Ioane 3:1–8

“E Ao Ina Toe Fanau Mai Outou”

O Nikotemo sa fai ma Faresaio ma se “faipule o Iutaia” (Ioane 3:1). Na alu ane o ia i le Faaola i le po e fesili i ai ni fesili taua e uiga i le faaolataga. E mafai ona fesoasoani lenei lesona e te malamalama ma lagonaina ai le taua o le toe fanau mai “i le vai ma le Agaga” (Ioane 3:5) ina ia ulufale ai i le malo o le Atua.

O se naunautaiga ia suia

Mafaufau i se tala faatusa e uiga i se tagata talavou ua manao e suia, faalatalata atili i le Faaola, ma lagonaina atili le filemu ae e le o mautinoa pe faapefea. Mafaufau i mea patino e ono manao lea tagata e sui ma ni faigata atonu latou te feagai ai a o suia. E ao foi ona e mafaufau i ni aafiaga sa faalogoina e oe po o isi a o faia ni suiga lelei e mafai ona fai ma faamalosiau mo lenei tagata talavou o loo mafai ona latou sui.

Mata aisea e manaomia ai e le Tama Faalelagi ona suia i latou o naunau e ulufale i Lona malo?

I totonu o lau api faamaumau mo suesuega, tusi i lalo ni auala o uunaia ai oe e sui ma avea atili e pei o Iesu Keriso. A o faasolo lenei lesona, valaaulia le musumusuga o le Agaga Paia a o e aoao pe faapefea ona saili le fesoasoani a le Faaola i le faia o suiga ua Ia naunau e te faia.

Na aoaoina e Iesu ia Nikotemo e uiga i le toe fanau mai

Na alu ane se alii e igoa ia Nikotemo ia Iesu i le po. O Nikotemo sa fai ma Faresaio ma se faipule o Iutaia. Na mulimuli ane ia puipuia Keriso i luma o Faresaio (tagai i le Ioane 7:50–53) ma auai ma tagata talitonu i le tanuga o Iesu (tagai i le Ioane 19:39–40). Na alu ane Nikotemo i le Faaola i lea po ma faailoa o Iesu o “se aoao ua maliu mai mai le Atua” (Ioane 3:2).

O leIoane 3:5 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.

Faitau i le Ioane 3:1–5, ma saili mo le mea na aoaoina e le Faaola ia Nikotemo e manaomia ona ia faia ina ia ulufale ai i le malo o le Atua.

O le a sou manatu i le uiga o le “toe fanau mai”? (Ioane 3:3).

Aisea e te manatu ai e manaomia ona tatou toe fanau mai ina ia vaai ai i le malo o le Atua?
I le taimi na lē malamalama ai Nikotemo pe faapefea ona toe fanau mai, o le a se mea na aoao i ai e le Faaola (e pei ona faamaumauina i le fuaiupu 5)?

O se tasi o mataupu autu tatou te aoao i ai mai aoaoga a le Faaola ia Nikotemo o le e ao ona tatou fanau i le vai ma le Agaga ina ia ulufale ai i le malo o le Atua.

O le a sou manatu i le uiga o le fanau i le vai ma le Agaga?
O a ni auala e te manatu e mafai e le papatisoina ma le faamauga ona fesoasoani ia i tatou e toe fanau mai ma ulufale atu ai i le malo o le Atua?
O le a se mea na aoaoina e le Faaola ia Nikotemo o le a e manao e malamalama i ai le tagata i le ata faataitai sa e fatuina?

O le papatisoga ma le faamauga o ni sauniga manaomia e lua o le faaolataga ma le faaeaga e tatau ona taliaina e tagata taitoatasi ina ia maua le malo selesitila. O nei sauniga o le faitotoa lea tatou te ulufale ai ina ia oo i luga o le ala o feagaiga e tau i le ola e faavavau (tagai i le 2 Nifae 31:17–20). A o tatou savalia lenei ala ma tausi a tatou feagaiga, tatou te oo i ni suiga ma se toe fanaufouina faaleagaga. Sa faamatala mai e le perofeta o Alema i le Tusi a Mamona le matafaioi a le Faaola i le faagafatiaina o i tatou ia toe fanau mai. Faitau i le Alema 7:14, ma vaai pe faapefea ona fesoasoani le Faaola ia i tatou e toe fanau mai.

O le a le matafaioi a le Faaola i le fesoasoani ia i tatou e toe fanau mai?

Mai le 2 Nifae 31:17 tatou te aoao ai foi i le matafaioi a le Agaga Paia i le fesoasoani ia i tatou e toe fanau mai: “Ona oo mai ai lea o se faamagaloga o a outou agasala i le afi ma i le Agaga Paia.”

O le a le matafaioi a le Agaga Paia i le fesoasoani ia i tatou e toe fanau mai?

Matamata i le vitio “O le Suia o le Loto” (4:39), mai le taimi 0:40 e oo i le 4:09, e iloa ai aafiaga o se alii talavou e igoa ia Ever. Vaavaai mo ni mea faapitoa na ia faia na mafai ai ona fesoasoani le Faaola e suia o ia. (O loo maua lenei vitio i le ChurchofJesusChrist.org.)

O Se Suiga o le Loto
Sa seesee malie atu se alii talavou i Honetura i se olaga o le le manatu popole, manatu faapito, ma faafitauli seia oo ina faaali atu e se uo ia te ia, sa fanau mai o ia mo ni mea e sili atu.

O le a se mea na faagaeetiaina ai oe e uiga i suiga na faia e lenei alii talavou?

O a ni suiga ua e faia po o se isi e te iloa ina ia avea atili ai e pei o Iesu Keriso?
O le a le matafaioi a sauniga o papatisoga ma faamauga na i ai i le faia o nei suiga?

O isi o taimi tatou te mafaufau po o faapei le faagasologa o le tatou toe fanauina faaleagaga. Sa aoao mai le Faaola i le Ioane 3:8 e mafai ona tatou vaaia aafiaga o le matagi ae tatou te lē iloa le mea na sau ai ma le mea e alu atu iai. E faapena foi la, e lē mafai ona tatou malamalama i taimi uma po o afea e amata mai ai le toe fanau mai, faapea foi pe faapefea ona faia suiga ia i tatou lava. Peitai, e mafai ona tatou vaai i ona aafiaga pe a suia o tatou manaoga ma faatinoga (tagai i le Mosaea 5:1–2). Tusi i lau api talaaga mo suesuega e uiga i faamaoniga ua e vaai i ai e uiga i le Faaola o fesoasoani ia te oe e sui. Maitau soo se uunaiga, mafaufauga, ma manatu e te ono mauaina mai le Agaga.

O le fesoasoani atu i isi

Tuu i le faitalia: O e Manao e Aoao Atili?

O le a le uiga o le toe fanau mai?

Na faamalamalama mai e Elder David A. Bednar o le Korama a Aposetolo e Toasefululua e faapea:

O loo saga aoao mai pea e auauna faamaonia a le Alii o se tasi o faamoemoega autu o le tatou i ai i lenei olaga faaletino o le suia faaleagaga lea ma liua e ala i le Togiola a Iesu Keriso. …

O loo faatonuina i tatou e “o mai ia Keriso, ma faaatoatoaina ia te ia, ma faafiti [tatou] lava mai mea uma e lē faaleatua” (Moronae 10:32), ina ia avea ma ni “foafoaga fou” ia Keriso (tagai i le 2 Korinito 5:17), tuu ese le “tagata natura” (Mosaea 3:19), ma ia faia “se liuga tele i totonu o i tatou, po o i totonu o o tatou loto, ia lē toe i ai se tatou manao e fai mea leaga, ae ia faia mea lelei e lē aunoa” (Mosaea 5:2). Faamolemole ia matau o le liua o loo taua i nei fuaiupu e maoae, e lē laitiiti—o se toe faafanauina faaleagaga ma se suiga faavae o mea tatou te lagonaina ma naunau i ai, o mea tatou te mafaufau i ai ma fai, ma o tatou ituaiga tagata. Ioe, o le agaga moni o le talalelei a Iesu Keriso e afua ai se suiga faavae ma le mautu i o tatou lava natura ua mafai i le tatou faalagolago i “taui, ma le alofa mutimutivale, ma le alofa tunoa o le Mesia Paia” (2 Nifae 2:8). A o tatou filifili e mulimuli i le Matai, ua tatou filifili ina ia suia—ia toe fanauina faaleagaga.

(David A. Bednar, “E Ao in Toe Fanau Mai Outou,” Liahona, Me 2007, 19–20)

E mafai faapefea ona ou toe fanau mai?

Sa faia e Elder David A. Bednar o le Korama o Aposetolo e Toasefululua se tautalaga na faaulutalaina “Faatumauina Pea le Faamagaloina o a Outou Agasala” (Liahona, Me 2016 59–62) o loo i ai ni malamalamaaga e faatatau i lenei fesili.

Aisea e ono faigata ai ona iloa po o ua ou toe fanauina?

Na aoao mai Elder D. Todd Christoffferson o le Korama a Aposetolo e Toasefululua:

E te ono fesili, Aisea e lē vave ai ona tupu lenei suiga tele mo au? … Mo le toatele lava o i tatou, e faifai malie suiga ma e umi se taimi e tulai mai ai. O le toe fanau mai … o le tele lava o se faagasologa ae le o se mea e tupu [i se taimi e tasi]. Ma o le auai ai i lena faagasologa o le faamoemoega tutotonu lea o le olaga faaletino.

I le taimi e tasi foi lea, aua nei o tatou tauamiotonuina i tatou lava i a tatou taumafaiga faasamasamanoa. Aua nei faamalieina i tatou e taofiofi ni amioga e faia le leaga. Ia tatou aai ma feinu ma le agavaa i le faamanatuga i vaiaso taitasi ma faaauau pea ona pipiimau i le Agaga Paia ina ia veleeseina ia muiaa o mea eleelea o loo totoe i totonu o i tatou. Ou te molimau atu a o outou faaauau ai i le ala o le toe faafanauina faaleagaga, o le a aveeseina e le alofa togiola o Iesu Keriso a outou agasala ma pisipisia o na agasala o loo ia te outou, o le a mou ese atu faaosoosoga, ma e ala ia Keriso o le a faapaiaina ai outou, e pei ona paia o Ia ma lo tatou Tama.

(D. Todd Christofferson, “Toe Fanauina,” Liahona, Me 2008, 78)

O le a le eseesega o le “vaaia” ma le “ulufale” i le malo o le Atua?

Sa aoao mai le Perofeta o Iosefa Samita (1805–44) e uiga i fetalaiga a le Faaola i le [Ioane 3:3, 5], lea e talanoa e uiga i le “vaaia” ma le “ulufale” i le malo o le Atua: “O le tasi mea o le vaai i le malo o le Atua, a o le isi mea o le ulufale atu i ai. E tatau ona i ai se suiga i o tatou loto ina ia vaaia ai le malo o le Atua, ma sainia pepa aloaia mo le vaetamaina ina ia ulufale atu i totonu” (i le Journal, December 1842–June 1844; Book 3, 15 July 1843–29 February 1844, 130, josephsmithpapers.org]. A “vaai” se tagata i le malo o le Atua, ua mafua mai ona ua faia e le Agaga Paia se “suiga tele o le loto” o lea tagata (tagai i le Alema 5:14). Ona tatau lea i le tagata ona auai i le faatinoina o sauniga o le talalelei ina ia mafai ai ona “ulufale” atu i le malo o le Atua.

(“Ioane 2–4,” i le Tusi Aoga a le Tagata Aoga o le Feagaiga Fou [2018], ChurchofJesusChrist.org)