Ang Nawala nga Karnero [The Lost Sheep], ni Yongsung Kim, havenlight.com

Maayong Kahimtang sa Panglawas

4.0

Pasiuna

Ang misyonaryo nga buhat nagkinahanglan og pisikal ug emosyonal nga pasalig. Ang mga sumbanan dinhi niining seksiyon ug diha sa Pagpahiangay sa Misyonaryo nga Kinabuhi makatabang nimo sa pag-andam sa imong panghunahuna ug panglawas aron mas maayong makaserbisyo sa Ginoo ug sa Iyang katuyoan. Rebyoha kanunay kining mga sumbanan sa tibuok nimong misyon.

4.1

Nutrisyon ug Pag-andam sa Pagkaon

Tukma nga pag-inom sa tubig ug ang nutrisyon importante sa imong kahimtang sa panglawas.

4.1.1

Kinatibuk-ang mga Lagda sa Nutrisyon

Palihog sunda ang kinatibuk-ang mga lagda sa nutrisyon sa ubos:

Pag-inom og 6 ngadto sa 12 ka baso (48 hangtod sa 96 ka ounce, o 1.5 hangtod 3 ka litro) nga limpyo nga tubig kada adlaw. Lagmit magkinahanglan ka og dugang tubig ug asin kon nagsingot ka og maayo sa tibuok adlaw o atol sa pag-ehersisyo.
Kaon og balanse nga mga pagkaon lakip sa mga utanon, mga prutas, mga lugas, makaayo sa lawas nga mantikilya, ug protina.
Limitahi ang mga junk food, karbonato [carbonated] nga mga ilimnon, giproseso nga mga pagkaon, ug pagkaon gikan sa fast food nga kan-anan.

4.1.2

Luwas nga Pag-andam sa Pagkaon

Sunda ang mosunod nga mga lagda aron sa pagsiguro nga ang imong pagkaon giandam sa luwas nga paagi:

Hugasi ang mga dapit nga andaman sa pagkaon gamit ang limpyo, init, sinabonan nga tubig sa dili pa ug pagkahuman magluto.
Limpyohi ang mga gamit sa pagluto ug sa pagkaon gamit ang limpyo, init, sinabonan nga tubig kada human og gamit.
Ilain ang hilaw nga karne, manok, mga itlog, ug pagkaon gikan sa dagat (seafood) gikan sa ubang pagkaon samtang magluto.
Lutoa og maayo ang karne, isda, ug manok.
Likayi ang pagkaon og dili pa kaayo luto o hilaw nga mga karne.
Paniti ang hilaw nga mga prutas ug mga utanon, o hugasi kini og maayo.
Isulod sa refrigerator ang mga salin ug mga pagkaon nga mapan-os. Aron malikayan ang pagkasakit, ilabay ang bisan unsang butang nga milapas na sa tagal nga girekomendar diha sa sudlanan.
Paningkamoti nga malikayan ang pagkaon gikan sa mga namaligya diha sa kadalanan, tungod kay ang kalidad sa pagkaon ug seguridad sa pag-andam wala mahibaloi.

Gamita kanunay kining mga lagda, bisan kon ang uban (lakip sa ubang mga misyonaryo) mosulay sa pagkombinser nimo nga kini dili importante o sobra ra.

Tan-awa kining bidyo alang sa dugang nga impormasyon mahitungod sa tukma nga nutrisyon ug seguridad sa pagkaon.

17:51

4.1.3

Luwas nga Tubig ug mga Produkto sa Gatas

Ang limpyo lang nga tubig ug giproseso nga mga produkto sa gatas sa hayop ang luwas nimong imnon o kaunon.

Sunda kini ug ang bisan unsang mga dugang nga lagda sa imong misyon:

Paggamit og salaan sa tubig kon ikaw nagserbisyo sa area nga walay purified nga tubig.
Paggamit og limpyo nga tubig sa pagsepilyo sa imong ngipon ug sa paghugas ug sa pag-andam sa pagkaon.
Kaon lang sa giproseso nga mga produkto gikan sa gatas sa hayop.

Pagmatngon nga sa ubang mga dapit, ang mga ice cube ug mga soft drink sa mga kan-anan mahimong gigamitan og dili purified nga tubig. Pagmainampingon, ug ayaw paggamit og ice o pag-inom og mga soft drink kon kini lagmit dili luwas.

4.2

Pag-ehersisyo

Ang pag-ehersisyo makatabang nimo nga magpabilin nga himsog ug makatabang sa pag-alibyo sa kaugtas. Himoa kini nga imong tulumanon sa kada adlaw (tan-awa sa 2.4.2). Kontaka ang opisina sa misyon kon ikaw adunay bisan unsang mga pangutana. Sunda ang piho nga mga lagda sa misyon ingon man ang mosunod nga kinatibuk-ang mga lagda:

Himoa ang lain-laing mga ehersisyo atol sa semana, lakip ang pagpalig-on sa kasingkasing [cardio], pagpakusgan, ug pagbansay sa pagpahumok sa lawas. Alang sa imong seguridad, likayi ang pag-alsa og bug-at nga mga butang [weights].
Kon aduna kay mobile nga himan, mahimo kang mogamit og app nga aprobado sa imong mga lider sa misyon aron maplano ang imong ehersisyo.
Ikaw kinahanglang dili mag-ehersisyo sa publiko o sa komersyal nga mga gym.

4.3

Pagdumala sa Kaugtas [Stress]

Ang misyonaryo nga buhat adunay dako nga gilaoman, ug ang pagbati og kaugtas sa matag karon ug unya normal ra. Maandam nimo ang imong lawas ug hunahuna aron mas madumala ang kaugtas pinaagi sa maayong paggamit sa suporta sa pamilya (tan-awa sa 3.9.1) ug pinaagi sa pagpraktis sa himsog nga pamatasan sa pagkaon (tan-awa sa 4.1.1), regular nga pag-ehersisyo (tan-awa sa 4.2), regular nga pagkatulog, pagpahulay, ug pagka-espirituhanon (naglakip sa pag-ampo, pagpamalandong, ug pagtuon).

Sa tibuok nimong misyon, gamita ang Pagpahiangay ngadto sa Misyonaryo nga Kinabuhi aron ka matabangan nga madumala ang imong kaugtas ug aron matabangan ang uban nga mga misyonaryo. Kon imong gibati nga ikaw o ang imong kompanyon naglisod sa pagdumala sa kaugtas sa himsog nga pamaagi, o kon adunay usa ka emerhensiya, kontaka ang imong mga lider sa misyon.

Kon giresitahan ka og tambal alang sa kaugtas, sunda ang giresita ug ang mga gitudlo sa imong doktor.

Si Apostol Pablo namalandong sa iyang misyonaryo nga mga paningkamot ug naghunahuna nga ang Ginoo mopaluyo, moabag, ug motabang niadtong kinsa mangita Kaniya. Ang Ginoo dili gayod mobiya kanimo. Si Pablo mitudlo:

“Ang Dios nga miingon, Gikan sa kangitngit modan-ag ang kahayag! mao ang Dios nga nagpadan-ag sa iyang kahayag sulod sa atong kasingkasing aron paghatag kanato sa kahibalo mahitungod sa himaya sa Dios nga nagdan-ag diha sa nawong ni Jesukristo. … Gisakit kami sa tanang paagi, apan wala gayod mapukan; naglibog apan wala gayod kawad-ig paglaom; gilutos kami sa mga tawo apan wala gayod biyai sa Dios ug bisan tuod gidagmalan sa makadaghan, wala kami mamatay. … Misulti ako tungod kay mituo man ako. Sa samang diwa sa pagtuo, misulti usab kami tungod kay mituo man kami. … Kining gamay ug lumalabay nga kalisdanan nga among giantos naghatag kanamog labihan kadako ug walay kataposang himaya nga labaw kaayo kay sa mga kalisdanan” (2 Mga Taga-Corinto 4:6, 8–9, 13, 17).

Alang sa dugang nga impormasyon tan-awa sa seksiyon 7.6, “Malisod nga mga Sitwasyon.”

4.4

Medikal nga Pag-atiman

Atimana ang imong pisikal ug emosyonal nga kahimsog sa seryoso nga paagi. Pahibaloa ang medikal nga koordinitor sa tanang isyu nga medikal (sama sa mga tambal nga imong gitumar, sa imong mga allergy, o mga kalihokan nga kinahanglan nimong likayan) aron masuportahan ka sa imong panginahanglan. Kontaka ang opisina sa misyon kon aduna kay bisan unsang pangutana mahitungod sa mga kabalaka sa kahimsog.

Alang sa imong seguridad:

Ayaw ipakigbahin ang giresita nga mga tambal ngadto ni bisan kinsa o mogamit og giresita nga mga tambal sa laing tawo.
Ayaw panghangyo sa pamilya o mga higala sa pagpadala nimo og mga tambal nga gidili diha sa nasod o dapit diin ka nagserbisyo.

Kon aduna kay mga emerhensiya sa panglawas, gamita ang sentido komon alang sa imong dinalian nga kasiguroan o pag-atiman. Tawag sa lokal nga emergency services (sama sa 911 sa Estados Unidos) gawas kon nahatagan ka og laing mga instruksyon diha sa imong misyon. Sa labing dali nga panahon, kontaka ang imong mga lider sa misyon.

Kon nagkinahanglan ka og medikal nga pag-atiman nga dili pang-emerhensiya, tawaga dayon ang medikal nga koordinitor sa misyon. Ang mga pagbisita nga dili pang-emerhensiya kinahanglan maaprobahan og una sa medikal nga koordinitor. Ang medikal nga koordinitor makatudlo nimo ngadto sa usa ka tawo [doktor,nurse,ug uban pa] nga makahatag og tukmang pag-atimang medikal nga nahimutang diha sa imong area.

Alang sa dugang nga impormasyon tan-awa sa seksiyon 7.7, “Mga Kabalaka sa Pisikal ug Mental nga Kahimsog.”

4.5

Peligro nga mga Sitwasyon ug mga Hulga

Daghang posible nga mga peligro ang mahimong malikayan gamit ang sentido komon ug pinaagi sa pagsunod sa mga sumbanan sa misyon, lakip sa pagpaduol sa imong kompanyon diin imo siyang makita ug madungog. Hinoon, ang mga tawo mahimong mopasakit gihapon nimo bisan kon maningkamot ka nga mahimong luwas. Kon adunay usa ka problema, ireport dayon kini ngadto ni bisan kinsa sa imong mga lider sa misyon.

Biya dayon kon ikaw o ang imong kompanyon mibati nga dili komportable sa usa ka dapit, sa tawo, o sa sitwasyon (lakip sa usa ka sitwasyon sa pagtudlo). Paminaw sa espirituhanong mga pag-aghat. Mahimo nimong biyaan ang imong kompanyon kon imong gibati nga siya makapameligro nimo. Kon imong biyaan ang imong kompanyon, tawag dayon ni bisan kinsa sa imong mga lider sa misyon.

Alang sa dugang nga impormasyon tan-awa sa seksiyon 7.8, “Peligro nga mga Sitwasyon.”

4.6

Pinuy-anan

Pagpakita og respeto sa imong pinuy-anan, sa tag-iya sa balay o tigdumala [host], ug sa imong mga silingan. Kon makaguba ka, ikaw ang responsable sa pagbayad alang sa mga pagpaayo gamit ang imong personal nga kwarta. Pakig-istorya sa koordinitor sa pinuy-anan sa misyon kon ikaw adunay mga problema mahitungod sa imong pinuy-anan.

Alang sa dugang nga impormasyon tan-awa sa seksiyon 7.9, “Seguridad sa Pinuy-anan.”

4.7

Transportasyon

Sunda kanunay ang mga lokal nga lagda sa trapiko, mga balaod, ug mga kustombre samtang magbiyahe ka. Gamita ang sentido komon, pagmatngon sa imong mga palibot, sinatia ang imong area, ug sunda ang kinatibuk-ang mga sumbanan sa seguridad dinhi niining tamdanan nga basahon.

Alang sa dugang nga impormasyon tan-awa sa seksiyon 7.10, “Seguridad sa Transportasyon.”

4.8

Kwarta

Ang suporta nga mga pundo sa misyonaryo nagrepresentar sa sakripisyo sa indibidwal nga mga miyembro sa Simbahan. Kini sagrado nga mga pundo, ug kinahanglan gamiton nimo kini sa responsable, matinud-anon, ug uban sa hingpit nga kaligdong nga pamaagi.

4.8.1

Suporta nga mga Pundo sa Misyonaryo

Gamita ang suporta nga mga pundo sa misyonaryo aron sa pagbayad sa personal nga mga aytem sa pagsuporta kanimo diha sa misyonaryo nga buhat. Gawas sa piho nga mga rason na mahimo rang madawat [exception], sa kinatibuk-an kinahanglan imong gamiton ang tanan nimong suporta nga mga pundo sa misyonaryo sa matag bulan. Ayaw pagtigom og kwarta gikan niining mga pundo o ihatag ang kwarta ngadto ni bisan kinsa, lakip ni bisan kinsang tawo sa inyoha. Ayaw pangutang o panghulam og kwarta.

Ang imong badyet alang sa suporta nga mga pundo sa misyonaryo mahimong naglakip sa mosunod:

Mga halad sa puasa nga ibayad ngadto sa ward o branch kon diin ka nagserbisyo.
Pagkaon aron makaandam og sustansyado nga mga pagkaon (tan-awa sa 4.1.1).
Transportasyon, lakip sa gas o pangpubliko nga transportasyon.
Pang-atiman sa buhok ug mga gamit sa personal nga kalimpyo.
Mga gamit sa pagpanglimpyo ug sa paglaba.
Postage o mga galastohan sa internet alang sa sinemana nga komunikasyon sa panimalay (tan-awa sa 3.8).
Limitado nga mga pagkaon sa restawran o sa fast-food.

Dili ka kinahanglang mobayad og ikapulo gikan sa suporta nga mga pundo sa misyonaryo.

Tan-awa sa 4.8.2 alang sa lista sa mga butang nga kinahanglan bayaran gamit ang personal nga mga pundo.

4.8.2

Personal nga mga Pundo

Ang personal nga mga pundo mao ang kwarta nga direktang gipadala diha nimo gikan sa panimalay. Gamita ang personal nga mga pundo alang sa mga aytem nga sama sa:

Pagpalit og sinina ug sapatos.
Pagpalit og bisikleta, pagmintenar, ug mga pagpaayo.
Mga galastohan sa medikal nga dili bayaran sa misyon, sama sa mga naandan na nga bayrunon para sa medikal nga serbisyo nga gilaoman [copayment], normal nga pagpakonsulta sa mata o sa dentista, ug pag-atiman sa mga kondisyon nga diha nang daan.
Mga multa sa trapiko ug sa parking.
Mga pagpaayo sa pinuy-anan kon ikaw ang nakaguba.
Audio o bidyo nga mga himan.
Mga handumanan [souvenir] ug mga gasa.

Ang ikapulo sa personal nga mga pundo nga nadawat ug sa bisan unsa nga kinitaan gikan sa usa ka negosyo o mga pamuhunan sa panimalay kinahanglan bayaran gamit ang personal nga mga pundo ug ipaagi sa imong ward didto sa inyo o ipaagi sa online nga mga donasyon.

4.8.3

Pagbarog sa Kinaugalingong Paningkamot ug Plano sa Paggasto

Himoa ang pagbarog sa kinaugalingong paningkamot atol sa imong misyon pinaagi sa paghimo ug pagsunod og usa ka plano sa paggasto. Kini nga kahanas makatabang ug mopanalangin nimo sa tibuok nimong kinabuhi. Ayaw pangayo sa imong mga kompanyon o sa pamilya alang sa sobra nga kwarta gawas kon kini dinalian.

Ang paghimo ug pagsunod og usa ka plano sa paggasto naglakip sa paghimo og usa ka lista sa tanang butang nga imo gayod nga gikinahanglan nga paliton sulod sa bulan ug dayon pagpili og mga butang nga labing importante ug bayari kini og una. Pilia kanunay kon unsa ang imong gikinahanglan sa dili pa mopili sa unsay imong ganahan.

Kon nagkinahanglan ka og dugang nga kwarta o dunay mga pangutana mahitungod sa galastohan, pakig-istorya ngadto sa sekretarya sa panalapi o sa imong mga lider sa misyon.

4.9

Panamit ug Panagway

Isip usa ka awtorisadong representante ni Jesukristo ug sa Iyang gipahiuli nga Simbahan, ang imong panagway sa kasagaran maoy unang impresyon nga madawat sa uban. Kinahanglan nga nahisubay kini sa sagradong mensahe diin ikaw gitawag sa pagpakigbahin. Sa imong tibuok nga misyon, siguroa nga ang imong panagway ug pamatasan makatabang sa uban nga makatutok niana nga mensahe.

4.9.1

Kinatibuk-ang mga Sumbanan alang sa Panamit ug Panagway

Piho nga mga butang ug mga estilo sa panamit mahimong irekomendar aron mohaum sa kultura ug klima sa imong misyon. Sa adlaw sa pagpangandam, kinahanglang magsul-ob ka og regular nga pangmisyonaryo nga sapot diha sa publiko. Hinoon, kon gikinahanglan para sa usa ka piho nga kalihokan, mahimong mas kaswal ang imong isul-ob. Palihog rebyoha ang mga sumbanan nga makita diha sa ChurchofJesusChrist.org/callings/missionary/dress-and-appearance. Kini nga website naghatag og mga ehemplo sa tukma, propesyonal nga paninina alang sa imong misyon. Ang imong mga lider sa misyon ug ang Kapangulohan sa Area mahimong mousab niini nga mga lagda aron sa paghatag og pagtagad sa lokal nga mga kahimtang.

Tan-awa sa 7.7.4 alang sa dugang nga impormasyon kon unsaon sa pagpanalipod sa imong panit gikan sa mga pinaakan sa mananap ug inseko.

4.9.2

Kinatibuk-ang mga Sumbanan alang sa Pamustura

Sunda ang mga sumbanan sa maayong pamustura:

Kaligo kada adlaw, kon mahimo.
Sepilyohi ang imong ngipon kanunay.
Gamit og deodorant kada adlaw.
Ligoa ang imong buhok kanunay.
Manghugas kanunay sa imong mga kamot, lakip sa dili pa mag-andam og pagkaon ug human mogamit sa kasilyas.
Pamutang og sunscreen.
Pilia ang hapsay, propesyonal nga estilo sa pamuhok nga sayon ra nga imentinar.