1 Sione 2–4; 2 Sione
Ko Hono Fakahā ‘o e ‘Ofa ki he Tamai Hēvaní mo Sīsū Kalaisí
ʻI he taimi ʻoku ongoʻi ai ʻe ha taha ʻoku ʻofaʻi pe ʻofa ʻi ha taha kehe, ʻoku faʻa liliu ʻenau ngaahi tōʻongá. Naʻe akoʻi ʻe Sione ʻe lava ke fakaʻaiʻai kitautolu ʻe heʻetau ʻofa ki he Tamai Hēvaní mo Sīsū Kalaisí ke tauhi ʻEna ngaahi fekaú. ʻOku fakataumuʻa ʻa e lēsoni ko ʻení ke tokoni ke mahino kiate koe ʻa e founga te ke lava ai ʻo fakahaaʻi ʻa e ʻofa ki he Tamai Hēvaní mo Sīsū Kalaisí ʻaki hono tauhi ʻa e ngaahi fekaú.
Maluʻi ʻofa ʻa e ʻOtuá
Naʻe fetaulaki ʻa ʻEletā Voni G. Kiisi (1960–2018) ʻo e Kau Fitungofulú lolotonga ʻene ʻi ha matātahi ʻi ʻAositelēliá mo ha kau fānifo ne nau fononga ki ai ʻi ha aʻusia laulōtaha ʻi he moʻuí. Ne nau lāunga fekauʻaki mo ha ngaahi pā fakangatangata ʻi he tahí, ʻo taʻofi ai kinautolu mei heʻenau lava ʻo fānifo ʻi he ngaahi peau lalahí.
Ke ʻiloʻi e meʻa naʻe hokó, sio ʻi he foʻi vitiō “ʻOku Monūʻia mo Fiefia ʻa Kinautolu ʻOku Tauhi e Ngaahi Fekau ʻa e ʻOtuá” (5:41) mei he taimi 0:00 ki he 2:34. ʻE lava ke maʻu ʻa e vitioó ni ʻi he ChurchofJesusChrist.org. Pe lau ʻa e lea ko ʻení.
Blessed and Happy Are Those Who Keep the Commandments of God
Read Elder Keetch's full conference talk here: https://www.lds.org/general-conference/2015/10/blessed-and-happy-are-those-who-keep-the-commandments-of-god?lang=eng&_r=1
Ko hono tauhi e ngaahi fekau ʻa e ʻOtuá
ʻOku tau takitaha moʻona pē ha ngaahi ʻuhinga ʻokú ne takiekina ʻetau fili ke tauhi e ngaahi fekau ʻa e ʻOtuá. Lau ʻa e ngaahi veesi ko ʻení, ʻo kumi e meʻa naʻe akoʻi ʻe he ʻAposetolo ko Sioné te ne lava ʻo fakaʻaiʻai kitautolu ke tauhi kinautolú. Mahalo ʻe tokoni ke manatuʻi naʻe fai ʻe Sione ʻene ngaahi tohí ki he kakai tui naʻa nau fehangahangai mo ha ngaahi akonaki hala.
(Mahalo ʻe ʻaonga foki ke lau e ngaahi akonaki ʻa e Fakamoʻuí ʻi he Sione 14:15, 23–24 .)
-
Ko e hā ha ngaahi moʻoni naʻá ke maʻu?
-
ʻE fakatupulaki fēfē nai ʻe he ʻilo ki he ngaahi moʻoni ko ʻení ha holi ʻa ha taha ke tauhi ʻa e ngaahi fekaú?
Naʻe akoʻi ʻe Sione ha ngaahi moʻoni kehekehe ʻi he ngaahi veesi ko ʻení. Mahalo ko e taha ʻo kinautolu kuó ke ʻiloʻí ko e lahi ange ʻetau ʻilo mo e ʻofa ki he Tamai Hēvaní mo Sīsū Kalaisí, ko e lahi ange ia ʻetau loto fiemālie ke tauhi ʻEna ngaahi fekaú (vakai, 1 Sione 1:5–7 ; 2:3–6 ; 2 Sione 1:6–9).
1. Fakakakato e ʻekitivitī ko ení ʻi hoʻo tohinoa akó:
Fakakaukauloto ʻoku fie tokoni hoʻo faiako Lautohi Faka-Sāpaté ki he kau mēmipa hoʻo kalasí ke nau ongoʻi ʻoku ueʻi kinautolu ke tauhi e ngaahi fekaú. ʻOkú ne kole atu ke ke fakalaulauloto ki he ngaahi fehuʻi ko ʻení mo teuteu ke vahevahe hoʻo ngaahi fakakaukaú ʻi he kalasí:
-
Ko e hā ʻoku hoko ai hono tauhi e ngaahi fekaú ko ha founga ke fakahaaʻi ai e ʻofa ki he Tamai Hēvaní mo Sīsū Kalaisí?
-
Ko e hā ʻokú ke ʻilo fekauʻaki mo e Tamai Hēvaní mo Sīsū Kalaisi ʻokú ne fakaʻaiʻai koe ke tauhi ʻEna ngaahi fekaú? Ko e hā ʻoku fakaʻaiʻai ai koe ʻe heʻiloko iá?
-
Ko e hā kuó ke ako fekauʻaki mo Kinaua ʻi hoʻo tauhi ʻEna ngaahi fekaú?
Te ke fakahaaʻi fēfē nai hoʻo ʻofa ki he Tamai Hēvaní?
Sio ki he fakatātā ko ʻení pea fakakaukau ki he meʻa ʻokú ke ʻilo fekauʻaki mo Sīsū Kalaisi mo e Tamai Hēvaní pea mo ʻEna ongo kiate koé. Mahalo te ke fiemaʻu foki ke fakakaukau ki he ongo ʻokú ke maʻu fekauʻaki mo Kinauá.
Neongo ʻe ngali faingataʻa ke fakahaaʻi ʻetau ʻofa ki he Tamai Hēvaní mo Sīsū Kalaisi koeʻuhí ʻoku ʻikai ke Na ʻi heni fakaesino mo kitautolu, ka te tau lava ʻo fakahaaʻi ʻetau ʻofa kiate Kinauá ʻaki hono tauhi ʻEna ngaahi fekaú. Tuku ha taimi ke ke fakalaulauloto ai ki he meʻa ʻokú ke fie manatuʻi pe fakahoko koeʻuhí ko e lēsoni ko ʻení. Ko ha ngaahi founga ʻeni ʻe lava ke ke fakahoko ai ia:
-
Hiki ha founga ʻe taha te ke fie ʻilo mo ʻofa lahi ange ai ʻi he Tamai Hēvaní mo Sīsū Kalaisí.
-
Fakakaukau ki he ngaahi fekau ʻokú ke lolotonga tauhí mo e ʻuhinga ʻokú ke tauhi ai kinautolú. Fakakaukau pe ʻoku fakaʻaiʻai koe ʻe he ʻofa ki he Tamai Hēvaní mo Sīsū Kalaisí pea fakakaukau foki pe te ke lava ʻo fakalakalaka ʻi he tafaʻaki ko iá.
-
Feinga ke ʻiloʻi ha fekau ʻe taha pe lahi ange te ke lava ʻo tauhi kakato ange ke fakahaaʻi hoʻo ʻofa ki he Tamai Hēvaní mo Sīsū Kalaisí. Faʻu ha palani ki he founga te ke tauhi kakato ange ai ʻa e ngaahi fekau ko ʻení.
Ko e hā ha founga ʻoku hoko ai e ngaahi fekaú ko ha founga ʻoku fakahaaʻi ai e ʻofa [ʻa e ʻOtuá] kiate kitautolú?
Naʻe pehē ʻe Palesiteni Tōmasi S. Monisoni (1927–2018):
Tauhi ʻa e Ngaahi Fekaú
President Thomas S. Monson encourages us to keep the commandments and identifies some of the blessings for doing so.
ʻOku ʻikai ʻomi ʻa e ngaahi fekau ʻa e ʻOtuá ke fakakinaʻi kitautolu pe hoko ko ha fakatuta ki heʻetau fiefiá. Ko hono fehangahangaí ia. ʻOku ʻafioʻi ʻe Ia naʻá Ne fakatupu mo ʻofa haohaoa ʻiate kitautolú ʻa ʻetau fiemaʻu ke moʻui ka tau lava ʻo maʻu ʻa e fiefia lahi taha [ʻe ala lava ke tau maʻú]. Kuó ne foaki mai ai ha ngaahi fakahinohino ʻa ia, kapau te tau muimui ki ai, te tau hao ʻi he fononga fakatuʻutāmaki fakamatelié ni. …
… ʻOku mahino kiate Ia ko e taimi ʻoku tau tauhi ai ʻa e ngaahi fekaú, ʻe fiefia ange ʻetau moʻuí, lavameʻa lahi ange, pea siʻi ange [e] palopalemá. ʻE faingofua ange hotau ngaahi ʻahiʻahí pea faingofua ange ʻa e palopalemá ke fuesia, pea te tau maʻu ʻEne ngaahi tāpuaki kuo talaʻofa maí.
(Thomas S. Monson, “Tauhi ʻa e Ngaahi Fekaú,” Ensign pe Liahona, Nōvema. 2015, 83)
ʻOku fakahaaʻi fēfē nai ʻeku ʻofa ki he ʻOtuá ʻi hono tauhi ʻo e ngaahi fekaú?
Naʻe pehē ʻe ʻEletā Voni G. Kiisi (1960–2018) ʻo e Kau Fitungofulú:
ʻOku Monūʻia mo Fiefia ʻa Kinautolu ʻOku Tauhi e Ngaahi Fekau ʻa e ʻOtuá
Naʻe akoʻi ʻe ʻEletā Keetch ko e ngaahi fekaú ko ha maʻuʻanga maluʻi mo fakahinohino ke tokoniʻi kitautolu ke tau hoko ʻo hangē ko ia ʻoku finangalo ki ai ʻa e ʻOtuá ke tau aʻusiá.
ʻOku tau fakahaaʻi ʻetau ʻofa ki he ʻOtuá—mo ʻetau tui kiate Iá—ʻi heʻetau fai hotau lelei tahá he ʻaho kotoa pē ke muimui ʻi he hala kuó Ne tofa maʻatautolú pea tauhi e ngaahi fekau kuó Ne ʻomi kiate kitautolú. ʻOku tau fakahaaʻi e tui mo e ʻofa ko iá ʻi he ngaahi tūkunga ʻoku ʻikai mahino kakato ai kiate kitautolu ʻa e ʻuhinga ʻo e ngaahi fekau ʻa e ʻOtuá pe hala tukupau ʻokú Ne folofola mai ke tau fou aí.
(Von G. Keetch, “ʻOku Monūʻia mo Fiefia ʻa Kinautolu ʻOku Tauhi e Ngaahi Fekau ʻa e ʻOtuá,” Ensign pe Liahona, Nōvema 2015, 116)
Te u fakatupulaki fēfē nai ʻeku ʻofá ki he ʻOtuá?
Naʻe fakamatala ʻa Palesiteni Tieta F. ʻUkitofa, ʻi heʻene hoko ko ha mēmipa ʻo e Kau Palesitenisī ʻUluakí he taimi ko iá ʻo pehē:
The Love of God
Love is the measure of our faith, the inspiration for our obedience, and the true altitude of our discipleship.
ʻOku tau fakatupulaki ʻetau ʻofa ki heʻetau Tamai Hēvaní mo fakahaaʻi e ʻofa ko iá ʻaki hono fakafenāpasi ʻetau fakakaukaú mo e tōʻongá mo e folofola ʻa e ʻOtuá. ʻOku tataki mo poupouʻi kitautolu ʻe Heʻene ʻofa haohaoá ke tau hoko ʻo haohaoa mo māʻoniʻoni ange. ʻOkú ne ueʻi kitautolu ke tau ʻaʻeva ʻi he māʻoniʻoni—ʻo ʻikai ʻi he manavahē pe haʻisia ka ʻi he holi fakamātoato ke hoko ʻo hangē pē ko Iá koeʻuhí he ʻoku tau ʻofa ʻiate Ia.
(Dieter. F. Uchtdorf, “Ko e Meʻaʻofa ʻo e ʻAloʻofá,” Ensign pe Liahona, Mē 2009, 23)