Ngaahi Fakamanatu ʻo e Fakataukei Fakatokāteliné Hono3

Mahino pea Fakamatalaʻi

ʻOku mahuʻinga ke maʻu e mahino ki he ngaahi potufolofola pau mo e malava ke fakamatalaʻi ʻa e ngaahi moʻoni ʻoku nau akoʻí ki hono maʻu ʻo e fakataukei fakatokāteliné. ʻOku fakataumuʻa ʻa e lēsoni ko ʻení ke tokoni ke mahino lelei ange kiate koe mo ke akoako hono fakamatalaʻi ʻo e tokāteline ʻoku akoʻi ʻi he ngaahi potufolofola fakataukei fakatokāteline ko ʻení: Mātiu 5:14–16; Luke 2:10–12; Sione 3:5; Sione 3:16.

Ko e hā e founga ʻokú ke ako lelei taha aí?

ʻOku lahi ha ngaahi founga ke ako ai, pea ʻoku tau ako mo tauhi e fakamatalá ʻi ha ngaahi founga ekhekehe.

1. Lau ʻa e ngaahi founga ako ko ʻení, pea fokotuʻutuʻu kinautolu mei he 1 ki he 4, ʻo ngāue ʻaki ʻa e 1 ki he meʻa ʻoku lahi taha hoʻo fakaʻaongaʻí, pea 4 ki he meʻa ʻoku siʻisiʻi taha hoʻo fakaʻaongaʻí. ʻE lava ke tokoni atu ʻeni ke ke fakapapauʻi ʻa e ʻekitivitī te ke fai ʻamui ange ʻi he lēsoní.

• Fakakaukauloto: ʻOku ou ako ʻaki ʻeku mamata mo fakakaukaulotó. ʻOku tokoni ʻa e tā fakatātaá, valivalí, sātí, kalafi mo e mītiá ke u ako mo puke maʻu ʻa e fakamatalá.

• ʻOku tokoni ʻa e vahevahe mo e niʻihi kehé: ʻOku tokoni ʻa e tohi mo e talanoa mo e niʻihi kehé ke u ngāue mo ako lahiange.

• Ako tauʻatāina: ʻOku ou saiʻia ange ke ako ʻiate au pē, pea ʻoku ou ongoʻi loto-falala ʻi heʻeku fakakaukauʻi tauʻatāina e ngaahi meʻá.

• Ako ʻi hono Fakahokó: ʻOku ou ako lelei taha ʻi heʻeku fakaʻaongaʻi ha ngaahi ongo kehekehe, hangē ko e ala, nanamu, fanongo, mo ueʻi hoku sinó.

Fakakaukau ki he founga naʻe fakafeʻungaʻi ai ʻe he Fakamoʻuí ʻEne akonakí ke feau e ngaahi fiemaʻu ʻa kinautolu naʻá Ne akoʻí.

• ʻOkú ke pehē ko e hā naʻe fakaʻaongaʻi ai ʻe he Fakamoʻuí ha ngaahi founga kehekehe ke akoʻi ʻaki e niʻihi kehé? Ko e hā ‘oku akoʻi atu ʻe he meʻá ni ‘o kau kia Sīsuú?

Ko hono fakaʻaongaʻi hoʻo founga akó ki he fakataukei fakatokāteliné

Fakaʻaongaʻi ha kiʻi taimi ke lau ai ʻa e ngaahi fakamoʻoni fakafolofola fakataukei fakatokāteline ko ʻeni ʻo e Fuakava Foʻoú. Vakai angé pe te ke lava ʻo manatuʻi e kupuʻi lea mahuʻinga ʻoku fekauʻaki mo iá.

• Mātiu 5:14–16

• Luke 2:10–12

• Sione 3:5

• Sione 3:16

• Ko e fē ʻi he ngaahi potufolofola ko ʻení ʻokú ke ongoʻi ʻoku mahino lelei kiate koé? Ko e fē te ke loto ke mahino lelei ange kiate koé?

Fakakakato ʻa e ʻekitivitī A, E, F, pe H ʻo fakaʻaongaʻi ha taha ʻo e ngaahi potufolofola fakataukei fakatokāteline kimuʻá (pe ko ha potufolofola fakataukei fakatokāteline kehe mei he Fuakava Foʻoú) te ke fiemaʻu ke mahino lelei ange kiate koe. Kapau ʻoku ʻi ai ha taimi feʻunga, fakakakato ha ngaahi ʻekitivitī lahi ʻaki ha ngaahi potufolofola fakataukei fakatokāteline kehekehe.

A: Fakakaukaulotó

Faʻu ha fakatātā, fakatahatahaʻi ha ngaahi fakatātā meme, word art, word cloud, pe ngaahi fakatātā kehe ʻokú ne fakahaaʻi e meʻa ʻoku akoʻi ʻe hoʻo potufolofolá. Lomiʻi ʻi he ngaahi fehokotakiʻanga ko ʻení ki ha ngaahi sīpinga:

Word artMemes

E: Ko e vahevahe mo e niʻihi kehé

Faʻu ha palani ke akoʻi hoʻo potufolofolá. Fakakaukau ki ha ngaahi fehuʻi te ke fai ke tokoni ke mahino kiate kinautolu ʻokú ke akoʻí ʻa e potufolofolá, faʻu ha foʻi vitiō ʻo fakamatalaʻi e ʻuhinga ʻo e ngaahi foʻi lea mo e kupuʻi lea mahuʻingá, pe fakaʻaongaʻi e hivá ke akoʻi ʻaki e niʻihi kehé.

F: Ako tauʻatāina

Fili ha ngaahi foʻi lea mahuʻinga mei he potufolofolá ke ako. Lekooti e ngaahi fakaʻuhinga, ngaahi potufolofola fakafekauʻaki, pe ngaahi fakamatala meí he kau taki ʻo e Siasí ʻokú ne fakaloloto hoʻo mahinó.

H: Ako ‘i hono fakahokó

Faʻu pe ʻai ke ʻiloʻi ha ngaahi meʻa pe ngaahi sīpinga te nau lava ʻo fakafofongaʻi ʻa e potufolofolá pe ngaahi foʻi lea pe kupuʻi lea pau meí he potufolofolá. Hangē ko ʻení, ki he Mātiu 5:14–16, te ke lava ʻo fakaʻaongaʻi ha ngaahi maʻuʻanga maama kehekehe ke fakatātaaʻi ʻaki e fakaafe ʻa Kalaisí ke “tuku ke ulo atu hoʻomou māmá.”

2. Fakamatalaʻi fakanounou ʻa e ʻekitivitī naʻá ke filí ʻi hoʻo tohinoa akó:

3. Ke fakafuofuaʻi hoʻo aʻusia fakaakó, fakaʻaongaʻi e ngaahi founga ko ʻení ke tali ʻaki e ngaahi fehuʻí:

(A) Loto ki ai (E) ʻIkai fuʻu loto ki ai (F) ʻIkai loto pe taʻeloto ki ai (H) Taʻeloto ki ai

1. ʻOku mahino lelei ange kiate au ʻa e (ngaahi) potufolofola naʻá ku filí.

2. ʻOku ou maʻu he taimí ni ha loto falala lahi ange ki heʻeku malava ke fakamatalaʻi e (ngaahi) potufolofola ne u filí ki ha taha kehe ʻo kapau ʻe fiemaʻu ke u fai ia.

3. ʻOku ou tui ʻe ʻaonga kiate au hono fakaʻaongaʻi ha founga tatau ki hono ako mo fakamanatu e ngaahi potufolofola fakataukei fakatokāteline kehé.