3

Gawi sa Misyonaryo

3.0

Pasiuna

Kini nga seksyon naghulagway sa mga sumbanan sa misyonaryo kabahin sa pamatasan ug Kristohanon nga mga kinaiya. Ikaw gilaoman nga imong praktison ug ugmaron kini nga mga sumbanan ug mga kinaiya samtang mahimo ka nga mas mapahinungoron nga disipulo ni Jesukristo. Sumala sa gitambag ni propeta Moroni, nga “Nahinumdom sa pulong sa Dios nga nag-ingon nga pinaagi sa ilang mga buhat kamo masay[o]d kanila; kay kon ang ilang mga buhat maayo, sila maayo usab” (Moroni 7:5).

3.1

Kristohanon nga Pamatasan

Mag-ampo ug molihok sa pag-ugmad og Kristohanon nga mga kinaiya, o mga hiyas, sama sa gihulagway diha sa mga kasulatan ug diha sa mga pagtulon-an sa buhi nga mga propeta. Kini nga mga hiyas naglakip sa pagkamapasalamaton, pagkamabination, paghigugma, pagkamapainubsanon, pagpailob, empatiya, ug pagkamasulundon. Inubanan sa tabang sa Ginoo ug sa imong kaugalingong sinsero ug makugihon nga mga paningkamot, makaugmad ka og Kristohanon nga mga hiyas (tan-awa sa Mosiah 3:19).

Magmabination, positibo, ug madasigon. Magmanggihunahunaon sa sitwasyon sa matag tawo. Bisita ka sa mga lugar nga imong giserbisyohan ug kinahanglan motratar sa mga tawo ug sa mga dapit uban sa pagtahod ug pagdayeg.

Samtang nagserbisyo sa komunidad, kanunayng morespeto sa mga kustombre, mga gituohan kalabot sa relihiyon, ug mga gipangbuhat sa uban sa tanang higayon. Likayi nga makapasilo sa uban. Hinumdomi, unsay imong isulti ug unsay imong buhaton atol sa imong mga buluhaton sa pagserbisyo mahimong madungog, makita, ug marekord. Bisan asa ka magserbisyo, ikaw usa ka representante ni Jesukristo ug sa Iyang gipahiuli nga Simbahan.

3.2

Katakos sa Pagsulod sa Templo

Ang mga misyonaryo kinahanglang takos sa pagsulod sa templo sa tibuok nila nga mga misyon.

Si Ginoong Jesukristo nagdapit kaninyo nga “mag-andam sa inyong mga kaugalingon, ug magbalaan sa inyong mga kaugalingon; oo, limpyohi ang inyong mga kasingkasing, ug hugasi ang inyong mga kamot ug ang inyong mga tiil diha sa akong atubangan, aron Ako makahimo kaninyo nga limpyo” (Doktrina ug mga Pakigsaad 88:74). Usa ka bahin niining pagpangandam naglakip sa pagtuman sa imong mga pakigsaad sa templo kon ikaw nakadawat sa imong pagtuga sa templo.

3.2.1

Mga Pakigsaad diha sa Templo (Kon Gitugahan)

Ang pagtuman sa mga pakigsaad diha sa templo sa pagkamasulundon, pagsakripisyo, ug pagpahinungod makapalig-on kanimo ug makatabang kanimo nga mas mahisama sa Manluluwas.

Bisan kon walay templo diha sa dapit sa inyong pangserbisyo nga misyonaryo, himoa ang pagpabiling takos sa pagsulod sa templo. Hangyoa ang imong bishop ug presidente sa stake alang sa interbiyo kalabot sa rekomend sa templo sa dili pa mawala ang kabalido sa imong rekomend.

Ang pagsul-ob og garment sa templo mao ang sagradong pribilehiyo niadtong mihimo og mga pakigsaad sa pagtuga. Tugoti ang Balaang Espiritu nga mogiya nimo sa pagkonsiderar sa imong personal nga pasalig sa pagsul-ob sa garment.

3.2.2

Pagsimba diha sa Templo

Kon ang templo duol ra, giawhag ka nga motambong sa templo isip usa ka patron sa tibuok nimong misyon. Kini nga pagtambong mahimo usab nga usa sa mga oportunidad sa gisangon nimo nga pagserbisyo.

Ang pagtambong sa templo kinahanglang dili makabalda sa uban nimong misyonaryo nga mga buluhaton. Kon magserbisyo ka sa templo, tumana ang imong buluhaton uban sa kaligdong, respeto, ug balaang pagtahod. Kon motambong ka sa templo, hinumdomi ang mosunod:

• Kon tawagon ka sa kapangulohan sa templo aron moserbisyo isip usa ka ordinance worker, moserbisyo ka sa templo sumala sa ilang imando.

• Ayaw pagdala og mga kamera, mga cell phone, o mga materyal nga basahonon, (lakip na ang patriyarkal nga mga panalangin) aron gamiton sulod sa templo.

• Dili magpundok-pundok isip mga misyonaryo o moluhod sa pag-ampo diha sa celestial nga lawak.

• Pinaagi sa pagdala og mga ngalan sa pamilya ngadto sa templo, makatabang ka sa pagpundok sa Israel sa pikas habig sa tabil ug mapalambo ang imong kasinatian sa templo.

3.3

Ang Balaod sa Kaputli

Ang usa ka importanting bahin sa katakos sa pagsulod sa templo mao ang pagtuman sa balaod sa kaputli. Buhata ang tanan nimong mahimo aron panalipdan ang imong kaugalingon gikan sa sekswal nga tintasyon nga mahimong mosangpot sa paglapas sa imong sagradong mga pakigsaad. Ang pagbuhat og mga butang nga makalapas sa balaod sa kaputli mahimong mapasakahan og kasong kriminal sa ubang mga dapit.

Likayi ang bisan unsang hunahuna o aksiyon nga makapahimulag nimo gikan sa Espiritu. Naglakip kini apan dili limitado ngadto sa pagpanapaw; pakighilawas nga dili pa minyo; mga kalihokan sa managsamang sekso [same-sex activity]; pakighilawas gamit ang baba [oral sex]; pagpagana sa sekswal nga mga pagbati; dili angay nga paghikap; pagpadala o pagdawat og mga mensahe, mga imahe, o mga video nga imoral o sekswal ang kahimtang; pagpagana sa kinatawo alang sa sekswal nga kalipay; ug pagtan-aw o paggamit og pornograpiya. Alang sa dugang nga impormasyon, tan-awa sa Alang sa Kalig-on sa mga Kabatan-onan (booklet, 2011), “Paghinulsol,” 28–29.

Kon nanglimbasog ka sa pagtuman niining mga sumbanan, pangayo og tabang sa Ginoo ug pakig-istorya diha-diha dayon sa imong presidente sa misyon.

3.3.1

Paglikay sa Pornograpiya

Adunay daghang matang sa pornograpiya. Ang pagplano daan ug paghimo og matarong nga mga pagpili makatabang nimo sa paglikay sa pornograpiya. Kon imo kining masugatan, likay, palonga ang device, o biyai ang sitwasyon.

Gamita ang mosunod nga mga sugyot aron makatabang nimo sa paglikay sa pornograpiya:

• Likayi ang mga website, mga materyal, ug mga dapit diin adunay kalagmitan nga imong madungog, mabasa, o makita ang makapadani nga mga materyal o pornograpiya.

• Kat-oni ang pag-ila sa mga higayon nga matintal ka pag-ayo sa sayop nga paggamit sa teknolohiya, sama sa higayon nga ikaw gikapoy o gilaay.

• Paghimo og plano kon unsay imong buhaton nianang mga higayona. Ang imong mga lider sa pangserbisyo nga misyon makatabang. Imo usab nga makita ang impormasyon sa ChurchofJesusChrist.org/addressing-pornography.

Si bisan kinsa nga magtinguha sa paglikay o pagbuntog sa pornograpiya makakaplag og tabang ug kaayohan pinaagi sa Pag-ula ni Jesukristo. Kon ikaw nanglimbasog, pakig-istorya sa imong presidente sa stake, kinsa makahatag og mahigugmaong tambag ug suporta.

3.4

Pagkamatinuoron

Kita gimandoan nga magmatinuoron. Ang katakos sa pagsulod sa templo naglakip sa pagkamatinuoron sa tanan nimong pakigsabot sa uban. Ang pagkamatinuoron naglakip sa:

• Pagsulti sa kamatuoran, ilabi na ngadto sa imong mga lider sa pangserbisyo nga misyon ug presidente sa stake kalabot sa imong gawi, pagpamatuod, mga nabatasan sa trabaho, ug emosyonal ug pisikal nga kahimsog.

• Paghatag og hustong mga report sa imong pagserbisyo ug kon giunsa nimo sa paggamit ang imong oras sa tibuok semana.

• Pagmahimong masaligan ug dili gayod mohatag og dili tinuod nga report o dili tinuod nga impormasyon mahitungod ni bisan kinsang tawo o sa imong buluhaton sa pagserbisyo.

• Pagmatinahuron sa uban pinaagi sa dili pagpanghulam, pagpanguha, o pagpanggamit og personal nga mga butang sa usa ka tawo (sama sa sinina, mga libro, elektronik nga mga himan, ug alahas) nga walay pagpananghid.

3.5

Pagpakig-inter-aksyon sa Uban

Ang Manluluwas nagtudlo, “Kini mao ang akong sugo: paghigugmaay kamo sama nga ako nahigugma kaninyo” (Juan 15:12). Pilia ang pagsunod sa ehemplo sa Manluluwas ug molihok sa mga paagi nga matinahuron, luwas, ug tukma sa sitwasyon.

3.5.1

Kinatibuk-ang mga Sumbanan alang sa Pagpakig-inter-aksyon sa Pamilya ug mga Higala

Magmahimong kalig-on ug maayong ehemplo sa imong pamilya ug mga higala. Pagpaambit og makapadasig nga mga estorya gikan sa imong mga kasinatian sa misyon.

Ang mga sakop sa pamilya tingali kinahanglang motabang kanimo sa imong pisikal nga mga panginahanglan, transportasyon, o sa ubang mga paagi aron magmalampuson ka sa imong pagserbisyo. Adunay pipila ka pagpahiangay ngadto sa kinabuhing pangpamilya atol sa imong misyonaryo nga pagserbisyo. Ikaw ug ang imong pamilya kinahanglang mohimo og pipila ka pagsakripisyo aron sa pagsiguro nga ikaw adunay labing makahuluganon ug mabungahon nga kasinatian sa misyon kutob sa mahimo.

3.5.2

Kinatibuk-ang mga Sumbanan alang sa Pagpakig-inter-aksyon sa mga Hamtong

Palig-ona ang pagsalig ug ang makahuluganon nga mga relasyon niadtong imong serbisyohan. Magmahimong propesyonal ug magmabination. Tumana ang mosunod nga mga sumbanan:

• Likayi ang mga sitwasyon nga mahimong peligroso sa pisikal o sa espirituhanon nga paagi o nga mahimong masaypan sa pagsabot.

• Ayaw pagbirig-birig o pagpakig-istorya sa dili angay nga paagi ni bisan kinsa.

• Ipabiling ligdong ang imong pinulongan. Likayi ang paggamit og slang. Paggamit og tukma nga mga tawag kon mosangpit sa uban. Pananglitan, gamita ang tawag nga “Elder” o “Sister” kon mosangpit ngadto sa ubang pangserbisyo nga mga misyonaryo ug mga lider sa pangserbisyo nga misyon aron sa pagpakita og pagtahod alang sa ilang mga calling.

3.5.3

Kinatibuk-ang mga Sumbanan alang sa Pagpakig-inter-aksyon sa mga Bata ug sa Mahuyang nga mga Hamtong

Alang sa imong seguridad ingon man sa seguridad sa mga bata ug sa mahuyang nga mga hamtong, tumana gayod ang mosunod nga mga sumbanan alang sa pagtrabaho kauban niini nga mga grupo:

• Ayaw pag-inusara uban sa mga bata o mahuyang nga mga hamtong ubos sa bisan unsa nga kahimtang.

• Dili mobantay nila, mosinina nila, o mohatag og mga tambal nila, o moatiman sa paglimpyo sa ilang kaugalingon [personal hygiene].

• Serbisyohi lamang sila kon adunay laing responsable nga hamtong nga anaa. Sunda ang mga protokol sa seguridad alang sa Simbahan o sa charity nga imong giserbisyohan.

• Kon nagtrabaho ka uban nila sa usa ka manggihatagon nga organisasyon, kinahanglan una nimong kompletohon ang pagsusi sa background niini.

Ang daling maapektohan nga mga hamtong mao ang mga tawo nga adunay mental o pisikal nga kakulian nga mahimong makaapekto og dako sa ilang abilidad sa pagsabot sa mga sitwasyon ug sa pagpanalipod sa ilang kaugalingon gikan sa pang-abuso, pagpasagad, o pagpahimulos. Ang daling maapektohan nga hamtong nagpasabot usab sa mga bakwit [refugee] nga tingali dili makasabot sa pinulongan o mga kalainan sa kultura.

3.5.4

Kinatibuk-ang mga Sumbanan alang sa Pagpakig-inter-aksyon sa Tigtudlo nga mga Misyonaryo

Isip usa ka miyembro sa Simbahan, mahimo ka nga mokuyog sa tigtudlo nga mga misyonaryo sa mga pagbisita aron magtudlo. Dili ka mopresentar sa imong kaugalingon isip usa ka tigtudlo nga misyonaryo. Ayaw isul-ob ang imong name tag sa pangserbisyo nga misyonaryo diha sa mga pagbisita aron magtudlo. Dili ka moapil sa tigtudlo nga mga misyonaryo sa district ug zone nga mga komperensiya gawas kon ang presidente sa misyon modapit kanimo.

3.5.5

Pagpakig-date

Dili ka mahimong makig-date isip usa ka misyonaryo. Ikaw giawhag nga moapil sa mga ward ug mga kalihokan sa YSA, apan kinahanglang dili ka motambong og mga sayaw-sayaw. Kinahanglang mag-amping ka sa pagtambong sa bisan unsa nga kalihokan nga morag pagpakig-date kon tan-awon.

3.5.6

Ang Pagsul-ob sa Name Tag sa Misyonaryo

Usa kini ka dungog ug pribilehiyo nga magsul-ob og name tag sa misyonaryo. Kanunay kining isul-ob samtang ikaw magbiyahe paingon o gikan sa imong misyonaryo nga buluhaton, diha sa imong misyonaryo nga buluhaton, ug diha sa mga miting sa Simbahan.

Ang misyonaryo nga mga buluhaton naglakip sa misyonaryo nga mga miting ug mga komperensiya, panahon sa pagserbisyo sa imong pamilya, ug mga buluhaton sa Simbahan ug sa manggihatagong katuyoan nga gihimo diha ra sa balay. Kon ikaw adunay bisan unsang mga pangutana kon kanus-a isul-ob ang imong name tag sa pagkamisyonaryo, palihog pangutan-a ang imong mga lider sa pangserbisyo nga misyon.

3.5.7

Nagpuyo sa Panimalay

Diha sa sulat sa imong pagkatawag, ikaw gisangonan aron sa pag-alagad isip pangserbisyo nga misyonaryo sa inyong lokal nga komunidad, nga maghatag og Kristohanong pagserbisyo samtang nagpuyo diha sa panimalay.

3.5.8

Pagpanarbaho ug Pag-eskwela

Ang pagpanarbaho ug pag-eskwela—ma-full time o part time man—dili kabahin sa usa ka pangserbisyo nga misyon. Kinahanglan ka nga mogahin sa imong panahon, mga talento, kusog, ug kapanguhaan sa pinansyal ngadto sa imong misyon. Kabahin kini sa balaod sa pagpahinungod.

Mahimo ka nga mo-enrol sa institute ug sa PathwayConnect kon ganahan.

3.5.9

Mga Lagda sa Seguridad alang sa mga Kalihokan

Ang mga lagda sa seguridad alang sa mga kalihokan magamit ngadto sa mga young single adult, nga nagpasabot nga kini imong magamit isip usa ka pangserbisyo nga misyonaryo. Adunay mga restriksiyon bahin sa tibuok gabii nga mga kalihokan, mga pagbisita sa templo sa gawas sa gidestinohan nimo nga temple district, ug layo ang biyahe. Kini nga mga kalihokan kinahanglang planohon daan sa imong mga lider sa pangserbisyo nga misyon ug mangayo og pagtugot gikan sa gitudlo nga mga lider sa pagkapari. Ang imong mga ginikanan o mga tigbantay tingali kinahanglang mokompleto sa Porma sa Permission and Medical Release aron makaapil ka.

3.6

Paglingaw-lingaw ug Kalingawan [Recreation and Entertainment]

Pagpili og mga kalihokan nga makapadasig ug makatabang nimo nga morelaks. Pinaagi sa pagkonsulta sa mga propesyonal sa pag-atiman sa kahimsog [health care professionals], mag-ehersisyo ug magmahimong aktibo aron padayon ang imong lawas ug hunahuna nga angayan alang sa pagserbisyo. Kinahanglang likayan ang mga kalihokan sa paglingaw-lingaw nga makaangol o grabe nga makapaluya.

3.6.1

Mga Dula, mga Salida, ug Telebisyon

Ang mga kalihokan atol sa mga oras nga wala ka sa buluhaton sa pagserbisyo, sama sa tukma nga mga video game, mga salida, ug mga pasundayag sa telebisyon, pwede ra kon may pagtugot sa imong presidente sa stake ug sa mga lider sa pangserbisyo nga misyon.

Ang ingon nga mga kalihokan kinahanglang dili makabalda sa imong personal nga pagpangandam, pagtuon, o panahon sa pagserbisyo. Likayi gayod ang bisan unsang butang nga makapalayo sa Espiritu. Palihog gamita ang maayong paghukom sa pagsul-ob sa imong name tag atol niining mga matang sa kalihokan.

3.6.2

Pagtambong sa Ward ug Institute

Atol sa imong pagserbisyo isip misyonaryo, ang imong mga rekord sa pagkamiyembro kinahanglang magpabilin sa imong kaugalingong ward. Kon gitugotan, mahimo ka nga motambong sa ward sa mga young single adult sa imong dapit.

Ikaw giawhag nga moapil sa mga klase ug mga kalihokan sa institute. Ikaw mahimo usab nga moapil sa mga kalihokan sa mga young single adult nga gipasiugdahan sa inyong ward o stake sama sa mga kalihokan sa home evening, mga pagbiyahe ngadto sa templo, mga debosyonal, mga dula, ug mga piknik, apan walay apil ang mga sayaw-sayaw.

3.6.3

Mga Kalihokan sa Kultural ug Paglingaw-lingaw

Hinumdomi, ikaw usa ka misyonaryo. Ang imong mga kalihokan kinahanglang maayo, makapadasig, ug nahiuyon sa mga sumbanan niining tamdanan nga basahon.

Kanunayng mag-amping ug gamiton ang maayong paghukom kon moapil sa mga kalihokan sa paglingaw-lingaw. Atol sa imong misyon kinahanglang dili ka moapil sa mga kalihokan nga adunay dakong risgo.

Mahimo kang mopahigayon o moapil sa sosyal nga mga panagtigom kuyog sa ubang pangserbisyo nga mga misyonaryo kon ikaw wala sa imong mga buluhaton sa pagserbisyo. Hinoon, kini nga mga kalihokan kinahanglang nagsunod sa mga sumbanan sa pangserbisyo nga misyonaryo ug kinahanglang dili gayod ipahigayon sa tibuok gabii.

Mahimo ka nga moapil sa mga pagbakasyon sa pamilya nga mopahibalo daan sa imong mga lider sa pangserbisyo nga misyon ug sa imong mga superbisor sa operasyon. Paghimo og usa ka plano uban sa imong mga lider sa pangserbisyo nga misyon aron mapalambo ang imong kasinatian sa misyon samtang nagbakasyon.

3.6.4

Musika

Paminaw og musika nga nahisubay sa imong sagrado nga calling. Ang musika kinahanglang makadapit sa Espiritu, makatabang nimo nga makatutok sa buhat, ug mogiya sa imong mga hunahuna ug mga pagbati ngadto sa Manluluwas.

Ayaw paminaw og musika nga nag-awhag og pagka-imoral, nagdasig sa pagkabayolente, naggamit og makapasilo nga pinulongan, o nagpakunhod sa imong espirituhanong kasensitibo pinaagi sa tugtog, tukar, kalanogon, mga pulong, o gikusgon.

3.6.5

Elektronik ug Computer nga Ekipo

Ang tanang paggamit sa elektronik nga mga device ug media, lakip na ang mga cell phone ug mga computer, kinahanglang nahiuyon sa mga baroganan sa ebanghelyo. Ang paggamit sa mga elektronik kinahanglang dili makapalayo sa espiritu ug sa calling sa imong misyon sa bisan unsang paagi.

Likayi ang bisan unsang butang nga hilas, imoral, bayolente, o may pornograpiya. Ayaw gamita ang imong cell phone atol sa mga oras sa buluhaton sa pagserbisyo.

3.6.6

Media

Ang social media mahimong usa ka epektibong paagi sa pagpaambit kon sa unsang paagi ka nagsunod sa Manluluwas isip usa ka misyonaryo. Ang mga post mahitungod sa mga kalihokan nga dili pangmisyonaryo kinahanglang nagpakita gihapon sa kaligdong sa imong call sa misyon.

Maalamong mopili kon mogamit sa media. Bisan unsa ang imong basahon, paminawon, o tan-awon makaapekto nimo. Pilia lamang ang media nga makapadasig nimo.

Bantayi ang imong seguridad ug ang seguridad sa uban pinaagi sa pag-amping kon unsa nga personal nga impormasyon ug mga hulagway ang imong ipaambit gamit ang teknolohiya. Dili mogamit sa titulo nga “Elder” o “Sister” sa imong ngalan sa account. Dili moistorya og bisan unsa diha sa internet o pinaagi sa pag-text nga dili angayang ipaambit sa personal. Dili mopaambit og politikanhong mga panglantaw. Sunda ang mga balaod nga nagdumala bahin sa pagpaambit sa musika, mga salida, ug ubang mga aytem nga adunay copyright. Ayaw ipakita nga ang imong mga gi-post opisyal nga komunikasyon sa Simbahan.

Ang paggahin og sobrang oras sa internet, sa mobile device, o sa ubang media makapugong nimo sa pagtuman sa imong eskedyul ug mga buluhaton sa pangserbisyo nga misyon.

Kon dili ka sigurado kon ang usa ka butang angay bang tan-awon o paminawon, pakig-istorya sa imong mga ginikanan, bishop, presidente sa stake, o mga lider sa pangserbisyo nga misyon. Ang Espiritu Santo mohatag nimo og kalig-on sa paghimo og sakto nga mga pagpili.

3.7

Mga Eksepsiyon sa Polisiya

Ang bisan unsa nga eksepsiyon sa mga sumbanan nga gipasabot niining mga sumbanan sa misyonaryo dili usa ka desisyon nga himoon lamang sa imong presidente sa stake, bishop, mga ginikanan, o mga lider sa pangserbisyo nga misyon. Kon ikaw mobati nga ang eksepsiyon kinahanglang ikonsiderar, pakig-istorya sa imong presidente sa stake ug sa mga lider sa pangserbisyo nga misyon aron hisgotan ang mga kahimtang. Ang mga lider sa pangserbisyo nga misyon makigsulti dayon sa Buhatan sa Pangserbisyo nga Misyon [Service Mission Office] sa pagkonsiderar sa hangyo.

3.8

Komunikasyon uban sa mga Lider sa Pangserbisyo nga Misyon, mga Lider sa Pagkapari, ug mga Superbisor sa Dapit nga Giserbisyohan [Service Location Supervisors]

Ang pagserbisyo isip usa ka misyonaryo naglakip og usa ka responsibilidad sa pagpanubag ngadto sa Ginoo ug sa imong mga lider. Ikaw mohimo niini pinaagi sa paghatag og regular nga mga pag­report sa misyonaryo. Kini nga mga report mahimong maglangkob sa:

• Imong mga buluhaton ug eskedyul sa pagkamisyonaryo

• Imong pisikal ug emosyonal nga kaayohan

• Imong espirituhanong mga kasinatian ug kalamboan

• Imong bag-ong mga kalamposan ug mga hagit

Kinahanglan nimong pahibaloon ang imong superbisor sa dapit nga giserbisyohan ug ang imong mga lider sa pangserbisyo nga misyon sa bisan unsang orasa nga dili ka makatambong sa imong buluhaton sa pagserbisyo. Kini nga komunikasyon kinahanglang ipahibalo nang daan kon mahimo.

Atol sa imong misyon, gamita ang gihatag nganha kanimo nga missionary email account imbis ang bisan unsang personal nga mga account.