Ioane 3:14–17

“Aua ua Faapea Lava ona Alofa mai o le Atua i le Lalolagi”

Ua toe foi atu Iesu i le faatoaga e faaauau ai pea ona tatalo ma mafatia i le tiga tele.

Pei ona tusia i le Ioane 3, na aoao Nikotemo e Iesu e uiga i Lana taulaga togiola ina ua Ia fetalai “e [ao ina] faapea ona siitia i luga o le Atalii o le Tagata: ina ia le fano se tasi e faatuatua ia te ia, a ia maua e ia le ola faavavau” (Ioane 3:14–15). Sa aoao mai Peresitene Russell M. Nelson, “A tatou faaalu aoga le taimi e aoao ai e uiga i le Faaola ma Lana taulaga togiola, e faalatalata atu ai tatou ina ia auai i [se] elemene autu e mafai ai ona maua Lona mana: tatou te filifili ia inai le faatuatua ia te Ia ma mulimuli ia te Ia” (“O Le Aumaia o le Mana o Iesu Keriso i totonu o o Tatou Olaga,” Liahona, Me 2017, 40). O le a avatu ia te oe e lenei lesona ni avanoa e faamalosia ai lou faatuatua ia Iesu Keriso a o e aoao atili e uiga i Lana Togiola.

O le a le Togiola a Iesu Keriso?

Ua tatalo Iesu Keriso i le Faatoaga o Ketesemane

O Keriso o loo tautau i luga o se satauro i Kalevaria.

Tagai i ata o Iesu i Ketesemane ma i luga o le satauro ma mafaufau i mea ua e iloa e uiga i le Togiola a Iesu Keriso.

I lenei lesona, o le a e aoao atili e uiga i le Togiola a Iesu Keriso ma le alofa na faaalia e le Tama Faalelagi i le taimi na Ia aumaia ai Lona Atalii i le lalolagi. A o e suesue, matau uunaiga a le Agaga Paia e mafai ona fesoasoani ia te oe e talisapaia atili ai le osigataulaga a Iesu Keriso mo oe ma faateleina ai lou faatuatua ia te Ia.

O Le Togiola a le Faaola

O fuaitau nei o mau ma faamatalaga o loo aoao mai ai e uiga i le Togiola a Iesu Keriso. Faaalu se 10 i le 15 minute e faitau totoa ai nei punavai (po o ni isi punavai e uiga i le Togiola a le Faaola o e fiafia e aoao i ai pe sa e mauaina a o lei faia lenei lesona). A o e faitau, mafaufau pe faapefea ona fesoasoani nei faamatalaga taitasi e te malamalama ai i mea na faia e le Tama Faalelagi ma Iesu Keriso mo oe ma pe aisea.

Sa aoao mai Elder Tad R. Callister o le Fitugafulu:

O le a la le Togiola a Iesu Keriso? I se lagona e tasi, o se faasologa o mea paia na tutupu lea na amata mai le Faatoaga o Ketesemane, faaauau atu i luga o le satauro, ma faaiu i le Toetu o le Faaola mai le tuugamau. Sa uunaia e se alofa lemafaamatalaina mo i tatou taitoatasi. Sa manaomia ai se tagata e leai ma sana agasala; o lē sa i ai le mana lē mafuatia i luga o elemene—e oo lava i le oti; o lē sa umia se gafatia lē faatuaoia e puapuagatia ai i taunuuga o a tatou agasala uma ma vaivaiga; ma o lē, o le mea moni, na afio i lalo ifo o nei mea uma lava [tagai i le Mataupu Faavae ma Feagaiga 88:6]. O le misiona lenei a Iesu Keriso—o Lana Togiola lenei.

O le a la lona faamoemoega? O le faia lea ia mafai ai e i tatou ona toe foi atu i le afioaga o le Atua, ia avea atili e faapei o Ia, ma maua se atoaga o le olioli. Na faia lenei mea e ala i le faatoilaloina o ni puniala se fa:

Oti faaletino

Oti faaleagaga ona o Atamu ma a tatou agasala

O o tatou mafatiaga ma faaletonu

O o tatou vaivaiga ma lē atoatoa

(Tad R. Callister, “O le Togiola a Iesu Keriso,” Liahona, Me 2019, 85)

O faapefea ona faaalia le alofa o le Tama i le auina mai o Lona Alo?

O leIoane 3:16 o se fuaitau o le atamai i aoaoga faavae. Mafaufau e faailoga fuaitau o mau o le atamai i aoaoga faavae i se auala iloga ina ia mafai ai ona e maua gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.

O se tasi o upu moni sa faamamafa mai e le Faaola e pei ona ia aoao ai Nikotemo e uiga i Lana Togiola (tagai i le Ioane 3:14–17) e faapea ua alofa tele le Tama Faalelagi i Lana fanau ua Ia auina mai ai Lona Atalii e Toatasi e togiola mo i tatou.

Sa aoao mai Peresitene Dallin H. Oaks o le Au Peresitene Sili e uiga i le ala ua faaalia ai le alofa o le Tama Faalelagi e ala mai i le Togiola a le Faaola:

E leai se faamaoniga e sili atu i le mana lē mafuatia ma le atoatoa o le alofa o le Atua nai lo o le na fetalai mai ai Ioane le Aposetolo: “Aua ua faapea lava ona alofa mai o le Atua i le lalolagi, ua ia auina mai ai lona Atalii e toatasi” (Ioane 3:16). Sa tusia e se tasi Aposetolo faapea o le Atua lava “sa na le faasaoina lona lava Alo, a ua tuuina mai o ia e sui ai i tatou uma lava” (Roma 8:32). Mafaufau i se tigaalofa o lo tatou Tama Faalelagi i le auina mai o Lona Atalii e onosaia mafatiaga e lē mafai ona malamalama i ai mo a tatou agasala. O le faamaoniga silisili lena o Lona alofa mo i tatou taitoatasi!

(Dallin H. Oaks, “Alofa ma le Tulafono,” Liahona, Nov. 2009, 26)

O le a se mea na e aoaoina mai lenei faamatalaga?

Matamata i le vitio “Aua ua Faapea Lava ona Alofa mai o le Atua i le Lalolagi” (4:48), o loo maua i le ChurchofJesusChrist.org, ma vaavaai pe o faapefea ona faaalia le alofa o Iesu Keriso ma le Tama Faalelagi.

Tuu i le faitalia: O e Manao e Aoao Atili?

E mafai faapefea ona ou mauaina le mana ua aumai e Iesu Keriso e ala i Lana Togiola?

Sa aoao mai e Peresitene Russell M. Nelson mea nei e uiga i le valaaulia o le mana o Iesu Keriso i totonu o o tatou olaga:

I le avea ai ma tagata o le Au Paia o Aso e Gata Ai, tatou te faasino i Lana misiona o le Togiola a Iesu Keriso, lea ua mafai ai ona avea le toetu ma se mea moni mo tagata uma ma ua mafai ai ona maua le ola e faavavau e i latou e salamo i a latou agasala ma taliaina ma tausia sauniga ma feagaiga taua. …

… O a tatou feagaiga e fusia ai i tatou ia te Ia ma tatou maua ai le mana faaleatua. I le avea ai ma soo faatuatua, tatou te salamo ma mulimuli atu ia te Ia i le vai o le papatisoga. Tatou te savavali i le ala o feagaiga ina ia maua ai foi isi sauniga taua. …

E saili e alii ma tamaitai tausi-feagaiga auala e tausia ai i latou lava ia lē pisia mai le lalolagi ina ia leai se mea e pupunia lo latou mauaina o le mana o le Faaola.

(Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 40–41)

E faapefea ona ou iloa o galue Iesu Keriso ma Lona mana i lou olaga?

Sa aoao mai Peresitene Henry B. Eyring o le Au Peresitene Sili:

Afai ua e lagonaina le tosinaga a le Agaga Paia i le aso nei, atonu e avea lena mea ma se faamaoniga faapea ua galue le Togiola [a Iesu Keriso] i lou olaga. Mo lena mafuaaga ma le tele o isi, o le a lelei pe a e tuuina oe lava i nofoaga ma galuega o loo valaauliaina uunaiga a le Agaga Paia.

(Henry B. Eyring, “Gifts of the Spirit for Hard Times,” Ensign, Iuni 2007, 23)

O fea e mafai ona ou aoao atili ai e uiga i le Togiola a Iesu Keriso?

Mafaufau e faaloloto atili lou malamalama i le Faaola ma Lana Togiola e ala i le faaaogaina o fesoasoani mo suesuega o tusitusiga paia e pei o le anotala o Autu o le Talalelei ua faaigoaina “Togiola a Iesu Keriso” (ChurchofJesusChrist.org) po o le su’e foi o le “ Togiola, Togiolaina ” i totonu o le Taiala i Tusitusiga Paia (scriptures.ChurchofJesusChrist.org). O nei fesoasoaniga mo suesuega o tusitusiga paia o loo i ai malamalamaaga taua, mau, talanoaga, vitio, ma isi punaoa o loo aoao mai e uiga i le Togiola a le Faaola.