Ko e Kamatá
“Ko e meʻa pē ʻokú Ne kolé ke fai hoʻo lelei tahá pea foaki mo ho lotó kotoa foki. Fai ia ʻi he loto-fiefia pea ʻi he lotu ʻo e tui.” —Palesiteni Henry B. Eyring1
ʻOku mau fakaafeʻi kimoutolu ke kamata homou uiuiʻi foʻoú ʻaki ʻa e poupou mo e ivi tākiekina kotoa pē kuo fakaʻatā atu ʻe he ʻEikí kiate kimoutolú. ʻE lava ke fai ʻeni ʻaki hono tali e ongo fakaafe ko ʻeni ke ngāué.
ʻUluakí, lotu. Lotua kinautolu ʻokú ke tatakí. Lotua kinautolu ʻokú ke tokoniʻí. Lotua maʻu pē ha ngaahi faingamālie, mahino, mo ha ngaahi tāpuaki. Falala lahi ki he ʻEikí pea te Ne tāpuakiʻi koe ʻi ho uiuiʻí.
Uá, ke hikinimaʻi pea vaheʻi koe ki ho uiuiʻi foʻoú. ʻOku ʻoatu ʻe he sitepu mahuʻingá ni kiate koe ʻa e mafai ʻo e lakanga fakataulaʻeikí ke ke ngāue ʻi ho uiuiʻí. Te ke lava ʻi he mafai ko ʻení ke maʻu ʻa e ngaahi tāpuaki mo e ueʻi fakalaumālie ʻoku tataki ʻe he Laumālié kiate kinautolu ʻokú ke taki mo tokoniʻí.
Hoko atu ki he konga ʻo e Ngaahi Fatongiá ki ha vakai fakalūkufua ki ho uiuiʻí.