ma auai i le uarota a lou aiga po o se uarota a talavou matutua nofofua.
Saili avanoa e auauna atu ai i le malumalu pe afai o iai se malumalu lata ane.
Auai i le inisitituti po o vasega o aoaoga faalelotu.
Saili avanoa mo aoga ma galuega e ala i le Ekalesia ma isi punaoa.

Ola ina ia e maua le aafiaga o le ituaiga olioli o loo faamatalaina i le Tusi a Mamona ina ua mulimuli ane feiloai Alema le Itiiti ma uso a faifeautalai i lona olaga:

“Ma o lenei sa oo ina aʼo malaga atu Alema mai le laueleele o Kitiona agai i le itu i saute, e alu ese atu i le laueleele o Maneti, faauta, sa ofo o ia, i lona feiloai ma atalii o Mosaea, o malaga atu agai i le laueleele o Saraʼemila.

“… O lea sa olioli tele Alema i le vaai atu i ona uso; ma o le mea na faaopoopo atili ai lona olioli,, ona sa avea pea i latou ma ona uso i le Alii; ioe, ma sa latou matua malolosi i le malamalama o le upumoni; ona o i latou o ni alii mafaufau lelei ma sa latou suesue i tusitusiga paia ma le filiga, ina ia latou iloa le afioga a le Atua.

“Ae sa le ona pau lea; sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga, ma a o latou aoao atu, sa latou aoao atu ma le mana ma le pule mai le Atua” (Alema 17:1–3faaopoopo le faatusilima).