Atamai i Aoaoga Faavae: Ioane 3:16

O Le Togiola a Iesu Keriso

I le lesona talu ai, sa e a’oa’oina le loloto o le alofa o le Tama Faalelagi sa faailoa mai i le auina mai o Lona Alo e fai mo tatou Faaola ma Togiola. O le lesona lenei e maua ai le avanoa e faateleina ai lou malamalamaaga i lenei aoaoga faavae autu e ala lea i le taulotoina o mau faasino ma fuaitau o mau autu, faamatalaina o le aoaoga faavae, ma le faaaogaina o mataupu faavae o le mauaina o le malamalama faaleagaga i tulaga moni o le olaga.

Tauloto ma faamatala

O se faitauga faafefiloi lea o le mau faasino ma le fuaitau autu o le mau mo le Ioane 3:16. Toe fa’asa’osa’o ia upu ma tusi le mau faasino sa’o ma le fuaitau autu o le mau i totonu o lau api talaaga mo suesuega.

Atua o le lona Atalii ona alofa i le 16 Aua ua faapea e toatasi lava mai Ioane au mai ai i le lalolagi ua ia 3

A mae’a ona fa’asa’osa’o le fuaitau, faaaoga sina taimi e tauloto ai le mau faasino ma le fuaitau autu o le mau.

Mafaufau faapea o oe o se faifeautalai faamisiona. Ua valaauina oe i se aiga e se ulugalii agalelei e lei faalogo lava i le Togiola o Iesu Keriso. E tusa ai ma mea sa e aoaoina mai le lesona talu ai e uiga i le alofa o le Atua i le auina mai o Lona Alo, o le a se mea o le a e faasoa atu i lenei ulugalii?

Faataitai ona faatino le ata faataitai lenei ma se tagata matua, pe tali atu foi i le ata faataitai i lau api talaaga mo suesuega.

Faataitai le faaaogaina

Faaaoga se taimi e toe faamanatu ai mataupu faavae o le mauaina o le malamalama faaleagaga i le gaoioiga lea.

Faatumu ia upu o loo misi mai fasifuaitau o loo i lalo.

• Faatino i le f____.

• Iloilo manatu ma f____ faatasi ma se v____ e f____.

• Saili le malamalama atili e ala i punavai f_________ ua a_______.

Mafaufau i le ata faataitai lenei.

Ina ua faalua ona tuai i le fale, sa faia ai e Sarai ma ona matua se talanoaga faigata. Ua ia iloa ua faasolo faigata ona talitonuina o ia e ona matua. Ua ia iloaina foi ua ia faia nisi o filifiliga, lea, a iloa e ona matua, o le a atili ai ona le talitonuina o ia e ona matua. Ua lagona e Sarai lona tausalaina, ae e foliga mai e faigofie mo le taimi nei ona ia le amanaiaina nei faafitauli. Ma le isi, ua na ia iloaina foi le faigata tele ona faatino ma lagonaina mea faaleagaga, lea ua ia mafaufau ai a le o le, e le moni le Tama Faalelagi pe ua liliuese fo’i o Ia mai ia te ia ona o ana filifiliga. I lenei taimi, ua le iloa e Sarai po o le a le mea a fai ae po o fea foi a liliu i ai.”

• O le a le mafuaaga o lenei mea ua avea ai ma tulaga faigata mo Sarai?

• Ana o oe lea i le tulaga Sarai, faamata o a ni fesili tele po o popolega e ia te oe?

Mafaufau pe mafai faapefea e mataupu faavae o le mauaina o le malamalama faaleagaga ona fesoasoani ia Sarai e tali atu ai i lona aafiaga. Afai e manaomia, faaalu sina taimi e iloilo ai parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) e aoao atili ai e uiga i nei mataupu faavae.

Faatino i le faatuatua

1. Tali fesili nei i totonu o lau api faamaumau mo suesuega:

• O le a se gaoioiga e mafai ona fai e Sarai ina ia faatino ai le faatuatua i lenei tulaga?

• O le a sau faamatalaga e fesoasoani ai ia te ia pe a ia lagona o le faatinoina o le faatuatua e faigata tele?

Iloilo manatu faavae ma fesili faatasi ma se vaaiga e faavavau

Ua lagona e Sarai ua afaina ana sootaga ma ona matua ma le Atua ona o filifiliga sa ia faia. O le talanoa sao atu i ona matua ma le Atua e foliga mai o le a faaletonu atili ai le latou mafutaga.

2. Tali fesili nei i totonu o lau api faamaumau mo suesuega:

• O a ni auala o loo sese pe lē atoatoa ai le vaai a Sarai i le tulaga ua i ai?

• O le a sou iloa i le Tama Faalelagi, Iesu Keriso, po o le ata o le faaolataga e mafai ona fesoasoani ia Sarai ia manatua?

• Ana faapea o oe o le tinā po o le tamā o Sarai, o le a sou lagona ia te ia? O le a se mea e te mana’o i lou afafine o loo feagai ma se tauiviga ia malamalama i ai e uiga i ou lagona?

Saili le malamalama atili e ala i punavai paia ua atofaina

Faaaoga nai minute e saili ai ni fuaitau o mau po o ni faamatalaga mai taitai o le Ekalesia e mafai ona fesoasoani ia Sarai. Pe a manaomia, mafaufau e faaaoga ia punaoa e pei o le Taiala i Tusitusiga Paia po o le Autu o le Talalelei e fesoasoani ia te oe (tagai i le ChurchofJesusChrist.org). E ono aoga foi le faaaoga o nisi o mau sa e a’oa’oina i le lesona taluai, e pei o le Ioane 3:14–17 po o le Mataupu Faavae ma Feagaiga 18:10–11.

3. Tali fesili nei i totonu o lau api faamaumau mo suesuega:

• O le a se mea na e aoao mai e uiga ia Iesu Keriso mai lau suesuega o le a fesoasoani ia Sarai?

• O a ni fuaitau patino e le itiiti ifo i le lua mai lau suesuega o le a aoga ia Sarai? Aisea?