Atamai i Aoaoga Faavae: Mataio 22:36-39

O Poloaiga Sili e Lua

I le Mataio 22:36–39, na aoao mai ai e le Faaola poloaiga sili e lua. O lenei lesona o le a fesoasoani ia te oe e faataitai ai le faaaogaina o le aoaoga faavae o loo aoao mai i lenei fuaitau ma mataupu faavae o le mauaina o le malamalama faaleagaga e malamalama ai i le ala e usitai ai i poloaiga e lua ia alofa i le Atua ma alofa i lou tuaoi.

Tauloto ma faamatala

Faataitai le taulotoina o le fasifuaitau autu “E te alofa atu i le Alii lou Atua. … Ia e alofa atu i le lua te tuaoi” mo le mau faasino Mataio 22:36–39 .

Tusi se ata o se fatu ma tusi le numera 1 ma le 2 i ona lalo ifo. I talaane o le numera 1, tusi ai, “E te alofa atu i le Alii lou Atua”;i talaane o le numera 2, tusi ai,“Ia e alofa atu i le lua te tuaoi.” Faasino i le fatu, ma tau mai le mau faasino. O le isi mea e sosoo ai, faasino i numera taitasi. A o e faia, tau mai le vaega o le fasifuaitau autu e fesootai ma le numera. Toe fai le faagasologa mo ni nai isi taimi.

Faitau le Mataio 22:36–39, ma faamanatua lau suesuega talu ai o nei fuaiupu.

1. Faamau au tali i fesili o loo mulimuli mai i lau api faamaumau suesuega:

• O a ni auala e mafai ai ona tatou alolofa ai i le Atua ma o tatou loto atoa? E mafai faapefea ona tatou alolofa i o tatou tuaoi e pei o i tatou lava?

• Aisea e te manatu na tuuina mai ai nei poloaiga e lua i lenei faatulagaga?

Faata’ita’i le faaaogaina

A manaomia, toe iloilo parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022).I nisi o tulaga, atonu tatou te tauivi e iloa pe faapefea ona mulimuli i poloaiga a le Atua ma faaali atu le alofa mo i latou e le usiusitai i poloaiga a le Atua.

Na aoao mai Elder Lynn G. Robbins o le Fitugafulu:

O le taumafai e faamalie muamua isi i lo le faamalieina o le Atua o le fesuiaia lea o le poloaiga sili muamua ma le lua (tagai i le Mataio 22:37–39). O le faagaloina lea o le itu e ao ona tatou faasaga i ai. Ae peitai, ua tatou faia uma lena mea sese ona o le fefe i tagata. …

O faaiuga a tagata ua faia e ala i le manatuaina o le faatulagaga sao o poloaiga sili muamua ma le lona lua. …

O le Faaola, lo tatou Faataitaiga sili, na faasaga atu i Lona Tama i taimi uma. Na Ia alofa ma auauna atu i Ona uso a tagata ae na fetalai mai, “Ou te le manao i le viiga mai tagata” ( Ioane 5:41).

(Lynn G. Robbins, “O Fea le Itu e Faasaga I Ai?,” Ensign po o le Liahona, Nov. 2014, 9, 11)

Mafaufau loloto i fesili nei ae e te lei faia le gaoioiga lenei.

• Pe na e fefe ea e faasao pe fautuaina ma le alofa se uo ona e te le i manao e faatiga ia i latou?

• Pe na e lagonaina ea e tatau ona e filifili i le va o mea ua faamoemoeina e isi mai ia te oe ma mea ua faamoemoeina e le Alii mai ia te oe?

2. Fai le mea lenei i totonu o lau api faamaumau suesuega:

Tusi se vaaiga faataitai e ono faigata ai i se tasi ona alofa i le Atua ma mulimuli i Ana poloaiga ma faaali atu foi le alofa i isi. (Manatua: Aua le faia se vaaiga faataitai e mafai ona iloa e isi e faatatau i se tagata patino po o se tupulaga.)

Iloilo manatu ma fesili ma se vaaiga e faavavau

Mafaufau i le tagata i lau vaaiga faataitai ao e taliina fesili nei.

• O a ni manatu e ono faatosinaina ai se tagata e filifili e faafiafia isi nai lo le faafiafiaina o le Atua?

• E mafai faapefea e le malamalama i le ata o le faaolataga a le Tama Faalelagi po o isi aoaoga o le talalelei ona fesoasoani e foia nei manatu sese?

• O a upumoni e uiga i le Tama Faalelagi ma Iesu Keriso e mafai ona fesoasoani i le tagata e vaai atu ai i isi mai la Laua silafaga?

Saili le malamalama atili e ala i punaoa paia ua filifilia

• E mafai faapefea e upumoni o loo i le Mataio 22:36–39 ona fesoasoani e taiala lenei tagata?

Faitau saunoaga nei mai perofeta o aso e gata ai e iloa ai po o a ni malamalamaaga e ono fesoasoani mo le tagata i lau vaaiga faataitai.Na aoao mai e Peresitene Russell M. Nelson:

O nisi taimi, i le avea ai o i tatou o ni taitai e faitioina ona o le taofiofimamau i tulafono a le Atua, puipuia o le aoaoga faavae autu a le Faaola, ma le tetee atu i uunaiga faaleagafesootai o o tatou taimi. …

… Ae pe le sili atu ea ona tatou faaleano i le le tauina atu o le upumoni—le aoao atu o mea ua faaalia mai e le Atua?

(Russell M. Nelson, “The Love and Laws of God” [faigalotu a le Iunivesite o Polika Iaga, Sept. 17, 2019], 3, speeches.byu.edu.)

Na aoao mai Peresitene Dallin H. Oaks o le Au Peresitene Sili:

E tatau ona tatou taumafai ia tausia poloaiga sili uma e lua. O le faia o lena mea, tatou te savavali faapaleni ai i le va o le tulafono ma le alofa—tausia o poloaiga ma savavali i le ala o feagaiga, a o alolofa atu i o tatou tuaoi i lenei soifuaga. O lenei savaliga, e manaomia ai lo tatou sailia o musumusuga faalelagi i mea e lagolago ai ma mea e tetee atu ai ma le auala e alofa atu ai ma faalogo ma le faaaloalo ma aoao atu ai i le faagasologa.

(Dallin H. Oaks, “O Poloaiga Sili E Lua,” Ensign po o le Liahona, Nov. 2019, 75)

• E mafai faapefea e le iloaina o upumoni o loo aoao mai i nei faamatalaga ona fesoasoani i le tagata i lau vaaiga faataitai?

Faatino le faatuatua

• O le a se mea e mafai ona fai e le tagata i lau vaaiga faataitai e maua ai le fesoasoani a le Tama Faalelagi ina ia iloa ai le auala e faatino ai?

• E mafai faapefea ona latou galulue i se auala o le a tausia uma ai poloaiga sili e lua?

3. I le faaaogaina o le vaaiga faataitai na e fatuina, tusi se tali e tali ai le auala e mafai ai e le tagata ona faaalia le alofa mo le Atua ma o latou tuaoi.

Iloiloga o le atamai i aoaoga faavae