Tohi ʻa e Kau Palesitenisī ʻUluakí

Siʻi Kāinga ʻOfeina:

Kuo fakahā mai ʻe he ʻEikí, “Ko ʻeku taumuʻá ke tauhi ʻa ʻeku kau māʻoniʻoní” (T&F 104:15). Ko e fakahā ko ʻení ko ha talaʻofa mei he ʻEikí te Ne ʻomi ha ngaahi tāpuaki fakatuʻasino pea fakaava e matapā ʻo e moʻui fakafalala pē kiate kitá, ʻa ia ko e malava ke tau maʻu ʻa e ngaahi fie maʻu ʻo e moʻuí maʻatautolu mo e kau mēmipa hotau fāmilí.

Kuo teuteuʻi ʻa e kiʻi tohi ko ʻení ke tokoniʻi ʻa e kau mēmipa ʻo e Siasí ke ako pea moʻui ʻaki ʻa e ngaahi tefitoʻi moʻoni ʻo e tuí, akó, ngāue mālohí, pea falala ki he ʻEikí. ʻI hoʻo tali mo moʻui ʻaki ʻa e ngaahi tefitoʻi moʻoni ko ʻení te ke malava lelei ange ʻo maʻu ʻa e ngaahi tāpuaki fakatuʻasino kuo talaʻofa mai ʻe he ʻEikí.

ʻOku mau fakaafeʻi koe ke ke ako faivelenga pea fakaʻaongaʻi ʻa e ngaahi tefitoʻi moʻoni ko ʻení pea akoʻi kinautolu ki he kau mēmipa ho fāmilí. ʻI hoʻo fai iá, ʻe faitāpuekina hoʻo moʻuí. Te ke ako ʻa e founga ke ngāueʻi ho hala lahi ange ʻo e moʻui fakafalala pē kiate kitá. ʻE tāpuakiʻi koe ʻaki ʻa e ʻamanaki leleí, melinó, pea mo e fakalakalaka lahi angé.

Kātaki ʻo fakapapauʻi ange ko e fānau koe ʻa ʻetau Tamai Hēvaní. ʻOkú Ne ʻofa ʻiate koe pea he ʻikai teitei liʻaki koe. ʻOkú Ne ʻafioʻi koe pea ʻoku mateuteu ke ʻoatu e ngaahi tāpuaki fakalaumālie mo fakatuʻasino ʻo e moʻui fakafalala pē kiate kitá.

Fakaʻapaʻapa atu,

Ko e Kau Palesitenisī ʻUluakí

Pulusi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
Sōleki Siti, ʻIutā

Fakangofua ʻi he lea faka-Pilitāniá: 3/15
Fakangofua ke liliú: 3/15
Liliu ʻo e My Path to Self-Reliance
Tongan
12378 900