Eperu 3–4

Sao atu i le Malologa o le Alii

O le faaalia o Iesu Keriso o loo alala i talaane o se vaitafe. O Keriso o loo uuina se tootoo leoleo mamoe i Lona aao. O loo i ai laau o loo ola i auvai o le vaitafe.

E finagalo lo tatou Tama Faalelagi ma Iesu Keriso e faamanuia i tatou i a Laua faamanuiaga silisili naua. O le le talitonu ma le loto-maaa e taofia ai le toatele mai le mauaina o nei faamanuiaga. I le uunaia ai o le Au Paia e lafoai ese uiga le talitonu, sa saili ai Paulo e fesoasoani ia i latou e toe foi atu i feagaiga sa latou osia. O lenei lesona ua faamoemoe e fesoasoani ia te oe e faatoilalo ai le le talitonu ina ia mafai ai ona e maua faamanuiaga folafolaina a le Faaola.

O lo tatou talitonuga ia Iesu Keriso

Sa faamatalaina e Elder Neil L. Andersen o le Korama a Aposetolo e Toasefululua se faafitauli ua feagai ma le lalolagi i aso nei:

Ua Matou Tautalatala e uiga ia Keriso
Ua fautuaina i tatou e Elder Andersen ia aoao atili e uiga i le Faaola ma talanoa e uiga ia te Ia i le fale, i le lotu, i luga o upega tafailagi, ma ia tatou talatalanoaga i aso faisoo.

I nisi o vaega o le lalolagi lea na folafolaina atu ai Lona suafa mo le tele o seneturi, o loo ua faaitiitia ai le faatuatua ia Iesu Keriso. Ua vaaia e le Au Paia totoa i Europa le faiifo o talitonuga i o latou atunuu i le gasologa o le tele o tausaga. O le mea e faanoanoa ai, o iinei i le Iunaite Setete, ua soloitua ai foi le faatuatua. Ua faaalia i se suesuega lata mai nei, o le 10 tausaga ua mavae atu e 30 miliona tagata i le Iunaite Setete ua laa ese mai le talitonu i le paia o Iesu Keriso. A tilotilo i le lalolagi atoa, ua valoia e se isi suesuega e faapea, o le tele o tausaga o lumanai, e sili atu i le faaluaina le toatele o le a tuua le faa-Kerisiano nai lo i latou o le a taliaina.

(Neil L. Andersen, “Ua Matou Tautalatala e uiga ia Keriso,” Liahona, Nov. 2020, 88)

O a nisi o taunuuga faamoemoeina, i le taimi nei ma i le lumanai, o tagata e le talitonu ia Iesu Keriso?

Mafaufau i lou lava talitonuga ia Iesu Keriso.

O le a le malosi e te manatu o i ai lou talitonuga ia Iesu Keriso?
E mafai faapefea e le filifili e talitonu ia te Ia ona faamanuiaina ai lou olaga?

O aoaoga a Paulo e uiga i le fanauga a Isaraelu

I lana tusi i tagata Eperu, sa faailoa atu ai e Paulo e faapea, ona o sauaga, sa manatu ai nisi o tagata liliu mai e fulitua i lo latou talitonuga ia Iesu Keriso.

Faitau le Eperu 3:7–19, ma vaavaai mo le tala lauiloa na taua e Paulo e fesoasoani ai i tagata Eperu ia malamalama i le matautia o le le talitonu.

O le “faaonoono … i le vao” (Eperu 3:8) e faasino i le taimi, ina ua uma ona faasaolotoina mai Aikupito, sa faaonoono ai Isaraelu i le Alii i le toasa ma sa teena faamanuiaga sa Ia moomoo e tuuina atu ia i latou (tagai i le Numera 14; Iakopo 1:7–8; Alema 12:33–37).

O a faamanuiaga na misia e le fanauga a Isaraelu? Aisea?

O le malologa o le Alii

E finagalo le Tama Faalelagi ma Iesu Keriso ia tatou oo i le La malologa. Suesue le fuaitau lenei o le mau ma le faamatalaga faaperofeta e aoao ai po o le a le malologa o le Alii. Atonu e fesoasoani le su’e o le upu “ Malologa ” i totonu o le Taiala i Tusitusiga Paia, pe afai o i ai.

Faitau le Mataupu Faavae ma Feagaiga 84:24 e aoao atili ai e uiga i le malologa o le Alii (tagai foi i le Alema 13:6, 12–13, 28–29).

Na aoao mai e Peresitene Iosefa F. Samita (1838–1918) le ala e mafai ai ona tatou ulu atu i le malologa o le Alii a o i ai i le olaga nei:

Na saunoa perofeta anamua i le “ulu atu i le malologa o le Atua” [tagai i le Alema 12:34; Mataupu Faavae ma Feagaiga 84:23–24]; o le a lona uiga? I lo’u manatu, o lona uiga o le ulu atu i le malamalama ma le alofa o le Atua, o le faatuatua i ona faamoemoega ma i lana fuafuaga, e oo i le tulaga tatou te iloa ai e sa’o i tatou, ma tatou te le o tutuli mo se isi mea, e le o faalavelaveina i tatou i le feaveai i matagi uma o mataupu, po o le pepelo ma togafiti leaga a tagata ua faatalitali e faasese ai. … O le tagata ua oo i lena maualuga o le faatuatua i le Atua, ua lafo ese ai le masalosalo ma le fefe uma mai ia te ia, ua ulu atu o ia i le “malologa o le Atua.”

(Aoaoga a Peresitene o le Ekalesia: Iosefa F. Samita [1998], 56)

O le a faapefea ona e faamatalaina le malologa o le Alii?

Sa faasoa atu e Alema se savali e talitutusa ma la Paulo i tagata o ona aso, o nisi o i latou sa tauivi foi e talitonu. Faitau le Alema 12:34–37, vaavaai mo ni malamalamaaga faaopoopo.

O le a le mataupu faavae e mafai ona e faailoa mai le Eperu 3 ma le Alema 12:34–37?

O se tasi o mataupu faavae atonu ua e aoaoina e faapea, afai tatou te tumau faamaoni i le Faaola ma aua le faamaaa o tatou loto, o le a tatou sao atu i le malologa o le Alii.

Tusitusi i luga o se fasipepa i se peni po o se penitala.

Filifili e talitonu

Faitau le Eperu 3:7–8, 12–15; 4:2–3, 6–7, 11. A o e faitau, vaavaai mo mea e mafai ona tatou faia e sao atu ai i le malologa o le Alii. Atonu e te manao foi e faitau le Faaliliuga a Iosefa Samita o le Eperu 4:3 (i le faaopoopoga i le pito i tua o le Tusi Paia).

O le a se mea e tumatila ia te oe mai nei fuaiupu?

Na aoao mai e Peresitene Russell M. Nelson le auala e mafai ona tatou faatoilaloina ai le le talitonu:

Ua Toetu Keriso; O le Faatuatua ia te Ia O Le A Aveesea ai Mauga
Ua molimau mai Peresitene Nelson i le mana o le faatuatua ia Iesu Keriso e fesoasoani ia i tatou e faatoilalo luitau o le olaga. Na ia fautua mai ni auala se lima e atiinae ai se faatuatua malosi atu.

Filifili e talitonu ia Iesu Keriso. Afai e i ai ni ou masalosaloga i le Atua le Tama ma Lona Alo Pele, po o le faamaoniga o le Toefuata’iga po o le moni o le valaauga paia o Iosefa Samita o se perofeta, filifili e talitonu ma tumau i le faatuatua. Avatu au fesili i le Alii ma isi punaoa faatuatuaina. Suesue faatasi ma se manao ia talitonu nai lo le faamoemoe e mafai ona e maua se measese na tupu i le soifuaga o se perofeta po o se mea faaletonu i tusitusiga paia. Taofi le faatupulaia o ou masalosaloga e ala i le faaleoina atu o i latou i isi tagata masalosalo. Faataga le Alii e taitai oe i lau faigamalaga o le sailiiliga faaleagaga.

(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103)

Tuu i le faitalia: O e Manao e Aoao Atili?

E mafai faapefea ona ou maua se loto talitonu sili atu?

Sa saunoa mai Peresitene Dieter F. Uchtdorf, a o avea ma uso o le Au Peresitene Sili:

Aua le Mata’u, Tau Lava Ina [Talitonu]
Ua tau mai e Peresitene Dieter F. Uchtdorf ia i tatou ina ia avea e pei o Tanielu ma maua le lototele e talitonu ma ia tetee atu i le le talitonu ma le masalosalo o le lalolagi. I le faia, o le a tatou maua le tele o le malamalama, upumoni, ma le fi

E leai se tulaga faamaneta e maua ai le talitonu Ae o le manao ia talitonu o le laasaga taua muamua lea! E le faailoga tagata le Atua. O Ia o lou Tama. E finagalo o Ia e fetalai atu ia te oe. Peitai, e manaomia ai sina fiailoa itiiti faasaeanisi—e manaomia ai se suesuega faataitai o le afioga a le Atua—ma le faatinoga o se “vaega itiiti o le faatuatua” [Alema 32:27]. E manaomia ai foi sina lotomaualalo itiiti. Ma e manaomia ai se loto matala ma se mafaufau fetāla’i. E manaomia ai se sailiga, i le uiga atoa o le upu. Ma e masalo o le mea sili ona faigata o mea uma, e manaomia ai le onosai ma le faatalitali i le Alii.

Afai tatou te le faia se taumafaiga e talitonu ai, ua pei lava la i tatou o le tagata na te seieseina le uaea o le molīsulu ona tuuaia lea o le molī i le le faasusulu maia o se malamalama.

(Dieter F. Uchtdorf, “Aua le Matatau, Na o le Talitonu,” Liahona, Nov. 2015, 78)

O ai e mafai ona fesoasoani ia i tatou e maua ai le malologa o le Faaola?

Fai mai Elder W. Craig Zwick o le Fitugafulu:

E alofa le Tama Faalelagi i Ana fanau taitoatasi ma e finagalo ia tatou toe foi uma atu ia te Ia. Ua Ia tuuina mai perofeta ma taitai perisitua ma le pule moni o le perisitua e fesoasoani ia tatou tumau ai i luga o le ala sa‘o ma le vaapiapi. Ua tatou maua, la, le taitaiga a nei taitai e fesoasoani ia i tatou e ulu atu ai i Lona malologa.

(W. Craig Zwick, “Enter into the Rest of the Lord,” EnsignFep. 2012, 24)