Atamai i Aoaoga Faavae: Ioane 3:5

Fanau i le Vai ma le Agaga e Ulu Atu ai i le Malo o le Atua

I se lesona talu ai, na e suesue ai i fetalaiga a le Faaola ia Nikotemo e uiga i le toe fanau mai faaleagaga e ala i sauniga o le papatisoga ma le faamauga. I lenei lesona e mafai ona e faataitai ai le faaaogaina o mataupu faavae o le mauaina o le atamai faaleagaga e faaaoga ai le aoaoga faavae e tatau ona tatou fananau i le vai ma le Agaga ia tatou ulu atu ai i le malo o le Atua.

Tauloto ma faamatala

Manatu faapea ua talosagaina oe e aoao atu i se vasega Peraimeri ia upu moni ua aoao mai e le Ioane 3:5: e tatau ona tatou fananau i le vai ma le Agaga ia tatou sao atu ai i le malo o le Atua.

1. Tusi lau tali i le manatu lenei i totonu o lau api talaaga mo suesuega.

• E faapefea ona e faamatala atu i le vasega Peraimeri le uiga o lenei aoaoga faavae? Ia aofia ai ni ou manatu e uiga i le matafaioi a le Faaola i lenei faagasologa, e pei ona aoao mai i le Alema 7:14.

E mafai ona fesoasoani ia te oe lenei faatinoga e te manatua ai le fuaitau i le atamai i aoaoga faavae ma tauloto le fasifuaitau autu o le mau. E mafai ona e faamaeaina se gaoioiga faapena i le polokalama o le Atamai i Aoaoga Faavae pe afai e mafai ona e mauaina. Faaaoga se penitala, tusi i totonu o lau api talaaga mo suesuega, “ Ioane 3:5: Afai e le fanau se tasi i le vai ma le Agaga, e le mafai ona sao o ia i le malo o le Atua.” Faitau ma toe faitau leotele le fasifuaitau pe fai faafia foi i lou mafaufau. Filifili ni upu se tolu pe fa ma tape ese uma o latou mataitusi sei vagana ai le mataitusi muamua o upu taitasi. Toe faitau faatolu pe faafa le fasifuaitau Toe fai le gaoioiga lenei seia oo ina na o mataitusi muamua o upu taitasi o loo totoe, e pei ona faaalia iinei: “I____ 3:_A_____ e l_ f____ s_ t___ i l_ v__ m_ l_ A____ e l_ m____ o__ s__ o i_ i l_ m___ o l_ A___.” Toe fai le fasifuaitau mo ni nai taimi e faaaoga ai mataitusi muamua, ona taumafai lea e tauloto e aunoa ma le tilotilo i ai.

Faataitai le faaaogaina

Manatu faapea e i ai sau uo e igoa ia Meghan e auai i le Ekalesia, ao lona tina e leai. E talitonu lona tina ia Iesu Keriso ma le Tusi Paia ae peitai e le auai i se ekalesia. Ua fesili atu Meghan ia te oe “Mata e le mafai ona alu lo’u tina i le lagi e aunoa ma le papatiso pe a ola o ia i se olaga lelei?”

• O a ni mafuaaga e ono fai ai e Meghan lenei fesili?

• Aisea e taua ai ona e malamalama i ana mafuaaga o le faia o lenei fesili faatoa e fesoasoani lea ia te ia e sueina ni tali?

Ina ia e fesoasoani ia Meghan ia maua se tali i lana fesili e uiga i le taua o le papatisoga, e mafai ona e faaaogaina mataupu faavae o le mauaina o le malamalama faaleagaga.

Faatino i le faatuatua

Faitau i parakalafa 5–7 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2022). Mafaufau e vase se laina i lalo o upu po o fasifuaitau e aoga mo lenei ata faataitai.

• O a upu po o fasifuaitau na e vaseina? E mafai faapefea ona e faaaogaina i lenei ata faataitai?

Iloilo manatu faavae ma fesili faatasi ma se vaaiga e faavavau

Faitau i parakalafa 8–10 i le vaega lava e tasi o le Pepa Autu o le Atamai i Aoaoga Faavae. Mafaufau e vase upu po o fasifuaitau o le a aoga e faaaoga i lenei ata faataitai.

• O a upu po o fasifuaitau na e vaseina? E mafai faapefea ona e faaaogaina i nei ata faataitai?

Saili nisi malamalama faaopoopo e ala i punavai faalelagi ua filifilia

Faitau i parakalafa 11–12 i le vaega lava e tasi o le Pepa Autu o le Atamai i Aoaoga Faavae. Mafaufau e vase upu po o fasifuaitau o le a aoga e faaaoga i lenei ata faataitai.

• O a upu po o fasifuaitau na e vaseina? E mafai faapefea ona e faaaogaina i nei ata faataitai?

2. E faavae i mea ua e aoaoina mai i au suesuega o le Ioane 3:5, faamatala mai pe faapefea ona e fesoasoani ia Meghan e faaaoga mataupu faavae mo le mauaina o le malamalama faaleagaga e tali ai lana fesili.