Galuega 17:16–34

“O i Tatou Uma Lava o Fanau a le Atua”

A o faatalitali mo ana soa faifeautalai e faatasi ma ia i Atenai, sa matua popole lava le Aposetolo o Paulo ona o tagata o Atenai o ni tagata e ifo i tupua ma e le malamalama i le natura moni o le Atua. Ina ia fesoasoani i tagata Atenai ia malamalama ma faalatalata atili atu i le Atua, sa aoao atu ai e Paulo le talalelei a Iesu Keriso i sunako ma nofoaga o maketi. Ona valaaulia lea e le au faifilosofia ia Paulo e faamatala “lenei aoaoga fou” (Galuega 17:19) i se nofoaga sa ta’ua o le Mauga o Areopako. Sa aoao atu e Paulo le au faifilosofia i le natura moni o le Atua ma molimau atu i lo latou sootaga paia ma Ia. O lenei lesona e mafai ona fesoasoani ia te oe e lagona ai le taua o lou faasinomaga o se atalii/afafine o le Atua.  

O a’u o se atalii/afafine o le Atua

Faalogologo i le viiga “O le Atua Lo’u Tama” (Hymns, no. 301) i luga o le polokalama o le Gospel Library po o luga o le ChurchofJesusChrist.org. Pe matamata le vitio “Child of God” (2:54), o loo maua i le ChurchofJesusChrist.org. A o e faalogologo pe usuina le viiga, mafaufau loloto i le taua o le savali o lenei viiga.

O a upu po o fasifuaitau mai lenei viiga ua e iloa e taua? Aisea?

Child of God
Remember—through a beloved children's song—who you really are.

Na valaaulia e Elder Donald L. Hallstrom o le Fitugafulu, i tatou ina ia mafaufau loloto i le savali o le “O Le Atua Lo’u Tama”:

O lenei viiga faapelepele o se tasi e masani ona lagiina soo i lenei Ekalesia. Ae o le fesili taua e faapea, o tatou iloaina moni ea lea viiga? O tatou iloaina i o tatou mafaufau, loto ma o tatou agaga? Pe o o tatou mātua faalelagi o lo tatou faasinomaga muamua lea ma aupito sili ona maoae?

(Donald L. Hallstrom, “O Le Atua Lo’u Tama,” Liahona, Me 2016, 26)

O fesili nei ua fetuutuunai mai le saunoaga a Elder Hallstrom ma e mafai ona taliina i se tali “ioe” po o le “leai”. A o e taliina nei fesili, faamatala pe aisea na e taliina ai fesili taitasi i le ala na e faia ai.

Tusitusi i luga o se fasipepa i se peni po o se penitala.

I le faagasologa o lenei lesona, mafaufau i au tali i fesili na muamua atu ma po o a mea o ta’u mai e au tali e uiga i ou lagona e faatatau i le Tama Faalelagi. Saili musumusuga mai lou Tama Faalelagi, e ala i le Agaga Paia, ina ia fesoasoani ai ia te oe ia malamalama atili i lou faasinomaga paia o se atalii/afafine o le Atua ma lagonaina Lona alofa tele mo oe.

Ua talai atu Paulo i Atenai

Sa talai atu le Aposetolo o Paulo i Atenai i le taimi o lana malaga lona lua faafaifeautalai. Sa tele manatu, filosofia, ma talitonuga eseese o tagata i Atenai. Na vaai Paulo o tagata sa “tuuina atu atoa i le ifo i tupua” (Galuega 17:16), o lona uiga sa latou tapuai i mea e ese mai nai le Atua. O lea sa talai atu ai Paulo i aso uma e uiga ia Iesu Keriso ma Lona Toetu. Ona aumaia ai lea o Paulo i le Mauga o Areopako, lea sa valaaulia ai o ia e lauga atu i luma o se vaega o le au filosofia (tagai i le Galuega 17:17–21).

Faitau le Galuega 17:22–23, ma vaavaai pe na faapefea ona faatomua mai e Paulo lana savali. E mafai fo’i ona e matamata i le vitio “We Are the Offspring of God” (4:26) mai le faailotaimi 0:00 e oo i le 1:54, o loo maua i le ChurchofJesusChrist.org.

We Are the Offspring of God
Paul preaches to Athenians on Mars' Hill and identifies their "unknown god" as the Father of us all. He testifies that we all are children of God. Acts 17:16–34

O le a se mea e mafai e tusitusiga o i luga o le fatafaitaulaga lea na taua e Paulo ona ta’u mai e uiga i le talitonuga o tagata Atenai i le Atua?
E faapefea ona faatusatusa lenei tusitusiga i mea o loo aoao mai e tusitusiga paia e uiga i le Atua?

Sa talitonu tagata Atenai anamua i le tele o atua ese ma sa fausia faatagata ma malumalu e faamamaluina ai i latou. O le fatafaitaulaga na fausia “mo le atua e le iloa” (Galuega 17:23), sa ono fai ma taumafaiga a tagata Atenai e faamalie i se atua e le mailoa po o se isi lava atua e le o iloa sona igoa.

O a nisi o malamalamaga sese masani ua e matauina i le lalolagi i aso nei e uiga i le Atua ma le tatou sootaga ma Ia?
Afai e te mauaina le avanoa e aoao atu ai se tasi e le tele sona iloa e uiga i le Tama Faalelagi, o le a se mea e te manao ia latou iloa e uiga ia te Ia?

O i tatou o le fanau a le Atua

ata pue o le seminare i le Mauga o Areopako

O se tasi o upumoni atonu na e iloaina mai i aoaoga a Paulo e faapea “o le fanau a le Atua i tatou” (fuaiupu 29).

E faapefea ona ese le avea ma se atalii/afafine o le Atua mai le na o le avea ma se tasi o Ana foafoaga?

Sa molimau mai Peresitene M. Russell Ballard o le Korama a Aposetolo e Toasefululua, e uiga i le taua o le upumoni “o i tatou o le fanau a le Atua.”

O le mea moni o le faavae o matua faalelagi e le na o sa’u upumoni po o sau upumoni. O le upumoni e faavavau. Ua tusia i mataitusi lapopoa, iloga, ma tetele. O le malamalama ai i lenei upumoni—malamalama moni i ai ma taliaina—e suia ai olaga. E tuuina atu ai ia te oe se faasinomaga tulaga ese e leai se tasi e mafai ona aveesea mai ia te oe. Ae e sili atu nai lo lena, e tatau ona e maua ai se lagona maoae o le taua ma se lagona o lou aoga e le gata. Ma le mea mulimuli, ua tuuina atu ai ia te oe se faamoemoega paia, mamalu, ma agavaa i le olaga.

(M. Russell Ballard, “Children of Heavenly Father” [Faigalotu i le Brigham Young University, Mati. 3, 2020], 2, speeches.byu.edu)

O le a se suiga e mafai ona faia i lou olaga ma i faaiuga e te faia i lou iloa ai o oe moni lava “o le fanau a le Atua”?
O a ni ou aafiaga na fesoasoani ia te oe e malamalama atili ai i lou faasinomaga paia o se atalii/afafine o le Atua?

Ina ia vaai i se faataitaiga o le auala na aafia ai se tasi tamaitai i le malamalama i lona faasinomaga paia, matamata i le vitio “Am I a Child of God?” (10:24), o loo maua i le ChurchofJesusChrist.org, mai le faailotaimi 3:24 i le 5:23.

O A’u ea o se Atalii o le Atua?
Ua aoao mai e Elder Taylor le auala e mafai ai ona faamalolosia i tatou e ala i le malamalama i la tatou faasinomaga paia o ni fanau a le Atua.

Faitalia pe Fai: O e Manao e Aoao Atili?

E mafai faapefea e le Tusi a Mamona ona faamalosia lo’u sootaga ma le Atua?

Na folafola mai e Peresitene Russell M. Nelson:

E tupu se mea mamana pe a saili atu se atalii/afafine o le Atua ia iloa atili e uiga ia te Ia ma Lona Alo Pele. E leai se isi vaipanoa o loo manino ma mamana atili ai le aoaoina o na upumoni nai lo le Tusi a Mamona.

(Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 60)

Aisea e taua tele ai le malamalama i lo’u faasinomaga moni o se atalii/afafine o le Atua?

Na aoao mai e Elder Brian K. Taylor o le Fitugafulu le mea lenei:

Sa aoaoina Mose e uiga i lona tupuaga paia e ala i le talanoa faafesaga’i ma le Alii. I le mavae ai o lena aafiaga, “Sa alu ane Satani ma faaosooso,” ma le faaōleōle, ae pulunaunau malosi e faasese le faasinomaga o Mose, “ua fai mai: Mose e, le atalii o le tagata, ifo mai ia te a’u. Ma sa … vaai atu Mose ia Satani ma fai atu: O ai oe? Aua faauta, O a’u o se atalii o le Atua” [Mose 1:12–13; faaopoopo le faamamafa].

O lenei taua tele i le faasinomaga paia o loo mumu malosi pea, a o faateteleina pea aupega taufaasese a Satani ua faamoemoe e faaumatia ai lo tatou talitonuga ma le malamalama e uiga i lo tatou sootaga ma le Atua. O le mea e faafetai ai, ua faamanuiaina i tatou i se vaaiga manino ma le malamalama i lo tatou faasinomaga moni mai le amataga. …

O le iloaina ai o lo tatou Tama e suia ai mea uma, aemaise o o tatou loto, a o faamautu mai e Lona Agaga agamalu lo tatou faasinomaga moni ma le taua tele i Lana silafaga. E savali faatasi le Atua ma i tatou i luga o le ala o feagaiga a o tatou saili atu ia te Ia e ala i aioiga i le agaga tatalo, suesueina o tusitusiga paia, ma tauiviga usiusitai.

(Brian K. Taylor, “O A’u ea o se Atalii o le Atua?,” Liahona, Me 2018, 12, 14)

Sa molimau mai Peresitene Dieter F. Uchtdorf o le Au Peresitene Sili e uiga i lo tatou faasinomaga moni o ni afafine ma atalii o le Atua i le vitio “Our True Identity” (3:38), o loo maua i le ChurchofJesusChrist.org.