1
Bwaai ake Ko Rinanona n Am Tai ni Mitinare ae Bwanin Taina
1.0
Moantaeka
Ami mition e aki waaki n te bong are kam katabuaki iai ao e aki toki n te bong are kam kamotirawaaki iai. Te mition tiaki aekakin katokaana iaon te tia mwakuri ke te kaboraoi n te reirei n te moaningabong ao ni manga butii ngkana e a toki kanoan te bong. Man te tai are ko bwabetitoaki iai, ko a tia n toka iaon kawain te berita ae tabu are e kairi nakon te kakukurei ae akea tokina, te kimwareirei, ao te rau. Am tai ni mitinare ae e banin taina e kona n riki bwa te taneiai are e kakorakora bitakim ma e riai naba n riki bwa te mwakoro ae moan te kakaawaki inanon mwakoron maium are ko rinanona n te mition.
Ngkana e taraaki man te taratara ae akea tokina, bwaai ake ko rinanona n am tai ni mitinare e raka riki nakon te bwai are ko a tia ni karaoia—e bon riai bwa kona reitanaako maium n riki bwa ana reirei Iesu Kristo ni kabanea maium.
Te burabeti Iotebwa Timiti e taetae iaon kakabwaia ao tibwanga ake a reke iroura ngketi baireia n riki bwa mwakoron te mwakuri ni kamaiu ae korakora aei. E tuangiia kain te Aro n taai akekei, “Tariu [ao mwaneu] ti aki ti na nako ni korakora ni kakoroa bukina? Wakinako ao tai kerikaki. Ninikoria, tariu [ao mwaaneu]; ao waaki, waaki nakon te tokanika! E riai nanomi ni kimwareirei, ao n rangi ni kukurei.” (Reirei ao Berita aika Tabu 128:22).
Kukurei ni bwaai ake kam rinanona n ami tai ni mitinare ngkai kam tangira te Atua ao n tangiriia kain rarikimi. Aio te tai ni kimwareirei ao n rinanon kakukurei aika akea tokiia ao te rau rinanon Iesu Kristo.
1.1
Ongotaeka
Ana reirei ni koaua Iesu Kristo bon te ongotaeka. E reirei te Tia Kamaiu, “Ngkana kam tangirai, ao kam na tou mwin au tua” (Ioane 14:15). Kawakinan tuua nanona bwa ko anga ma nanom ao ni kakaonimaki nakon te bwai are e butiiko te Uea ibukina bwa ko tangiria ao ko karaoia naba ma te “kimwareirei” (I-Korote 1:11) ao ni “kimwareirei n nanona te nano ae ti teuana” (Makuri 2:46).
Iesu Kristo bon te banna ni katooto n te kakaonimaki ae kororaoi. E ti karaoa ana kantaninga te Tama. Iriria man karaoan am kabanea n tamaroa ni kawakin Ana tua ao ni maiuakinan te kainibaire ibukiia mitinare. Bwainakin te kakaonimaki ao te ongotaeka naba nanona bwa kona kataia n reiakin, rikirake, ao ni kaeti kaairua ni waekoa, ao ni butimwaai bukintaeka ibukin am mwakuri.
Am tia kairiiri n te mition e na teimatoa ni buokiko n reiakina aron karaoan reirei n te aeniboki aei.
Kona bon mano riki ngkana ko iri tua ao kainibaire ibukiia mitinare ao ni kabongana am iango. Ma ataia bwa e ngae ngke ko kawakin tua, ko kona n rinanon kangaanga, aoraki, ke n ikoaki (taraa Ioane 16:33). Te Tia Kamaiu e rinanon bwaai aikai ni kabane (taraa Aramwa 7:11–12; Reirei ao Berita aika Tabu 122:8), ao E berita, “I bon aki kitani ngkami ni motiki roomi: I a okiri ngkami” (Ioane 14:18).
Te Atua e tangiriko. Rineia bwa kona kawakin tua ibukina bwa ko tangira te Atua. Tai kataia ni karaoa te boraraoi ma te Uea ao ni kantaningai kakabwaia aika onoti man bitakin bwaai ake a kainnanoaki mai iroum. Bwaai ake a kainnanoaki ake ko kantaningai bwa ana kamatoai a bon kariaiakaki man te Moan Beretitentii ao te Kooram n Abotoro n te Tengaun ma Uoman ao a kuneaki inanon kainibaire aikai. Te katooto, tai kataia ni boraraoi ma te Uea man moantaaim n uti, n otinako n aki mooi ke n amwarake (n riaon te aki mamatam n te namwakaina), ke ni katibanakoa te bong ni katauraoi.
1.2
Kainibaire ibukin te Maiu
Te Atua e kaoiko bwa kona kabanea nanom Nakoina rinanon nako maium. Kainibaire n te mition n aron te kamatebwai i bon iroum, katean te kouru, ao kabonganaan raoi rabakau aika a boou n ae raoiroi e na kakabwaiako n am mition ao e na buokiko n nikiran maium.
Kariaia bwa tua inanon koroboki aika a tabu, reirei inanon Taetaekina Au Euangkerio: Te Kairi nakon Aia Ibuobuoki Mitinare, (2019), ao aroia mitinare ae katauaki ake a kamatataaki n te boki aei bwa a na riki bwa tuua ni kairiiri. Ngkai ko irii ana tua te Atua ao ana kainibaire, E na kaetiko, kakabwaiako, ao e na kairiko rinanon nako maium.