Ennaan eo jān Būreejtōnji eo Kein Kajuon im Doulul eo an Jon̄oulruo Rijilōk ro

Iakwe Mijenede eo Ejitōnbōro:

Ālkin Jerkakpeje eo An, Jisōs Kraist ekar waļo̧kļo̧k n̄an rikaļoor ro An im kakien er n̄an “kōm̧m̧an bwe ren ri kaļoora” (lale Matu 28:19, footnote a) “ri aelōn̄ ko otemjej, peptaij er ilo etan Jema im Nejin im Jetōb Kwōjarjar, katakin er bwe ren pokake naan ko otemjej I ar jiron̄ koṃ” (Matu 28:19–20).

Em̧ōj kūr eok kōn revelesōn jān rijerbal ro em̧ōj kāālet er an Anij n̄an jipan̄ Rijilōk ro ilo jerbal in eļap n̄an bōkļo̧k gospel eo an Jisōs Kraist n̄an aolepen laļ in n̄an an maron̄ kōṃṃan ri aelōn̄ ko otemjej bwe ren rikaḷoor.

N̄e kwoj mijen kōn aolepān būruom̧, kwoj jipan̄ kakūrm̧ool kien ko ruo reļļap: “Iakwe Irooj am̧ Anij … [im] iakwe riturum̧ āinwōt kwe” (Katak im Bujen Ko 59:5–6).

N̄an erom̧ juon mijenede eo ewājepdik, kwoj aikuj juon rijilōk an Jisōs Kraist etiljōk. Jej kūr eok n̄an kōļapļo̧k taļōn ko am̧ im jeļā ko am̧ n̄an aiboojoj eo an Anij. Jisōs Kraist enaaj kōkajoorļo̧k kwe. Jemedwōj Ilan̄ ej iakwe eok, im E enaaj jipan̄ eok n̄an iakwe im kōjeraam̧m̧an ajri ro Nejin jabdewōt jikin kwoj jerbal ie. Enaaj lewaj kajoor n̄an eok im armej ro kwoj jerbal ippāer, kōn Pinmuur eo an Jisōs Kraist, n̄an m̧ool in “oktak tok n̄an Irooj” (Alma 23:6).

Jon̄ak kein an mijenede kar kōmālimi jān Opiij eo an Būreejtōnji eo Kein Kajuon im Doulul eo an Jon̄oulruo Rijilōk ro. Renaaj jipan̄ kōjparok eok ilo ānbwin, jetōb, im en̄jake im jipan̄ eok n̄an erom̧ rikaļoor eo Jisōs Kraist ej aikuji bwe kwon erom̧.

Eļan̄n̄e ewōr am̧ kajjitōk kōn juon jon̄ak, tiljek ilo jar n̄an kajjitōk ippān Anij n̄an jipan̄ eok meļeļe kōn aorōkin, innām eļan̄n̄e emenin aikuj, kajjitōk ippān kampānien eo am̧, ritōl ro an mijenede, ak emaron̄ juon iaan ritōl ro an mijen eo am̧ n̄an jipan̄. Ekkatak jon̄ak kein raan otemjej ippān kampānien eo m̧ōttam̧ im kajjieon̄ n̄an pokaki.

Kōmij kōjeraam̧m̧an eok kōn am̧ eo̧ron̄ kūr eo n̄an etal n̄an juon full-time mijen, im jej jar bwe kwonaaj lo aeņōm̧m̧an em̧ool im lan̄lōn̄ ilo jerbal n̄an Irooj Jisōs Kraist.

Būreejtōnji eo Kein Kajuon im jān Doulul eo an Jon̄oulruo Rijilōk ro

Kabun̄ eo an Jisōs Kraist im Armej ro Rekwojarjar ilo Raan Ko Āliktata