Pōpoaki mei he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá
Siʻomau Kaungā Faifekau:
Hili ʻa e Toetuʻu ʻa Sīsū Kalaisí, naʻá Ne hā ki Heʻene kau ākongá pea fekauʻi kinautolu ke “ngaohi ko ha kau ākonga ʻa e” (vakai, Mātiu 28:19, footnote a) “puleʻanga kotoa pē, ʻo papitaiso ʻakinautolu ʻi he huafa ʻo e Tamai, mo e ʻAlo, mo e Laumālie Māʻoniʻoni; ʻo akonaki atu kiate kinautolu ke nau tokanga ki he ngaahi meʻa kotoa pē ʻa ia kuó u fekau kiate kimoutolú” (Mātiu 28:19–20).
Kuo uiuiʻi koe ʻi he fakahā ʻo fakafou ʻi he kau tamaioʻeiki kuo fili ʻa e ʻOtuá, ke tokoni ki he kau ʻAposetoló ʻi he ngāue maʻongoʻongá ni ʻo hono ʻave ʻo e ongoongolelei ʻo Sīsū Kalaisí ki he māmaní, ke ngaohi ko ha kau ākonga ʻa e ngaahi puleʻanga kotoa pē.
ʻI hoʻo ngāue fakafaifekau ʻaki ʻa e kotoa ho lotó, ʻokú ke tokoni ai ke fakahoko ʻa e ongo fekau lalahi ʻe uá: “ʻOfa ki he ʻEiki ko ho ʻOtuá … [pea] ʻofa ki ho kaungāʻapí ʻo hangē pē ko koé” (Tokāteline mo e Ngaahi Fuakava 59:5–6).
Ke hoko ko ha faifekau lelei, kuo pau ke ke hoko ko ha ākonga faivelenga ʻa Sīsū Kalaisi. ʻOku mau fakaafeʻi koe ke fakatupulaki ho ngaahi talēnití mo e taukeí ki hono fakalāngilangiʻi ʻo e ʻOtuá. ʻE fakatupulekina koe ʻe Sīsū Kalaisi. ʻOku ʻofa ʻa e Tamai Hēvaní ʻiate koe, pe te Ne tokoniʻi koe ke ke ʻofa mo tāpuakiʻi ʻEne fānaú ʻi ha feituʻu pē te ke ngāue ai. Te Ne fakaivia koe mo e kakai ʻokú ke tokoniʻí, ʻo fakafou ʻi he Fakalelei ʻa Sīsū Kalaisí, ke mou “ului [moʻoni] ki he ʻEikí” (ʻAlamā 23:6).
ʻOku fakangofua ʻa e ngaahi tuʻunga moʻui fakafaifekau ko ʻení ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Te nau tokoniʻi koe ke ke malu fakatuʻasino, fakalaumālie, mo fakaeloto pea tokoni atu ke ke hoko ko e ākonga ʻoku finangalo ʻa Sīsū Kalaisi ke ke aʻusiá.
Kapau ʻoku ʻi ai haʻo ngaahi fehuʻi fekauʻaki mo ha tuʻunga moʻui, lotua ʻo kole ki he ʻEikí ke tokoni atu ke mahino kiate koe ʻa hono mahuʻingá, pea kapau ʻe fiemaʻu, fehuʻi ki ho hoa faifekaú, kau taki faifekau kei talavoú, pe ko ha taha ʻo hoʻo kau taki fakamisioná ke tokoni atu. Faʻa ako ʻa e ngaahi tuʻunga moʻui ko ʻení mo hoʻo hoa faifekaú pea feinga ke talangofua ki ai.
ʻOku mau talamonū atu ʻi hoʻo tali ʻa e ui ke hoko ko ha faifekau taimi kakató, pea ʻoku mau lotua ke ke maʻu ʻa e nonga mo e fiefia moʻoní ʻi hoʻo ngāue maʻá e ʻEiki ko Sīsū Kalaisí.
Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá
Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní