Misinari Oganaesesen mo Aktiviti

2.0

Fas Toktok

Lod i bin talem: “ bae yufala i oganaesem yufalawan mo givim wan [wok] long evri man [mo woman]” (Doktrin mo Ol Kavenan 104:11). Seksen ia blong hanbuk i tokbaot oganaesesen blong misin mo i eksplenem olsem wanem yu save wok gud mo laef wetem wan kompanion, tekpat long ol aktiviti blong misin, mekem plan blong evri dei taemtebol, mo givim seves long ol narawan wetem bigfala lav ia blong Kraes (luk long Moronae 7:44–47).

Blong mekem i klia, olgeta standet ia, oli yusum toktok ia, yang misinari lida, blong tokbaot ol misinari we oli gat ol lidasip wok, olsem ol senia kompanion, ol sista trening lida, o ol son lida. Ol Misin Lida i tokbaot misin presiden blong yu, we i holem ol ki, mo waef blong hem.

Olgeta standet ia oli yusum tu ol toktok olsem, bisop, stek presiden, wod, mo stek. Yusum ol gaedlaen ia we oli go wetem mo olsem we i stret long ol branj presiden, ol distrik presiden, ol branj, mo ol memba blong ol distrik.

2.1

Misin Lidasip

Responsabiliti blong yu we i moa impoten long olgeta evriwan, hemia nomata wanem lidasip wok oli givim long yu, hem i blong yu wan misinari we i fetful mo i givim ful tingting mo taem. Kaonsel ia, we i kam long Lod, oli raetemdaon i stap long Doktrin mo Ol Kavenan, mo hem i blong yu tu: “Samting we bambae i moa gud long yu, bae hem i blong yu talemaot fasin blong sakem sin long ol pipol ia, blong yu save tekem ol sol oli kam long mi” (Doktrin mo Ol Kavenan 15:6).

2.1.1

Ol Misin Lida: Misin Presiden blong Yu mo Waef blong Hem

Misin presiden blong yu mo waef blong hem, we tufala i givim seves tugeta olsem ol misin lida blong yu, God i singaotem tufala mo i setem apat tufala blong lidim misin ia. Tugeta, oli lavem mo wok blong yu, tufala i helpem yu blong mekem stamba tingting blong yu olsem wan misinari, mo tufala i help blong kipim yu yu stap sef mo stap hapi.

Ol misin lida blong yu oli serem plante responsabiliti blong misin. Tufala i wok tugeta blong sapotem mo leftemap tingting blong yu, lisin long ol wari blong yu, ansarem ol kwestin blong yu, skelem progres blong yu, mo givim kaonsel. From se misin presiden blong yu i holem samfala prishud ki, hem i stap olsem wan jeneral jaj insaed long misin ia. Ol fasin blong brekem loa long saed blong seks, mo ol nara series sin, yu mas konfesem i go long misin presiden blong yu (luk long Mosaea 26:29–30). Yu mas ones fulwan wetem hem. Bae hem i helpem yu blong sakem sin (luk Blong Ol Yut Oli Kam Strong [2011], 28–29).

Yu save invaetem waef blong misin presiden, wan senia misinari, o misinari kompanion blong yu blong joenem yu long eni intaviu wetem misin presiden. Desisen blong yu blong invaetem wan blong joenem yu, i no mas daonem lav, wari, mo gud tingting we misin lida blong yu i gat long yu.

2.1.2

Misin Presidensi

Misin presiden blong yu i prisaed long misin ia wetem ol ki blong prishud. Hem i wan memba blong misin presidensi we hem i gat tufala kaonsela blong hem.

Olgeta kaonsela long misin presidensi, semmak olsem ol kaonsela long wan stek presidensi o long wan bisoprik, tufala i help blong oganaesem mo help long wok. Ol kaonsela insaed long misin presidensi, oli no lukluk long ol mata we i lukluk se wan misinari i klin inaf o no.

2.1.3

Misin Lidasip Oganaesesen

Misin presiden blong yu i yusum revelesen mo ol ki blong prishud blong oganaesem wok. Hem i givim wok long ol yang misinari blong oli ol trena, ol senia kompanion, ol distrik lida, ol sista trening lida, ol son lida, mo ol asisten. Ol asisten, ol ofis misinari, mo ol nara misinari oli no givim ol lidasip wok, o oli no sendem yu long ol eria we bae yu wok long hem. Be, misin presiden i save kaonsel wetem waef blong hem, o ol asisten blong hem abaot ol wok blong givimaot long ol misinari.

Ol misin lida blong yu, mo ol asisten, ol son lida, mo ol sista trening lida oli ol memba blong misin lidasip kaonsel. Ol lida ia oli kaonsel abaot wei blong lukluk long ol nid blong ol misinari mo oli mekem ol plan blong helpem misin blong progres mo blong muvum wok i go fored.

2.1.4

Ol Responsabiliti blong Lidasip blong Wan Yang Misinari

Ol yang misinari lida, semmak olsem evri misinari, oli folem kaonsel blong Jisas Kraes blong “wok blong [God] wetem ful hat, ful paoa blong tingting, ful maen mo ful paoa blong yufala,” mo blong “tingbaot blong gat fet, klin fasin, save, fasin blong kontrolem yufalawan, fasin blong save wet longtaem, kaen fasin long brata blong yufala, fasin olsem hemia blong God, bigfala hat, fasin blong gat tingting i stap daon, mo fasin blong wok strong wetem strong tingting” (Doktrin mo Ol Kavenan 4:2, 6). Ol lidasip wok we oli givimaot i no givim saen se oli mas givim spesel respek o wan hae posisen, o i soemaot hamas nao wan misinari i klin.

Ol yang misinari lida oli gat responsabiliti ia blong :

Faenem, tijim, baptaesem mo felosip long ol pipol.
Stap olsem wan eksampol blong gat fasin blong stap folem ol standet blong ol misinari (luk long 3.0).
Trenem ol nara misinari mo lidim wok blong jenjenisim ol kompanion (luk long 2.3.1).
Serem infomesen mo daereksen we i kam long misin lidasip kaonsel wetem ol misinari we oli stap lidim.
Lavem mo stap fren wetem ol nara misinari. Helpem olgeta blong luksave hamas hadwok blong olgeta i impoten.
Lisin long ol wari blong ol nara misinari. Givim sapot mo kaonsel.
Stretem ol nara misinari long wan wei we i kaen mo i praevet, olsem we i nid, mo afta, soem wan “lav we i bigwan moa” (luk long Doktrin mo Ol Kavenan 121:41–43).
Wok kolosap wetem ol lokol lida mo ol memba.

Olsem evri misinari, ol elda mo ol sista wetem ol lidasip wok oli mas praktisim lidasip olsem hemia blong Kraes. Sapos fasin blong eni misinari, wetem hemia blong ol yang misinari lida, i luk se i no go wetem ol komanmen mo ol standet blong ol misinari, toktok raon long mata ia wetem misinari. Sapos oli no stretem problem ia, serem ol wari blong yu wetem ol yang misinari lida blong yu, o wetem misin presiden, be i no wetem ol nara misinari, ol memba, o ol fren.

Blong gat moa infomesen abaot ol spesifik wok mo responsabiliti blong ol yang misinari lida (ol trena, ol senia kompanion, ol distrik lida, ol sista trening lida, ol son lida, mo ol asisten blong presiden), luk long seksen 7.1, “Ol Responsabiliti blong Lidasip blong Wan Yang Misinari.”

2.1.5

Ol Responsabiliti blong Yuwan

“Givim ona mo wok strong long ofis blong [yu] i go long Lod” (Jekob 1:19), mo kam blong dipen long yuwan long saed blong spirit, mo “tekem aksen blong [yuwan]” (2 Nifae 2:16) taem yu trastem Lod mo stap folem Spirit. Taem we yu gat ol kwestin mo ol wari:

Praktisim tijing ia blong “stadi gud long hem insaed long maen blong yu; afta, yu mas askem long mi sapos hem i raet,” (Doktrin mo Ol Kavenan 9:8).
Lukaotem blong Lod i soem rod long yu tru long revelesen we i blong yuwan; tru long prea; mo tru long stadi long ol skripja (speseli Buk blong Momon), Prijim Gospel blong Mi, ol tijing blong ol profet we oli stap laef, mo olgeta standet ia.

Sapos yu nidim sam moa help afta we yu praktisim olgeta prinsipol ia, askem kompanion blong yu, o ol yang misinari lida blong yu. Plante taem, oli save helpem yu blong faenem ol ansa blong ol kwestin blong yu, mo helpem yu blong stretem ol wari blong yu. Sapos no, yu save go toktok wetem eniwan long ol misin lida blong yu, papa mo mama blong yu, o hom prishud lida blong yu. Plis, yu no ring o kontaktem ol hedkwota blong Jos. Sapos yu mekem olsem, bambae oli sendem yu i kambak long misin presiden blong yu.

Toktok wetem misin presiden blong yu abaot ol problem long saed blong fasin blong stap klin inaf. Toktok wetem eniwan long ol misin lida blong yu abaot ol kwik sefti problem, olsem fasin blong kilim man, o abius, o ol nara trabol we oli no save stretem wetem ol nara misinari.

Bae i gat ol taem, long taem blong misin blong yu we bae yu faenem i had blong lukluk nomo long wok blong yu from se yu gat ol jalenj, ol problem blong yuwan mo blong famli, o iven tingting long ol eksperiens blong bifo. Hemia oli andastanem. Yu no holemtaet yu, mo yu serem ol wari blong yu wetem kompanion blong yu, ol yang misinari lida blong yu, o wetem ol misin lida blong yu blong kasem sapot.

Tingbaot invitesen blong Sevya: “Lukluk long mi long evri tingting blong yutufala; no gat tu tingting, no fraet. Luk ol kil we spia i mekem long saed blong bodi blong mi, mo tu, olgeta mak blong nil long ol han mo leg blong mi; stap fetful, stap obei long ol komanmen blong mi mo bambae yutufala i save kasem kingdom blong heven. Amen” (Doktrin mo Ol Kavenan 6:36–37).

2.2

Ol Kompanion

Lod i stap singaotem ol misinari blong oli prijim gospel blong Hem long ol kompanionsip, olsem ol grup blong tutu. “Oli mas wokbaot tutu, mo olsem ia nao, oli mas prij folem rod long evri kongregesen, mo mekem baptaes long wota, mo mekem fasin blong putum han antap long hed” (Doktrin mo Ol Kavenan 52:10). Bae yu wok wetem ol defren kompanion truaot long misin blong yu. Ol Kompanion:

Oli kam wan long wok ia, mo tugeta, testifae abaot Jisas Kraes.
Oli sapotem wanwan long yutufala long saed blong gudlaef long saed blong spirit, filing, mo bodi.
Oli traem blong kipim wanwan long yutufala i stap sef.
Oli stap akaontebol from wanwan long yutufala blong stap kipim ol standet blong ol misinari.

2.2.1

Stap Sapotem Wanwan long Olgeta

Ol kompanion oli mas helhelpem wanwan long olgeta blong oli lanem samting, oli groap, mo oli stap developem ol fasin olsem hemia blong Kraes (luk long Doktrin mo Ol Kavenan 4 mo “Olsem Wanem Mi Developem Ol Fasin Olsem Hemia blong Kraes?” insaed long Prijim Gospel blong Mi [2018], japta 6). Taem yu stap lanem blong save wet longtaem mo gat lav, blong stap praktisim fasin blong fogivim man, mo akseptem ol defdefren fasin blong ol man, bambae hemia i blesem yu truaot long laef blong yu.

Olsem ol kompanion:

Lavem , respektem, mo mekem wanwan long yutufala i kam strong moa.
Stadi tugeta evri dei, mo prea tugeta oltaem truaot long dei.
Gat tingting i stap daon mo luksave paoa we i stap long wanwan long yutufala.
Tritim wanwan long yutufala olsem we yu wantem se bae oli mekem long yu.
No stap poenem fingga mo raorao.
No stap talem nogud wanwan long yutufala long ol nara misinari, ol memba blong Jos, o ol famli mo ol fren long hom.

Sapos yu luk se i gat wan situesen o wan fasin we i no stret, toktok raon long hem wetem kompanion blong yu. Sapos yutufala i no save stretem problem ia, o sapos kompanion blong yu i kam blong gat abius, gat paoa long tingting mo lav long kompanion blong yu, mo askem misin presiden blong yu blong hem i helpem yutufala (luk long 3.9.2).

2.2.2

Stap Stap Tugeta

Taem yu stap wetem kompanion blong yu, bae i help blong givim proteksen agensem ol denja long saed blong bodi, mo spirit, agensem ol giaman tok agensem yutufala, mo fasin blong filim se yu stap yuwan. Obei misinari standet ia long evri taem mo long evri ples. Neva stap yuwan.

Yu mas save luk mo save harem kompanion blong yu long evri taem, be nomo taem yu yu stap swim long ples blong swim, o yu stap long wan intaviu wetem wan misin lida, o taem yu stap mekem wan intaviu blong baptaes (luk long 2.3.6).
Yutufala i sapos blong slip insaed long semfala rum, be i no long semfala bed.
Taem we wanwan long yutufala i stap mekem wok blong wanwan insaed long haos, yusum gudfala tingting blong yutufala blong protektem yutufala, mo folem ol misinari standet long saed blong fasin (luk long 3.0).
Yu no krietem taem blong yu stap yuwan. Eksampol: yu no stap wekap let long naet, o yu no girap eli, o girap fastaem long kompanion blong yu.
Sapos yu mo kompanion blong yu i hapen se yutufala i seperet, kontaktem misin presiden blong yu kwiktaem.

2.2.3

Stap Wok long Eria blong Yu

“Go mo wok wetem paoa blong [yu]” (Jekob 5:72), mo putum evri hadwok blong yu blong wok long tijing eria we oli givim long yu blong wok long hem. Lukluk nomo long wok blong yu long ol eria we yu luk se bae yu save helpem moa pipol blong mekem mo kipim olgeta kavenan. Eksampol: lukluk nomo long ol ples kolosap long wan bilding blong jos, o long wan ples we ol memba we oli gat strong tingting oli stap laef long hem. Tingbaot promes blong Lod: “Long weaples we eniwan i akseptem yufala, ples ia bae mi stap long hem tu” (Doktrin mo Ol Kavenan 84:88).

Yu save aot long eria we oli givim long yu blong yu wok long hem long taem we yufala i jenjenisim ol kompanion (luk long 2.3.1) o gat ol transfea (luk long 2.3.2). Sapos yu nid blong aot long eria blong yu from wan risen, askem raet long distrik lida blong yu blong yu aot long eria blong yu blong muv insaed long distrik blong yu, o yu askem long ol son lida sapos yu nid blong travel aotsaed long distrik blong yu. Yu nidim raet blong misin presiden blong yu, o wan we hem i jusum, blong yu aot long son blong yu.

Sapos yu nidim blong aot long eria we oli givim long yu blong wok long hem from se i gat wan imejensi, olsem i gat wan disasta, o i gat man i kilim yu, o blong go long wan dokta, nao yu lukaotem sefti o medikol kea fastaem, mo afta, yu ring i go long misin presiden blong yu, o ol yang misinari lida blong yu, stret afta we yu save mekem.

2.2.4

Stap Wok wetem Ol Pipol aotsaed long Eria blong Yu

Long taem blong misin blong yu, bae i posibol se bae yu faenem ol pipol we oli stap aotsaed long eria ia we yu stap wok long hem. Sapos oli intres blong stap lanem gospel blong Jisas Kraes, bae yu save:

Serem wan mesej wetem olgeta.
Konek wetem olgeta long sosol media we oli apruvum (luk long 7.5.6).
Sendem nem blong olgeta long ol misinari we oli stap long ples we oli stap laef long hem, mo serem infomesen abaot olgeta wetem ol misinari we oli gat wok long eria ia (luk long 2.3.4).
Wetem raet blong misin presiden blong yu, yusum teknoloji (luk long 7.5.4) blong wok wetem ol misinari blong ples ia we ol man o woman ia oli stap laef long hem, blong oli help blong tij mo sapotem olgeta. Yu save invaetem stret famli blong yu mo ol fren blong yu tu blong oli help blong tijim olgeta, wetem raet blong olgeta (luk long 3.9.5).

Taem we yu stap wok wetem ol nara misinari o ol nara memba, tugeta, insaed mo aotsaed long eria o misin blong yu:

Kaonsel tugeta blong save olsem wanem i bes wei blong helpem olgeta we oli gat intres blong oli kam kolosap moa long Papa long Heven mo long Jisas Kraes.
Yu mas respektem taem blong ol memba mo taem blong ol nara misinari.
Letem ol misinari we oli gat wok long eria ia we man o woman i stap laef long hem blong oli tekem lid blong stap tijim olgeta kwiktaem olsem we i posibol.

2.3

Ol Misinari Wok Aktiviti

Ol misinari oli tekpat long ol defren aktiviti blong mekem wanem we Lod i givim komanmen from, we i blong “rere long evri samting we i nid” (Doktrin mo Ol Kavenan 88:119) blong save mekem wok ia i kamtru. Olgeta aktiviti ia, oli tekem blong tekpat long ol taem blong jenjenisim kompanion, mo ol transfea, blong wok wetem ol memba, blong folemap ol nem we oli givim, blong stap tij, stap tekpat long ol kaonsel mo ol miting, mo blong givim seves. Ol elda oli save mekem ol intaviu blong baptaes olsem pat blong misinari aktiviti blong olgeta.

2.3.1

Jenjenisim Kompanion

Long wan taem blong jenjenisim kompanion, wan yang misinari lida, olsem wan sista trening lida, o wan asisten long presiden, i wok wetem wan nara misinari. Long taem oli jenjenis, lida ia bae i tijim, i trenem, mo i lanem samting aot long misinari. Lida ia bae i folem kaonsel blong Lod we i stap long Doktrin mo Ol Kavenan, we i blong leftemap tingting blong nara misinari “long evri storian blong yufala, tru long evri prea blong yufala, tru long evri samting we yufala i talem, mo tru long evri samting we yufala i mekem” (Doktrin mo Ol Kavenan 108:7).

Ol yang misinari lida oli gat responsabiliti ia blong mekem plan blong ol taem blong jenjenisim kompanion; oli mekem hemia wetem ol misinari we oli stap lidim olgeta. Ol sista oli lidim wok blong jenjenisim kompanionsip wetem ol nara sista, mo ol elda oli lidim wok blong jenjenisim kompanionsip wetem ol nara elda.

Long plante misin, ol yang misinari lida nao oli stap lidim ol taem blong jenjenisim kompanion, mo ol transfea.

Ol distrik lida oli lidim wok blong jenjenisim kompanion wetem wanwan elda insaed long distrik blong olgeta.
Ol son lida oli lidim ol taem blong jenjenisim kompanionsip wetem wanwan distrik lida, mo olsem we i nid, wetem ol nara elda insaed long son blong olgeta.
Ol sista trening lida oli lidim wok blong jenjenisim ol kompanionsip wetem wanwan sista we i stap long son we oli stap long hem, o ol son.
Ol asisten long presiden oli lidim wok blong jenjenisim ol kompanionsip wetem ol son lida, o ol nara elda, olsem we misin presiden i talem.
Taem ia blong jenjenisim kompanionsip, plante taem, i tekem samples 24 aoa. Long wanwan taem we i gat jenjenis long kompanionsip, yang misinari lida i mas:
- Lidim wok blong jenjenisim ol kompanionsip insaed long eria blong yang misinari lida. Long sam taem, ol jenjenis ia oli save lidim olgeta insaed long eria blong misinari taem we i stret.
- Mekem plan blong gat taem blong jenjenis, bifo taem.
- Wok tugeta blong putum ol gol wetem misinari long wanem blong mas mekem i hapen long taem blong jenjenis ia. Tekpat long evri pat blong misinari wok, olsem blong faenem, blong tijim man, blong gat kompanion stadi, blong gat lanwis stadi (sapos i posibol), plan blong evri dei, mo stap felosip.
- Taem yu givim trening, yusum ol skripja mo ol prinsipol we oli stap long Prijim Gospel blong Mi.
- Luklukbak mo toktok raon long ol pipol we ol misinari oli stap wok wetem o stap tijim.
- Givim long ol misinari, ol spesifik fidbak we bae i helpem olgeta, mo tu, talem wanem nao misinari ia i mekem i gud mo olsem wanem misinari ia i save kam antap.
- Gat open tingting long wanem fidbak bae yu kasem long misinari ia long saed blong samfala eria blong kam antap long hem.
- Luklukbak mo toktok raon long wanem wanwan misinari i stap lanem long taem blong jenjenisim kompanionsip.
- Givim ripot long jenjenis blong kompanionsip insaed long wik leta i go long misin presiden.

2.3.2

Ol Transfea

Misin ofis bambae i arenjem travel blong yu long taem blong wan transfea blong mekem se yu yu no stap yuwan. Long samfala taem nomo, from ples i longwe o from sam nara samting, bae misin presiden blong yu i save talem se bae i defren. Long ol situesen ia, yu mas lukaotgud, yusum gudfala tingting blong yu, mo folem Spirit.

Taem oli stap transferem yu:

Go stret long niufala eria blong yu blong joen wetem niu kompanion blong yu.
Yu no kakae, o dring eni samting we yu bin lego blong smol taem, taem we yu stap travel.
Taem we yu travel, meksua se fon blong yu i jaj fulwan blong mekem se batri i save laef long ful trip. Sapos yu yu stap travel yuwan blong moa long tri aoa, jekem misin ofis wanwan taem.

Sapos kompanion blong yu i transfea i go, be yu yu no transfea, wok wetem ol nara misinari, olsem we ol yang misinari lida blong yu oli givim wok long yu, kasem taem we niufala kompanion blong yu i kam.

2.3.3

Ol Janis blong Stap Tij wetem Ol Memba

Invaetem ol memba blong joenem yu long ol wei we i nomol taem we yu stap faenem, tijim, baptaesem mo felosip long ol man. Leftemap tingting mo helpem ol memba blong oli fren wetem ol pipol we yu stap tijim mo blong stap invaetem ol pipol blong tekpat long ol aktiviti blong wod mo famli. Askem ol memba blong oli serem ol eksperiens blong olgeta we oli stret mo blong oli serem testemoni blong olgeta.

Ol misinari oli nid blong stap tugeta long ol kompanionsip. From hemia, i no gat ol taem we ol misinari oli jenjenisim olgeta wetem ol memba. Be, ol memba we oli ol woman (oli mas gat 16 yia finis, be oli mas olfala moa blong i stret wetem ol lokol loa) oli save go mo tij wetem tu o moa long tu sista misinari. Ol memba we oli ol man, (oli mas gat 16 yia, be oli mas olfala moa blong i stret wetem ol lokol loa) oli save go mo tij wetem tu mo long tu elda misinari. Ol mared kapol oli save tij wetem ol sista mo ol elda.

2.3.4

Ol Riferol o Stap Givim Nem

Wan riferol i taem wan i bin askem blong ol misinari oli kontaktem hem.

Taem we yu stap wok wetem ol pipol we oli bin sendem nem blong olgeta oli kam long yu:

Kontaktem ol misinari, ol memba o man o woman ia we i givim riferol ia, sapos i posibol. Toktok wetem olgeta abaot bes wei blong helpem man o woman ia.
Taem blong kasem man o woman ia, we oli givim nem blong hem kwiktaem olsem we i posibol, plante taem, long 24 aoa taem nomo.
Lisin mo lanem olsem wanem blong helpem man o woman ia we oli bin givim nem blong hem.
Givim eni samting we oli askem.
Tijim man o woman ia, wanem i ol nid mo wanem i ol intres.
Gohed blong wok wetem ol misinari, ol memba, o wanwan man o woman we i bin givim riferol ia (luk long 2.2.4).

Blong gat moa infomesen long saed blong ol riferol, luk long “Ol Riferol blong Ol Memba, Ol Misinari, mo Hedkwota blong Jos” insaed long “?Olsem Wanem Mi Faenem Ol Pipol blong Tijim?” insaed long Prijim Gospel blong Mi, japta 9.

2.3.5

Ol Miting mo Ol Kaonsel

Ol misinari oli kaonsel tugeta taem we oli stap givim mo kasem trening, mo taem we oli stap plan mo kodinetem misinari wok. Ol miting mo ol kaonsel oli mas invaetem Spirit blong Lod mo oli mas stap olsem wan taem blong kasem revelesen (luk long Doktrin mo Ol Kavenan 6:32). Antap long hemia, blong kam tugeta olsem ol misinari bae i givim yu wan janis blong leftemap wanwan long yufala mo stap glad long ol wok blong yufala (luk long Doktrin mo Ol Kavenan 43:8; 50:22).

Ol miting we ol misinari kompanionsip, ol yang misinari lida, mo ol misin lida oli oganaesem, oli tekem olgeta samting ia:

Evri dei mo wik plan blong ol sesen
Distrik kaonsel miting
Ol son konfrens
Ol misin lidasip kaonsel miting

Ol miting we ol lokol lida oli oganaesem we i tekem olgeta samting ia:

Ol misinari kodinesen miting
Ol wod kaonsel miting

2.3.6

Ol Intaviu blong Baptaes

Taem we hem i stap lidim intaviu blong baptaes, ol elda oli mas:

Luklukbak wanem we Lod i bin talem long Doktrin mo Ol Kavenan 20:37.
Folem rod we Tabu Spirit i soem.
Askem ol kwestin blong intaviu blong baptaes we oli stap long seksen ia: “Baptaes mo Konfemesen: Ol Kwestin mo Ansa” we i stap long japta 12 insaed long Prijim Gospel blong Mi.
Stretem ol kwestin ia i folem yia mo situesen blong wanwan.
Meksua se presiden blong kworom blong ol elda, o wod misin lida i savegud intaviu blong baptaes bifo long intaviu taem.

Sapos hem we i kasem baptaes i wantem, hem i save invaetem wan famli, waef o hasban blong hem, o wan nara adalt blong i joen long intaviu blong baptaes ia. Lukaot gud long ol filing blong wan abaot man o waef blong hem, o lukaot gud long wan pikinini we i no gat 18 yia yet, we oli stap intaviu long hem. Folem ol gaedlaen we oli stap long Prijim Gospel blong Mi blong save intaviu mo kasem raet blong baptaes blong ol waef o hasban, mo blong ol pikinini we oli no gat 18 yia yet (luk long“Olsem Wanem blong Holem Wan Intaviu” insaed long “Olsem Wanem Mi Mekem Wan i Rere blong Kasem Baptaes mo Konfemesen?” insaed long Prijim Gospel blong Mi, japta 12).

Ol distrik lida oli intaviu long ol kandidet blong baptaes we ol misinari oli bin tijim olgeta insaed long distrik blong olgeta; hemia i tekem tu ol asisten blong presiden, ol son lida, mo ol sista trening lida insaed long distrik blong olgeta.

Ol son lida oli intaviu long ol kandidet blong baptaes we ol distrik lida oli bin tijim insaed long son blong olgeta.

Sapos ol distrik mo ol son lida oli no stap, misin presiden i save givim wok ia long wan nara elda blong hem i mekem intaviu ia.

2.3.7

Ol Baptaes

Wok wetem presiden blong kworom blong ol elda, o wetem wod misin lida blong arenjem ol seves blong baptaes (luk long “Seves blong Baptaes” insaed long “Olsem Wanem Mi Rere Ol Man blong Kasem Baptaes mo Konfemesen?” insaed long Prijim Gospel blong Mi, japta 12). Stat blong rere long seves blong baptaes, kwik olsem we i posibol.

2.4

Ol Evri Dei Aktiviti mo Taemtebol

Mekem plan blong taemtebol blong yu blong mekem stamba tingting blong misinari wok blong yu i kamtru mo blong stap lukluk nomo long ol nid blong ol narawan. Tingbaot se Lod i bin promesem olgeta we Hem i bin singaotem olgeta blong oli prijim gospel: “!Mo sapos yutufala i stap wok evri dei blong laef blong yutufala blong taltalemaot long ol pipol ia blong oli sakem sin, mo tekem wan sol nomo i kam long mi, bambae glad blong yutufala i bigwan wetem hem insaed long kingdom blong Papa blong mi!” (Doktrin mo Ol Kavenan 18:15).

2.4.1

Ol Evri Dei Aktiviti

Putum olgeta aktiviti ia insaed long evri dei taemtebol blong yu:

Setem mo luklukbak long ol gol blong yuwan, wetem kompanion, mo blong misin.
Mekem plan blong taemtebol blong yu blong dei.
Rere long ol lesen.
Stadi long ol skripja, long Prijim Gospel blong Mi, ol tijing blong ol profet mo ol aposol we oli stap laef, mo ol nara risos we oli apruvum (luk long 2.4.4).
Luklukbak long wan helt o sefti topik, o wan long ol sef fasin blong yusum teknoloji (luk long 4.0–4.7).
Faenem ol pipol blong stap tijim olgeta.
Wok wetem ol lokol lida mo ol memba.
Givim seves long ol narawan long ol aktiviti we oli plan from mo olgeta we oli no plan from.
Tekem kea long ol nid blong yuwan, olsem blong kakae, mo rere from dei we bae i stap.

2.4.2

Eksampol blong Evri Dei Taemtebol

Evri dei taemtebol blong misin blong yu, maet i save luk olsem taemtebol we i stap daon ia. Ol evri dei taemtebol, misin presiden i save stretem blong i folem ol holidei, ol spesel taem blong misin blong yu, mo ol narawan moa.

6.30 moning	Statem dei.
6:30 –10: 00 klok moning	Prea Eksasaes (30 minit). Swim, kakae, mo rere from dei ia. Gat stadi blong yuwan (60 minit). Mekem plan (30 minit).
10:00 klok moning–9:00 klok naet	Faenem, tijim, baptaesem mo givim seves long ol narawan.* Apdeitem ol rekod long pepa mo long kompiuta truaot long dei. Blong sot taem, luklukbak long wan helt o sefti topik, o wan sef wei blong stap yusum teknoloji. Gat kompanion stadi mo rere long ol lesen (30 minit). Stadi sam moa tul blong ol niu misinari mo ol trena long taem blong ol fasfala 12 wik long fil (30-60 minit, sapos i save olsem). Stadi long misin lanwis blong yu (30-60 minit, sapos i save olsem). Kakae lanj mo dina (hemia i no mas tekem moa long 2 aoa blong tufala tugeta).
9:00 klok naet	Gobak long haos blong yu, be nomo sapos yu gat wan tijing apoenmen; sapos i olsem, gobak hom bifo 9.30 naet.
9:00 klok moning–9:30 naet.	Raet long jenol blong yu, rere blong go long bed, mo prea.
9:30 klok moning–10:30 naet	Go long bed.

*Ol evri dei aktiviti blong yu oli mas lukluk nomo blong stap toktok wetem ol pipol. Putum taem blong mekem plan mo stadi i hapen truaot long dei blong mekem se yu no stap spendem ol longfala taem insaed long apatmen blong yu. Sapos ples blong wokbaot long hem i no longwe, mo sapos i gat taem, yu save aot mo gobak long apatmen blong yu truaot long dei blong save lukluk long ol nid ia.

Taemtebol we misin blong yu i apruvum, bae i givim taem long yu blong yu wok, yu spel, mo yu putum tingting i kambak tugeta blong lukluk long wan samting nomo. Hem i impoten blong kasem inaf spel mo kaekae blong yu gat wan gudlaef long saed blong spirit, filing, mo bodi.

2.4.3

Setem Gol mo Mekem Plan blong Ol Sesen

Holem sam sesen evri dei mo tu long wik blong mekem plan wetem kompanion blong yu. Tingting long ol nid blong olgeta we yu stap tijim mo olsem wanem blong wok wetem ol memba taem yu stap luklukbak long progres we i stap, taem yu stap setem ol gol, mo mekem ol plan blong dei mo blong wik (luk long “Olsem Wanem blong Setem Ol Gol,” “Taem blong Mekem Plan Evri Wik,” mo “Taem blong Mekem Plan blong Dei” insaed long “Yusum Taem Wetem Waes” insaed long Prijim Gospel blong Mi, japta 8).

2.4.4

Ol Stadi Sesen

Yusum stadi taem blong yuwan mo wetem kompanion blong lukluk nomo long ol skripja (speseli Buk blong Momon), Prijim Gospel blong Mi, ol tijing blong ol profet we oli stap laef (we yu save faenem insaed long Gospel Laebri), mo olgeta standet ia. Olgeta risos ia we oli apruvum, oli save mekem save blong yu i kam bigwan moa, mo i save mekem se yu gat wan testemoni abaot gospel ia we i kambak, we i blong Jisas Kraes, i kam strong moa; mo tu, i save helpem yu blong rere blong mitim ol nid blong olgeta we yu stap tijim.

Sapos oli givim wok long yu blong lanem wan niu lanwis, stadi mo praktisim lanwis ia evri dei.

Sapos yu yu wan niu misinari, stadi wetem trena blong yu blong 30 o 60 moa minit evri dei blong ol fasfala 12 wik we yu stap long misin fil (luk long “Blong Ol Niu Misinari: Wan Moa Kompanion Stadi” insaed long “Fas Toktok: ?Olsem Wanem Bae Mi Save Yusum Gud Prijim Gospel blong Mi?” insaed long Prijim Gospel blong Mi).

2.4.5

Ol Kaekae wetem Ol Nara Pipol

Sapos i posibol, bae misin presiden mo lokol stek presiden bae i givim ol gaedlaen blong putum taemtebol blong go kakae wetem ol pipol insaed long misin blong yu. Taem we ol memba o ol nara pipol oli givim kaekae:

Gat respek long situesen blong olgeta mo taem blong olgeta.
Gat gladhat long kaekae we oli givim long yu.
Askem blong tijim wan lesen blong 15 o 20 minit, bifo o afta long kakae; hemia i blong mekem olgeta we yu stap visitim oli kam strong moa, mo blong yu givim wan janis blong kam antap long paoa blong yu blong tij wetem Spirit.

Wan nara adalt we i sem jenda (seks) long yu i mas stap wetem yu mo kompanion blong yu taem we yu stap kakae wetem wan we jenda blong hem i oposit long yu.

2.5

Priperesen Dei

Misin presiden blong yu bae i putum wan dei long wan wik we bae i stap olsem priperesen dei. Priperesen dei i letem yu blong gat taem blong yu karembak paoa long bodi, spirit mo filing taem yu “stanap olsem ol witnes blong God long evri taem mo long evri samting, mo long evri ples” (Mosaea 18:9). Hemia bae i givim janis tu long yu mo kompanion blong yu blong stap wetem ol nara misinari insaed long distrik blong yufala, mo blong stap gat ol gudfala aktiviti blong pleiplei tugeta (luk long 3.6).

Plis tingbaot ol gudfala toktok blong Lod long saed blong taem: “Yu no ron bitim o wok bitim paoa we yu gat” (Doktrin mo Ol Kavenan 10:4), mo “go long bed eli, blong yufala i no save taet; girap eli, blong mekem se bodi blong yufala mo maen blong yufala i kam laef gud” (Doktrin mo Ol Kavenan 88:124).

2.5.1

Ol Priperesen Dei Aktiviti

Ol aktiviti ia blong rere long dei, i save gat olgeta samting ia (be i no hemia nomo):

Toktok wetem famli, misin presiden, mo ol fren (luk long 3.9)
Wasem ol klos.
Katem hea mo lukaot gud long bodi blong yu
Klinap
Pem samting long stoa
Spel
Tekpat long ol aktiviti blong pleiplei we oli givim raet from (luk long 3.6)

2.5.2

Eksampol blong Priperesen Dei Taemtebol

Priperesen Dei taemtebol, i save luk olsem ia:

6.30 moning	Statem dei.
6:30 –8: 00 klok moning	Prea. Swim, kakae, mo rere from dei ia. Mekem plan (30 minit). Gat stadi blong yuwan (30 minit).
8:00 klok moning–6:00 klok naet	Mekem ol aktiviti blong priperesen dei ( luk long 2.5.1). Not: Evri aktiviti blong priperesen dei oli mas finis long 6 klok naet.
6:00 klok naet–9:00 klok naet.	Faenem, tijim, mo givim seves long ol narawan.
9:00 klok naet	Gobak long haos blong yu. Sapos yu gat wan tijing apoenmen, gobak hom bifo 9.30 naet.
9:00 klok moning–9:30 naet.	Raet long jenol blong yu, rere blong go long bed, mo prea.
9:30 klok moning–10:30 naet	Go long bed.

2.6

Ol Sabat Dei Aktiviti

Mekem plan long ol aktiviti long Sabat we bae i helpem yu blong mekem stamba tingting blong yu olsem wan misinari blong stap faenem, tijim, baptaesem, mo helpem ol narawan blong oli lanem samting abaot Papa long Heven mo Jisas Kraes, mo blong kam olsem Tufala. Tingbaot ol tijing blong Lod abaot Sabat dei, we i stap long Doktrin mo Ol Kavenan 59:13–19, mo luk gud ol toktok mo ol sentens we i talem se tru Sabat dei, hem i tekem glad, stap glad, wan hat we i glad, mo fes blong yu i glad.

Ol aktiviti blong Sabat, sam long olgeta oli blong go long Jos, go long jeneral konfrens, go long ol Sandei sesen blong stek konfrens, mo sam moa miting olsem wod kaonsel taem we oli invaetem yu long hem. Mo tu, i tekem blong stap tekem pat long fasin blong livim kakae long evri manis.

Long ol misinari hadwok blong yu, Lod i no askem yu blong yu no stap kakae, be nomo long taem blong mekem hemia long nomol taem long evri manis, o blong yu sakrifaes long slip blong yu blong save kam wan misinari we i givim moa taem mo tingting. Wanwan taem, yu save livim kakae from wan spesel risen, be yu no mas livim kakae blong moa long 24 aoa long wan taem.

2.7

Seves Insaed long Komuniti

Yu save lan blong stap wan disaepol blong Jisas Kraes taem yu givim seves semmak olsem we Hem i bin mekem. Faenem ol janis blong givim seves long kompanion blong yu, ol pipol we yu stap tijim, ol memba, mo ol narawan insaed long komuniti, “ blong yufala i save lanem se taem we yufala i stap wok blong ol narafala man, yufala i stap mekem wok blong God blong yufala nomo” (Mosaea 2:17).

Yu sapos blong givim seves wetem wan tru tingting long hat blong helpem ol narawan mo no ting se bae yu kasem wan samting. Folem evri rul blong seves projek (luk long 7.2), speseli, eni rul abaot fasin blong no stap tij taem yu givim seves, mo blong no givim seves long ol ples we bae yu stap yuwan wetem ol pikinini. Sapos wan i talemaot we hem i gat intres long mesej blong yu, givim wan sot ansa mo putum taem blong mit wetem olgeta long wan defren taem mo ples blong save serem wan mesej.

Blong gat moa infomesen, luk long seksen 7.2, “Ol Gaedlaen blong Givim Seves.”