Tō’u pi’ira’a ’ei peresideni nō te pupu diakono

Te mau hōpoi’a

’Ua māuruuru roa te Fatu nō tō ’oe hina’aro ’ia tāvini i roto i tāna ’Ēkālēsia. E ’ite mai ’oe i raro nei i te hō’ē hi’ora’a o te mau hōpoi’a nō tō ’oe pi’ira’a.

Te fā o te Autahu’ara’a a Aarona

E tauturu te mau pupu o te autahu’ara’a a Aarona i te feiā ’āpī tamāroa ’ia rave ’e ’ia ha’apa’o i te mau fafaura’a mo’a, ’e ’ia fa’ahōhonu i tō rātou fa’afāriura’a ia Iesu Mesia ’e i tāna ’evanelia. Te fā a te hō’ē pupu ’o te tauturura’a ïa i te feiā e mau nei i te autahu’ara’a, ’ia ’ohipa ’āmui nō te fa’aō mai i roto i te ’ohipa nō te fa’aorara’a ’e te fa’ateiteira’a a te Atua. (Hi’o Buka arata’i rahi : Te tāvinira’a i roto i Te ’Ēkālēsia a Iesu Mesia i te Feiā Mo’a i te mau Mahana Hope’a nei, 10.1, Vaira’a buka ’evanelia)

Te pupu diakono

E tomo te feiā ’āpī tamāroa i roto i te pupu o te mau diakono i te ’āva’e Tēnuare o te matahiti e ti’ahia ai tō rātou 12 matahiti. I te reira taime e fa’atōro’a-ato’a-hia rātou ’ei diakono, mai te peu ’ua ineine maita’i rātou ’e ’ua ti’a mā. Tei roto i te mau hōpoi’a te ’ōperera’a i te ’ōro’a mo’a ’e te tauturura’a i te ’episekōpo i roto i « te ha’apa’ora’a ïa i te mau mea tāhuti ato’a » (Te Ha’api’ira’a Tumu ’e te mau Fafaura’a 107:68). (Hi’o 10.1.3.1)

Te peresideni

I roto i te mau hōpoi’a a te peresideni o te pupu diakono, tē vai ra te arata’ira’a i te mau tauto’ora’a a te pupu i te ravera’a i te ’ohipa nō te fa’aorara’a ’e te fa’ateiteira’a a te Atua ; te ha’amātaura’a ’e te tāvinira’a i te melo tāta’itahi o te pupu, te fa’aōra’a mai ia rātou ’aita e haere mai nei i te rurura’a a te pupu ; te ha’apūaira’a i te mau melo ’āpī ’e tei ho’i mai ; te ha’api’ira’a i te mau melo o te pupu i tā rātou hōpoi’a o te autahu’ara’a ; ’e te fa’anahora’a ’e te arata’ira’a i te mau rurura’a a te pupu (hi’o 10.4.2). E turu tōna nā tauturu iāna i roto i tāna mau hōpoi’a. ’Ia putuputu tāmau noa te peresidenira’a pupu (hi’o 10.4.3).

Te ’āpo’ora’a a te feiā ’āpī

E melo te peresideni o te pupu diakono nō te ’āpo’ora’a feiā ’āpī pāroita. Te fā o teie ’āpo’ora’a, nō te tauturu ïa i te feiā ’āpī ’ia ’āfa’i mai ia vetahi ’ē ia Iesu Mesia ra ’e ’ia rave i te ’ohipa nō te fa’aorara’a ’e te fa’ateiteira’a. Nā te ’episekōpo e peresideni i te ’āpo’ora’a feiā ’āpī pāroita. (Hi’o 10.4.4.)

Te ’ohipa tāvinira’a ’e te mau ’ātivite

Nā te ’episekōpora’a ’e te feiā fa’atere pupu feiā ’āpī, pāturuhia ’e te mau tauturu ha’amāramarama, e fa’anaho i te tāvinira’a ’e te mau ’ohipa ri’i. E tauturu te reira i te rave fa’aotira’a i te ’ohipa nō te fa’aorara’a ’e te fa’ateiteira’a. ’Ia ravehia te reira i roto e maha tuha’a o te tupura’a o te ta’ata iho : te pae vārua, te pae tōtiare, e pae tino, ’e te pae o te ferurira’a. (Hi’o 10.2.1.3.)

Te mau arata’ira’a ’e te mau fa’aturera’a

Te tahi atu mau arata’ira’a ’e mau fa’aturera’a, mai te turura’a i te feiā ’āpī tamāroa huma, te fa’ari’ira’a i te mau pīhi nō te mau tamari’i ’e te feiā ’āpī ’e te ha’aputura’a i te mau ō ha’apa’era’a mā’a, e ’itehia ïa i roto te tuha’a 10.8 o te Buka arata’i rahi.