Lipōtí: Vahevahe nounou mo e kulupú ki ha ngāue faingataʻa naʻá ke lava ʻo fakaʻosi ʻi he uike kuo ʻosí.
Fakalaulauloto: Ko e hā ʻoku fakaʻatā ai ʻe he Tamai Hēvaní kitautolu ke tau fehangahangai mo e palopalemá mo e faingataʻá?
Mamataʻi: “Ha Loli Lahi Angé? (A Bigger Truck?)” maʻu ʻi he srs.lds.org/videos . (ʻIkai ha vitiō? Lau ʻa e peesi 19 .)
Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.
ʻĪmisi
mei he Ha Loli Lahi Angé
ʻEletā Dallin H. Oaks : Naʻe fokotuʻu ʻe ha ongo tangata haʻana pisinisi. Naʻá na langa ha kiʻi palepale ʻi ha veʻehala femoʻuekina. Naʻá na fakatau ha loli ʻo lele ai ki ha ngoue ʻa ha taha faama, ʻo na fakatau ha uta meleni ʻi he paʻanga ʻe taha ki he foʻi meleni. Naʻá na lele mai ʻi he lolí ki hona kiʻi palepale he veʻe halá, ʻo fakatau atu ai ʻena melení ʻi he paʻanga ʻe taha ki he foʻi meleni. Naʻá na toe foki ki he faamá ʻo fakatau mai ha uta meleni ʻe taha ʻi he paʻanga ʻe taha ki he foʻi meleni. Naʻá na ʻomai ia ki he veʻe halá, ʻo toe fakatau atu ʻi he paʻanga ʻe taha ki he foʻi meleni. ʻI heʻena toe foki ki he fāmá ke ʻomi ha toe uta ʻe tahá, naʻe talaange ʻe he tokotaha ʻiate kinaua, “ʻOku ʻikai ke ta maʻu ha paʻanga fēfē ʻi he pisinisi ko ʻení, ko ia?” Tali ange ʻe hono hoa ngāué, “ʻIkai, ʻoku ʻikai.” “ʻOkú ke pehē ʻokú ta fie maʻu ha loli lahi angé?”
(“Focus and Priorities,“ Ensign, May 2001, 82)
Foki ki he peesi 18 .
Aleaʻi: Ko e hā ʻa e palopalema totonu ʻi he talanoá? Ko e hā ha ngaahi meʻa ke fili mei ai ʻa e ongo tangatá?
Lau: Tokāteline mo e Ngaahi Fuakava 9:7–9 mo e lea naʻe fai ʻe ʻEletā Robert D. Hales (ʻi he toʻomataʻú)
“Vakai, naʻe ʻikai mahino kiate koe; naʻá ke pehē te u foaki ia kiate koe, ka naʻe ʻikai te ke fai ha fakakaukau ki ai tuku kehe pē ke kole kiate au.
“Kae vakai, ʻoku ou pehē kiate koe, kuo pau ke ke fakakaukauʻi ia ʻi ho ʻatamaí; pea kuo pau ke ke toki fehuʻi mai kiate au pe ʻoku totonu ia, pea kapau ʻoku totonu ia, te u ngaohi ke māfana ʻa ho lotó ʻiate koe; ko ia, te ke ongoʻi ʻoku totonu ia.
“Ka ʻo kapau ʻoku ʻikai ke totonu ia ʻe ʻikai te ke ongoʻi pehē, ka te ke maʻu ha fakakaukau fiemohea, ʻa ia ʻe fakatupu ai ʻene ngalo ʻiate koe ʻa e meʻa ʻoku halá.”
Tokāteline mo e Ngaahi Fuakava 9:7–9
“ʻOku ʻamanaki mai ʻe he ʻEikí ke tau tokoni ʻo fakaleleiʻi ʻetau ngaahi palopalemá. … Ko ha kakai faʻa fakakaukau, mo faʻa fakaʻuhinga kitautolu. ʻOku tau lava ʻo ʻiloʻi ʻetau ngaahi fie maʻú, ke palani, fokotuʻu ha ngaahi taumuʻa, mo fakaleleiʻi ʻetau ngaahi palopalemá.”
Robert D. Hales , “Every Good Gift,” New Era, Aug. 1983, 8, 9
Sitepu 1: Fili ha hoa ngāue, pea lau ʻa e ngaahi sitepu ʻi laló.
ʻĪmisi
fakatātā ʻo e fakaleleiʻi e ngaahi palopalemá
Sitepu 2: Fili ha palopalema ʻokú ke fehangahangai mo ia pea hiki ia ʻi lalo.
Faʻu ha Fakamatala
Sitepu 3: Fakaʻaongaʻi ʻa e sitepu takitaha ki hoʻo palopalemá.
ʻIloʻi:
Ngaahi fili ki he akó:
Faʻu ha Fakamatala
Fakapapauʻi pea ngāue:
Faʻu ha Fakamatala
Lau:1 Nīfai 17:51 mo e 1 Nīfai 18:2–3 (ʻi he toʻomataʻú)
“Pea ko ʻeni, kapau ʻoku ʻi he ʻEikí ʻa e mālohi lahi pehē, pea kuó ne fai ha ngaahi mana lahi pehē ʻi he lotolotonga ʻo e fānau ʻa e tangatá, ko e hā nai ʻoku ʻikai ai te ne fakahinohinoʻi au ke u foʻu ha vaká?”
“Pea ko ʻeni ko au, Nīfai, naʻe ʻikai te u ngaohi ʻa e ngaahi ʻakaú ʻo hangē ko e founga kuo poto ai ʻa e tangatá; pea ʻikai foki te u foʻu ʻa e vaká ʻo hangē ko e founga ʻa e tangatá; ka naʻá ku ngaohi ia ʻo fakatatau ki he founga kuo fakahā kiate au ʻe he ʻEikí; ko ia, naʻe ʻikai fakatatau ia mo e founga ʻa e tangatá.
Pea ko au Nīfai, naʻá ku ʻalu tuʻo lahi ki he moʻungá, peá u lotu tuʻo lahi ki he ʻEikí; ko ia, naʻe fakahā mai ʻe he ʻEikí kiate au ʻa e ngaahi meʻa lalahi.
Aleaʻi: Naʻe founga fēfē hono lava ʻe Nīfai ʻo foʻu ha vaká?
Tukupā: Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha:
Ngāueʻi ʻa e ngaahi sitepu naʻá mo aleaʻi ʻi he ʻekitivitií ke kamata hono fakaleleiʻi hoʻo palopalemá. Manatuʻi, ʻoua te ke foʻi. ʻOku fie maʻu ha taimi ke fakaleleiʻi ai ʻa e ngaahi palopalemá mo fai ha ngaahi liliu.
Vahevahe mo hoʻo familí pe ngaahi kaungāmeʻá e meʻa kuó ke ako he ʻahó ni fekauʻaki mo hono fakaleleiʻi e ngaahi palopalemá.