Karōk in Doulul eo an Mijenede im M̧akūtkūt ko

2.0

Kadkad In

Irooj ekar ba, “Kom̧ naaj ko̧koņ kom̧ make im jitōn̄ aolep armej [im kōrā ro] eddo eo an [ak lio];” (Katak im Bujen Ko 104:11). Jekjōn in an bok in bōk meļeļe in ej kōmeļeļeik doulul eo an mijen im kōmeļeļeik wāween an em̧m̧anļo̧k am̧ jerbal im jokwe ippān juon kam̧pānien, kobaļo̧k ilo m̧akūtkūt ko ilo mijen, karōk jikejuuļ ko an kajjojo raan, im jerbal n̄an ro jet ippān iakwe em̧ool an Kraist (lale Moronai 7:44–47).

N̄an kalikkar, jon̄ak kein rej kōjerbal naan eo mijenede rūm̧m̧an ded ro me rej ritōl n̄an ba etan mijenede ro me ewōr aer kūr in tōl, ko āinwōt senior kam̧panien ro, sister training leader, ak zone leader ro. Ritōl ro an mijen ej kōnono kōn mijen būreejtōn eo am̧, eo ej kabwijer ki ko an priesthood, im kōrā eo pāleen.

Jon̄ak kein rej barāinwōt kōjerbal naan ko bisop, stake būreejtōn, ward, im stake. Kōjerbal unin tōl ko reiookļo̧k āinwōt an jetjet n̄an branch būreejtōnj eo, district būreejtōņ ro, branch ko, im ro uwaan district ko.

2.1

Ritōl ro an Mijen

Eddo eo am̧ aorōktata, jekdo̧o̧n ta kūr ko am̧ me an ritōl, ej n̄an erom̧ juon mijenede eo etiljek im̧ eļap an kijejeto ilo an kate. Kapilōk in letok jān Irooj kar jeik ilo Katak im Bujen Ko ej bar āinwōt jerbal n̄an eok “Me enaaj aorōk tata n̄an kwe enaaj n̄an kwaļo̧k ukeļo̧k n̄an [epepen] in, bwe kwōn maron̄ bōktok armej n̄an eō” (Katak im Bujen Ko 15:6).

2.1.1

Ritōl ro an Mijen: Mijen Būreejtōnj eo Am̧ im Kōrā eo Pāleen

Mijen būreejtōn eo am̧ im kōrā eo pāleen, ro rej jerbal ippān doon āinwōt ritōl ro am̧ ilo mijen, kar kūr jān Anij im kajeņolo̧k er n̄an tōl mijen eo. Ippān doon rej iakwe im jerbal n̄an eok, jipan̄ eok kakūrm̧ool jibadbad eo am̧ āinwōt juon mijenede, im jipan̄ kōjparok eok im kam̧ōņōņōik eok.

Ritōl ro am̧ ilo mijen rej ajeej e elōn̄ eddo ko n̄an mijen eo. Renaaj jerbal ippān doon n̄an jipan̄ rie im kapilōk eok, ron̄jake inepata im kajjitōk ko am̧, uwaake kajjitōk ko, lale jon̄an am̧ eddōkļo̧k, im lewaj kapilōk. Kōnke mijen būreejtōn eo am̧ ej kabwijer jet kii ko an priesthood, ej jerbal āinwōt juon riekajet ilo mijen eo. Jerawiwi ilo m̧ōm̧ an kanniōk im jerawiwi ko jet reļļap rej aikuj kwaļo̧ki n̄an mijen būreejtōn (lale Mosaia 26:29–30). Kom̧in lukkuun m̧ool n̄an e. Enaaj jipan̄ eok ukweļo̧k (lale N̄an Kōkajoorļo̧k Jodikdik ro [2011], 28–29).

Kwomaron̄ kūr tok kōrā eo pāleen mijen būreejtōn eo, juon mijenede eo erūtto, ak mijenede kam̧pānien eo am̧ n̄an kobaļo̧k ilo jabdewōt intōrpiu ko ippān mijen būreejtōn eo. Kālet eo am̧ n̄an kūr waj juon armej n̄an kobawaj ejjab aikuj kadikļo̧k iakwe eo an ritōl ro am̧ ilo mijen, kea, ak nebar eok.

2.1.2

Mijen Būreejtōnji eo

Mijen būreejtōn eo am̧ ej tōl ilo mijen eo am̧ kōn kii ko an priesthood. Ej juon membōr in uwaan mijen būreejtōnji eo ippānļo̧k ruo an rikakpilōklōk.

Rikakpilōklōk ro ilo mijen būreejtōnji eo, āinwōt rikakpilōklōk ro ilo juon stake būreejtōnji ak bisoprik, jipan̄ karōke im tōl ilo jerbal in. Rikakpilōklōk ro ilo mijen būreejtōnji eo rejjab ekōnono kōn erreeo an juon mijenede.

2.1.3

Doulul eo an Ritōl an Mijen

Mijen būreejtōn eo am̧ ej kōjerbal revelesōn im kii ko an priesthood n̄an karōk jerbal eo. Ej jitōn̄ mijenede rūm̧m̧an ded ro n̄an erom̧ trainer ro, senior kam̧pānien ro, district leader ro, sister training leader ro, zone leader ro, im assistant ro. Assistant ro, mijenede ro ilo opiij, im mijenede ro jet ro rejjab kōm̧m̧ani kūr ko an ritōl ak karōkļo̧k eria ko ijoko kwonaaj jerbal ie. Ijoke, mijen būreejtōn eo emaron̄ kapilōk kōrā e pāleen im rijipan̄ ro an ruo kōn jerbal ko an mijenede.

Ritōl ro an mijen eo am̧ im assitant ro, zone leader ro, im sister training leader ro rej membōr ro an doulul in ko̧o̧njeļ eo an ritōl ro an mijen. Ritōl rein rej ko̧o̧njeļ kōn kweilo̧k ko mijenede ro rej aikuji im kōm̧m̧ani karōk ko n̄an jipan̄ mijen eo eddōkļo̧k im wōnm̧aanļo̧k wōt ilo jerbal in.

2.1.4

Eddo ko an Ritōl ro an Mijenede Rūm̧m̧an Ded ro

Ritōl ro an mijenede rūm̧m̧an ded ro, āinwōt aolep mijenede, rej ļoor kapilōk eo jān Jisōs Kraist n̄an “jerbal n̄an [Anij] kōn aolepān [būruwer], maron̄, ļōmņak im kajoor” im n̄an “keememej tōmak, erreo, jeļāļo̧kjeņ, jatōr, lōjokmen, jeļā ņae, m̧wil em̧m̧an, iakwe-em̧ool, ettā, niknik.” (Katak im Bujen Ko 4:2, 6). Ijjitōn̄ ko an ritōl rejjab kwaļok kile ko rejeņolo̧k ak wōnm̧aanļo̧k ak kwaļo̧k erreo an juon mijenede.

Ritōl ro an mijenede rūm̧m̧an ded ro ewōr aer eddo n̄an:

Kappukot, katakin, peptaij, im jemjerāik armej ro.
Kōm̧m̧ane juon waanjon̄o̧k in jon̄ak ko an mijenede an m̧wil (lale 3.0).
Katakin mijenede ro jet im tōl iien ejānijnij ko an kampānien (lale 2.3.1).
Kwaļo̧k meļeļe ko im wāween ko jān ko̧o̧njeļ eo an ritōl an mijen ippān mijenede ro rej tōl er.
Iakwe im jemjerā ippān mijenede ro jet. Jipan̄ er kile jon̄an aorōk in kijejeto ko aer.
Ron̄jake inepata im kajjitōk ko an mijenede ro jet. Leļo̧k jipan̄ im naan in rōjan̄.
Kajim̧we mijenede ro jet ilo jouj im ilo ittiņo, āinwōt aikuji, ippānļo̧k “ļapļo̧k in iakwe” (lale Katak im Bujen Ko 121:41–43).
Jerbal ippān ritōl ro an jikin eo im membōr ro ie.

Āinwōt aolep mijenede ro, elder ro im sister ro ewōr kūr in tōl im rej aikuj mour kōn jerbal in tōl āinwōt Kraist. Eļan̄n̄e m̧wil an jabdewōt mijenede, ekoba ritōl ro an mijenede rūm̧m̧an ded ro, āinwōt kalimjōkļo̧k an jab ekkeijel ippān kien ko im jon̄ak ko an mijenede, ekōnono kōn menin ippān mijenede eo. Eļan̄n̄e juon men ebōd ejjan̄in m̧ōj kajim̧weiki, kwaļo̧k inepata in am̧ ippān ritōl ro an mijenede rūm̧m̧an ded ro im ejjab ippān mijenede ro jet, membōr ro, ak ro m̧ōttam̧.

N̄an meļeļe ko reļļapļo̧k kōn ijjitōn̄ ko rejeņoļo̧k im eddo ko an ritōl ro an mijenede rūm̧m̧an ded ro ( elōn̄ļo̧k meļeļe ko kōn jerbal kein im eddo kein an ritōl ro an mijenede rūm̧man ded ro (trainer ro, senior kam̧pānien ro, district leader ro, sister training leader ro, zone leader ro, and rijjipan̄ ro an būreejtōn eo), lale jekjōn 7.1, “Eddo ko an Ritōl an Mijenede Reddik.”

2.1.5

Eddo ko An Juon Make

“Kōļapļo̧k kūr eo [am̧] n̄an Irooj” (Jekab 1:19), erom̧ juon eo ej un̄n̄are pein make ilo jetōb, im “kōm̧m̧an n̄an [kwe make]” (2 Nipai 2:16) N̄e ewōr am̧ kajjitōk ak inepata ko:

Kōjerbal katak eo n̄an “ekkatak kake ilo ļōmņak eo am; innām … kajjitōk Ippa eļan̄n̄e e jim̧we” (Katak im Bujen Ko 9:8).
Kappukot tōl jān revelsōn ko am̧ make; jar; im ekkatak jān jeje ko rekwojarjar (eļaptata Bok in Mormon), Preach My Gospel, katak ko an rikanaan ro rej mour, im jon̄ak kein.

Eļan̄n̄e kwoj aikuj kakkobaba in jipan̄ ālkin am̧ mour kōn pedped in katak kein, kajjitōk ippān kam̧pānien eo am̧ ak ritōl ro an mijenede rūm̧m̧an ded ro. Eiten aolep iien, remaron̄ jipan̄ eok kappukot uwaak ko n̄an kajjitōk ko am̧.im jipan̄ jerbale inepata ko am̧. Eļan̄n̄e jaab, kappukot jipan̄ jān juon iaan ritōl ro am̧ ilo mijen, ro jinōm̧ im jem̧ōm̧, ak ritōl ro an priesthood ilo ijo jikūm̧ kwoj itok jāne. Jouj im jab kūrļo̧k opiij eo eļap an Kabun̄ in. Eļan̄n̄e kwonaaj, renaaj bar jitōn̄ļo̧k eok n̄an mijen būreejtōn eo am̧.

Ekōnono ippān mijen būreejtōn eo am̧ kōn jorrāān ko ikijeen erreo. Ekōnono ippān juon iaan ritōl ro am̧ ilo mijen kōn inepata ko reidin̄ ikkijeen wāween kōjparok, ekoba ko̧kkure ilo m̧ōm̧ an kanniōk ak ko̧kkure, ak jorrāān ko jet me remaron̄ jab jerbale ippān mijenede ro jet.

Emaron̄ wōr iien ko ilo mijen eo am̧ n̄e kwoj lo an pen n̄an ļōmņak kōn jerbal kōn apan̄ ko rej waļo̧k, inepata ko am̧ make ak an baam̧le eo am̧, ak em̧ool en̄jake ko am̧ tōre ko remootļo̧k. Menin emeļeļe kake. Jab āliklik in kwaļo̧k inepata kein am̧ ippān kam̧pānien eo am̧, ritōl ro an mijenede rūm̧m̧an ded ro, ak juon iaan ritōl ro am̧ ilo mijen im kappukot jipan̄.

Keememej kūr eo an Rilo̧mo̧o̧r eo: “Reitok n̄an Eō ilo ļōmņak otemjeļo̧k; jab pere, jab mijak. Lali kinej kein rekar wākari ikatū, im barāinwōt jenkwan dila kā ilo Peiū im Neō; kom̧in tiljek, kōjparok kien ko Aō, im kom̧ naaj jolōte aelōn̄ in lan̄. Amen” (Katak im Bujen Ko 6:36–37).

2.2

Kampānien ro

Irooj ej kūr mijenede ro n̄an kwaļo̧k gospel eo An ruo ļo̧k ruo. “Ren etal ruo ian ruo ian, im āindein ren kwaļo̧k naan ilo iaļ eo ilo jarlepju otemjej, im peptaij jān dān, im likūt pā ko ioon iturin dān eo.” (Katak im Bujen Ko 52:10). Kwonaj jerbal ippān kampānien ro reokoktak ilo aolepān mijen eo am̧. Kampānien ro:

Ippān doon ilo jerbal in im kam̧ool ippān doon kōn Jisōs Kraist.
Jipan̄ doon ilo mour in jetōb, en̄jake, im ājmour ilo ānbwin.
Kajjieon̄ kōjparok doon.
Rej bōk eddo n̄an doon ilo aer kōjparok jon̄ak ko an mijenede.

2.2.1

Jipan̄ Doon

Kam̧pānien ro rej aikuj jipan̄ doon ekkatak, eddōkļo̧k, im kōļapļo̧k m̧wil ko āinwōt Kraist.(lale Katak im Bujen Ko 4 im “How Do I Develop Christlike Attributes?” ilo Preach My Gospel [2018], jepta 6). Ekkatak kijenmej im iakwe, kajjeon̄ joļo̧k an ro jet bōd, im meļeļe kōn oktak ko ilo m̧wil ko enaaj kōjeraam̧m̧an eok ilo aolepān mour eo am̧.

Āinwōt Kampānien ro:

Iakwe, kautiej, im kōkajoorļo̧k doon.
Ekkatak ippān doon aolep raan im kōmakijkij ami jar ippān doon ilo likio in juon raan.
Ettā im kile kajoor ko an doon.
Kōm̧m̧an n̄an doon āinwōt am̧ naaj kar kōņaan bwe ren kōm̧m̧an n̄an eok.
Jab kōknanaik doon im kōm̧m̧an akweel.
Jab ba men ko rejjab em̧m̧an kōn doon n̄an mijenede ro jet, ro uwaan Kabun̄ in, ak baam̧le im ro m̧ōtta ilo ijo jikūm̧.

Eļan̄n̄e kwoj lo jekjek ko ak m̧wil ko rejjab ekkar, ekōnono ippān kam̧pānien eo am̧ kake. Eļan̄n̄e men eo ekōnono kake ejjab em̧m̧anļo̧k ak eļan̄n̄e kam̧pānien eo am̧ ej ko̧kkure im kōmetak eok, bōk peran im iakwe n̄an kam̧pānien eo am̧ n̄an kajjitōk ippān mijen būreejtōn eo am̧ n̄an jipan̄ (lale 3.9.2).

2.2.2

Pād Wōt Ippān Doon

Pād wōt ippān kam̧pānien eo am̧ enaaj jipan̄ kōjparok eok jān kauwōtata ko ilo ānbwin im jetōb, riab ņae ko, im en̄jake in makeļo̧k iaam̧. Pokake jon̄ak in an mijenede ilo iien otemjeļo̧k im ilo aolep jikin. Jab makeļo̧k iaam̧ iien otemjej.

Kwoj aikuj maron̄ loe im ron̄ ainikien kam̧pānien eo am̧ aolep iien m̧ae iien kwoj pād ilo juon m̧ōn kapojak, ak ilo juon intōrpiu ippān juon ritōl an mijen, ak kwoj kōm̧m̧ane juon itōrpiu in peptaij (lale 2.3.6).
Kwoj aikuj kiki ilo juon wōt ruum̧ ak ejjab juon wōt būton̄.
N̄e kwoj kōm̧m̧ane juon jerbal an juon amrej make ilo m̧ōn jokwe eo, kōjerbal jeļā eo am̧ n̄an kōjparoke kwe make im ļo̧o̧r jo̧n̄ak in m̧wil ko an mijenede (lale 3.0).
Jab kōm̧m̧an iien bwe kon makeļo̧k iaam̧. N̄an waanjon̄o̧k, jab emmej ak mōkaj am̧ rūj jān kampānien eo am̧.
Eļan̄n̄e kwe ak kam̧pānien eo am̧ rej jenolo̧k, m̧ōkaj im kūrļo̧k mijen būreejtōn eo am̧.

2.2.3

Jerbal ilo Eria eo Am̧

“Ilo̧k im jerbal kōn aolep kajoor ko [am̧]” (Jekāb 5:72), im kokwojarjar kijejeto ko ām̧ ilo ijo em̧ōj kile eok n̄an jerbal ie. Mije jerbal eo am̧ ilo eria ko ijo enaaj ļapļo̧k am̧ jipan̄ armej kōm̧m̧ani im kōjparok bujen ko. N̄an waanjon̄o̧k, mije wōt ro rūtūrūm̧ me repaake m̧ōn jar eo ak ilo jukjukin pād eo me membōr ro ie rekajoor. Keememej kallim̧ur eo an Irooj: “Im jabdewōt eo ej bōk kom̧, Inaaj pād ijo barāinwōt” (Katak im Bujen Ko 84:88).

Kwomaron̄ etal jān jikin eo kar karōke n̄an kwe n̄an (lale 2.3.1) ak iien ejānijnij ko an kam̧pānien (lale 2.3.2). Eļan̄n̄e kwoj aikuj diwōjļo̧k jān jikin jerbal eo am̧ kōn bar un, kajjitōk mālim jān district leader eo am̧ n̄an diwōjļo̧k jān eria eo am̧ ilowaan wōt district eo am̧ ak jān zone leader ro am̧ eļan̄n̄e kwoj aikuj em̧akūtkūtļo̧k itulikin district eo am̧. Kwoj aikuj mālim jān mijen būreejtōn eo am̧, ak juon armej ekar kappeiki, n̄an diwōjļo̧k jān zone eo am̧.

Eļan̄n̄e kwoj aikuj diwōjļo̧k jān eria eo am̧ kōn juon idin̄, ko āinwōt jorrāān ko an mejatoto ak juon ko̧kkure ak n̄an kappukot jipan̄ kōn idin̄ ilo ājmour, kappukot m̧oktata kōjparok ak jipan̄ jān taktō im tokālik kūrļo̧k mijen būreejtōn eo am̧ ak ritōl ro an mijenede rūm̧m̧an ded ro ilo iien eo em̧ōkajtata kwomaron̄.

2.2.4

Jerbal ippān Armej ro itulikin Eria eo Am̧

Ilo iien mijen eo am̧ elōn̄ iien kwonaaj ioon armej ro rej jokwe itulikin eria eo kwoj jerbal ie. Eļan̄n̄e ewōr aer kōņaan ilo ekkatak kōn gospel eo an Jisōs Kraist, kwomaron̄:

Kwaļo̧k juon katak ippāer.
Ekkeijel ippāer ilo social media ko remālim kōjerbali (lale 7.5.6).
Leļo̧k etaer n̄an mijenede ro ijo rej jokwe ie im kwaļo̧k meļeļe ko kōn er ippān mijenede ro rej jerbal ijo rej jokwe ie (lale 2.3.4).
Ippān mālim eo jān mijen būreejtōn eo am̧, kōjerale technology (lale 7.5.4) n̄an jerbal ippān mijenede ro ijo armej ro rej jokwe ie n̄an katakin er im jipan̄ er. Kwomaron̄ barāinwōt karuwaineneik baam̧le eo am̧ make im ro m̧ōttam̧ n̄an jipan̄ katakin er, kōn mālim (lale 3.9.5).

N̄e kwoj jerbal ippān mijenede ro jet im membōr ro jim̧or jān ilowaan im itulikin eria eo am̧ ak mijen eo:

Ko̧o̧njeļ ippān doon n̄an jeļā wāween eo em̧m̧antata n̄an jipan̄ armej eo ewōr an ikdeelel in epaakeļo̧k Jemedwōj Ilan̄ im Jisōs Kraist.
Kanooj kautiej iien ko an membōr ro im mijenede ro jet.
Kōtļo̧k bwe mijenede ro rej jerbal ilo eria eo ijo armej eo ej jokwe ie en bōk tōl ilo iien ekkatak eo ilo iien eo ekkar im em̧ōkajtata.

2.3

M̧akūtkūt ko an Jerbal in Mijenede

Mijenede ro kobaļok ilo elōn̄ kain m̧akūtkūt ko n̄an kakūrm̧o̧o̧l kakien eo an Irooj n̄an “kōpooj kajjojo mennin aikuj;” (Katak im Bujen Ko 88:119) n̄an maron̄ kōttōbrak jerbal eo An. M̧akūtkūt kein rekoba kobaļo̧k ilo ejānijnij ko an kampānien im transfer ko, jerbal ippān membōr ro, kōttōbarļo̧k armej ro kar leļo̧k etaer n̄an katak ippāer, katakin, bōk koņaam̧ ilo ko̧o̧njeļ im kweilo̧k ko, im jerbal. Elder ro remaron̄ kōm̧m̧ani itōrpiu in peptaij ko āinwōt m̧ōttan m̧akūtkūt ko aer mijenede.

2.3.1

Ejānijnij ko an Kampānien

Ilo iien jānij an kampānien ro, juon ritōl an mijenede rūm̧m̧an ded ro, ro āinwōt juon sister training leader ak juon rijipan̄ an būreejtōn eo, ej jerbal ippān mijenede eo juon. Ilo iien jānij eo, ritōl eo ej katakin, train, im ekkatak jān mijenede eo. Ritōl eo enaaj ļoor kapilōk eo an Irooj lo ilo Katak im Bujen Ko n̄an kōkajoorlo̧k mijenede eo juon “ilo aolep kōm̧m̧ao ko [ami], ilo aolep jar ko [ami], ilo aolep kōketak ko [ami], im ilo aolep kōm̧m̧an ko [ami].” (Katak im Bujen Ko 108:7).

Ritōl ro an mijenede rūm̧m̧an ded ro ej aer eddo n̄an karōk iien ejānijnij ko ippān mijenede ro me rej tōl er. Sister ro rej kōm̧m̧ane iien ejānijnij ko ippān sister ro jet, im elder ro rej kōm̧mani iien ejānijnij ippān elder ro jet.

Ilo eiten aolep mijen ko, ritōl ro reddik an mijen ekkā aer kōm̧m̧ani iien ejānijnij ko an kampānien juon kattōn ilo aolep transfer.

District leader ro rej kōm̧m̧ani iien ejānijnij ko ippān kajjojo elder ro ilo district eo aer.
Zone leader ro rej kōm̧mani iien ejānijnij ko ippān kajjojo district leader ro im āinwōt aikuji ippān elder ro jet ilo zone eo aer.
Sister training leader ro rej kōm̧m̧ani iien ejānijij ko ippān kajjojo sister ro ilo zone eo aer ak zone ko.
Rijipan̄ ro an būreejtōn eo rej kōm̧m̧āni ejānijnij ko ippān zone leader ro im elder ro jet āinwōt karōke jān mijen būreejtōn eo.
Juon ejānijnij an kampānien ekkā aitokan n̄an 24 awa ko. N̄an kajjojo ejānijnij an kampānien, ritōl eo an mijenede rūm̧m̧an ro rej aikuj:
- Kōm̧m̧āni ejānijnij ko an kampānien ippān ritōl ro an mijen reddik ilo eria eo. Jet iien, ejānijnij ko remaron̄ barāinwōt kōm̧m̧ani ilo eria eo an mijenede eo n̄e ekkar.
- Karōke ejānijnij an kam̧pānien ko m̧oktaļo̧k.
- Jerbal ippān doon n̄an karōke kōttōpar ko ippān mijenede eo kōn ta eo n̄an kattōbrake ilo iien ejānijnij eo. Kobaļo̧k ilo aolep m̧ōttan jerbal ko an mijenede, ekoba kappukot, katakin, im ekkatak an kam̧pānien, ekkatakin kajin (n̄e ekkar), kōm̧m̧an karōk aolep raan, im jemjerāik armej ro.
- Katakin ilo am̧ kōjerbale jeje ko rekwojarjar im pedped in katak ko jān Preach My Gospel.
- Etale im kōmeļeļe kōn armej ro mijenede ro rej jerbal ippāer ak katakin er.
- Leļok n̄an mijenede eo, naan in jipan̄ ko kō realikkkar, ekoba ta eo em̧m̧an mijenede eo ekar kōm̧m̧ane im wāween an mijenede eo em̧m̧anļo̧k.
- Kōpelļo̧k buruōm n̄an enaan ko jān mijenede eo kōn eria ko kwoj aikuj em̧m̧anļo̧k ie.
- Etale im ekōnono ippān kajjojo mijenede ro ekkatak ilo iien ejānijnij ko an kam̧pānien.
- Reboot kōn ejānijnij an kam̧pānien ilo leta ko am̧ aolep wiik n̄an mijen būreejtōn eo

2.3.2

Em̧m̧akūt ko

Mijen opij eo enaaj karōke iien em̧akūtkūt eo am̧ ilo juon iien em̧m̧akūt bwe kon jab makeļo̧k iaam̧. Ilo jejjo iien ko, kōn an jon̄an ettoļo̧k im ļōmņak ko jet, mijen būreejtōn eo am̧ emaron̄ kōm̧man oktak. Ilo jekjek kein, lukkuun kōkm̧anm̧an, kōjerbal jeļā eo am̧, im ļoor Jetōb.

N̄e kwoj em̧m̧akūt:

Kajjuļo̧k n̄an eria eo am̧ ekāāl n̄an kobaļo̧k ippān kam̧pānien eo am̧ ekāāl.
Jab m̧ōn̄ā ak idaak jabdewōt men ko kwaar ital jāni ilo iien am̧ em̧akūtkūt.
N̄e kwoj em̧akūtkūt, kanooj kōm̧m̧an bwe en bwe bātōre eo an taļboon eo am̧ n̄an tūreep eo. Eļan̄n̄e kwoj em̧akūtkūt make iaam̧ elōn̄lo̧k jān 3 awa ko, kakutkut am̧ ko̧o̧ļeļo̧k mijen opij eo.

Eļan̄n̄e kam̧pānien eo am̧ ej em̧m̧akūt im kwojjab, jerbal ippān mijenede ro jet, āinwōt kar karōke jān ritōl ro an mijenede reddik, m̧ae iien kam̧pānien eo am̧ ekāāl ejtōprak waj.

2.3.3

Iien ko Rem̧m̧an n̄an Kwaļo̧k Ippān Membōr ro

Karuwaineneik membōr ro n̄an kobawaj ippam̧ ilo jekjek ko rejjab kāāl n̄an kappukot, katakin, peptaij, im jemjerā armej ro. Rojan̄ im jipan̄ membōr ro n̄an m̧ōttāik armej ro kwoj katakin er im n̄an karuwaineneik ro kwoj katak ippāer n̄an bōk koņaer ilo m̧akūtkūt ko an ward eo im an baam̧le. Kajjitōk ippān membōr ro n̄an kwaļo̧k en̄jake ko aer make im naan in kam̧ool ko aer.

Mijenede ro rej aikuj ped wōt ippān doon ilo kam̧pānien ko. Kōn menin, ejjeļo̧k mijenede rej ejānijnij ippān membōr ro. Ijoke, kōrā membōr ro (diktata 16 iiō ak rūttoļo̧k aikuj ļoor kien ko an jikin eo) emaron̄ etal ippānļo̧k im katakin ippān ruo ak elōn̄ļo̧k sister ro. Em̧m̧aan membōr ro (diktata 16 iiō ak rūttoļo̧k aikuj ļoor kien ko an jikin eo) emaron̄ etal ippānļo̧k im katakin ippān ruo ak elōn̄ļo̧k elder ro. Ripālele ro em̧ōj aer m̧are remaron̄ katakin ippān sister ro ak elder ro.

2.3.4

Etan Rikkatak ro Kar Leļo̧k

Etan rikkatak eo kar leļo̧k me ekar kajjitōk n̄e mijenede ro remaron̄ kepaake n̄an katak.

N̄e jerbal ippān armej eo lewaj etan n̄an eok:

Kepaak mijenede ro, membōr ro, ak kajjojo armej ro rekar lewaj armej eo me ekar lewaj etan rikkatak eo, eļan̄n̄e emaron̄. Kapilōk ippāer kōn wāween am̧ jipan̄ armej eo.
Kajjeon̄ kūrlo̧k armej eo kar lewaj ilo iien eo em̧ōkajtata, ilowaan wōt 24 awa.
Ron̄jake im katak wāween eo n̄an jipan̄ armej eo kar lewaj etan.
Bokļo̧ki jabdewōt aitōm̧ ko kar kajjitōk kaki.
Katakin aikuj ko im itok limo ko an armej eo.
Wōnm̧aanļo̧k wōt im jerbal ippān mijenede ro, membōr ro, ak kajjojo armej ro me rekar lewaj etan armej eo (lale 2.2.4).

N̄an meļeļe ko reļļapļo̧k kōn kajjojo armej ro me kar lewaj etan rikkatak eo, lale “Member, Missionary, and Church Headquarters Referrals” ilo “Ekōjkan Aō Kappok Armej n̄an Katakin?” ilo Preach My Gospel, jebta 9.

2.3.5

Kweilo̧k ko im Ko̧o̧njeļ ko

Mijenede ro rej kapilōk ippān doon ilo aer leļo̧k im bōk kaminene ko ilo aer kōm̧m̧an karōk im kōtōbalbal jerbal in mijenede. Kweilo̧k ko im ko̧o̧njeļ ko rej aikuj akjokwetok Jetōb an Irooj im aikuj juon iien eo n̄an revelesōn (lale Katak im Bujen Ko 6:32). Kakkobabaļo̧k, ain doon āinwōt mijenede ro aikuj lewaj n̄an eok iie n eo em̧m̧an n̄an kōketak doon im lan̄lōn̄ ilo jerbal ko am̧ ippān doon (lale Katak im Bujen ko 43:8; 50:22).

Kweilo̧k ko me kar karōki jān kam̧panien ko an mijenede, mijenede ritōl eo me edik, im ritōl ro an mijen ekoba:

Iien ko n̄an kōm̧m̧ani karōk ko an kajjojo raan im kajjojo wiik
Kweilo̧k ko an ko̧o̧njeļ an district
Kweilo̧k ko reļļap an zone
Kweilo̧k ko an ko̧o̧njeļ an ritōl ro an mijen

Kweilo̧k ko kar karōki jān ritōl ro an jikin eo ekoba men kein:

Kweilo̧k in kōtōbalbal ko an mijenede
Kweilo̧k ko an ward ko̧o̧njeļ

2.3.6

Intōrpiu in Peptaij ko

N̄e kōm̧m̧ane juon iien intōrpiu in peptaij, elder ro rej aikuj:

Etale ta eo Irooj ekar ba ilo Katak im Bujen Ko 20:37.
Ļoor tōl eo an Jetōb Kwojarjar.
Kajjōtikin kajjitōk in peptiaj ko loi ilo “Baptism and Confirmation: Questions and Answers” jekjōn in jebta 12 ilo Preach My Gospel.
Ukukōt kajjitōk ko n̄an dettan im kekemo̧o̧j eo an kajjojo armej.
Likkuun lale bwe būreejtōn eo an doulul eo an elder ro ak ward mjen leader eo ejeļā kōn intōrpiu in peptaij eo m̧oktakļo̧k.

Eļan̄n̄e armej eo ej tin peptaij ej kōņaan, ļeo ak lio maron̄ aruwaineneik juon pāāren, eo pālele, ak rūtto ro jet n̄an kobaļo̧k ilo iien intōrpiu eo. Ekōl kōn en̄jaake ko an juon armej kōn an eo pāleen ļeo ak lio ak juon ajri edik ej intōrpiu. Ļoor laajrak in tōk ko ilo Preach My Gospel n̄an intōrpiu im bōk mālim eo n̄an peptaiji eo pāleen juon armej ak juon ajri jidikdik (lale “How to Conduct the Interview” ilo “How Do I Prepare People for Baptism and Confirmation?” ilo Preach My Gospel, jebta 12).

District leader rej intōrpiuki armej ro rej tōn peptaiji er im kar katakin er jān mijenede ro ilo district eo aer, ekoba ro rekar ekkatak jān rijipan̄ ro an būreejtōn eo, zone leader ro, im sister training leader ro ilo district eo aer.

Zone leader ro rej itōrpiuki armej ro rej tōn peptaij er im kar katakin er jān district leader ro ilo zone eo aer.

Eļan̄n̄e ritōl ro an district im zone kar kappeik er rejjab pād, mijen būreejtōn eo emaron̄ jitōn̄ bar juon elder n̄an kōm̧m̧ane intōrpiu eo.

2.3.7

Peptaij ko

Jerbal ippān būreejtōn eo an doulul eo an elder ro ak ward mission leader eo n̄an karōke iien peptaij ko (lale “The Baptismal Service” in “How Do I Prepare People for Baptism and Confirmation?” ilo Preach My Gospel, jebta 12). Ijjinoe kōpopo ko n̄an iien peptaij ko ilo iien eo em̧okajtata.

2.4

M̧akūtkūt ko Raan Otemjej im Jikejuuļ ko

Karōke im jikejuuļi n̄an kakūrm̧ool jibadbad in mijenede eo am̧ im kalimjōk wōt aikuj ko an ro jet. Keememej ta eo Irooj ekar kallim̧uri ro me kar kūr n̄an kwaļo̧k gospel eo: “Im eļan̄n̄e āindein bwe kom̧ro en aikuj jerbal aolepān raan ko amiro ilo kwaļo̧k ukeļo̧k n̄an armej rein, im bōktok, juon wōt armej n̄an Eō, ewi jon̄an an ļap naaj amiro m̧ōņōņō ippān ilo aelōn̄ eo an Jema!” (Katak im Bujen Ko 18:15).

2.4.1

M̧akūtkūt ko Ejjab Ekkā Kōm̧m̧ani Raan Otemjej

Ekoba m̧akūtkūt kein ilo jikejuuļ eo am̧ aolep raan:

Kālet im etali kōttōpar ko am̧ make, kam̧pānien, im mijen eo.
Karōke jikejuuļ eo am̧ n̄an raan eo.
Kōpooj katak ko.
Ekkatak jān jeje ko rekwojarjar, Preach My Gospel, katak ko an rikanaan ro remour im rijilōk ro, im kein jipan̄ ko jet em̧ōj kōmālimi (lale 2.4.4).
Etale juon unin kōnono ikijeen ājmour ak kōjeparok ak juon iaan wāween kōjeparok ko n̄an kōjerbal technology (lale 4.0–4.7).
Kappok armej n̄an katakin.
Jerbal ippān ritōl ro ilo jikin eo im membōr ro.
Jerbal n̄an ro jet ilo m̧akūtkūt ko kar karōki ak jaab.
Bōk aikuj ko am̧ make, ko āinwōt m̧ōn̄ā im kōpojak n̄an raan eo.

2.4.2

Waanjon̄o̧k in Jikejuuļ an Kajjojo Raan

Jikejuuļ eo an kajjojo raan n̄an mijen eo am̧ emaron̄ āinwōt jikeuuļ in ijin ilaļ. Jikejuuļ eo am̧ emaron̄ okoktak jidik jān mijen būreejtōn eo am̧ n̄an holiday ko, iien ko reaorōk im reļļap ilo mijen eo am̧, im wōnm̧aanļo̧k wōt.

6:30 jibbon̄	Jino raan eo.
6:30–10:00 jibbon̄	Jar. Kōmourur (30 minit ko). Tutu, m̧ōn̄ā in jibbon̄, im kōppopo n̄an raan eo. Ekkatak ippam̧ make (60 minit ko). Kōm̧m̧an karōk (30 minit ko).
10:00 jibbon̄.–9:00 jota	Kappukot, katakin, im jerbal n̄an ro jet.* Kōkāāl rekoot ko ilo digital ak peba ilo aolepān raan eo. Etale ilo tukadu in juon unin kōnono ikkijeen ājmour ak kōjparok ak juon iaan kein kōjparok ko an teknaļōji. Kōm̧m̧ane iien ekkatak an kam̧pānien im kōpooj katak ko (30 minit). Ekkatak bar kein jipan̄ ko jet n̄an mijenede ro rekāāl im rikaminene ro ilowaan wiik ko 12 ilo jikin mijen eo (30–60 minit ko, eļan̄n̄e ekkar). Katak kajin eo an mijen eo am̧ (30–60 minit ko, n̄e ekkar). Mōn̄ā in rālep ak jota (en jab ļapļo̧k jān 2 awa ko kobain).
9:00 jota	Jepļaak n̄an jikin jokwe eo am̧, ijjelo̧kin n̄e ewōr juon am̧ iien ekkatak em̧ōj karōke, eļan̄n̄e āindein, jepļaak ilo 9:30 jota.
9:00–9:30 jota	Jeje ilo jōnōļ eo am̧, pojak n̄an kiki, im jar.
9:30–10:30 jota	Etal im kiki

*M̧akūtkūt ko am kajjojo raan rej aikuj pedped ioon iaieo ippān armej. Ajeeje am̧ kōm̧m̧an karōk im m̧akūtkūt ko aolepān raan eo n̄an kōm̧m̧an bwe kon jab joļo̧k eļap iien lo jikin apartment eo ami. Eļan̄n̄e jon̄an ettoļo̧k in im iien ej kōtļo̧k, komaron̄ jepļaak n̄an apartment eo ilo ilo aolepān raan eo n̄an katōprak aikuj kein.

Jikejuuļ eo em̧ōj kōmālimi n̄an mijen eo am̧ enaaj kōtļo̧k iien n̄an jerbal, kakkije, im bar jerbal. Ej aurōk n̄an kabwe am̧ kakkije im m̧ōn̄ā im draak n̄an ājmour eo am̧ ilo jetōb im en̄jake.

2.4.3

Iien ko n̄an Kōm̧m̧an Kōttōpar im Karōk

Kōm̧m̧ani iien kōm̧m̧ani karōk ko an kajjojo raan im kajjojo wiik ippān kam̧pānien eo am̧. Ļōmņak kōn aikuj ko an ro kwoj katakin er im wāwee am̧ jerbal ippān membōr ro ilo am̧ etale eddōkļo̧k, kōm̧m̧ani kōttōpar ko, im kōm̧m̧ani kālet ko n̄an raan eo im wiik eo (lale “How to Set Goals,” “The Weekly Planning Session,” im “Daily Planning Session” ilo “How Do I Use Time Wisely?” ilo Preach My Gospel, jebta 8).

2.4.4

Iien Ekkatak ko

Kōjerbal iien ekktak eo am̧ make im kam̧pānien eo m̧ōttam̧ n̄an pedped ioon jeje ko rekwojarjar (Eļaptata ilo Bok in Mormon), Preach My Gospel, katak ko an rikanaan ro rej mour (loe ilo Gospel Library), im ilo jon̄ak kein. Kein jipan̄ kein em̧ōj kōmālimi remaron̄ kōkajoorlo̧k jeļāļ eo am̧ im naan in kam̧ool eo am̧ kōn gospel eo an Jisōs Kraist karr kōjepļaaktok im jipan̄ eok tōpar aikuj ko an ro kwoj katakin er.

Eļan̄n̄e em̧ōj karōk eok n̄an ekkatak juon kajin ekāāl, ekkatak im kōmālmel e aolep raan.

Eļan̄n̄e kwoj juon mjinede eo ekāāl, ekkatak ippān trainer eo am̧ n̄an eļapļo̧k 30 n̄an 60 minit ko kajjojo raan n̄an wiik ko 12 m̧oktata ilo mission field. (lae “For New Missionaries: Additional Companion Study” ilo “Introduction: How Can I Best Use Preach My Gospel?” ilo Preach My Gospel).

2.4.5

Mōn̄ā ippān Ro Jet

Eļan̄n̄e ewōr, mijen būreejtōn eo am̧ im būreejtōn eo an stake ijo jokwe ie naaj lewaj unin tōl ko n̄an jikejuuļ in m̧ōn̄ā ko ippān armej ro ilo mijen eo am̧. N̄e membōr ro ak ro jet rej kōm̧m̧an iien m̧ōn̄ā:

Kwōn kautiej jekjek ko im iien ko aer.
Kwōn kam̧m̧oolol kōn m̧ōn̄ā ko rej lewaji.
Kajjitōk n̄an katakin juon katak 15- ak 20-minit m̧okta ak ālikin iien m̧ōn̄ā eo n̄an kōkajoorļo̧k ro kwoj loļo̧k er im n̄an kōm̧m̧ane juon iien em̧m̧an n̄an kōkm̧anm̧anļo̧k maron̄ eo am̧ n̄an katakin jān Jetōb eo.

Juon rūtto jān gender eo am̧ make aikuj ped ippōm̧ im kam̧pānien eo am̧ n̄e kwoj m̧ōn̄ā juon m̧ōn̄ā ippān juon eo jān gender eo juon.

2.5

Raan in Kōppopo

Mijen Būreejtōn eo am̧ enaaj karōk juon raan ilo kajjojo wiik āinwōt juon raan in kōppopo. Ilo raan in kōppopo eo ej kōtļok iien n̄an bar kōmourur ilo ānbwin, jetōb, im en̄jake āinwōt am̧ “jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko” (Mosaia 18:9). Enaaj barāinwōt lewaj n̄an eok im kam̧pānien eo am̧ iien ko rem̧m̧an n̄an ped ippen mijenede ro jet ilo district eo am̧ im n̄an lan̄lōn̄ ilo m̧akūtkūt in kalimomo ko ippān doon (lale 3.6).

Jouj im keememej kakkōl eo an Irooj kōn iien: “Jab ettōr m̧ōkajļo̧k ak jerbal eļapļo̧k jān am maron̄” (Katak im Bujen Ko 10:4), im “etal n̄an jikin kiki ko ami m̧ōkaj, bwe kom̧in maron̄ jab mōk; jerkak m̧ōkaj, bwe ānbwinnōmi im ļōmņak ko ami ren maron̄ wāmourur ” (Katak im Bujen Ko 88:124).

2.5.1

M̧akūtkūt ko an Raan in Kōppopo eo

M̧akūtkūt ko an raan in kōppopo eo remaron̄ koba (ak rejjab dikļo̧k) āinwōt in ilaļ:

Ekōnono ippān baam̧le, mijen būreejtōn eo, ro m̧ōttam̧ (lale 3.9)
Kwaļkoļ nuknuk
Mwijbar im ko jet n̄an karbōb eo an juon make
Karreo
Kaikujkuj
Kakkije
Bōk koņaam̧ ilo m̧akūtkūt in kalimomo ko kar kōmālimi (lale 3.6)

2.5.2

Waanjon̄o̧k in Jikejuuļ in Raan in Kōppopo

Juon jikejuuļ in raan in kōppopo eo enaaj āinwōt in laļ:

6:30 jibbon̄	Jino raan eo.
6:30–8:00 jibbon̄	Jar. Tutu, m̧ōn̄ā in jibbon̄, im kōppopo n̄an raan eo. Kōm̧m̧an karōk (30 minit ko). Kōm̧m̧ane iien katak eo am̧ make (30 minit ko).
8:00 jibbon̄ –6:00 jota	Kōm̧m̧ani m̧akūtkūt ko an raan in kōppopo eo (lale 2.5.1). Kakeememej: Aolep m̧akūtkūt ko an raan in kōppopo eo rej aikuj dedeļo̧k ilo 6:00 awa jota.
6:00–9:00 jota	Kappukot, katakin, im jerbal n̄an ro jet.
9:00 jota	Jepļaak n̄an m̧ōn jokwe eo am̧. Eļan̄n̄e ewōr am̧ iien ekkatak, jepļaak ilo 9:30 jota.
9:00–9:30 jota	Jeje ilo jōnōļ eo am̧, pojak n̄an kiki, im jar.
9:30–10:30 jota	Etal im kiki

2.6

M̧akūtkūt ko an Raan in Jabōt

Karōke m̧akūtkūt ko an Raan in Jabōt me renaaj jipan̄ eok kakūrm̧ool jibadbad in mijenede eo am̧ n̄an kappukot, katakin, peptaij, im jipan̄ ro jet ekkatak kōn im erom̧ eļapļo̧k āinwōt Jemedwōj Ilan̄ im Jisōs Kraist. Keememej katak ko an Irooj kōn Raan in Jabōt ilo Katak im Bujen Ko 59:13–19, im ļōmņak kōn naan ko ak ļain in naan ko me rej elmakote bwe juon Jabōt em̧ool ekoba lan̄lōn̄, bōro em̧ōņōņō, im juon paaktokūm̧ em̧ōņōņō.

M̧akūtkūt ko an Raan in Jabōt ekoba etal n̄an jar, kweilo̧k eo eļap, m̧wen̄an ko an kweilo̧k eo eļap ilo raan in Jabōt an stake, im kweilo̧k ko jet āinwōt ward ko̧onjeļ eo n̄e kūrļo̧k eok. Rej barāinwōt koba bōk koņaam̧ ilo jitlo̧k allōn̄ otemjej.

Ilo kijejeto in mijenede ko am̧, Irooj ekar jab kajjitōk ippam̧ n̄an ilo̧k ilo ejjeļo̧k m̧ōn̄ā, ijello̧kin ilo iien jitlo̧k eo allōn̄ otemjej jeļā kake, ak n̄an kaarmejete am̧ kiki n̄an am̧ maron̄ in juon mijenede ej wūjlepļo̧k. Kwomaron̄ kakkut am̧ jitlo̧k kōn juon un eo eaorōk, bōtaab jab jitlo̧k eļapļo̧k jān 24 awa ilo juon iien jitlo̧k.

2.7

Jerbal in Jipan̄ ilo Jukjuk in Pād eo

Kwomaron̄ ekkatak n̄an erom̧ juon rikaļoor an Jisōs Kraist jān am̧ jerbal āinwōt an Kar jerbal. Kappukot iien ko rem̧m̧an n̄an jerbal n̄an kam̧pānien eo am̧, armej ro kwoj katakin er, membōr ro, im ro jet ilo jukjuk in pād eo, “bwe kom̧in maron̄ ekkatak jeļāļo̧kjeņ; bwe eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij” (Mosaia 2:17).

Kwoj aikuj jerbal kōn juon ikdeelel em̧ool n̄an jipan̄ ro jet ilo ejjeļo̧k kōtmene ta eo enaaj waļo̧k. Ļoor aolep kakien ko ikkijjen būroojāk in jerbal in jipan̄ (lale 7.2), eļaptata jabdewōt kōn jab kwaļo̧k naan ilo iien am̧ jerbal im jab jerbal ilo ijo kwonaaj make iaam̧ ippān ajri ro. Eļan̄n̄e juon ej kwaļo̧k itok limo ilo ennaan eo am̧, uwaake ilo juon iien eo ekanooj kadu im kōm̧m̧an karōk n̄an ioone er ilo juon iien eoktak im jikin eo n̄an kwaļo̧k juon ennaan.

N̄an meļeļe ko reļļapļo̧k lale jekjōn 7.2, “Guidelines for Service.”