Mataio 23

Ua Tausalaina e le Faaola le Pepelo

I le vaiaso mulimuli o le galuega a le Faaola i le lalolagi, sa Ia tausalaina ai le pepelo o le au tusiupu ma le au Faresaio. O lenei lesona e mafai ona fesoasoani ia te oe e aloese ai mai le pepelo ma avea ma se soo lotomaulalo o Iesu Keriso.

O le a le pepelo?

Mafaufau faapea o loo i ai ni ipu se tolu e mafai ona e filifili e te inu mai ai. O le ipu muamua e palapala fafo, o le ipu lona lua e palapala totonu, ma le ipu lona tolu e mama atoa.

• O a auala e mafai ona faatusa i ai ipu palapala i tagata pepelo?

O le upu pepelo e faaliliu mai se upu Eleni o lona uiga o se “tagata faatino” ma e faasino i se tasi e faafoliga, e faatuputeleina se mea, pe fesuisuiai ana aga taufaasese. E “matele ina faauigaina i se tagata e faafoliga e lotu ae leai” (Bible Dictionary, “Hypocrite”). E mafai foi ona faasino i se tagata e faafoliga mai e le lotu ae o la e toaga moni i le lotu.

A o e suesue i le Mataio 23, vaavaai mo upumoni o le a fesoasoani ia te oe e aloese ai mai le pepelo ma avea atili ia faapei o Iesu Keriso.

I se vaega o le savali faaiu faalauaitele a le Faaola i le vaiaso mulimuli o Lana auaunaga i le lalolagi, sa Ia tausalaina ai le pepelo o le au tusiupu ma le au Faresaio. Sa Ia faailoa mai e faapea o le au tusiupu ma le au Faresaio “[sa nonofo] i le nofoa o Mose” (Mataio 23:2), o lona uiga sa latou seei i se tofiga o iai le pule e aoao atu ai aoaoga faavae ma faaliliu ma faatautaia le tulafono. Na latou manatu e sili atu lo latou agavaa nai lo se isi lava i le sunako.

Faitau le Mataio 23:3–7, vaavaai mo mea na fetalai ai le Faaola e uiga i auala na talapepelo ai le au tusiupu ma le au Faresaio. Ae e te lei faitau, atonu e fesoasoani le iloa o “filateri” (fuaiupu e 5) o ni atigipusa pau laiti na nonoa e tagata Iutaia i le muaulu ma le lima agavale. I totonu o filateri e i ai ni lola laiti o taaiga e i ai ni fuaiupu o mau faapitoa mai le Feagaiga Tuai. Sa ofuina e tagata Iutaia filateri e fesoasoani ia i latou ia manatua e mulimuli i poloaiga a le Atua.

A uma ona faitau, atonu e te manao foi e matamata i le vitio “Phylacteries” (1:06), o loo maua i le ChurchofJesusChrist.org.

Phylacteries

One of sixteen short video segments help us understand New Testament customs.

• E tusa ai ma le fuaiupu 5, aisea na faalautele ai e le au tusiupu ma le au Faresaio a latou filateri ma “tuupao o a latou ofu”?

Sa lei tausalaina e le Alii i latou sa fai o latou filateri, ae na Ia tausalaina i latou o e sa faaaogaina ma le talapepelo pe faalauteteleina ina ia mataulia ai i latou e isi pe foliga ai foi e sili lo latou taua.

1. Tali fesili nei i totonu o lau api faamaumau suesuega:

• O a nisi o tulaga matautia o le tapuai i le Atua i amioga e vaaia mai fafo ona o lou manao ia iloa oe e isi?

• Aisea e te manatu ai e finagalo le Atua e te tapuai atu ia te Ia i le faamaoni ma le faamoemoega amiotonu?

E faaopoopo atu i le lapataia o tagata e aua nei mulimuli i amioga a le au tusiupu ma le au Faresaio, sa fetalai tuusao atu foi le Faaola i le au tusiupu ma le au Faresaio. Na Ia taua le tele o mala e oo mai ia i latou ona o lo latou pepelo (tagai i le Mataio 23:13–33). Oi talofa o lona uiga o se tulaga o le pagatia, puapuaga, ma le faanoanoa.

Faitau le Mataio 23:23-28, ma vaavaai mo mea na fetalai atu ai le Faaola i le au tusiupu ma Faresaio.

2. Tali fesili nei i totonu o lau api faamaumau suesuega:

• E faapefea ona faaopoopo e nei fuaiupu lou malamalama i le pepelo?

• O le a sau tala e fai atu i se tasi e popole i le avea ma se tagata pepelo pe a latou faia ni mea sese a o taumafai e ola i le talalelei?

E faapefea ona mafai ona tatou aloese ma faatoilaloina le pepelo

I le faatusatusa atu i le au tusiupu ma le au Faresaio, e le i amio pepelo lava le Faaola. Sa Ia aoao atu tagata ia aua nei manatu e sili atu i latou nai lo isi, aua o i latou uma o fanau a le Atua, e tutusa i Lana silafaga. Sa Ia molimau mai o le Tama Faalelagi o lo tatou Foafoa ma o Ia, o Keriso, na auina mai e le Tama ma o lo tatou Matai moni lea na te aumaia le ola (tagai i Faaliliuga a Iosefa Samita, Mataio 23:6 [i le Mataio 23:9, vaefaamatalaga a]; Mataio 23:8–10).

Faitau le Mataio 23:11–12, ma vaavaai mo aoaoga e mafai ona fesoasoani ia i tatou e faatoilalo ma aloese ai mai le pepelo. I le fuaiupu 12, o le upu faaeaina o lona uiga o le siitia, ma o le faamaualalo o lona uiga o le faamaualaloina, faalumaina pe faaitiitia le faaaloalogia.

• O le a sou manatu i le mataupu faavae o loo aoao mai e le Faaola ia i tatou i nei fuaiupu?

Na aoao mai le Faaola e faapea afai tatou te lotomaualalo ma auauna atu i isi, o le a siitia ae i tatou e le Alii. O le a Ia fesoasoani ia i tatou ia avea atili e faapei o Ia, ma e ala i le usiusitai i Ana poloaiga ma le salamo faamaoni o le a tuuina mai ai e le Atua ia i tatou le faaeaga i le malo selesitila.

3. Tali fesili nei i totonu o lau api faamaumau suesuega:

• E faapefea ona avea Iesu Keriso ma faataitaiga o le lotomaualalo, auauna atu i isi, ma aloese mai le pepelo?

• E mafai faapefea e le lotomaualalo ma auauna atu i isi ona fesoasoani ia te oe e aloese mai le pepelo ma avea atili ai e faapei o le Faaola?

Faitau ma manatunatu i faamatalaga nei. Faailoa le faamatalaga se tasi pe lua e masani ona e iloa.

• Ou te faafoliga i se tasi tagata e le o au.

• Ou te faia mea lelei ina ia matauina ai au e isi.

• E masani ona ou manatu ou te sili atu nai lo isi.

• E ui ina ou faia ni mea sese, ae ou te taumafai faamaoni e ola i le talalelei.

• Ou te taumafai e auauna atu i isi ma faia mea lelei ae le sailia ni viiga.

• Ou te taumafai e lotomaualalo ma aua le vaai ia te au lava e sili atu nai lo isi.

Saili le taitaiga a le Agaga Paia a o e faailoaina soo se vaega e mafai ona e faaleleia atili. Manatua e alolofa le Tama Faalelagi ma Iesu Keriso ia te oe ma silafia soo se taumafaiga faamaoni e ola ai i le talalelei. A e ole atu i le Tama Faalelagi mo se fesoasoani, o le a Ia fesoasoani ia te oe e faatoilalo soo se vaivaiga po o le pepelo.

Faitalia pe Fai: O e Manao e Suesue Atili?

Na faapefea ona silasila le Faaola i le au tusiupu ma le au Faresaio pepelo?

I lana lauga “O Le Leo o le Lapataiga,” Elder D. Todd Christofferson o le Korama a Aposetolo e Toasefululua e uiga i le ala na tausalaina ai e Iesu le pepelo o le au tusiupu ma le au Faresaio (Ensign po o le Liahona, Me 2017, 108–11).

O Le Leo o le Lapataiga

Ua talosaga mai Elder Christofferson ina ia tatou lapatai atu i isi e ala i le faasoaina atu o tulaga faatonuina o le talalelei ina ia mafai ona latou aoao foi i faamanuiaga o le fuafuaga sili o le fiafia.

Pe o au ea o se tagata pepelo pe a ou faia ni mea sese a o ou taumafai e ola i le talalelei?

Na aoao mai Elder Jeffrey R. Holland o le Korama a Aposetolo e Toasefululua:

Uso e ma tuafafine, o i tatou uma lava o loo saili atu i se olaga sili FaaKeriso nai lo le faamanuiaina masani i le olaga. Afai tatou te tautino atu lena faamaoni ma taumafai ia faaleleia, e le o i tatou la o ni tagata pepelo; o tatou o tagata soifua.

(Jeffrey R. Holland, “Ia Atoatoa Ona Lelei o La Outou Amio—I Le Iuga,” Ensign po o le Liahona, Nov. 2017, 42)