Pag-angkon og Espirituhanong Kahibalo, Bahin 2

Pagsusi sa mga Konsepto ug mga Pangutana inubanan sa Mahangtoron nga Panglantaw

Nagtan-aw pinaagi sa mga anteyohos, ang pagtutok sa templo ug pamilya

Ang usa sa mga katuyoan sa doktrinal nga kahanas mao ang pagtabang kanimo sa pagkat-on ug paggamit sa mga baroganan alang sa pag-angkon og espirituhanong kahibalo aron mahimong mas mahisama ni Jesukristo. Kini nga leksiyon makatabang kanimo sa pagkat-on sa pagsusi sa mga isyu inubanan sa mahangtorong panglantaw aron mas klaro kining makita.

Mga pangutana ug mga hagit

Usahay makasinati kita og mga hagit o mga pagsulay nga mosulay sa atong hugot nga pagtuo. Nagpakigbahin si Presidente Russell M. Nelson og usa ka pagsulay nga nasinati sa asawa sa iyang apo.

Tan-awa ang “Ipatigbabaw ang Dios Labaw sa Tanan” gikan sa code sa oras nga 5:50 hangtod sa 6:39, o basaha ang mosunod nga teksto:

Ipatigbabaw ang Dios Labaw sa Tanan
President Nelson describes latter-day covenant Israel as those who let God prevail in their lives. He invites us to make God our life’s most important influence.

Dili pa lang dugay, ang asawa sa usa sa among mga apo nanlimbasug sa espirituhanong paagi. Ako siyang tawgon og “Jill.” Bisan pa sa pagpuasa, pag-ampo, ug mga panalangin sa pagkapari, himatyon ang amahan ni Jill. Nahadlok siya pag-ayo nga mawad-an siya sa iyang amahan ug sa iyang pagpamatuod.

Usa ka lawom na nga kagabhion, ang akong asawa, si Sister Wendy Nelson, misulti kanako sa sitwasyon ni Jill. Pagkasunod buntag gibati ni Wendy nga ipakigbahin kang Jill nga ang akong tubag sa iyang espirituhanon nga pakigdumog mao ang usa ka pulong! Ang pulong mao ang myopic.

(Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 93)

Ang pulong nga myopic nagpasabot og duol ra ang makita o mubo og panglantaw.

Unsa ang pipila ka kamatuoran mahitungod sa Dios ug sa Iyang plano nga mahimong makatabang kang Jill nga dili mahadlok kon unsa ang lagmit nga mahitabo sa umaabot?

Hunahunaa ang usa ka hagit o pangutana nga imong kasamtangang giatubang. Tingali pareho kini sa imong gituki sa leksiyon nga “Pag-angkon og Espirituhanong Kahibalo, Bahin 1”.

Nganong ikaw gusto man ug nanginahanglan og tabang niini nga pangutana o hagit?

Hinumdomi nga OK lamang nga makasinati og kaguol ug kasakit. Bisan si Jesus naguol para sa Iyang mga minahal (tan-awa sa Juan 11:32–36). Kon tan-awon nato ang atong mga sitwasyon uban sa mahangtorong panglantaw, makatabang ang Ginoo kanato sa pagdumala niini nga mga pagbati. Pangitaa ang mga kamatuoran niini nga leksiyon nga makatabang kanimo sa pagbuhat niini diha sa imong kaugalingong mga pangutana ug mga hagit.

Mga baroganan sa pag-angkon og espirituhanong kahibalo

Kon makasinati kita og mga hagit sa kinabuhi o mag-atubang og wala matubag nga mga pangutana, ang mosunod nga mga baroganan sa pag-angkon og espirituhanong kahibalo makatabang nato:

Lihok inubanan sa hugot nga pagtuo.
Susiha ang mga konsepto ug mga pangutana nga adunay mahangtorong panglantaw.
Pagtinguha pa og dugang nga panabot pinaagi sa balaanong gitudlo nga mga tinubdan.

Niini nga leksiyon tutokan nato ang kamatuoran nga samtang magsusi kita sa mga isyu inubanan sa mahangtorong panglantaw, ang Espiritu Santo makatabang kanato nga mas klaro kining makita.

Basaha ang parapo 8 sa seksiyon nga “Pag-angkon og Espirituhanong Kahibalo” diha sa Mahinungdanong Dokumento sa Doktrinal nga Kahanas ug bisan usa lamang sa mosunod nga mga tudling sa kasulatan. Markahi ang mga pulong o hugpong sa mga pulong nga makatabang kang Jill nga makita ang iyang mga pagsulay inubanan sa mahangtorong panglantaw.

Unsaon pagsusi sa mga pangutana o mga kabalaka inubanan sa mahangtorong panglantaw

Kon aduna kitay mga pangutana o mga kabalaka, ang usa ka proseso nga atong masunod aron makatabang kanato nga makita ang mga butang gikan sa mahangtorong panglantaw mao ang:

Pag-ila sa bisan unsang mga pangagpas nga atong gibuhat nga lagmit nga moresulta sa sayop nga pagsabot mahitungod sa Langitnong Amahan o sa Iyang plano.
Pag-ila sa mga kamatuoran mahitungod sa Langitnong Amahan o sa Iyang plano nga makakorihir niini nga mga pangagpas.
Pag-usab sa pangutana pinaagi sa pagkonsiderar niini inubanan sa mahangtorong panglantaw o pinaagi sa pagbag-o sa pangutana aron pamalandongan ang mga kamatuoran sa ebanghelyo.

Tan-awa ang “Examining Questions with an Eternal Perspective” (2:56), nga nahimutang sa ChurchofJesusChrist.org, aron makita kon giunsa sa usa ka batan-ong babaye nga ginganlan og Lauren sa paggamit niini nga proseso aron sa pagtabang sa iyang higala.

Pagsusi sa mga Pangutana nga inubanan sa Mahangturong Panglantaw
Usa ka batan-ong babaye nagpakita sa kahanas sa paghan-ay sa lisud nga pangutana diha sa konteksto sa Plano sa Kaluwasan.

Unsay natabang niini nga bidyo kanimo sa pagsabot mahitungod sa pagsusi sa mga konsepto ug mga pangutana inubanan sa mahangtorong panglantaw?
Giunsa ni Lauren paggamit ang tulo ka lakang nga bag-ohay lang natong giila?

Hunahunaa kon sa unsang paagi kining sama nga proseso makatabang ni Jill, ang apo nga babaye gikan sa istorya nga gipakigbahin ni Presidente Nelson.

Gipakigbahin ni Presidente Nelson kon sa unsang paagi nga gipanalanginan si Jill pinaagi sa pagpalambo og mahangtorong panglantaw pinaagi sa iyang pagsulay. Tan-awa ang “Ipatigbabaw ang Dios Labaw sa Tanan,” nga naa sa ChurchofJesusChrist.org, gikan sa code sa oras nga 6:58 hangtod sa 8:24, o basaha ang pamahayag sa ubos:

Human mitaliwan ang amahan ni Jill, ang pulong nga myopic nagbalik-balik sa iyang hunahuna. Gibuksan niya ang iyang kasingkasing aron mas makasabot og maayo nga ang myopic nagpasabot og “mubo nga panglantaw.” Ug ang iyang panghunahuna misugod sa pagkausab. Si Jill dayon miingon, ang “myopic nakapahimo nako sa paghunong, paghunahuna, ug pagkaayo. Kana nga pulong karon mipuno kanako og kalinaw. Nagpahinumdom kini kanako nga palapdan ang akong panglantaw ug magtinguha sa mahangtoron. Nagpahinumdom kini kanako nga adunay balaanong plano ug nga ang akong papa buhi pa ug nagmahal ug nagbantay kanako. Ang myopic midala kanako ngadto sa Dios.”

Mapagarbohon kaayo ko sa bililhong asawa sa among apo. Atol niining makaguol kaayo nga panahon sa iyang kinabuhi, si Jill nakakat-on sa paghangop sa kabubut-on sa Dios alang sa iyang papa, uban sa mahangtorong panglantaw alang sa iyang kaugalingong kinabuhi. Pinaagi sa pagpili nga ipatigbabaw ang Dios labaw sa tanan, nakakaplag siya og kalinaw.

(Russell M. Nelson, “Ipatigbabaw ang Dios Labaw sa Tanan,” 93)

Sa unsang paagi gipanalanginan si Jill samtang nagpabilin siya nga may mahangtorong panglantaw?

Pamalandongi ang hagit o pangutana nga imong giila sa unang bahin niini nga leksiyon. Trabahoa ang imong pangutana o hagit diha sa imong journal sa pagtuon gamit ang tulo ka lakang nga bag-ohay nimong nakat-onan.

Opsiyonal: Gustong Makakat-on pa og Dugang?

Sa unsa nga paagi nga ang pagpabilin nga may mahangtorong panglantaw makatabang kanako kon makasinati ako og kaguol o mamatyan og minahal sa kinabuhi?

Gipasabot ni Presidente Russell M. Nelson kon sa unsang paagi nga ang pagpabilin nga may mahangtorong panglantaw nakatabang kaniya sa dihang kalit nga namatay ang iyang asawa nga si Dantzel ug sa dihang namatay ang iyang anak nga babaye nga si Wendy pagkahuman sa dugay nga pakigbatok sa kanser:

Niadtong 2005, human sa dul-an 60 ka tuig nga kaminyoon, ang akong minahal nga si Dantzel wala damha nga gitawag ngadto sa langitnong panimalay. Sulod sa usa ka panahon, hapit dili ko makalihok sa kasubo. Apan ang mensahe sa Pasko sa Pagkabanhaw ug ang saad sa pagkabanhaw mipalahutay kanako.

(Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 94)

Gimingaw kaayo kami sa among anak. Apan, tungod sa gipahiuli nga ebanghelyo ni Jesukristo, wala kami mabalaka bahin kaniya. Samtang padayon namong gitahod ang among mga pakigsaad sa Dios, nagpuyo kami nga nagpaabot sa among pagpakig-uban kaniya og usab. Sa pagkakaron, nagserbisyo kami sa Ginoo dinhi ug siya nagserbisyo Kaniya didto—sa paraiso.

(Russell M. Nelson, “Dali, Sunod Kanako,” Liahona, Mayo 2019, 88)

Nganong importante man ang atong mga pangagpas?

Si Presidente Dallin H. Oaks sa Unang Kapangulohan mipakigbahin:

Tungod kay ang mga Santos sa Ulahing mga Adlaw nahibalo sa plano sa Langitnong Amahan para sa Iyang mga anak, atong nahibaloan nga kining mortal nga kinabuhi dili usa ka hugna nga dula nga gitaliwad-an sa wala mahibaloi nga kagahapon ug sa walay kasigurohang umaabot. Kining kinabuhia sama og maoy ikaduhang akto sa tulo ka akto nga drama. Ang katuyoan niini gipasabot pinaagi sa unsay gipadayag mahitungod sa atong pagpuyo isip mga espiritu diha sa Akto 1 ug sa mahangtoron natong destinasyon diha sa Akto 3. Tungod sa atong kahibalo niini nga Plano ug sa ubang kamatuoran nga gipadayag sa Dios, nagsugod kita sa managlahing pangagpas kaysa niadtong wala makahibalo sa atong nahibaloan. Isip resulta, magkalahi kita og mga konklusyon sa daghang importante nga mga hilisgotan nga hukman lamang sa uban pinasubay sa ilang mga opinyon mahitungod sa mortal nga kinabuhi.

(Dallin H. Oaks, “As He Thinketh in His Heart” [gabii kauban sa usa ka Kinatibuk-ang Awtoridad, Peb. 8, 2013], 3–4)

Unsaon nako sa pag-usab ang akong mga pangutana ug mga kabalaka aron makita kini gikan sa mahangtorong panglantaw?

Si Brother Chad H Webb, administrator sa Seminaries and Institutes of Religion, miingon:

Kon sugdan nato uban sa mahangtorong panglantaw, moabot kita sa mga konklusyon nga nagpakita sa mahangtorong kamatuoran. Pero kon sugdan nato uban sa kalibotanong mga pangagpas, malagmit nga moabot kita sa kalibotanong mga konklusyon. Mao nga kinahanglan natong usbon ang ubang mga pangutana tungod kay dili kita yanong modawat sa mga ebidensiya diin kini gipasikad.

Sama pananglit, tingali ikaw gipangutana, “Dili ba angay nga magminyo ang duha ka tawo nga nagkahigugmaay sa usag usa?” Gikan sa panglantaw sa kalibotan, ang tubag mora og oo. Pero hunahunaa ang unsay inyong nahibaloan sa plano sa kaluwasan ug mahitungod sa katuyoan sa Langitnong Amahan alang sa kaminyoon. Ang plano sa kaluwasan naghatag og mahangtorong panglantaw ug ebidensiya sa ebanghelyo nga nag-usab sa pangutana. Ang ubang mga pangutana nga mahimo ninyong ikonsiderar mao ang “Ngano ang pamilya gi-orden sa Dios?” o “Nganong giestablisar sa Ginoo ang kaminyoon tali sa lalaki ug babaye?” Hunahunaa unsay inyong nahibaloan mahitungod sa espiritu nga mga anak sa Langitnong Amahan—diin sila gikan ug unsay Iyang gusto para kanila karon ug sa kahangtoran. Hunahunaa nganong Iya kitang gipanalanginan og gahom sa pagselyo sa mga pamilya diha sa mga templo. Sa unsa nga paagi nga ang inyong pagsabot niini nga mga baroganan makapausab sa pangutana ug makatugot ninyo nga makakita sa isyu pinaagi sa kahayag sa ebanghelyo?

(Chad H Webb, “That They May Know How to Come unto Him and Be Saved” [debosyonal sa Brigham Young University–Hawaii, Mar. 22, 2016], byuh.edu)