3
Misinari Fasin
3.0
Fas Toktok
Seksen ia i tokbaot ol standet blong fasin blong wan misinari mo ol kwaliti olsem hemia blong Kraes we oli wantem luk yu yu praktisim mo developem long taem blong misin blong yu taem yu stap kam wan disaepol blong Jisas Kraes we i givim moa taem mo tingting. Olsem we profet Moronae i bin talem long kaonsel blong hem: “From mi tingbaot toktok blong God we i talem se, tru long ol wok blong olgeta bae yufala i save olgeta; from sapos ol wok blong olgeta oli stap gud, ale oli gud tu” (Moronae 7:5).
3.1
Fasin Olsem Hemia blong Kraes
Prea mo wok blong developem ol fasin olsem hemia blong Kraes olsem we oli tokbaot insaed long ol skripja mo insaed long Prijim Gospel blong Mi, we i tekem ol fasin blong save talem tangkyu, stap kaen, gat lav, putum tingting i stap daon, save wet longtaem, save andastanem man, mo fasin blong stap obei. Wetem help blong Sevya, mo wetem ol tru hadwok blong yu we yu mekem wetem strong tingting, yu save developem ol fasin olsem hemia blong Kraes (luk long Mosaea 3:19).
Gat kaen fasin, lukluk long gud saed blong ol samting, mo gat fasin blong leftemap tingting blong man. Gat tingting long situesen blong wanwan man o woman, mo askem yuwan ol kwestin olsem olgeta ia:
-
?Hem i let finis o i eli tumas blong save ringim man o woman ia? ?Bae mi stopem wan famli taem o wan taem we wan i gat blong hemwan?
-
?I gat wan wei we mi save help long situesen ia?
-
?Bae aksen ia o toktok ia bae i mekem man i sem, o bae i mekem man i filim se hem i no naf, o bae i mekem man i harem nogud?
-
?Wanem nao i stret blong mekem long kalja ia?
Yu yu wan ges insaed long eria ia we yu stap wok long hem, mo yu mas tritim ol pipol mo ol ples wetem respek mo fasin blong talem tangkyu. Respektem ol kastom, ol bilif mo ol praktis blong relijin, mo ol tabu ples insaed long eria blong yu long evri taem. Lukaot gud blong ol aksen blong yu oli no mekem eniwan i harem nogud. Tingbaot se, wanem we yu talem mo wanem yu mekem, man i save harem, lukluk, mo oli save rekodem.
Blong moa infomesen luk long seksen 7.3, “Respect for Others,” mo Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 38.6.14, “Prejudice,” insaed long Gospel Laebri.
3.2
Stap Klin Inaf blong Go long Tempol
Lod Jisas Kraes i stap invaetem yufala blong “mekem yufala i rere, mo mekem yufala i kam tabu; yes, mekem hat blong yufala i kam klin evriwan, mo klinim ol han mo leg blong yufala long fored blong mi, blong mekem se mi mekem yufala i klin” (Doktrin mo Ol Kavenan 88:74). Pat ia blong yufala i rere i tekem tu blong stap kipim ol kavenan blong yu we yu bin mekem insaed long tempol.
3.2.1
Ol Tempol Kavenan
Blong stap kipim ol tempol kavenan blong stap obei, mekem sakrifaes, mo konsekresen (givim evri samting) bae i givim yu paoa, mo bae i helpem yu blong kam moa olsem Sevya.
Iven sapos i no gat wan tempol insaed long misin blong yu, holem wan tempol rekomen we i laef i stap blong helpem yu blong tingbaot ol kavenan blong yu. Askem misin presiden blong yu blong gat wan tempol rekomen intaviu bifo rekomen blong yu i nomo laef.
3.2.2
Tempol Wosip
Sapos i gat wan tempol we i stap kolosap, misin presiden blong yu i save letem yu mo ol nara misinari blong oli go long tempol wanwan taem long priperesen dei.
Blong gat moa infomesen, luk long seksen 7.4, “Go long Tempol.”
3.3
Loa blong Jastiti
I gat wan tempol kavenan we yu yu bin mekem, hem i blong stap obei long loa blong jastiti. Mekem evri samting we yu save mekem blong protektem yuwan, kompanion blong yu, mo ol narawan blong oli no foldaon long temtesen long saed blong seks we i save lidim man blong brekem tabu kavenan ia. Taem wan i mekem samfala samting we i brekem loa blong jastiti, long sam eria, ol samting ia tu oli save go agensem loa mo i wan kraem.
Yu mas stap longwe long eni tingting o aksen we bae i seperetem yu long Spirit blong God. Hemia i tekem, be i no stop long fasin blong mekem adaltri; fasin blong slip wetem man o woman bifo long mared; sem seks aktiviti; seks long maot; fasin blong wekemap ol filing long saed blong seks; fasin blong tajem man o woman long fasin we i no stret; sendem o kasem ol mesej, ol pikja, o ol vidio we oli nogud o i soem seks; fasin blong wan i tajem tabu pat blong hemwan bakegen long fasin blong gat seks, mo stap lukluk o yusum ponografi (luk long 7.5.3). Luk long Blong Ol Yut Oli Kam Strong, “Bodi blong yu i tabu,” 22–29, blong gat sam moa infomesen.
Lod i bin tijim se: “Setan i wantem blong prapa spolem samting” (Doktrin mo Ol Kavenan 132:57) mo mekem yu yu “save harem nogud olsem hem” (2 Nifae 2:27). Bambae Hem i yusum ol pipol, ol media we oli no stret mo gud, mo ol nara temtesen blong save trikim yu, mekem yu fas long trap, tok nogud agensem laef blong yu, mo i save mekem yu yu sem. Eksampol: yu mas lukaot gud long olgeta we oli save askem mane blong mekem se oli no talemaot se yu yu bin sendem ol pikja o ol mesej we i no stret.
Sapos yu yu gat trabol blong kipim olgeta standet ia, o sapos wan i stap tok nogud o mekem samting nogud agensem laef blong yu, askem Lod blong i helpem yu mo toktok kwik wetem misin presiden blong yu.
3.4
Fasin blong Stap Ones
Blong stap klin inaf blong go long tempol, i minim tu blong stap ones long evri samting we yu stap mekem wetem ol narafala man. Long misinari seves, hemia i tekem:
-
Blong stap talem trutok, speseli long misin presiden blong yu long saed blong fasin blong yu, testemoni, fasin blong wok, mo helt blong yu long saed blong filing mo bodi.
-
Blong stap givim ol ripot we oli stret evriwan, insaed long ol wik ripot blong yu, abaot wok blong yu mo wei we yu bin stap spendem taem blong yu truaot long wik.
-
Blong stap yusum ol misin mane wetem fasin we i soem se yu yu responsibol, mo givim ol risit we oli stret gud.
-
Blong oli save trastem yu mo neva givim wan giaman ripot o wan giaman infomesen abaot eniwan, mo i tekem kompanion blong yu tu.
-
Blong stap respektem ol narawan taem we yu no boro eni samting, yu no tekem o yusum ol samting we i blong wan man o woman (mo i tekem tu ol klos, ol buk, ol lektronik tul, mo ol jiulri) sapos yu no askem fastaem.
3.5
Mekem Samting wetem Ol Nara Pipol
Sevya i bin tijim se: “Hemia i komanmen blong mi: Se yufala i mas lavlavem yufala, olsem we mi mi lavem yufala” (Jon 15:12). Jusum blong folem eksampol blong Sevya mo mekem ol samting long ol wei we i gat gud fasin long hem, long ol wei we i sef, mo i stret folem situesen.
3.5.1
Ol Jeneral Standet blong Mekem Samting wetem Ol Adalt
Bildimap tras mo ol rilesensip we oli gat mining wetem olgeta we yu stap wok wetem olgeta, mo i tekem tu ol pipol we yu stap tijim olgeta, ol nara misinari, mo ol lokol memba. Yu mas mekem samting long wan profesonol fasin mo stap kaen, mo yu mas folem olgeta standet ia:
-
Oltaem, stap wetem kompanion blong yu.
-
Yu no givim advaes long ol adalt abaot ol problem blong olgeta. Sendem ol memba oli go luk bisop sapos oli nidim sam advaes. Sapos yu filim se wan blong wan nara fet i nidim help wetem sam problem we oli blong hemwan, toktok long misin presiden blong yu.
-
Stap longwe long ol situesen we i save putum yu long denja, long saed blong bodi o long saed blong spirit, o ol situesen we man i save andastanem i rong.
-
Yu no krip o joen wetem eniwan long wan fasin we i no stret nating. Limitim hao yu kontak wetem wan we i oposit long jenda(seks) blong yu, i go long sekhan nomo.
-
Oltaem yu mas mekemsua se i gat wan nara adalt we i sem jenda (seks) long yu we i stap wetem yu mo kompanion blong yu taem we yu stap visitim wan (fes tu fes), tijim wan (fes tu fes), taem yu travel o kakae wetem wan we jenda blong hem i oposit long yu. Yu mas askem misin presiden blong yu i save apruvum blong letem wan taem olsem.
-
Kipim lanwis blong yu i gud mo gat hae respek, mo no stap yusum ol slang o toktok olbaot. Yusum ol stret taetol taem yu stap toktok long ol nara pipol. Eksampol: Yusum taetol ia “Elda” o “Sista” taem yu stap toktok long ol nara misinari blong soem respek long koling blong olgeta.
3.5.2
Ol Jeneral Standet blong Mekem Samting wetem Ol Pikinini
Blong mekem se yu yu sef, mo ol pikinini oli sef, yu mas folem olgeta gaedlaen ia long wan strik fasin:
-
Oltaem, stap wetem kompanion blong yu.
-
Neva stap yuwan wetem eniwan we i no kasem 18 yia yet.
-
Lukaot gud taem yu stap plei wetem ol grup blong ol pikinini, olsem taem yu joenem wan futbol gem o ol nara gem. Yu no mekem wan samting we bae i man i lukluk long wan rong wei.
-
Taem we i posibol, askem raet blong papa mo mama blong save mekem samting wetem wan pikinini.
-
Yu no giligili long ol pikinini, yu no jenisim napkin o daepa blong ol pikinini, yu no karem o haggem ol pikinini, o yu no letem ol pikinini oli sidaon long leg blong yu. Olgeta aksen ia, bae man i save luk se i nogud, o i save tekem se i nogud.
-
Wetem kaen fasin, talem no taem wan i askem yu blong lukaot long eni pikinini i nomata hamas yia blong pikinini ia.
-
Yu no tekpat long ol seves aktiviti we bae yu stap yuwan wetem ol pikinini (luk long 7.2.2).
3.6
Aktiviti blong Pasem Taem
Yu save lan blong lavem moa ol pipol we yu stap wok blong olgeta taem yu gat wan tru intres long kalja, histri, graon mo tradisen blong olgeta, taem we yu stap go visitim ol lokol ples we i gud blong visitim long taem blong ol priperesen dei (luk long 2.5).
Askem olgeta we yu stap mitim olgeta blong givim nem blong sam ples we i sef blong yu go visitim. Jusum ol aktiviti we oli save leftemap tingting blong yu mo i save helpem yu blong rilaks. Ol ples we oli stret blong visitim, oli ol ples olsem olgeta ia, be i save gat sam moa tu:
-
Ol ples blong histri mo kalja
-
Ol miusiom mo ol ples we oli soem ol samting
-
Ol ples we oli kipim animol mo ol pak
3.6.1
Ol Standet blong Jeneral Aktiviti blong Pasem Taem
Traem blong stap longwe long ol bigfala grup blong kam tugeta blong ol misinari long ol pablik ples. Plante taem, hemia i minim se yufala i no sapos blong kam tugeta long wan saes grup we i bigwan moa bitim saes blong distrik we yufala i stap long hem. Yu no putum ae blong man i kam long yu, o yu no mekem man i filim se yu yu moa strong bitim hem.
Yusum ol trak blong misin blong ol aktiviti we misin presiden nomo i givim raet from.
Eksasaes mo muvmuv blong kipim bodi blong yu i fit blong mekem misinari wok. Plei spot long ol wei we i mekem se yu yu stap longwe long fasin blong kasem kil o taed bigwan.
3.6.2
Ol Aktiviti we Yu No Save Mekem
Oltaem yu mas stap sef mo yusum gud tingting blong yu taem yu tekpat long ol aktiviti blong pleiplei. From se ol misinari oli bin kasem ol bigfala kil taem oli bin tekpat long ol aktiviti we i gat denja long ol, yu no mas tekpat long ol aktiviti long taem blong misin blong yu we i gat ol bigfala denja long ol. Olgeta aktiviti ia, oli olsem olgeta ia, be i save gat sam moa tu:
-
Kontak spot, jimnastik, winta mo wota spot (mo i tekem blong swim tu)
-
Klaem long maonten mo klaem long klif o hil
-
Ron long ol moto mo ron long hos
-
Ron long ol praevet bot o plen
-
Holem masket o nara samting olsem
-
Yusum ol faeawok o ol samting we oli save faerap
Wajem vidio ia blong gat moa infomesen abaot sefti long pleiplei.
3.6.3
Media
Jusum media we oli apruvum mo i stret blong invaetem Spirit mo blong helpem yu blong mekem stamba wok blong yu olsem wan misinari. Hemia i minim:
-
Blong stap yusum sosol media, ol ap blong mobaelfon, mo onlaen media we misin blong yu i apruvum blong stap tijim gospel o blong toktok wetem famli mo ol fren blong yu (luk long 3.9).
-
Stap longwe long televisen, ol muvi, ol vidio gem, mo ol vidio we oli givim raet from.
-
Stap jusum ol odio buk, miusik, mo ridim ol buk we i mekem fet blong yu long Jisas Kraes i kam antap moa. Oli mas tabu, invaetem Spirit, mo leftemap tingting (luk long Jeneral Hanbuk, 19.1).
Lukluk i gobak long ol teknoloji standet blong misin blong kasem moa infomesen( luk long 7.5). Toktok raon long ol kwestin abaot media wetem ol misin lida blong yu.
3.6.4
Ol Tul blong Miusik
Sapos misin presiden blong yu i givim raet from, yu save tekem wan miusik tul i go long misin fil. Miusik tul ia i no mas wan sas tul, i isi blong tekem i goraon, mo i save go wetem sutkes long plen. Miusik tul ia i mas stret blong yusum long ol Sandei miting (luk long Jeneral Hanbuk, 19.3.6).
Yu save praktis long miusik tul ia long priperesen dei, mo long ol nara taem we misin presiden i save talem long yu. Taem we yu stap plei long miusik tul ia, tingting long neba blong yu mo ol nara misinari, mo olsem wanem hemia i save spolem olgeta o no. Kaen miusik we bae yu plei long hem long miusik tul ia, bae i tabu, i gat hae respek, mo i stret long misinari wok.
3.7
Ol Foto mo Ol Vidio
Ol foto oli save helpem yu blong serem eksperiens blong misin blong yu wetem ol pipol we oli stap long hom, oli save helpem yu blong tingbaot ol samting long taem blong misin blong yu. Taem we yu stap tekem ol foto, o stap rekodem ol vidio, lukaot gud blong yu no mekem eniwan i sem, mo hemia i tekem tu ol nara misinari, mo ol pipol we oli gat trabol long saed blong ol jalenj blong mane, sosol laef o long saed blong bodi. Sam pipol bae oli no wantem yu o ol narawan blong yu luk, yu serem, o yu mekem olgeta oli tingbaot wanem i stap long wan foto. Askem raet blong man bifo yu tekem o serem ol foto o ol vidio. Long samfala misin, yu no gat raet blong serem ol foto blong eniwan we yu stap tijim long pablik, hemia from se i gat ol lokol loa long saed blong praevet laef blong man.
Blong tekem sam kaen foto, i save mekem man i harem nogud, mo tu, long sam kalja mo ples, i no folem loa. Samfala eksampol ia, i blong tekem foto blong:
-
Samfala gavman mo ami bilding.
-
Ol sekiuriti ples long ol eapot, ol ples we oli jekem paspot, ol ples blong krosem boda, ol bilding blong ol konsulet, mo ol embasi.
-
Ol wokman blong loa o ami.
-
Ol pipol, ol bilding mo ol aktiviti blong ol nara fet.
-
Ol topik blong kalja we i tabu, mo tu, ol pipol we oli werem ol kastom klos.
-
Ol pipol we oli gat hadtaem mo gat pua laef, sik, o disabiliti.
Olsem wan jeneral gaedlaen, yu no tekem foto blong ol samting, ol ples, o ol pipol we oli putum long lis antap ia. Toktok raon long eni kwestin we yu save gat wetem ol misin lida blong yu.
Jos tu i gat ol spesifik polisi blong stap tekem ol foto long ol mitinghaos:
-
Yu no tekem pikja o rekodem vidio insaed long japel blong ol mitinghaos.
-
Yu no tekem foto, o sendem foto, o rekodem vidio blong ol tabu odinens, we i tekem tu sakramen, mo ol baptaes mo ol konfemesen.
Wajem vidio ia blong gat moa infomesen abaot ol gaedlaen blong stap tekem foto mo ol vidio.
3.8
Yusum Teknoloji
Lod i stap talem: “Luk, bambae mi mekem wok blong mi i muv hariap moa long stret taem.” (Doktrin mo Ol Kavenan 88:73). Teknoloji i save wan tul blong serem gospel blong Jisas Kraes mo oli mas yusum long wan stret mo gud fasin.
Blong gat moa infomesen, luk long seksen 7.5, “Teknoloji.”
3.9
Komunikesen wetem Famli, Ol Misin Lida, mo Ol Fren
Famli blong yu, ol misin lida mo ol fren blong yu oli save stap olsem wan bigfala sapot long yu long misin blong yu. Toktok long dei blong stap rere wetem famli blong yu mo ol pipol blong ol narafala eria, we i tekem tu ol memba mo olgeta we yu bin tijim olgeta. Mekem olgeta oli kam moa strong taem yu serem ol eksperiens blong yu long saed blong spirit mo testemoni blong yu.
Taem yu toktok wetem ol nara pipol (we oli no ol famli blong yu), yu mas limitim storian blong yu long wan imel o leta nomo mo i no long fon o vidio jat, be sapos nomo we misin presiden blong yu i apruvum.
Putum taem blong yu faswan long priperesen dei blong yu toktok wetem papa mo mama blong yu, mo misin presiden afta.
Stap waes blong skelem hamas taem yu yusum blong storian. Taem yu stap mekem ol desisen ia, yu mas gat tingting long kompanion blong yu, mo tu, yu mas kipim long maen wanem i stamba tingting blong misinari seves ia.
Yu save ridim eni komunikesen we yu kasem long taem blong wik taem we yu gat taem blong mekem. Yu save ansarem ol komunikesen long priperesen dei nomo, be nomo sapos i gat wan imejensi (luk long 3.9.7).
3.9.1
Famli
Yu save toktok wetem famli blong yu long taem blong wik priperesen blong yu tru long ol leta, ol imel, ol teks mesej, ol onlaen mesej, ol fon kol, mo ol vidio jat.
Yusum fasin blong komunikesen we oli apruvum mo i wok gud moa long yu mo famli blong yu, mo wan we i no sas tumas blong mekem se yu no ova long bajet blong yu we yu gat blong yusum long wan manis. Hemia bae i jenis folem ol situesen, ol ples, mo ol taemtebol.
Sapos papa mo mama blong yu i stap laef long ol defren ples, bae yu save toktok long papa mo long mama i seperet long ol priperesen dei.
Mo tu, oli leftemap tingting blong yu blong yu kontaktem famli blong yu long ol spesel taem, olsem long Krismes, long dei blong Ol Mama, long dei blong Ol Papa, mo betdei blong papa mo mama blong yu, mo ol nara holidei we oli impoten long homkantri blong yu o long kalja blong yu.
Misinari nao bae i statem evri teks mesej storian, onlaen mesej, telefon kol mo vidio jat, be i no papa o mama. Sapos wan famli i nidim blong kontaktem yu, oli mas kontaktem misin presiden fastaem.
Taem we yu stap toktok wetem famli blong yu tru long telefon o long vidio storian, yu mas waes blong save se bae yu storian i longwan olsem wanem. Taem yu stap mekem ol desisen ia, yu mas gat tingting long kompanion blong yu, mo tu, yu mas kipim long maen wanem i stamba tingting blong misinari seves ia.
3.9.2
Misin Presiden
Raetem wan leta i go long misin presiden blong yu evri wik long priperesen dei. Plante taem, bambae yu sendem wan leta i go long hem tru long Missionary Portal.
Misin presiden blong yu nomo bae i luklukbak long wik leta blong yu. Yu mas open mo stap ones blong mekem se hem i save andastanem eni wari we yu gat, mo bae i save givim ol stret advaes mo tingting. Plis, yu mas save se bambae hem i ridim leta blong yu, be bae hem i no save ansa long evri leta.
Sapos yu kasem sam impoten nius we i kam long hom we i nidim blong yu lukluk long hem kwiktaem, talem long misin presiden blong yu mo jekem wetem hem bifo yu kontaktem famli blong yu long ol dei we oli no ol priperesen dei, o i no wan spesel dei.
3.9.3
Stap Toktok Wetem Ol Pipol Insaed long Misin blong Yu
Taem yu stap kontaktem pipol blong ol nara eria long misin blong yu,, meksua se toktok storian blong yu i tokbaot nomo ol samting we i mekem stamba tingting blong misin blong yu i kamtru. Folem ol standet we oli stap long seksen 3.5.1, “Ol Jeneral Standet blong Mekem Samting wetem Ol Adalt,” mo long Stap Yusum Teknoloji long Sef Fasin, mo tingbaot blong serem storian wetem kompanion blong yu taem yu stap tekpat long ol komunikesen ia.
3.9.4
Ol Paket mo Ol Leta
Samfala misin, oli save yusum adres blong misin ofis blong save kasem ol leta o paket we oli sendem tru long postofis, mo yu save yusum olsem adres blong yu. Praktis ia i save protektem sefti blong yu, mo i save help blong stopem fasin blong stil mo ol paket we oli lus from ol transfea. Plis folem evri gaedlaen we yu kasem long ol kaen kes olsem.
3.9.5
Ol Misinari Eksperiens wetem Ol Pipol blong Homples
Maet bae yu save wan long hom we eksperiens blong hem i save helpem wan we yu stap tijim long misin blong yu. Yu mas askem misin presiden blong yu blong kasem raet blong man o woman ia blong yu save serem eksperiens mo testemoni blong hem. Toktok wetem man o woman ia abaot bes teknoloji komunikesen blong yusum.
Sapos famli o fren blong yu long hom i wantem lanem moa abaot gospel blong Jisas Kraes, misin presiden blong yu i save givim raet long yu blong tijim olgeta mo yusum teknoloji from hemia (luk long 7.5.4).
3.9.6
Ol Visit blong Ol Famli mo Ol Fren
Plante taem, ol famli mo ol fren oli no sapos blong visitim yu long taem blong misin blong yu. Be, anda long samfala spesel situesen nomo bae misin presiden blong yu i save apruvum blong letem wan taem olsem. Ol visit ia, oli mas sot, mo oli no mas stopem ol misinari diuti blong yu. Wan visit ia, i no mas mekem kompanion blong yu i harem nogud long hem, mo i semmak wetem ol nara misinari, o ol pipol we yu stap tijim. Tekem kea blong mekem se ol kaen visit olsem oli no pulumaot ol tingting blong yu oli gowe long seves blong yu, o i no mekem se i gat problem blong mane long famli blong yu.
3.9.7
Ol Imejensi
Sapos famli blong yu i talem long yu abaot wan imejensi long hom, letem ol misin lida blong yu oli save long hem blong mekem se oli save givim sapot long yu. Ol misin lida bae oli kontaktem famli blong yu sapos yu gat wan imejensi situesen.