Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajom li ch’uut reheb’ li Saaj Ixq

Li ch’uut reheb’ li Saaj Ixq naxtenq’aheb’ lix raarookil rab’in li Dios chixkawresinkil rib’ chi sutq’iik rik’in a’an. Naxtenq’aheb’ li saaj ixq chixk’ulb’aleb’ ut chixpaab’ankileb’ li loq’laj sumwank ut chixchamob’resinkil lix jalajik xch’ooleb’ rik’in li Jesukristo ut lix evangelio. Sa’eb’ lix tzoleb’aal, eb’ li saaj ixq neke’k’anjelak chiruheb’ li ras riitz’in, neke’xb’aanu li teneb’anb’il xb’aaneb’ lix sumank, neke’xnimob’resi li junajil, ut neke’xtzol ut neke’xyu’ami li tzol’leb’. (Chi’ilmanq Jolomil K’anjenel Hu: Li k’anjelak sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 11.1.1.)

Eb’ laj tenq’ aj k’ehol na’leb’

Li awa’b’ej ut eb’ laj tenq’ aj k’ehol na’leb’ neke’k’anjelak chiruheb’ li saaj ixq naq yookeb’ chi ok jo’ xtzolom li Jesukristo chiru chixjunil lix yu’ameb’. Neke’xk’ut chiruheb’ li awa’b’ejil re tzoleb’aal k’a’ru teneb’anb’il sa’ xb’eeneb’ ut neke’xtenq’aheb’ (chi’ilmanq 11.3.2). Eb’ laj tenq’ aj k’ehol na’leb’ neke’xtenq’a ajwi’ li awa’b’ej rik’in li tz’iib’anb’il esil, ut chan ru na’oksiman li tumin.

Eb’ li saaj aj jolominel

Li awa’b’ejil reheb’ li Saaj Ixq naxtenq’aheb’ li saaj aj jolominel. Eb’ li awa’b’ej re tzoleb’aal neke’k’anjelak sa’ li ch’uut reheb’ li saaj re teep. Eb’ li awa’b’ejil re tzoleb’aal neke’xb’eresiheb’ ut neke’k’anjelak chiruheb’ li saaj ixq naq yookeb’ chi nach’ok rik’in li Kolonel ut chi tz’aqonk sa’ lix k’anjel li Dios re li kolb’a-ib’ ut li taqenaqil loq’al. Chi tenq’anb’il xb’aaneb’ laj jolominel li ninqeb’, neke’xkawresi li k’anjelak chiru as iitz’inb’ej, eb’ li kok’ k’anjel, ut eb’ li ch’utam re domingo (chi’ilmanq 11.3.4.2).

Eb’ li tzoleb’aal re domingo

Li obiispil ut eb’ laj jolominel reheb’ li saaj ixq neke’xsik’ ru rik’in tijok chan ru xk’uub’ankileb’ li tzoleb’aal a’ yaal xchihab’eb’ li saaj ixq. Neke’xk’oxla chan ru naru te’jolominq li saaj ixq. Sa’ li junjunq chi tzoleb’aal, us ta ka’ch’in, tento taawanq jun awa’b’ej, ut b’ar wi’ naru, jun malaj wiib’ laj tenq’ aj k’ehol na’leb’ ut jun aj tz’iib’anel (chi’ilmanq 11.1.3).

Li k’anjelak chiru as iitz’inb’ej ut eb’ li kok’ k’anjel

Eb’ li awa’b’ejil re tzoleb’aal, chi tenq’anb’ileb’ xb’aaneb’ laj jolominel ninq, neke’xkawresi li k’anjelak chiru as iitz’inb’ej ut li kok’ k’anjel li te’xwaklesi li xnawom ch’oolej, te’xk’e xkawilaleb’ li junkab’al, te’xwaklesi li junajil sa’ li tzoleb’aal, ut te’xkanab’eb’ li komon chirosob’tesinkil li ras riitz’ineb’ (chi’ilmanq 11.2.1.3). Li k’anjelak chiru as iitz’inb’ej ut eb’ li kok’al neke’xkanab’eb’ li saaj chi ch’utlaak ut chixwotzb’al lix sahilal li xyu’aminkil li evangelio ut chi tz’aqonk sa’ li xnimal ru xk’anjel li Qaawa’.

Li b’eresink ut li chaq’rab’ink

Chixjunileb’ li komon ak ninqeb’ li neke’k’anjelak rik’ineb’ li saaj tento te’xb’aanu li tzolok chirix xkolb’aleb’ rix li kok’al naq maji’ jun po rokikeb’ sa’ lix b’oqb’aleb’ (ProtectingChildren.ChurchofJesusChrist.org). Li b’eresink ut li chaq’rab’ink chirixeb’ li saaj ixq wankeb’ xmajelal sa’ tib’elej, eb’ li eetalil reheb’ li saaj, ut xkomon chik li na’leb’ naru natawman sa’ li tasal 11.6 re li Jolomil K’anjenel Hu.