Toe Vakaiʻi Hono 15 ʻo e Fakataukei Fakatokāteliné

Fakaʻaongaʻi ‘o e Ngaahi Potufolofola Fakataukei Fakatokāteliné

ʻOku fakatahataha mai ha toʻu tupu kehekehe. ʻOku hangē ʻoku nau ʻi he lotú ʻi ha kalasi Lautohi Faka-Sāpaté. ʻOku ʻi ai ʻenau folofolá pea ʻoku nau malimali. Ko e meʻa ʻeni ʻi Haʻamoa.

Ko e taha ʻo e ngaahi taumuʻa ʻo e fakataukei fakatokāteliné ke tokoniʻi koe ke ke ako e founga ke fakaʻaongaʻi totonu ai e ngaahi potufolofola fakataukei fakatokāteliné ʻi hoʻo akoʻi e ongoongolelei ʻo Sīsū Kalaisí ki he niʻihi kehé. ʻE ʻoatu ʻe he lēsoni ko ʻení ha ngaahi faingamālie ke ke akoako fakaʻaongaʻi ai ha niʻihi ʻo e ngaahi potufolofola fakataukei fakatokāteliné ki ha ngaahi tuʻunga fakafaiako kehekehe.  

ʻOku ʻi he ngaahi folofola ʻoku fakaʻaongaʻi ʻe he Siasí ha ngaahi talanoa lahi ʻo ha kakai ʻoku nau fakaʻaongaʻi e folofolá ke akoʻi ki he niʻihi kehé. ʻOku kau ʻi he ngaahi sīpinga ʻe niʻihi ʻa hono akoʻi ʻe Sīsū Kalaisi ha toko ua ʻo ʻEne kau ākongá ʻi he hala ki ʻEmeasí (Luke 24:27), ko hono fakalotolahiʻi ʻe Nīfai hono ngaahi tokouá ke nau ʻomi ʻa e ʻū lauʻi peleti palasá (vakai, 1 Nīfai 4:2), pea mo hono fakahinohinoʻi ʻe Molonai ʻa e talavou ko Siosefa Sāmitá (Siosefa Sāmita—Hisitōlia 1:36–41).

Ko e fē ha taimi kuó ke fakaʻaongaʻi ai, pe ko ha taha ʻokú ke ʻilo, ʻa e ngaahi folofolá ke akoʻi e niʻihi kehé?
ʻOkú ke pehē ko e hā ʻoku mahuʻinga ai ke fakaʻaongaʻi ʻa e folofolá makehe mei heʻetau ngaahi fakamatalá ʻi heʻetau akoʻi e niʻihi kehé?

Toe vakaiʻi e lisi ko ʻeni ʻo e ngaahi fakamoʻoni fakafolofola ʻo e fakataukei fakatokāteliné mo e ngaahi kupuʻi lea mahuʻinga he folofolá. Fakalaulauloto ki ha ngaahi tūkunga kehekehe te ke ala fehangahangai mo ia ʻa ia te ke lava ʻo fakaʻaongaʻi ai ʻa e ngaahi potufolofola ko ʻení ke akoʻi ha taha.

Fakataukei Fakatokāteline ʻo e Fuakava Foʻoú: 1 Kolinitō–Fakahā

1 Kolinitō 6:19–20	“Ko homou sinó ko e fale tapu ʻo e Laumālie Māʻoniʻoní.”
1 Kolinitō 11:11	“ʻOku ʻikai ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí.”
1 Kolinitō 15:20–22	“ʻOku hangē ʻoku mate kotoa pē ʻia ʻĀtamá, ʻe pehē foki ʻe moʻui kotoa pē ʻia Kalaisi.”
1 Kolinitō 15:40–42	ʻI he Toetuʻú, ʻoku ʻi ai ʻa e ngaahi nāunau ʻe tolu.
ʻEfesō 1:10	“ʻI he kakato ʻo e ngaahi kuongá naʻá ne tuʻutuʻuni, ke ne fakakātoa fakataha ʻa e meʻa kotoa pē ʻia Kalaisi.”
ʻEfesō 2:19–20	ʻOku fokotuʻu ʻa e Siasí “ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.”
2 Tesalonika 2:1–3	“ʻA e ʻaho ʻo Kalaisí … ʻe ʻikai hoko ʻa e ʻaho ko iá, ʻo kapau ʻe ʻikai tomuʻa hoko ʻa e liliu koví.”
2 Tīmote 3:15–17	“Ko e ngaahi tohi māʻoniʻoní … ʻoku faʻa fakapoto koe ki he fakamoʻuí.”
Hepelū 12:9	Ko e Tamai Hēvaní ʻa e “Tamai ʻo e ngaahi laumālié.”
Sēmisi 1:5–6	“Ka ai hamou taha ʻoku masiva ʻi he potó, ke kole ʻe ia ki he ʻOtuá.”
Sēmisi 2:17–18	“Tuí, kapau ʻoku ʻikai ʻi ai ʻa e ngaahi ngāué, ʻoku mate ia.”
1 Pita 4:6	“Naʻe malanga ʻaki ai ʻa e ongoongoleleí kiate kinautolu foki kuo maté.”
Fakahā 20:12	“Pea naʻe fakamāuʻi ʻa e pekiá … ʻo fakatatau ki heʻenau ngaahi ngāué.”