Գաղատացիս 5

«Հոգով ընթացեք»

Դուք երբևէ զգացել եք, որ մաքառում եք գայթակղությանը ենթարկվելու ցանկության և Սուրբ Հոգու՝ արդարակյաց ապրելու հուշումներին հետևելու ցանկության միջև: Պողոս Առաքյալը նկարագրել է այն մենամարտը, որը կարող է տեղի ունենալ մեր մահկանացու, ոչ կատարյալ մարմնի ցանկությունների և Աստծո Հոգու միջև: Այս դասի նպատակն է օգնել ձեզ ավելի նմանվել Հիսուս Քրիստոսին և ձեզ հնարավորություն տալ բացահայտել, թե դուք ինչպես կարող եք ավելի լավ «հոգով ընթանալ» (Գաղատացիս 5.16):

Պարանով քաշքշուկի մրցույթ

• Ձեր կյանքն ինչո՞վ է նման պարանով քաշքշուկի մրցույթ-խաղին:

Գաղատացիներին ուղղված իր նամակում Պողոս Առաքյալը նկարագրել է երկու մրցակցող ուժերի, որոնք կարող են մեզ տարբեր կողմեր ձգել: Կարդացեք Գաղատացիս 5.16-17-ը՝ փնտրելով Պողոսի խորհուրդը այդ ուժերի վերաբերյալ:

• Ի՞նչ մրցակցող ուժեր եք բացահայտել այս հատվածներում:

«Մարմնի ցանկութիւնը [-ները]» (հատված 16) գայթակղություններն են, որոնց մենք հանդիպում ենք կյանքում:

• Որո՞նք են ֆիզիկական գայթակղությունները (մարմնի ցանկությունները), որոնց երիտասարդները հանդիպում են իրենց կյանքում:

Համեմատեք ձեր պատասխանը Պողոսի՝ Գաղատացիս 5.19-21-ում ներկայացված պատասխանների հետ:

Մի պահ մտածեք, թե Սուրբ Հոգու և մարմնի ցանկությունների միջև այս պայքարն ինչպես է դրսևորվում ձեր կյանքում: Ինչպե՞ս կարող եք պայքարել մարմնի ցանկությունների դեմ: Ինչպես եք օրհնվում Սուրբ Հոգուն հետևելու դեպքում: Ուսումնասիրության ժամանակ ուշադրություն դարձրեք հոգևոր հուշումներին, որոնք կարող են ձեզ օգնել իմանալ, թե ինչ շտկումներ կարող եք կատարել գայթակղությունները հաղթահարելու համար:

Խուսափեք մարմնի գործերից

Կարդացեք Գաղատացիս 5.21-ը՝ փնտրելով, թե ինչու է կարևոր խուսափել մարմնի ցանկություններից:

• Ի՞նչ եք սովորել այն մասին, թե ինչու է պետք խուսափել մարմնի ցանկություններից:

• Ի՞նչը կարող է մեզ խանգարել դա անել, նույնիսկ, եթե մենք գիտենք, որ սխալ ենք գործում:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Որպես Աստծո որդիներ և դուստրեր՝ մենք Նրանից ժառանգել ենք աստվածային հատկություններ: Բայց մենք ներկայումս ապրում ենք անկում ապրած աշխարհում: Այն նյութերը, որոնցից ստեղծվել են մեր մարմինները, բնույթով անկում են ապրել և միշտ ենթակա են մեղքի, քայքայման և մահվան ազդեցության: Հետևաբար, Ադամի անկումը և դրա հոգևոր և նյութական հետևանքները անմիջականորեն ազդում են մեզ վրա՝ մեր ֆիզիկական մարմինների միջոցով: …

Քանի որ ֆիզիկական մարմինը այդքան էական է Հոր երջանկության ծրագրում և մեր հոգևոր զարգացման համար, Լյուցիֆերը ձգտում է խանգարել մեր առաջընթացին և գայթակղում մեզ անպատշաճ ձևով օգտագործել մեր մարմինները: Հավերժության գլխավոր հեգնանքներից մեկն այն է, որ հակառակորդը, որը թշվառ է հենց այն պատճառով, որ չունի ֆիզիկական մարմին, հրավիրում և հրապուրում է մեզ մասնակից լինել իր թշվառությանը` մեր մարմինների անպատշաճ օգտագործման միջոցով: Հենց այն գործիքը, որը նա չունի, հանդիսանում է հրապուրելու նրա փորձերի հիմնական թիրախը՝ մեզ ֆիզիկական և հոգևոր կործանման տանելու համար:

(Դեյվիդ Ա․ Բեդնար, «Մենք հավատում ենք մաքրաբարո լինելուն», Լիահոնա, մայիս 2013, 42)

• Ո՞ր բառերն ու արտահայտությունները կարևորեցիք այդ հատվածներում: Ինչո՞ւ։

Ընտրեք ընթանալ Հոգով

Վերընթերցեք Գաղատացիս 5.16 հատվածը՝ փնտրելով Պողոսի ուսմունքները այն մասին, թե մենք ինչ կարող ենք անել՝ մարմնի գայթակղությունները հաղթահարելու համար:

Գաղատացիս 5.16 հատվածից մենք կարող ենք սովորել հետևյալ սկզբունքը. Եթե մենք ընթանանք Հոգով, մենք կկարողանանք հաղթահարել մարմնի գայթաղկությունները: 

• Ձեր կարծիքով, ի՞նչ է նշանակում՝ «Հոգով ընթացեք»:

• Ձեր կարծիքով, Հոգով ընթանալն ինչպե՞ս կարող է օգնել ձեզ հաղթահարել մարմնի գայթակղությունները:

Կարդացեք Մոսիա 3.19-ը և Վարդապետություն և Ուխտեր 11.12-ը՝ փնտրելով այն ուսմունքները, որոնք կարող են օգնել ձեզ ավելի լավ հասկանալ Հոգով ընթանալու կարևորությունը:

1. Սուրբ գրությունների ուսումնասիրության ձեր օրագրում պատասխանեք հետևյալ հարցերից առնվազն երկուսին.

• Ի՞նչ գաղափարներ կամ տպավորություններ ունեցաք, երբ ուսումնասիրում էիք այդ հատվածները:

• Ի՞նչ եք սովորել այն մասին, թե Հիսուս Քրիստոսն ինչպես կարող է օգնել ձեզ հաղթահարել մարմնի գայթակղությունները:

• Ի՞նչ հատուկ բաներ կարող եք անել՝ համոզվելու համար, որ Սուրբ Հոգին ձեզ հետ է:

• Ի՞նչ փորձառություններ եք ունեցել, երբ Սուրբ Հոգուն հետևելն օգնել է ձեզ հաղթահարել գայթակղությունը: (Համոզվեք, որ չեք կիսվել խիստ անձնական տեղեկություններով):

Հոգու պտուղները

Պողոսը բացահայտել է շատ օրհնություններ, որոնք կարող են լինել մեր կյանքում, եթե մենք լսենք և հետևենք Սուրբ Հոգուն: Նա այդ օրհնությունները կոչեց «Հոգու պտուղ» (տես Գաղատացիս 5.22):

Կարդացեք Գաղատացիս 5.22-23-ը՝ փնտրելով Պողոսի կողմից բացահայտված Հոգու պտուղը:

2. Սուրբ գրությունների ուսումնասիրության ձեր օրագրում պատասխանեք այս հարցերից մեկին կամ երկուսին.

• Հոգուց ստացված այս օրհնություններից կամ զգացողություններից որո՞նք եք ունեցել ձեր կյանքում:

• Ի՞նչ են ձեզ օգնում հասկանալ այս օրհնությունները Երկնային Հոր և Հիսուս Քրիստոսի մասին։ (Անհրաժեշտության դեպքում տես Սաղմոս 25.8-10, Մոսիա 2.41:)

Կիրառեք ձեր սովորածը

Հիսուս Քրիստոսը, որը միշտ կատարել է Երկնային Հոր կամքը (տես 3 Նեփի 27.13), կատարյալ օրինակն է այն բանի, թե ինչպես պետք է ապրել՝ մեղքի գայթակղությունը հաղթահարելու համար: Չնայած Նա կրեց մարմնի տարբեր գայթակղություններ (տես Եբրայեցիս 4.15, Ալմա 7.11), Նա «ուշք չդարձրեց դրանց» (Վարդապետություն և Ուխտեր 20.22):

Կարող եք մի պահ մտածել, թե դուք ինչպես եք ձգտելու հետևել Հիսուս Քրիստոսի օրինակին և կիրառել այսօր սովորած ճշմարտությունները: Հիշեք ստացած հուշումները և ծրագրեք, թե ինչ եք անելու՝ Հոգով ավելի լավ ընթանալու և գայթակղությունը հաղթահարելու համար: Ձեր մտքերը գրանցեք ձեր օրագրում:

Ընտրովի. ցանկանո՞ւմ եք ավելին իմանալ

Սուրբ Հոգուն հետևելը ինչպե՞ս կարող է օգնել ինձ դիմակայել և հաղթահարել գայթակղությունը

Տասներկու Առաքյալների Քվորումի Նախագահ Բոյդ Ք. Փաքերն (1924–2015) ուսուցանել է.

Հասկանալի է, որ ձեր կյանքը չի լինի առանց սխալների, սակայն, եթե մեծ սխալի առաջ կանգնեք, Սուրբ Հոգին կնախազգուշացնի ձեզ դրա մասին: Այս խոստումը վերաբերում է Եկեղեցու բոլոր անդամներին: …

Եթե դուք հայտնվում եք այնպիսի իրավիճակներում, որտեղ չպիտի հայտնվեիք, կամ եթե շփվում եք մարդկանց հետ, որոնք ձեզ տանում են սխալ ուղղությամբ, ապա ժամանակն է պաշտպանել ձեր անկախությունը, ձեր ազատ կամքը: Լսեք Հոգու ձայնին, և դուք չեք մոլորվի:

Ես կրկնում եմ, որ այսօր երիտասարդությունը մեծանում է անկում ապրող բարոյական չափանիշով թշնամու տարածքում: Բայց որպես Տիրոջ ծառա, ես խոստանում եմ, որ դուք կպաշտպանվեք և կպատսպարվեք հակառակորդի հարձակումներից, եթե կամենաք ուշադրություն դարձնել հուշումներին, որոնք գալիս են Սուրբ Հոգուց:

(Բոյդ Ք․ Փաքեր, «Խորհուրդ երիտասարդներին», Լիահոնա, նոյեմբեր 2011, 18)

Մարմնի ցանկությունները կատարելու և Հոգով ընթանալու արդյուքները տեսնելու համար դիտեք «ՎՕՍ կախվածության վերականգնման ծրագիր. ծանոթացեք Սիդրեսի հետ» տեսանյութը (3:06) ChurchofJesusChrist.org կայքում:

LDS Addiction Recovery Program: Meet Sidreis

Sidreis is recovering from a sexual addiction. The atonement helped heal the deep personal wounds she felt.