Fakataukei Fakatokāteliné: 2 Tesalonika 2:1–3

“ʻE ʻIkai Hoko ʻa e ʻAho [ʻo Kalaisí] … Kapau ʻe ʻIkai Tomuʻa Hoko ʻa e Liliu Koví”

ʻĪmisi ʻo ha tangata ʻi ha tesi ʻoku tohi ʻi he kiliʻi manú

ʻI he lēsoni kimuʻá, naʻá ke ako ai naʻe kikiteʻi ʻi he kuonga muʻá ʻe hoko ha Hē mei he Siasi ʻo Sīsū Kalaisí kimuʻa ʻi Heʻene Hāʻele ʻAnga Ua Maí (vakai, “2 Tesalonika 2”). ʻE lava ke tokoni e lēsoni ko ʻení ke ke ako maʻuloto e potufolofola fakataukei fakatokāteliné mo e kupuʻi lea mahuʻinga he folofolá ki he 2 Tesalonika 2:1–3, fakamatalaʻi ʻa e tokāteline ‘o e Hē mei Moʻoní, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Ako maʻuloto pea fakamatalaʻi

Ko e hā ʻokú ke manatuʻi fekauʻaki mo e meʻa ʻoku akoʻi ʻi he 2 Tesalonika 2:1–3?

Ako maʻuloto ʻa e potufolofola mo e kupuʻi lea mahuʻinga he folofolá ki he 2 Tesalonika 2:1–3. Ko e founga ʻe taha ke fakahoko ai ʻení ko hono fakakakato ʻa e ʻekitivitī ko ʻení (pe ko ha meʻa tatau pē ʻo fakaʻaongaʻi ʻa e app Fakataukei Fakatokāteliné):

Hiki ‘a e 2 Tesalonika 2:1–3: “[Ko e] ʻaho ʻo Kalaisí … ʻe ʻikai hoko [ia], ʻo kapau ʻe ʻikai tomuʻa hoko ʻa e liliu kovi” ʻi hoʻo tohinoa akó pe ʻi hoʻo meʻangāue fakaʻilekitulōniká.

Toutou lau leʻolahi e potufolofolá mo e kupuʻi lea mahuʻingá pe toutou lau ia ʻi ho ʻatamaí.

Tamateʻi pe toʻo ha kupuʻi lea, hangē ko e “tomuʻa hoko ha liliu koví,” pea feinga ke toe lau ʻa e potufolofolá kakato mo e kupuʻi lea mahuʻingá.

Hoko atu hono tamateʻi pe toʻo ha ngaahi kupuʻi lea kehe kae ʻoua kuó ke lava ʻo toe lau maʻuloto kotoa e potufolofolá mo e kupuʻi lea mahuʻingá.

Mahalo te ke manatuʻi ko e taimi naʻá ke ako ai ʻa e 2 Tesalonika 2, naʻá ke ako ai naʻe kikiteʻi ia ʻi he kuonga muʻá kimuʻa ʻi he Hāʻele ʻAnga Ua Mai ʻa Sīsū Kalaisí, ʻe hoko ha hē mei Hono Siasí.

Tohi ʻi ha laʻipepa ʻaki ha peni pe penivahevahe.

Akoako fakahoko hono fakaʻaongaʻí

ʻI hoʻo hoko atu e lēsoni ko ʻení, te ke maʻu ai ha faingamālie ke tokoniʻi ha taha ke ne fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié. Ke ʻiloʻi e tuʻunga lelei hoʻo manatuʻi e ngaahi tefitoʻi moʻoni ko ʻení, feinga ke fakatauhoa e ngaahi fakamatala ko ʻení mo e tefitoʻi moʻoni ʻo hono maʻu e ʻilo fakalaumālie ʻoku fakamatalaʻi ʻe he fakamatala takitaha.

“Ka neongo iá, ʻoku totonu ke tokanga ʻa e kau fekumi fakamātoato ki he moʻoní telia ʻa e ngaahi maʻuʻanga fakamatala taʻefalalaʻangá.”
“Falala ki he ʻOtuá pea ʻuluaki tafoki kiate Ia ʻi he lotu fakamātoato, ako ʻEne ngaahi akonakí, pea talangofua ki Heʻene ngaahi fekaú.”
“Fakakaukau ki heʻ ngaahi [fehu‘i] ʻi he puipuitu‘a ʻo e palani ‘o e fakamoʻuí pea mo e ngaahi akonaki ‘a e Fakamoʻuí.”

Ngāue ʻi he tuí.
Vakavakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

‘Oku maʻu ‘a e ngaahi tali totonu ki he siví ‘i he ngataʻanga ‘o e lēsoni ko ‘ení.

Kapau te ke fiemaʻu ke toe vakaiʻi ʻa e ngaahi tefitoʻi moʻoni ko ʻení, lau ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2022).

Fakakaukauloto ʻokú ke fetohiʻaki ʻi he telefoní mo ho kaungāmeʻa ko Kīsoní, ko ha mēmipa ʻo ha siasi faka-Kalisitiane kehe. ʻOkú ne līʻoa ʻaupito kia Sīsū Kalaisi pea ʻokú ne ako maʻu pē ʻa e Tohi Tapú. Naʻe pehē ʻe Kīsoni ʻi ha pōpoaki telefoni kiate koe, “Naʻe akoʻi ʻe heʻemau faifekaú he ʻahó ni ʻoku tui ʻa e kāingalotu homou siasí ko homou siasí pē ʻa e siasi moʻoní pea ʻoku hala e toenga ia ʻo e ngaahi siasi kehé. ʻOku moʻoni ia? ʻOku ou ongoʻi ofi ange ki he ʻOtuá koeʻuhí ko hoku siasí. ʻOku fēfē ʻene ʻikai mei he ʻOtuá?”

Ko e hā ʻe fakanatula ai ki he kāingalotu ʻo e ngaahi siasi kehé ke ʻi ai haʻanau ngaahi fehuʻi pehení?
Te ke tali fēfē kia Kīsoni ʻi ha founga faka-Kalaisi?

ʻOkú ke text kia Kīsoni, ʻo fakamālō ange ʻi heʻene fehuʻi fakatupu fakakaukaú. ʻOkú ke kole pe te ke lava ʻo vahevahe hoʻo talí mo ia ʻi he ʻaho hono hokó, pea ʻokú ne loto ki ai.

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

Te ke fakaʻaongaʻi fēfē ʻa e ngaahi moʻoni naʻe akoʻi ʻi he 2 Tesalonika 2:1–3 ke tokoni kia Kīsoní?

Kumi ha potufolofola, lea, pe ngaahi fakamatala ʻe tolu pe lahi ange ʻokú ke pehē ʻe tokoni ʻi he tūkunga ko ʻení. Fakakaukau ke fakaʻaongaʻi e ngaahi maʻuʻanga tokoni ko ʻení:

Lau ʻa e ngaahi fakamatala ki he “Hē mei he Moʻoní” mo e “Fakafoki Mai ʻo e Ongoongoleleí” ʻi he Fakahinohino ki he Ngaahi Folofolá, pe kumi ha ngaahi fakamatala tatau ʻi he Fakahinohino ki he Ngaahi Folofolá. ʻE lava ke maʻu e ngaahi fakamatala ko ʻení ʻi he scriptures.ChurchofJesusChrist.org.
Vakai ki he fakamatala “Hē mei he Moʻoní” ʻi he Ngaahi Tefito ʻo e Ongoongoleleí (topics.ChurchofJesusChrist.org).
Vakai ki he ngaahi potufolofola mo e ngaahi fakamatala mei he lēsoni “2 Tesalonika 2” pe mei he “Lēsoni 1: Ko e Pōpoaki ʻo Hono Toe Fakafoki Mai ʻo e Ongoongolelei ʻo Sīsū Kalaisí” ʻi he Malangaʻaki ʻEku Ongoongoleleí (2018), 35–52.

Ko e hā ha ngaahi potufolofola pe maʻuʻanga tokoni kehe naʻá ke maʻu ʻe lava ʻo tokoni atu ke ke tali e fehuʻi ʻa Kīsoní?

Vakaiʻi mo sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

Ko e hā ha ngaahi moʻoni fekauʻaki mo e Tamai Hēvaní mo Sīsū Kalaisi te ke fie vahevahe mo Kīsoni ʻe lava ʻo tokoni ke mahino kiate ia ʻa e fiemaʻu ke Fakafoki mai ʻa e Ongoongoleleí?

Ngāue ʻi he tuí

Ko e hā ha ngaahi ngāue pau te ke lava ʻo fakaafeʻi ʻa Kīsoni ke ne fai kae lava ke ne ako ʻiate ia pē ʻa e ʻuhinga naʻe fiemaʻu ai ke Fakafoki mai e Siasi ʻo Kalaisí?
Ko e hā ha faʻahinga aʻusia ʻe lava ke ʻamanaki ʻa Kīsoni ki ai kapau te ne fakahoko e ngaahi ngāue ko ʻení?
ʻOku hoko fēfē ʻa hono fakaafeʻi iá ke ngāueʻi ai hoʻo tuí?

Ko e ngaahi tali tonu ki he ʻekitivitī fakatauhoá ko e (1) f; (2) a; (3) e.