ការហៅរបស់ខ្ញុំជាលេខាក្រុមយុវនារី
ការទទួលខុសត្រូវទាំងឡាយ
ព្រះអម្ចាស់មានអំណរគុណចំពោះឆន្ទៈរបស់អ្នកក្នុងការបម្រើនៅក្នុងសាសនាចក្ររបស់ទ្រង់ ។ ខាងក្រោមនេះជាទិដ្ឋភាពទូទៅមួយនៃការទទួលខុសត្រូវក្នុងការហៅរបស់អ្នក ។
គោលបំណងរបស់ក្រុមយុវនារី
អង្គការយុវនារីជួយបុត្រីជាទីស្រឡាញ់របស់ព្រះឲ្យរៀបចំខ្លួន ដើម្បីត្រឡប់ទៅទីវត្តមានរបស់ទ្រង់វិញ ។ អង្គការយុវនារីជួយក្រុមយុវនារីឲ្យចុះ និងរក្សាសេចក្តីសញ្ញាដ៏ពិសិដ្ឋ ហើយធ្វើឲ្យការប្រែចិត្តជឿរបស់ពួកគេលើព្រះយេស៊ូវគ្រីស្ទ និងដំណឹងល្អរបស់ទ្រង់កាន់តែស៊ីជម្រៅ ។ នៅក្នុងថ្នាក់របស់ពួកគេ ក្រុមយុវនារីបម្រើមនុស្សដទៃ បំពេញទំនួលខុសត្រូវនៃសេចក្តីសញ្ញា ស្ថាបនាសាមគ្គីភាព និងរៀនរស់នៅតាមគោលលទ្ធិ ។ ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ, ១១.១.១ ) ។
លេខា
លេខាថ្នាក់ក្រុមយុវនារីជួយប្រធានក្នុងការរៀបចំរបៀបវារៈ ការកត់ត្រាការប្រជុំ និងការតាមដានការចាត់តាំងសម្រាប់ការប្រជុំគណៈប្រធាន ។ គាត់ក៏ណែនាំដល់លេខាថ្នាក់ ជួយពួកគេឲ្យរក្សាកំណត់ត្រាវត្តមាន និងជួយដល់គណៈប្រធានយុវនារីក្នុងការរៀបចំថវិកា និងគណនីសម្រាប់ចំណាយផងដែរ ( សូមមើល ១១.៣.៣ ) ។
ថ្នាក់ថ្ងៃអាទិត្យ
គណៈប៊ីស្សព និងថ្នាក់ដឹកនាំជាមជ្ឈិមវ័យរបស់ក្រុមយុវនារីធ្វើការសម្រេចចិត្តប្រកបដោយការអធិស្ឋាន ដើម្បីរៀបចំថ្នាក់ទាំងឡាយស្របតាមអាយុ ។ ពួកគាត់ពិចារណាពីឱកាសឲ្យក្រុមយុវនារីចេះធ្វើការដឹកនាំ ។ ថ្នាក់នីមួយៗ មិនថាវាមានទំហំប៉ុនណានោះទេ វាគួរតែមានប្រធានមួយរូប ហើយបើអាចធ្វើបាន មានទីប្រឹក្សាម្នាក់ ឬពីរនាក់ ហើយនិងលេខាម្នាក់ ( សូមមើល ១១.១.៣ ) ។
ការបម្រើ និងសកម្មភាពនានា
គណៈប្រធានថ្នាក់ដែលបានគាំទ្រដោយថ្នាក់ដឹកនាំជាមជ្ឈិមវ័យ រៀបចំផែនការបម្រើ និងសកម្មភាពនានាដែលស្ថាបនាទីបន្ទាល់ ពង្រឹងក្រុមគ្រួសារ ជំរុញឲ្យមានសាមគ្គីភាពក្នុងថ្នាក់ និងផ្ដល់ឱកាសដើម្បីផ្ដល់ពរជ័យដល់អ្នកដទៃ ( សូមមើល ១១.២.១.៣ ) ។ ការបម្រើ និងសកម្មភាពនានាគឺជាឱកាសមួយដើម្បីប្រមូលផ្តុំយុវវ័យ និងចែកចាយនូវក្តីអំណរនៃការរស់នៅតាមដំណឹងល្អ និងការចូលរួមកិច្ចការដ៏អស្ចារ្យរបស់ព្រះអម្ចាស់ ។
គោលការណ៍ណែនាំ និងគោលនយោបាយ
មជ្ឈិមវ័យទាំងអស់ដែលធ្វើការជាមួយកុមារ និងយុវវ័យ ត្រូវតែបំពេញវគ្គបណ្តុះបណ្តាលការការពារកុមារ និងយុវវ័យក្នុងរយៈពេលមួយខែ ក្រោយពីត្រូវបានគាំទ្រចំពោះការហៅ ( នៅលើគេហទំព័រ ProtectingChildren.ChurchofJesusChrist.org ) ។ គោលការណ៍ណែនាំ និងគោលនយោបាយទាក់ទងនឹងយុវនារីដែលមានពិការភាព និមិត្តរូបយុវវ័យ និងច្រើនទៀត មាននៅក្នុងផ្នែក ១១.៦ នៃ ក្បួនខ្នាតទូទៅ ។