2 Tīmote 3

Ngaahi Tohi Māʻoniʻoní

Tohi ʻa Molomoná ʻi he lea faka-Sipeiní.

ʻOkú ke ongoʻi lōmekina nai pe manavasiʻi fekauʻaki mo e tuʻunga fakalaumālie ʻo e māmaní he ʻaho ní? Naʻe kikiteʻi ʻe Paula ʻi ha tohi kia Tīmote, ʻe kau ʻi he ngaahi ʻaho fakaʻosí ha “kuonga fakatuʻutāmaki” (2 Tīmote 3:1), ka naʻá ne toe akoʻi foki kuo foaki atu ʻe he ʻEikí ʻa e meʻaʻofa ʻo e folofola māʻoniʻoní ke tokoniʻi koe lolotonga e ngaahi taimi fakatuʻutāmakí (vakai, 2 Tīmote 3:14–17). ʻOku fakataumuʻa ʻa e lēsoni ko ʻení ke tokoniʻi koe ke ke ongoʻi ha holi ke ako ʻa e folofolá, ʻa ia ʻe lava ʻo tokoni ke maluʻi koe mei he ngaahi kovi ʻo hotau kuongá.

Ko e ngaahi ʻaho fakaʻosí

Lau ʻa e fakamatala ko ʻeni ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá, pea fakakaukau ki he ʻuhinga ʻoku hoko ai hoʻo moʻui ʻi he taimi ko ʻení ke ke ongoʻi houngaʻia, tailiili, pe fakatouʻosi.

ʻOku tau moʻui ʻi ha kuonga mātuʻaki mahuʻinga, ka ʻoku fakaofo. …

ʻOku tau ʻilo ʻi heʻetau ofi ki he Hāʻele ʻAnga Ua Mai ʻa e Fakamoʻuí ʻe fonu hotau māmaní ʻi he moveuveu mo e puputuʻu. ʻE liʻaki ʻe ha tokolahi ʻi he sosaietí ʻa e ngaahi fekau ʻa e ʻOtuá. Kuó u faʻa lea ʻaki ʻa e fakamatala ko ʻeni ne fakahoko ʻe Palesiteni Tōmasi S. Monisoní: “Kuo ʻosi atu e taimi ia naʻe meimei fenāpasi lelei ai e tuʻunga moʻui ʻa e Siasí pea mo e sosaietí, ka kuó na faikehekehe lahi ʻeni kinaua pea ʻoku fakaʻau pē ke toe lahi ange.”

(Neil L. Andersen, “A Compensatory Spiritual Power for the Righteous” [Brigham Young University Education Week devotional, Aug. 18, 2015], speeches.byu.edu)

Ko e hā ha ngaahi founga ʻoku fakaofo ai e ngaahi taimi ʻoku tau moʻui aí?
Ko e hā te ne ala ʻai koe ke ke ongoʻi tailiili fekauʻaki mo e moʻui ʻi he māmaní naʻe fakamatalaʻi ʻe ʻEletā ʻEnitasení?

ʻI hoʻo ako e lēsoni ko ʻení, kumi ha ngaahi founga kuo ʻomi ai ʻe he ʻOtuá ʻi he ʻofa ha tokoni ki he puputuʻú, ngaahi fakatuʻutāmaki fakalaumālié, pe hohaʻa te ke ala ongoʻi mei he ngaahi tūkunga ʻo e māmaní.

Lau ‘a e 2 Tīmote 3:1–7, 12–13; 4:3–4, ʻo kumi e fakamatala ʻa Paula ki he ngaahi fakatuʻutāmaki ʻi he ngaahi ʻaho fakaʻosí.

Ko e hā ha sīpinga ʻo e ngaahi tūkunga naʻe fakamatalaʻi ʻe Paulá kuó ke mātā ai ʻi he māmaní he ʻaho ní?

Ko ha meʻaʻofa mei he ʻOtuá

Kuo teʻeki tuku kitautolu ʻe he Tamai Hēvaní ke tau fehangahangai mo e ngaahi fakatuʻutāmaki ʻo e ngaahi ʻaho fakaʻosí ʻiate kitautolu pē. ʻI Heʻene ʻaloʻofá mo e ʻofá, kuó Ne foaki mai kiate kitautolu ha ngaahi meʻafoaki fakaofo lahi.

Naʻe hoko atu ʻa ʻEletā ʻEnitaseni:

ʻI heʻetau ʻilo hotau hala ʻi ha māmani ʻoku ʻikai fuʻu tokanga ki he ngaahi fekau ʻa e ʻOtuá, te tau faʻa lotu, ka ʻoku ʻikai fiemaʻu ke tau fuʻu hohaʻa. ʻE tāpuakiʻi ʻe he ʻEikí Hono Kāingalotú ʻaki e mālohi fakalaumālie makehe ʻoku fiemaʻu ke feau ʻaki e ngaahi faingataʻa ʻi hotau kuongá.

(Neil L. Andersen, “A Compensatory Spiritual Power for the Righteous” [Brigham Young University Education Week devotional, Aug. 18, 2015], speeches.byu.edu)

Lau ʻa e 2 Tīmote 3:14–17, ʻo kumi ha taha ʻo e ngaahi meʻaʻofa kuo foaki mai ʻe he ʻOtuá ke tokoniʻi kitautolu ʻi he ngaahi fakatuʻutāmaki ʻo hotau kuongá.

Ko ha potufolofola fakataukei fakatokāteline ʻa e 2 Tīmote 3:15–17. Fakakaukau ke fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke ako lahi ange fekauʻaki mo e potufolofola fakataukei fakatokāteline ko ʻení ʻi he lēsoni hokó.

Ko e hā ha niʻihi ʻo e ngaahi tāpuaki te tau lava ʻo maʻu mei hono ako e folofolá naʻá ke fakatokangaʻi ʻi he ngaahi veesi ko ʻení?

ʻE lava ke tokoniʻi koe ʻe he ako folofolá:

Fakatupulaki hoʻo tui kia Sīsū Kalaisí.
Maʻu ha poto mo ha fakahinohino ʻi he ngaahi tūkunga ʻokú ke fehangahangai mo iá.
Mahino ʻa e tokāteline pe ngaahi moʻoni ʻo e ongoongoleleí.
Fakatonutonu ha ngaahi fakakaukau hala pe ngaahi tōʻonga moʻui ʻoku ʻikai leleí.
Hoko ʻo hangē ko Sīsū Kalaisí.

Te ke fakamatalaʻi fakanounou fēfē ʻa e meʻa ne akoʻi ʻe Paula fekauʻaki mo e ako ‘o e folofolá?

ʻI hoʻo tohinoa akó, tohi fekauʻaki mo ha taimi naʻe tokoniʻi ai koe ʻe he folofolá ʻi ha taha ʻo e ngaahi founga naʻe fakamatalaʻi ʻe Paulá. Kapau ʻoku ʻikai te ke lava ʻo fakakaukau ki ha aʻusia, hiki ʻa e ʻuhinga ʻokú ke pehē ai ʻe lava ke tokoniʻi koe ʻe he folofolá ʻi ha taha ʻo e ngaahi founga naʻe fakamatalaʻi ʻe Paulá.

Ko e hā ha ngaahi founga kehe ʻe lava ke tāpuekina ai koe ʻe he ʻEikí ʻi hoʻo ako e folofolá?
Naʻe foaki atu ʻe he ʻEikí ʻa e meʻafoaki ʻo e folofolá ke tokoniʻi koe ʻi he ngaahi ʻaho fakaʻosí. Ko e hā ‘oku akoʻi atu ʻe he meʻá ni fekauʻaki mo Iá?

Ko hono ngāue ʻaki ʻo e folofolá

Ke akoako fakaʻaongaʻi e folofolá ke fakamālohia hoʻo tui kia Sīsū Kalaisí, fili ha pole ʻe ua ʻi he ngaahi ʻaho kimui ní naʻe kikiteʻi ʻe Paula ʻi he 2 Tīmote 3:1–7, 12–13; 4:3–4, pe fili ha ngaahi faingataʻa kehekehe ʻoku fekauʻaki mo hoʻo moʻuí. Fekumi ki he ngaahi potufolofola ʻe lava ʻo tokoni ki ha taha ʻoku fehangahangai mo e ngaahi faingataʻa ko ʻení. Mahalo ʻe tokoni ke fekumi ki he ngaahi foʻi lea mahuʻingá ʻi he Fakahinohino ki he Ngaahi Folofolá ʻa ia ʻoku maʻu ʻi he ChurchofJesusChrist.org. Pe te ke ʻuluaki fili ha niʻihi ʻo e ngaahi potufolofola ʻokú ke saiʻia taha aí peá ke fili leva pe ko e fē ʻi he ngaahi faingataʻa ʻo e ngaahi ʻaho kimui ní te nau lava ʻo tokoni atu aí.

Tohi ʻi ha laʻipepa ʻaki ha peni pe penivahevahe.

Ko hoʻo taumuʻa ki he ako folofolá

Naʻe fakamanatu ʻe Paula kia Tīmote kuo tāpuakiʻi ʻa Tīmote ke ne ʻilo ʻa e folofolá talu mei heʻene kei siʻí (vakai, 2 Tīmote 3:15). Ko e meʻa tatau pē, ʻe tāpuekina koe ʻe he Tamai Hēvaní ʻi hoʻo ako e folofolá ʻi hoʻo kei talavoú. Fakaʻaongaʻi ha ngaahi miniti siʻi ke fokotuʻu ʻi he faʻa lotu ha taumuʻa pe fakakaukauʻi hoʻo taumuʻa lolotonga ki he ako folofola fakataautaha fakaʻahó. Fakalaulauloto ki he ngaahi fehuʻi ko ʻení:

Kuó ke fakahoko fēfē hoʻo taumuʻá?
ʻOku tokoniʻi fēfē koe ʻe hoʻo taumuʻá ke fakatupulaki hoʻo tui kia Sīsū Kalaisí mo ikunaʻi ʻa e ngaahi faingataʻa ʻi hotau kuongá?
Ko e hā ha ngaahi liliu, kapau ʻoku ʻi ai, ki hoʻo taumuʻá ʻokú ke ongoʻi ʻoku totonu ke ke fakahoko?

Fakakaukau ke ke talaange ki hoʻo faiakó, mātuʻá, pe ko ha taha kehe ʻokú ke falala ki ai fekauʻaki mo hoʻo taumuʻa ako folofolá pea fakaafeʻi kinautolu ke nau muimuiʻi ia mo koe.

Fili Pē: Fie Ako Lahi Ange?

ʻE mahino fēfē kiate au ʻa e ngaahi fakatuʻutāmaki ʻoku hiki ʻi he 2 Tīmote 3:1–7?

ʻE lava ke ʻaonga e ngaahi foʻi fakaʻuhinga ko ʻení:

ʻE lava ke kau ʻi he “ʻikai ha ʻofa ʻoku fakanatulá” (2 Tīmote 3:3) ʻa e ngaahi ʻulungaanga ʻoku fekauʻaki mo e ʻikai ongoʻi pe tokanga ki ha meʻá, ongoʻi tāufehiʻá mo e fakaliliʻá, pe ngaahi holi kovi ʻoku fakaiku ki he angaʻuli fakasekisualé
ʻOku ʻuhinga ʻa e “holi koví” (2 Tīmote 3:3) ki he ʻikai mapuleʻi kitá
ʻOku ʻuhinga ʻa e “anga ʻohonoá’’ (2 Tīmote 3:4) ki he loto-hohaʻa, taʻetokanga
ʻOku ʻuhinga ʻa e “loto fielahí” (2 Tīmote 3:4) ki he fakafuofuolahi, loto-hīkisia

ʻE founga fēfē ha mahino lelei ange kiate au ʻa e 2 Tīmote 3:16–17?

Fakakaukau ke lau ʻa e fakamatala “Line upon Line: 2 Timothy 3:16–17” (New Era Apr. 2012, 19), ʻa ia ʻoku ʻi ai ʻa e foʻi lea tokoni, fakamatala fakaepalōfita, mo e ngaahi fakamatala ʻe ala tokoni ke mahino lahi ange kiate koe ʻa e ongo veesi ko ʻení.

ʻE fēfē ha lava ʻe he folofolá ʻo tokoniʻi au ʻi heʻeku moʻuí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Fakamuʻomuʻa Hoʻo Ngāueʻi e Tuí
Lea ʻa ʻEletā Richard G. Scott ʻi he Konifelenisi Lahi ʻo ʻOkatopa 2014.

ʻOku tau fakataufolofola ki he ʻOtuá ʻi he lotu. Ko e lahi taha ʻEne folofola mai kiate kitautolú ʻoku fai mai ia ʻi Heʻene folofola kuo tohí. Koeʻuhí ke ke ʻilo pe ʻoku ongo fēfē e leʻo Fakalangí, lau ʻEne folofolá, ako e ngaahi folofolá pea fakalaulauloto ki ai. ʻAi ke nau hoko ko ha konga mahuʻinga ʻo hoʻo moʻuí he ʻaho kotoa. …

Tuʻunga ʻi he ako folofola maʻu pē mo toutou fakahokó, te ke maʻu ai ha nonga ʻi he mamahi ʻoku nau ʻākilotoa koé pea mo ha mālohi ke fakafepakiʻi e ngaahi ʻahiʻahí. Te ke fakatupulaki ha tui mālohi ʻi he ʻaloʻofa ʻo e ʻOtuá pea mo ʻilo ʻe lelei e meʻa kotoa ʻi he Fakalelei ʻa Sīsū Kalaisí ʻo fakatatau mo e taimi ʻa e ʻOtuá.

(Richard G. Scott, “Fakamuʻomuʻa Hoʻo Ngāueʻi e Tuí,” Liahona, Nōvema 2014, 93–94)

ʻE anga fēfē haʻaku ongoʻi fakatuʻamelie ki he kahaʻú kapau ʻoku ngali fehangahangai e fakahinohino ʻa e sosaietí mo e ngaahi fekau ʻa e ʻOtuá?

ChurchofJesusChrist.org

On Zion’s Hill
Every soul who willingly affiliates with The Church of Jesus Christ of Latter-day Saints and seeks to abide by its principles and ordinances is standing “on Zion’s hill.”

Ko e hā ha ngaahi founga te u lava ai ʻo ako lelei ʻa e folofolá?

ChurchofJesusChrist.org.