1 Juan 2–4; 2 Juan
Pagpakita og Gugma alang sa Langitnong Amahan ug ni Jesukristo
Kon ang usa ka tawo mibati nga gihigugma o naghigugma sa laing tawo, ang iyang mga lihok kasagaran mausab. Si Juan mitudlo nga ang atong gugma alang sa Langitnong Amahan ug ni Jesukristo mahimong makadasig kanato sa paghupot sa Ilang mga sugo. Kini nga leksiyon gituyo aron makatabang kanimo nga makasabot unsaon nimo pagpakita og gugma alang sa Langitnong Amahan ug ni Jesukristo pinaagi sa pagtuman sa mga sugo.
Ang mahigugmaong pagprotekta sa Dios
Samtang anaa sa usa ka beach sa Australia, si Elder Von G. Keetch (1960–2018) sa Kapitoan nakahimamat og pipila ka mga surfer kinsa nakabiyahe didto sa talagsa ra kaayo mahitabo sa kinabuhi [once-in-a-lifetime] nga pagbiyahe. Sila mireklamo mahitungod sa usa ka bug-at nga pukot nga nagbabag sa tubig, nagbalda kanila sa pag-surf sa dagkong mga balod.
Aron mahibaloan unsa ang nahitabo, tan-awa ang video nga “Bulahan ug Malipayon Kadtong Nagtuman sa mga Sugo sa Dios” (5:41) gikan sa time code nga 0:00 hangtod 2:34. Kini nga video anaa sa ChurchofJesusChrist.org. O basaha ang mosunod nga asoy.
Blessed and Happy Are Those Who Keep the Commandments of God
Read Elder Keetch's full conference talk here: https://www.lds.org/general-conference/2015/10/blessed-and-happy-are-those-who-keep-the-commandments-of-god?lang=eng&_r=1
Pagtuman sa mga sugo sa Dios
Aduna kitay atong kaugalingong mga rason nga nakaapekto kon kita mopili ba sa pagtuman sa mga sugo sa Dios. Basaha ang mosunod nga mga bersikulo, nga mangita kon unsa ang gitudlo ni Apostol Juan nga makapadasig kanato sa pagtuman kanila. Mahimong makatabang ang paghinumdom nga si Juan misulat sa iyang epistola ngadto sa mgamagtutuo [believers] kinsa nag-atubang sa bakak nga mga pagtulun-an.
(Mahimo usab nga mapuslanon ang pagbasa sa mga pagtulun-an sa Manluluwas sa Juan 14:15, 23–24 .)
-
Unsa nga mga kamatuoran ang imong nakit-an?
-
Sa unsang paagi kaha nga ang pagkahibalo niining mga kamatuoran nakapadugang sa tinguha sa usa ka tawo sa pagtuman sa mga sugo?
Si Juan mitudlo og nagkalain-laing mga kamatuoran niini nga mga bersikulo. Usa kanila nga mahimo nimong maila mao nga kon mas nakaila ug nahigugma kita sa Langitnong Amahan ug ni Jesukristo, mas andam kitang mosunod sa ilang mga sugo (tan-awa ang 1 Juan 1:5–7 ; 2:3–6 ; 2 Juan 1:6–9).
1. Kompletoha ang mosunod nga kalihokan diha sa imong journal sa pagtuon:
Handurawa nga ang imong Sunday School nga magtutudlo gustong motabang sa mga miyembro sa inyong klase nga mobati og kadasig sa pagtuman sa mga sugo. Siya mihangyo kaninyo sa pagpamalandong sa mosunod nga mga pangutana ug pag-andam sa pagpaambit sa inyong mga hunahuna sa klase:
-
Nganong ang pagtuman sa mga kasugoan usa man ka paagi sa pagpakita og gugma alang sa Langitnong Amahan ug ni Jesukristo?
-
Unsa ang imong nahibaloan mahitungod sa Langitnong Amahan ug ni Jesukristo nga nakapadasig kanimo sa pagtuman sa Ilang mga kasugoan? Nganong ang pagkahibalo niana makadasig kanimo?
-
Unsa ang imong nakat-onan mahitungod Kanila diha sa imong pagtuman sa Ilang mga kasugoan?
Sa unsang paagi nimo mapakita ang imong gugma ngadto sa Langitnong Amahan?
Tan-awa kini nga larawan ug paghunahuna mahitungod sa unsa ang imong nahibaloan mahitungod kang Jesukristo ug sa Langitnong Amahan ug unsa ang Ilang gibati nganha kanimo. Mahimo usab nimong hunahunaon kon unsa ang imong gibati ngadto Kanila.
Samtang tingali lisod ang pagpakita sa atong gugma alang sa Langitnong Amahan ug ni Jesukristo tungod kay Sila wala uban kanato sa pisikal, mahimo kitang magpakita sa atong gugma alang Kanila pinaagi sa pagtuman sa Ilang mga kasugoan. Paggahin og higayon sa pagpamalandong unsa ang gusto nimong mahinumdoman o buhaton tungod niini nga leksiyon. Ang mosunod mao ang pipila ka paagi aron mabuhat kini:
-
Pagsulat og usa ka paagi nga gusto nimong mas makahibalo ug mas mahigugma sa Langitnong Amahan ug ni Jesukristo.
-
Paghunahuna mahitungod sa mga kasugoan nga imong kasamtangang gituman ug nganong imo ni silang gituman. Ikonsiderar kon ikaw nadasig ba gumikan sa gugma alang sa Langitnong Amahan ug ni Jesukristo o kon ikaw makapalambo niana nga dapita.
-
Pag-ila og usa o daghan pang mga sugo nga imong mas hingpit nga matuman aron mapakita ang imong gugma alang sa Langitnong Amahan ug ni Jesukristo. Paghimo og plano kon unsaon nimo nga mas hingpit nga matuman kini nga mga kasugoan.
Opsiyonal: Gustong Makakat-on pa og Dugang?
Sa unsang paagi nga ang mga sugo usa ka pagpadayag sa gugma sa Dios alang kanato?
Si Presidente Thomas S. Monson (1927–2018) mipahayag:
Sunda ang Kasugoan
Si Presidente Thomas S. Monson nag-awhag kanato sa pagsunod sa kasugoan ug nagpahibalo bahin sa pipila ka mga panalangin tungod sa pagbuhat niini.
Ang kasugoan sa Dios wala gihatag aron sa pagpugong kanato o aron mahimong mga babag sa atong kalipay. Ang sukwahi mao ang tinuod. Siya nga naglalang kanato ug nahigugma kanato hingpit nga nasayod kon sa unsang paagiha kita magpakabuhi aron maangkon ang labing dakong kalipay kutob sa mahimo. Siya mihatag kanato og mga sumbanan diin, kon kita mosunod niini, luwas nga mogiya kanato niining makuyaw nga mortal nga panaw. …
…Siya nakasabot nga kon atong sundon ang kasugoan, ang atong kinabuhi mas malipayon, mas makatagbaw, ug dili kaayo komplikado. Ang atong mga hagit ug mga problema mas sayon pas-anon, ug atong madawat ang Iyang gisaad nga mga panalangin.
(Thomas S. Monson, “Sunda ang Kasugoan,” Ensign o Liahona, Nob. 2015, 83)
Sa unsang paagi nga ang pagtuman sa mga kasugoan nagpakita sa Dios sa akong gugma?
Si Elder Von G. Keetch (1960–2018) sa Kapitoan mipahayag:
Bulahan ug Malipayon Kadtong Nagtuman sa mga Sugo sa Dios
Si Elder Keetch nagtudlo nga ang mga sugo usa ka tinubdan sa proteksyon ug giya aron sa pagtabang kanato nga mahimo kon unsay gusto sa Dios nga kita mamahimo.
Atong gipakita ang atong gugma alang sa Dios—ug ang atong pagtuo diha Kaniya—pinaagi sa pagbuhat sa atong pinakamaayo kada adlaw sa pagsunod sa dalan nga Iyang gitakda alang kanato ug pinaagi sa pagtuman sa mga kasugoan nga Iyang gihatag kanato. Labi pa gayod natong gipakita kanang pagtuo ug gugma diha sa mga sitwasyon diin wala nato masabti sa hingpit ang rason sa kasugoan sa Dios o sa partikular nga dalan nga Iyang paagian kanato.
(Von G. Keetch, “Bulahan ug Malipayon Kadtong Nagtuman sa mga Sugo sa Dios,” Ensign o Liahona, Nob. 2015, 116)
Unsaon nako nga madugangan ang akong gugma alang sa Dios?
Si Presidente Dieter F. Uchtdorf, kanhi sakop sa Unang Kapangulohan, mipasabot:
The Love of God
Love is the measure of our faith, the inspiration for our obedience, and the true altitude of our discipleship.
Kita makapatubo sa atong gugma alang sa atong Langitnong Amahan ug ikapakita kana nga gugma pinaagi sa pagpauyon sa atong mga hunahuna ug mga buhat sa pulong sa Dios. Ang Iyang tiunay nga gugma naggiya ug nagdasig kanato sa pagkahimong labaw nga lunsay ug balaan. Nagdasig kini kanato sa paglakaw diha sa katarong—dili kay tungod sa kahadlok o obligasyon apan gumikan sa labing dako nga tinguha nga mas mahisama Kaniya tungod kay kita nahigugma Kaniya.
(Dieter F. Uchtdorf, “Ang Gugma sa Dios,” Liahona, Nob. 2009, 21-24)