Hepelū 12

“Ko Ia ʻOku ʻOfa Ki Ai ʻa e ʻEikí ʻOkú Ne Tautea”

Ko e fē taimi fakamuimuitaha ne tauteaʻi pe fakatonutonuʻi ai koe ʻe ha taha? Naʻe anga fēfē hoʻo tali iá? Kuó ke houngaʻia nai ʻi ha fakatonutonu kuó ke maʻu? Naʻe tohi ʻa Paula ki he Kāingalotu Hepeluú ʻo fakamatalaʻi ange kiate kinautolu ʻoku faʻa fakahaaʻi ʻe heʻetau Tamai Hēvaní ʻEne ʻofá ʻaki hono fakatonutonu kitautolú. ʻE lava ke tokoniʻi koe ʻe he lēsoni ko ʻení ke ke ako ʻa e founga ʻe lava ke tokoniʻi ai koe ʻi hoʻo fakavaivai ki he fakatonutonu mei he Tamai Hēvaní ke ke maʻu ʻa e nongá pea hoko ʻo hangē ko Iá.

Ko e lova ʻo e moʻuí

Hiki ʻi hoʻo tohinoa akó ha lisi ʻo e ngaahi founga ʻoku hangē ai hoʻo moʻui fakamatelié ko ha lova mamaʻó. Hangē ko ʻení, te ke lava ʻo fakaʻaongaʻi ʻeni:

• Ko e hā ʻokú ne ʻai koe ke ke helaʻia pe ongosia?

• Ko e hā ha ngaahi founga ʻokú ke fakahoko lelei ʻi he lová mo e ngaahi founga ʻe lava ke ke toe lelei ange aí?

• Ko e hā ʻa e feituʻu ʻokú ke fakataumuʻa ki aí? Ko e hā ʻoku fakamānako ai iá?

• Ko e hā ʻokú ke fiemaʻu tokoni ai ke fakaʻosi e lova ʻo e moʻuí?

“Lele ʻi he faʻa kātaki”

Naʻe fakatatau ʻe he ʻAposetolo ko Paulá ʻa e moʻuí ki ha lova. Lau ʻa e Hepelū 12:1–2, ʻo kumi e meʻa naʻe akoʻi ʻe Paula fekauʻaki mo e founga te tau lava ai ʻo lele lelei ʻi he lova ʻo e moʻuí. Fakatokangaʻi ange ʻoku ʻuhinga ʻa e “ʻao ʻo e kau fakamoʻoni” ʻoku lave ki ai ʻi he veesi 1 ki he ngaahi sīpinga ʻo e tui ʻoku lekooti ʻi he Hepelū 11.

• Ko e hā ʻoku makehe kiate koe ʻi he ngaahi veesi ko ʻení?

• ʻE tokoniʻi fēfē kitautolu ʻe he muimui ki he faleʻi ʻa Paulá ke tau lavaʻi lelei ʻa e lova ʻo e moʻuí?

Naʻe pehē ʻe Paula ʻi he veesi 2 naʻe kātekina ʻe he Fakamoʻuí ʻa e faingataʻa ʻo e tutukí ʻaki ʻEne tokanga taha ki he “fiefia naʻe tuku ʻi Hono ʻaó” (Hepelū 12:2). Naʻe fakamatalaʻi ʻe Palesiteni Lāsolo M. Nalesoni ʻo pehē:

Fiefiá mo e Moʻui Fakalaumālié

ʻOku akoʻi ʻe Palesiteni Nelson te tau malava ʻo maʻu e fiefiá ʻi ha faʻahinga tūkunga pē kapau te tau fakatefito ʻetau tokangá ʻia Sīsū Kalaisi pea mo e palani ʻo e fakamoʻuí.

Ko e hā leva e fiefia naʻe tuku kiate Iá? Pau naʻe kau ai e fiefia ʻo e fakamaʻá, fakamoʻuí, mo hono fakamālohia kitautolú; fiefia hono huhuʻi e angahala ʻa kinautolu kotoa ʻe fakatomalá; fiefia he malava ke tau foki ki ʻapi—ʻi he maʻa mo e taau—ʻo nofo mo ʻetau mātuʻa mo e fāmili fakalangí.

(Russell M. Nelson, “Fiefiá mo e Moʻui Fakalaumālié,” Liahona, Nōvema 2016, 83)

• Ko e hā ʻoku akoʻi atu ʻe he meʻa ne tukutaha ki ai e tokanga ʻa e Fakamoʻuí lolotonga Hono Tutukí, fekauʻaki mo ʻEne ongo fekauʻaki mo koé?

• ʻE tokoniʻi fēfē koe ʻe hono ʻiloʻi ʻeni fekauʻaki mo Sīsū Kalaisí ke ke aʻusia ʻa e fiefiá neongo e ngaahi taimi faingataʻá?

• Ko e hā ha ngaahi fiefia te ke lava ʻo tokanga taha ki ai lolotonga e ngaahi taimi faingataʻa ʻi hoʻo moʻuí?

Kātekina e tautea mei he ʻEikí

Fakakaukau ki ha taimi naʻe fakatonutonu ai koe ʻe ha taha pea mo e founga naʻá ke tali ʻaki e fakatonutonu ko iá.

• Ko e hā ha ngaahi ʻuhinga kuo fakatonutonuʻi ai koe ʻe he kakaí?

• Ko e hā e ʻuhinga ʻoku faʻa faingataʻa ai ke fakatonutonuʻi koe ʻe he niʻihi kehé?

• Ko e fē ha taimi kuó ke houngaʻia ai ʻi ha niʻihi ʻo e fakatonutonu kuó ke maʻú? Ko e hā hono ʻuhingá?

Lau ʻa e Hepelū 12:5–7, 9–11ʻo kumi e meʻa naʻe akoʻi ʻe Paula fekauʻaki mo e valokí pe fakatonutonú.

Ko e Hepelū 12:9 ko ha potufolofola fakataukei fakatokāteline. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke ako lahi ange fekauʻaki mo e potufolofola fakataukei fakatokāteline ko ʻení ʻi he lēsoni hokó.

• Ko e hā ʻoku akoʻi mai ʻe he ngaahi veesi ko ʻení ʻo kau ki he ngaahi taumuʻa ʻa e Tamai Hēvaní ki hono tauteaʻi ‘a kitautolú?

Toe vakaiʻi ‘a e Hepelū 12:10–11, ʻo kumi ʻa e founga te ke lava ai ʻo fakakakato ʻa e foʻi moʻoni ko ʻení:

• Kapau te tau fakavaivai ki he tautea mei he Tamai Hēvaní …

Ko ha tefitoʻi moʻoni ʻe taha te tau lava ʻo ako mei he ngaahi veesi ko ʻení: Kapau te tau fakavaivai ki he tautea mei he Tamai Hēvaní, te tau hoko ange ai ʻo hangē ko Iá mo maʻu e nonga ʻoku maʻu mei he anga māʻoniʻoní.

Naʻe fakahoko ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi fakakaukau ko ʻeni fekauʻaki mo e valoki ʻoku tau maʻu mei he ʻEikí:

ʻOku tolu ʻa e taumuʻa ʻo e fakatonutonu fakalangí: (1) ke fakalotoʻi kitautolu ke fakatomala, (2) ke fakaleleiʻi mo fakamāʻoniʻoniʻi kitautolu, pea (3) toe fakatonutonu hotau hala ʻi he moʻuí ke fenāpasi mo e meʻa ʻoku ʻafioʻi ʻe he ʻOtuá ko ha hala ʻoku lelei angé. …

… Kapau te tau loto ke tali, ʻe hoko mai e fakatonutonu ʻoku fiemaʻú ʻi ha founga kehekehe mo ha ngaahi maʻuʻanga tokoni kehekehe. ʻE lava ke hoko mai ia ʻi he founga ʻetau lotú ʻi he folofola mai ʻa e ʻOtuá ki hotau ʻatamaí mo e lotó ʻi he Laumālie Māʻoniʻoní [vakai, Tokāteline mo e Ngaahi Fuakava 8:2]. ʻE lava ke fou mai ia ʻi he founga ʻikai ko e tali ʻo e lotú pe kehe ia mei he meʻa naʻa tau ʻamanaki ki aí. ʻE hoko mai ʻa e valokí ʻi heʻetau ako e folofolá ʻo fakamanatuʻi mai e ngaahi tōnounoú, talangataʻá, pe ngaahi meʻa kuo ʻikai ke tau toe faí.

(D. Todd Christofferson, “Ko Kimoutolu ʻOku Ou ʻOfa aí, ʻOku Ou Valokiʻi mo Tauteaʻi,” Liahona, Mē 2011, 98, 100)

• Fakatatau ki he fakamatala ʻa ʻEletā Kulisitofasoní, ko e hā ha ngaahi founga ʻe lava ke tauteaʻi pe fakatonutonuʻi ai kitautolu ʻe he Tamai Hēvaní?

Kapau ʻe lava, mamata ʻi he vitiō “Ko e Finangalo ʻo e ʻOtuá” (3:01) ke vakai ki he anga hono tokoniʻi ʻo Palesiteni Hiu B. Palauni (1883–1975) ʻo e Kau Palesitenisī ʻUluakí ʻe he tautea ʻa e ʻOtuá. ʻOku lava ke maʻu ʻa e vitioó ni ʻi he ChurchofJesusChrist.org.

Ko e Finangalo ʻo e ʻOtuá

ʻOku toe fakaʻaongaʻi ʻe he ʻOtuá ha founga ʻe taha ki he tauteá pe fakatonutonú ke tataki kitautolu ki ha kahaʻu ʻoku ʻikai ke tau lava ʻo sio ki ai he taimí ni, ka ʻokú Ne ʻafioʻi e hala ʻoku lelei ange kiate kitautolú.

• Ko e hā ha ngaahi fakakaukau pe ngaahi ongo naʻá ke maʻu ʻi hoʻo sio ʻi he vitiō ko ʻení ʻe lava ʻo tokoni atu ʻi hoʻo moʻuí?

• ʻE lava fēfē ʻe he fakavaivai ki he tautea mei he Tamai Hēvaní ʻo ʻomi ʻa e nongá mo tokoniʻi koe ke ke hoko ʻo hangē ko Iá?

• Ko e hā ha ngaahi meʻa kuó ke aʻusia ʻa ia kuo tokoniʻi ai koe ʻe he tautea ʻa e Tamai Hēvaní ke ke maʻu ʻa e melinó pe hoko ʻo hangē ko Iá?

• Naʻe tākiekina fēfē ʻe he aʻusia ko ʻení hoʻo ngaahi ongo kiate Iá?

1. Fakahoko ʻeni ʻi ha sētesi ʻe tolu ki he nima ʻi hoʻo tohinoa akó:

Fakakaukau ki he meʻa kuó ke ako mo ongoʻi he ʻahó ni ʻe lava ʻo tokoni atu ʻi hoʻo moʻuí. Lekooti hoʻo ngaahi fakakaukaú mo e ongó, kau ai ha faʻahinga ngāue ʻokú ke palani ke fai ʻo makatuʻunga ʻi he meʻa naʻá ke ako mo ongoʻí.

Fili Pē: Fie Ako Lahi Ange?

Fēfē kapau ʻoku ou ongoʻi ʻoku ou tō kimui mei he niʻihi kehé ʻi he lova ʻo e moʻuí?

Naʻe fakamatala ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻikai ke tau feʻauhi mo e niʻihi kehé pe ko hai ʻoku tuʻumālie tahá pe talēnitiʻia tahá pe talavou tahá pe monūʻia tahá. Ko e lova ʻoku tau lolotonga kau moʻoni ki aí, ʻa e lova ko ia mo e angahalá.

(Jeffrey R. Holland, “Ko e Kau Ngāue ʻi he Ngoue Vainé,” Liahona, Mē 2012, 31)

ʻOku fakahaaʻi fēfē ʻe he tautea ʻa e Tamai Hēvaní ʻa ʻEne ʻofa ʻiate kitautolú?

Naʻe fakamatalaʻi ʻe ʻEletā Taniela B. Uākolo ʻo e Kau Fitungofulú ha ngaahi sīpinga mei heʻene moʻuí mo e moʻui ʻa Siosefa Sāmitá naʻe fakahaaʻi ai e ʻofa ʻa e ʻOtuá ʻo fakafou ʻi he tauteá.

Mamata ʻi he “ʻOku ʻOfa ʻa e ʻOtuá Heʻene Fānaú” mei he taimi 5:23 ki he 8:04 ke mamata ʻi he ngaahi sīpinga ko ʻení.

ʻOku ʻOfa ʻa e ʻOtuá Heʻene Fānaú

ʻOku fakamoʻoni ʻa ʻEletā Uakolo ki he ʻofa ʻa e ʻOtuá mo fakamatalaʻi e founga ʻokú Ne fakahaaʻi ʻaki ʻEne ʻofá ki Heʻene fānaú.

ʻOku fakamoʻoni ʻa e folofolá ki he ngaahi taumuʻa taʻefaʻalaua ki he tautea ʻa e ʻEikí. Naʻe akoʻi ʻe Paula ʻi he Hepelū 12:10, ʻoku fakatonutonuʻi kitautolu ʻe he ʻEikí “ke ʻaonga, ke tau kau ai ʻi heʻene māʻoniʻoní.” ʻOku ʻomi ʻe Heʻene fakatonutonú “ʻa e fua fakamelino ʻo e māʻoniʻoní kiate kinautolu kuo akonekina aí” (Hepelū 12:11). ʻE lava ke hoko mai e fakatonutonu ʻa e ʻEikí ʻi ha ngaahi founga lahi, pea ʻoku faʻa tokoni maʻu pē ia ke akonekina e niʻihi fakafoʻituituí pea pehē foki ke ʻomi ʻa e fakatonutonu ʻoku fiemaʻú. ʻOku tokoni ʻa e tauteá ke manatuʻi, fakatomala, maʻu e fakamolemolé mo e fakahaofí, ako e talangofuá, pea hoko ai ʻo lelei ange e kakai ʻa e ʻEikí (vakai, Hilamani 12:3; Tokāteline mo e Ngaahi Fuakava 1:27; 95:1; 105:6; Siope 23:10).

Naʻe fakamatala ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e tauteá ʻo pehē:

ʻOku fiemaʻu e fakatonutonú kapau ʻoku tau fie fakatatau ʻetau moʻuí ki he “tangata haohaoá ʻo fakatatau [ki hono] lahi ʻa e foaki ʻa Kalaisí” (ʻEfesō 4:13). Naʻe lea ʻa Paula ʻi he fakatonutonu pe tautea fakalangí, “He ko ia ʻoku ʻofa ki ai ʻa e ʻEikí ʻokú Ne tautea” (Hepelū 12:6). Neongo ʻoku faʻa faingataʻa ke kātakiʻi moʻoni, ka ʻoku totonu ke tau fiefia he ʻoku fie fakamoleki ʻe he ʻOtuá hono taimí mo e iví ke fakatonutonu kitautolu.

(D. Todd Christofferson, “Ko Kimoutolu ʻOku Ou ʻOfa aí, ʻOku Ou Valokiʻi mo Tauteaʻi,” Liahona, Mē 2011, 97–98)