Mesej we I Kam long Fas Presidensi mo Kworom blong Olgeta Twelef Aposol
Ol Dia Fren Misinari:
Afta we Hem i laef bakegen long ded, Jisas Kraes i kamkamaot long olgeta disaepol blong Hem mo i bin givim komanmen long olgeta blong “[oli] mas go long ol man long olgeta ples long wol, blong pulum olgeta oli kam man blong mi” (luk long Matiu 28:19, futnot a) “Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala” (Matiu 28:19–20).
Oli bin singaotem yu, tru long revelesen we i go long ol wokman blong God we Hem i jusum olgeta, blong yu helpem Ol Aposol long bigfala wok ia blong tekem gospel blong Jisas Kraes i go long wol blong save “mekem ol man long olgeta ples long wol, … oli kam man blong [Hem].
Taem we yu stap givim seves long wan misin wetem evri hat blong yu, bae yu stap help blong mekem tufala hae komanmen ia oli kamtru, we i blong “mas lavem Lod God blong yu … [mo blong] mas lavem neba blong yu olsem yu lavem yuwan”(Doktrin mo Ol Kavenan 59:5–6).
Blong yu wan misinari we i mekem gud wok, yu mas stap wan fetful disaepol blong Jisas Kraes. Mifala i stap invaetem yu blong mekem talen mo skil blong yu i kam bigwan moa mo yumi from glori blong God. Jisas Kraes bae i mekem yu yu kam blong save plante moa. Papa long Heven i lavem yu, mo bambae Hem i helpem yu blong lavem mo blesem ol pikinini blong Hem, i nomata weaples yu givim seves long hem. Bambae Hem i givim paoa long yu mo ol pipol ia we yu stap wok blong olgeta, tru long Atonmen blong Jisas Kraes, blong oli rili “jenisim laef blong olgeta long Lod” (Alma 23:6).
Olgeta misinari standet ia, Fas Presidensi mo Kworom blong Olgeta Twelef Aposol oli apruvum. Bambae oli protektem yu long saed blong bodi, long saed blong spirit, mo long saed blong filing mo helpem yu blong stap disaepol ia we Jisas Kraes i nidim yu blong kam olsem.
Sapos yu gat wan kwestin abaot wan standet, prea long Lod mo askem Hem blong helpem yu blong andastanem hamas nao standet ia i impoten, mo afta, sapos i nid, askem kompanion blong yu, ol yang misinari lida, o ol misin lida blong yu blong oli help. Oltaem, stadi long olgeta standet ia wetem kompanion blong yu, mo traehad blong stap obei long olgeta.
Mifala i kongratuletem yu blong akseptem wan koling ia blong givim seves long wan fultaem misin, mo mifala i prea we bae yu faenem tru pis mo glad blong stap wok blong Lod, Jisas Kraes.
Fas Presidensi mo Kworom blong Olgeta Twelef Aposol
Jos Ia blong Jisas Kraes blong Ol Lata-dei Sent