Doktrinal nga Kahanas: Lucas 2:10–12

Si Jesukristo Natawo isip Manluluwas ug Ginoo

Sa miaging leksiyon, imong gitun-an ang pagpamatuod sa usa ka anghel ngadto sa mga magbalantay sa karnero nga si Jesukristo mao ang Anak sa Dios ug Manluluwas sa kalibotan (tan-awa sa Lucas 2:10–12). Hatagan ka niini nga leksiyon og oportunidad aron ipakita ang imong pagsabot niini nga doktrina samtang naggamit ka og mga baroganan sa pag-angkon og espirituhanong kahibalo sa usa ka sitwasyon sa tinuod nga kinabuhi.

Isag-ulo ug ipasabot

Tan-awa ang hulagway sa pagkatawo sa Manluluwas ug sag-uloha ang pakisayran ug mahinungdanon nga hugpong sa mga pulong sa kasulatan alang sa Lucas 2:10–12: “Kay karong gabhiona, natawo sa lungsod ni David ang inyong Manluluwas, ang Kristo nga Ginoo.” Balika hangtod nga mobati ka og pagsalig nga masag-ulo nimo kini gikan sa panumdoman.

Pagbansay sa paggamit

Paggahin og pipila ka minuto sa pagrebyo sa mga baroganan sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Alang sa matag baroganan, pagmarka og bisan usa lamang ka kapahayag nga gibati nimo nga nagpasabot sa konsepto.

Ikonsiderar ang mosunod nga sitwasyon:

Ang usa sa imong mga higala nga dili relihiyoso bag-ohay nga nakakita og pares sa mga misyonaryo nga nakig-istorya sa pipila ka tawo sa parke. Gipangutana ka sa imong higala, “Nganong ang mga misyonaryo gikan sa inyong simbahan mogawas man ug mosangyaw mahitungod kang Jesus? Mora og naningkamot mo nga ipugos ang inyong mga gituohan ngadto sa uban tawo. Nganong dili na lamang ninyo sila pasagdan nga malipay sa kon unsa sila?”

Sa paghunahuna niini nga sitwasyon, tun-i ang mosunod nga mga baroganan sa pag-angkon og espirituhanong kahibalo ug pamalandongi kon sa unsang paagi kini makatabang kanimo sa pagtubag sa pangutana sa imong higala.

Lihok inubanan sa hugot nga pagtuo

“Kita molihok inubanan sa hugot nga pagtuo kon atong pilion ang pagsalig sa Dios ug Siya ang unahon” (Mahinungdanon nga Dokumento sa Doktrinal nga Kahanas, “Pag-angkon og Espirituhanong Kahibalo,” parapo 5).

Unsa nga mga hugpong sa mga pulong ang imong nakaplagan diha sa mga parapo 5–7 sa seksiyon sa “Pag-angkon og Espirituhanong Kahibalo” nga makatabang kanimo niini nga sitwasyon?
Sa unsang paagi nga ang paglihok inubanan sa hugot nga pagtuo makatabang kanimo samtang nangita ka og tubag para sa imong higala?

Susiha ang mga konsepto ug mga pangutana nga adunay mahangtorong panglantaw

“Sa pagsusi sa [mga konsepto ug mga pangutana] inubanan sa mahangturong panglantaw, atong ikonsiderar ang kinatibuk-ang kahulogan niini sa plano sa kaluwasan ug sa mga pagtulon-an sa Manluluwas” (Mahinungdanon nga Dokumento sa Doktrinal nga Kahanas, “Pag-angkon og Espirituhanong Kahibalo,” parapo 8).

Rebyoha ang Lucas 2:10–12. Hunahunaa kon unsa ang gitudlo niini nga tudling kauban ang imo nang nahibaloan mahitungod kang Jesukristo.

Unsa ang mga tahas sa Manluluwas diha sa plano sa kaluwasan?
Nganong importante man alang niadtong wala pa nakahibalo mahitungod kang Jesukristo nga makahibalo mahitungod Kaniya?
Nganong importante kaayo nga atong ipakigbahin ang mensahe sa Iyang gipahiuli nga ebanghelyo ngadto sa tanan, lakip na sa uban pang Kristiyano nga midawat na Kaniya?
Sa unsang paagi nimo magamit ang mga tubag sa miaging mga pangutana sa pagtubag sa imong higala?

Pagtinguha pa og dugang nga panabot pinaagi sa balaanong gitudlo nga mga tinubdan

Aron matabangan kita nga makaangkon og espirituhanong kahibalo, ang Ginoo “miestablisar og mga tinubdan nga pinaagi niini Siya mopadayag sa kamatuoran ug giya ngadto sa Iyang mga anak” (Mahinungdanon nga Dokumento sa Doktrinal nga Kahanas, “Pag-angkon og Espirituhanong Kahibalo,” parapo 11).

Rebyoha ang usa o dugang pa sa mosunod nga dinasig nga mga tinubdan, nga mangita og impormasyon nga makatabang kanimo sa pagtubag sa pangutana sa imong higala.

“Ang Buhi nga Kristo: Ang Pagpamatuod sa Mga Apostoles” (ChurchofJesusChrist.org)
Ang mga bersikulo nga imong gi-link o gi-cross reference sa Lucas 2:10–12 sa miaging leksiyon
Mga kanta nga nakalista ubos sa hilisgotan nga “Jesukristo” diha sa hymnbook

Ikonsiderar kon unsa ang gitudlo niini nga mga tinubdan mahitungod kon sa unsang paagi nga ang Manluluwas ug ang Iyang mga pagtulon-an makahatag og kalipay sa mga tawo.

Unsa ang imong nakat-onan mahitungod sa Manluluwas ug sa Iyang mga pagtulon-an nga makahatag sa mga tawo og kalipay niini nga kinabuhi ug sa kinabuhi nga moabot?
Unsang personal nga mga kasinatian diha sa Manluluwas o sa Iyang mga pagtulon-an ang naghatag kanimo og kalipay?
Sa unsang paagi nga ang imong mga tubag niini nga mga pangutana makatabang kanimo sa pagtubag sa pangutana sa imong higala?