Mauaina o le Malamalama Faaleagaga, Vaega 2

Iloiloina o Manatu Faavae ma Fesili faatasi ma se Vaaiga e Faavavau

Vaa e ala i matatioata, o le taulaiga i le malumalu ma le aiga

O se tasi o faamoemoega o le atamai i aoaoga faavae o le fesoasoani atu ia te oe i le aoaoina ma le faaaogaina o mataupu faavae mo le mauaina o le malamalama faaleagaga ina ia avea atili ai e pei o Iesu Keriso. E mafai ona fesoasoani lenei lesona e te iloiloina ai faafitauli faatasi ma se vaaiga faavavau ina ia manino atili ai lau vaai atu i ai.

Fesili ma luitau

O nisi taimi tatou te feagai ai ma luitau po o tofotofoga e mafai ona sueina ai lo tatou faatuatua. Sa faasoa mai e Peresitene Russell M. Nelson se tasi o nei tofotofoga sa tulai mai i le toalua o le atalii o se tasi o lana fanau.

Matamata i le “Faamuamua le Atua” mai le taimi 5:50 agai le 6:39, pe faitau i le faamatalaga lenei:

Ia Faamuamua le Atua
Ua faamatalaina e Peresitene Nelson ia feagaiga a Isaraelu o aso e gata ai e pei o i latou o e o loo faamuamua le Atua i o latou olaga. Ua ia valaaulia i tatou e avea le Atua ma faatosinaga sili ona taua i o tatou olaga.

E le i leva tele atu, sa tauivi ai faaleagaga le toalua o le atalii o se tasi o le ma fanau. O le a ou faaigoaina o ia iā “Jill.” E ui i le anapogi, tatalo, ma faamanuiaga faaleperisitua, sa vaivai lava le tamā o Jill a talioti. Sa lofituina o ia i le fefe ina ne’i maliu lona tamā ma leiloa ai ma lana molimau.

I le tuneva o se tasi afiafi, sa faamatala mai ai e lo’u toalua, Sister Wendy Nelson, le tulaga o Jill. O le taeao na sosoo ai sa uunaia Wendy e faasoa atu ia Jill e faapea o la’u tali i lana tauiviga faaleagaga e na o le tasi lava le upu! O le upu o le myopic.

(Russell M. Nelson, “Ia Faamuamua le Atua,” Liahona, Nov. 2020, 93)

O le uiga o le upu myopic o se tagata e lata mai pe e le mamao lana vaai.

O a nisi upumoni e uiga i le Atua ma Lana fuafuaga e ono fesoasoani atu ia Jill e faaitiitia ai lona popole i mea e ono tutupu i le lumanai?

Mafaufau i se luitau po o se fesili o loo feagai ma oe i le taimi nei. E mafai ona tutusa lau fesili lenei ma lea sa tuuina mai i le lesona “Mauaina o le Malamalama Faaleagaga, Vaega 1” .

Aisea e te manaomia ma moomia ai le fesoasoni i lenei fesili po o le luitau?

Ia e manatua e leai se mea e afaina ai lou oo i faanoanoaga ma le tiga. Sa faanoanoa foi Iesu mo i latou na Ia alofa i ai (tagai i le Ioane 11:32-36). A tatou vaai i o tatou tulaga faatasi ma se vaaiga e faavavau, e mafai ona fesoasoani mai le Atua tatou te taulima nei lagona. Vaai mo ni upumoni i lenei lesona e mafai ona fesoasoani atu ia te oe e fai le mea lenei faatasi ma au lava fesili ma luitau.

Mataupu faavae o le mauaina o le malamalama faaleagaga

Pe a o tatou aafia i luitau o le olaga pe feagai foi ma ni fesili e lei taliina, e mafai ona fesoasoani ia i tatou mataupu faavae nei o le mauaina o le malamalama faaleagaga:

Faatino i le faatuatua.
Iloilo manatu faavae ma fesili faatasi ma se vaaiga e faavavau.
Saili le malamalama atili e ala i punavai faalelagi ua atofaina.

I lenei lesona o le a tatou taulai atu ai i le upumoni o le a o tatou iloiloina faafitauli faatasi ma se vaaiga e faavavau, e mafai ona fesoasoani le Agaga Paia ia i tatou ia atili manino le vaai i ai.

Suesue le parakalafa 8 i le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae ma ia le itiiti ifo se tasi o mau nei. Faailoga upu po o fasifuaitau e mafai ona fesoasoani ia Jill ina ia vaai atu ai i ona tofotofoga faatasi ma se vaaiga e faavavau.

Auala e iloilo ai fesili ma popolega faatasi ma se vaaiga e faavavau

A i ai ni a tatou fesili po o popolega, o se tasi o faagasologa e mafai ona tatou mulimuli ai e fesosoani tatou te vaai ai i mea mai se vaaiga e faavavau o le:

Faailoa soo se manatu o loo tatou faia e ono oo ai i se le femalamalaama’i e uiga i le Tama Faalelagi ma Lana fuafuaga.
Faailoa upumoni e uiga i le Tama Faalelagi po o Lana fuafuaga e faasa’o ai nei manatu soona fai.
Toe faaupu le fesili e ala i le manatu i ai faatasi ma se vaaiga e faavavau po o le toe iloilo o le fesili ina ia atagia mai ai upumoni o le talalelei.

Matamata le “Examining Questions with an Eternal Perspective” (2:56), o loo maua i le ChurchofJesusChrist.org, e iloa ai pe na faapefea ona faaaoga e le tamaitai talavou o Lauren lenei faagasologa e fesoasoani ai i lana uo.

Iloiloina o Fesili ma se Vaaiga e Faavavau
Ua faaalia e se tamaitai talavou le tomai e mafaufau ai i se auala fou i se fesili faigata i le talaaga o le Ata o le Faaolataga.

O le a se mea na fesoasoani lenei vitio e te malamalama ai e uiga i le iloiloina o manatu faavae ma fesili faatasi ma se vaaiga e faavavau?
Na faapefea ona faaaoga e Lauren nei laasaga e tolu na tatou faailoaina?

Mafaufau pe mafai faapefea ona fesoasoani lenei faagasologa ia Jill, le afafine mai le tala na faasoa mai e Peresitene Nelson.

Na faasoa mai e Peresitene Nelson le ala na faamanuiaina ai Jill e ala i le atiina a’e o se vaaiga e faavavau e ala i lana tofotofoga. Matamata le “Ia Faamuamua le Atua,” o loo maua i le ChurchofJesusChrist.org, mai le taimi 6:58 i le 8:24, po o le faitau i le faamatalaga o loo i lalo:

Ina ua mavae le maliu o le tamā o Jill, sa oo mai pea le upu myopic i lona mafaufau. Sa ia tatala lona loto ia malamalama atili ai i le loloto o le uiga o le myopic o le “vaai lata mai.” Ma na amata ona suia lona mafaufau. Ona fai mai lea o Jill, o le “Vaai lata mai [Myopic] na mafua ai ona ou tu, mafaufau, ma ua faamaloloina. O lena upu ua faatumulia ai nei a’u i le filemu. Ua faamanatu mai ai ia te au ia faalautele la’u vaaiga ma saili atu i le faavavau. Ua faamanatu mai ia te au o loo i ai se fuafuaga paia ma o loo ola pea lo’u tamā ma e alofa ma tausia pea au. O levaai lata mai na taitai atu ai au i le Atua.”

Ua ou mitamita lava i lo ma afafine faaletulafono faapelepele. I lenei taimi o le lofituina tele o lona olaga, o loo aoao ai Jill e talia le finagalo o le Atua mo lona tamā, i se vaaiga e faavavau mo lona lava olaga. E ala i le filifili e faamuamua le Atua, ua ia mauaina ai le filemu.

(Russell M. Nelson, “Ia Faamuamua le Atua,” 93)

Na faapefea ona faamanuiaina Jill ao ia tausisia se vaaiga e faavavau?

Toe mafaufau i le luitau po o le fesili sa e faailoa i le amataga o lenei lesona. Galue i lau fesili po o le luitau i lau api talaaga ma ia faaaoga laasaga e tolu na e aoaoina.

Tuu i le faitalia: O e Manao e Aoao Atili?

E mafai faapefea ona fesoasoani ia te au le tausisia o se vaaiga e faavavau pe a ou feagai ma faanoanoaga po o se maliu?

Na faamatala mai e Peresitene Russell M. Nelson le ala na fesoasoani ai ia te ia le tausisia o se vaaiga e faavavau ina ua maliu faafuasei lona faletua o Dantzel ma ina ua maliu lona afafine o Wendy i le mavae ai o se taimi umi o le tauiviga ma le kanesa:

I le 2005, i le mavae ai o le toeitiiti 60 tausaga o le ma faaipoipoga, sa faafuasei ai ona valaauina la’u pele o Dantzel e toe foi atu i le aiga. Mo se vaitau, sa toetoe lava a le mafai ona ou toe gaoioi i lo’u lotofaavauvau. Ae o le savali o le Eseta ma le folafolaga o le toetu sa lagolagoina a’u.

(Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 94)

Ua ma misia tele lo ma afafine. Peitai, ona o le talalelei toefuataiina a Iesu Keriso, matou te le popole ai ia te ia. A faaauau pea ona matou faamamalu i a matou feagaiga ma le Atua, matou te ola ma tulimatai atu e toefaatasi ma ia. O le taimi nei, o loo matou auauna i le Alii iinei ae o loo ia auauna ia te Ia iina—i le parataiso.

(Russell M. Nelson, “Sau, Mulimuli Mai ia te Au,” Liahona, Me 2019, 88)

E afaina i se a o tatou manatu soona fai?

Sa faasoa mai Peresitene Dallin H. Oaks o le Au Peresitene Sili:

Ona ua iloa e le Au Paia o Aso e Gata Ai le fuafuaga a lo tatou Tama Faalelagi mo Ana fanau, ua tatou iloa o le olaga nei e le o se tala faatino e tasi se vaega ua fafao faatasi i le va o se taimi tuanai e le mailoa ma se lumanai e le mautinoa. O le olaga nei ua pei o le vaega lua o se tala faatino e tolu vaega. O lona faamoemoega ua faamatalaina e ala i mea ua faaalia e uiga i lo tatou i ai faaleagaga i le Vaega 1 ma lo tatou taunuuga e faavavau i le Vaega 3. Ona o lo tatou malamalama i lenei Fuafuaga ma isi upumoni ua faaalia mai e le Atua, tatou te amata ai i ni mafaufauga e ese ai nai lo i latou e le o faasoaina mai lo latou iloa. O se taunuuga, tatou te oo i ai i ni faaiuga eseese i le tele o mataupu taua ia e na ona faamasinoina e isi i tuutuuga o o latou manatu e uiga i le olaga faaletino.

(Dallin H. Oaks, “E Pei Ona Manatu o Ia i Lona Loto” [afiafi ma se Pulega Aoao, Fep. 8, 2013], 3–4)

E faapefea ona ou toe faaupuina au fesili ma popolega ina ia mafai ona vaaia i latou mai se vaaiga e faavavau?

Na saunoa Brother Chad H. Webb, taitai o Seminare ma Inisitituti o Mataupu Faalelotu:

Afai tatou te amata i se vaaiga e faavavau, o le a tatou taunuu i faaiuga lea e atagia ai upumoni e faavavau. Ae afai tatou te amata ma ni mafaufauga soona fai faalelalolagi, e foliga mai o le a tatou taunuu i faaiuga faalelalolagi. O lea la e ono manaomia ai ona tatou toe fetuunaia ia nisi o fesili ona tatou te le o taliaina manatu i tulaga lea e faavae mai ai.

Mo se faataitaiga, atonu na fesiligia oe, “Pe le tatau ea i ni tagata se toalua o e alofa le tasi i le isi ona mafai ona faaipoipo?” Mai le vaaiga a le toatele o le lalolagi, o le tali e ono foliga o le ioe. Ae ia mafaufau i le mea ua e iloa e uiga i le ata o le faaolataga ma e uiga i le faamoemoega o le Tama Faalelagi mo le faaipoipoga. O le ata o le faaolataga ua saunia ai se vaaiga e faavavau ma se manatu faaletalalelei lea e toefaaupu ai le fesili. O nisi o fesili e mafai ona e toe mafaufau i ai o le “Aisea ua faauuina ai e le Atua le aiga?” po o le “Aisea ua faavaeina ai e le Alii le faaipoipoga i le va o le alii ma le tamaitai?” Mafaufau i mea ua e iloa e uiga i fanau agaga a le Tama Faalelagi—o fea sa latou o mai ai ma po o le a Lona finagalo mo i latou i le taimi nei ma i le faavavau. Mafaufau pe aisea ua Ia faamanuiaina ai i tatou ma le mana e faamauina ai aiga i totonu o malumalu. E faapefea e lou iloaina o nei mataupu faavae ona toefaaupu ai le fesili ma faataga ai oe ia vaai atu i le mataupu e ala atu i le malamalama o le talalelei?

(Chad H Webb, “Ina ia Latou Iloa le Ala e Omai ai ia te Ia ina ia Faasaoinabyuh.edu” [faigalotu a le Brigham Young University–Hawaii, Mar. 22, 2016], )